“Asilotyala Lam”

KUKANGAPHI namhlanje usiva ubani esithi, ‘Ndicela uxolo. Ibilityala lam. Ndim owenze yonke le nto!’? Kunqabile ukuba uve amazwi okunyaniseka alolo hlobo. Enyanisweni, kwiimeko ezininzi, kwanaxa ubani elivuma ityala, wenza nayiphi na imigudu yokulityhalela komnye umntu okanye azithethelele ngokuthi bekungenxa yeemeko ebengenakuzilawula.

Bambi bade babek’ ityala imizila yabo yemfuza! Kodwa ngaba oku kusengqiqweni? Incwadi ethi Exploding the Gene Myth ithandabuza iinjongo nokuphumelela kwezinye iinkalo zophando lwemizila yemfuza. Xa ihlolisisa le ncwadi, intatheli yaseOstreliya uBill Deane, ifikelela kwesi sigqibo sisengqiqweni: “Kubonakala ngathi abo bakholelwa kwelokuba izinto ezenziwa ngabantu zimiselwe kwangaphambili kutshanje sele beqalisile ukucinga ukuba babufumene ubungqina obuchanileyo bokuxhasa intanda-bulumko yabo yokuba akukho mntu ufanele abekw’ ityala ngezenzo zakhe: ‘Akakwazanga kuzinqanda ekumnqumleni umqala, Mhlekazi—oku bekukwimizila yakhe yemfuza.’”

Asilotyekelo Lutsha Ngokwenene

Njengoko esi sizukulwana ngokukhawuleza sisiba koko omnye umbhali wakubiza ngokuba sisizukulwana “sika-asindim,” olu tyekelo lunokubonakala lusanda. Noko ke, imbali ebhaliweyo ityhila ukuba ukutyhola abanye, ngesingxengxezo sokuba “Asilotyala lam ngokwenene,” bekusoloko kukho kwasekuqaleni. Intsabelo ka-Adam noEva emva kwesono sabo sokuqala, sokutya isiqhamo uThixo awayesalele, ingumzekelo ocacileyo wokutyhola abanye. Ingxelo yeGenesis isixelela ngencoko eyayikho, eyaqalwa nguThixo ngokuthi: “Udlile na kuwo umthi, endakuwisela umthetho ngawo, ndathi, uze ungadli kuwo? Wathi uAdam, umfazi owandinikayo ukuba abe nam, nguye ondinikileyo kuwo umthi, ndadla ke. Wathi uYehova uThixo kumfazi, yintoni na le nto uyenzileyo? Wathi umfazi, inyoka indilukuhlile, ndadla ke.”—Genesis 3:11-13.

Ukususela ngelo xesha, abantu baye bavelisa iinkolelo ezahlukahlukeneyo yaye baye bakhangela izingxengxezo ezininzi ezingaqhelekanga eziza kubakhulula kuzo naziphi na izenzo ababekek’ ityala ngazo. Eyona iphambili kwezi yayiyinkolelo yamandulo kwilishwa. Elinye ibhinqa elingumBhuda elalikholelwa ngokunyanisekileyo kwiKarma lathi: “Ndandicinga ukuba akukho ngqiqweni ukubandezeleka ngento endazalwa nayo kodwa endandingayazi. Kwafuneka ndiyamkele njengento endandiyimiselwe kwangaphambili.” Ekubeni kukhuthazwa yimfundiso yokuba izinto zimiselwa kwangaphambili eyafundiswa nguJohn Calvin, ukukholelwa kwilishwa kuqhelekile kwiNgqobhoko. Ngokufuthi abefundisi baxelela izalamane ezisentlungwini ukuba ingozi ethile ikukuthanda kukaThixo. Kwakhona, wambi amaKristu aneenjongo ezintle abek’ ityala uSathana ngazo zonke izinto ezingahambi kakuhle ebomini bawo.

Ngoku, sibona abantu abanezimilo ezingenakubekek’ ityala ezamkelekileyo ngokusemthethweni nangokwasekuhlaleni. Siphila kwixesha lokwanda kwamalungelo nokuncipha kweembopheleleko zomntu ngamnye.

Uphando olungokuziphatha komntu luye lwanikela ubungqina obungokwenzululwazi bokuba bambi bavakalelwa kukuba banokuvula zibhuqe kwimikhwa esusela ekuziphatheni okubi ukusa ekubulaleni. Oku kubonisa indlela ibutho labantu elithanda ngayo ukubeka ityala kwenye into okanye komnye umntu belisusa kulowo ulenzileyo.

Imibuzo enjengale ifanele iphendulwe: Yintoni ngokwenene eye yafunyaniswa yinzululwazi? Ngaba ukuziphatha kwethu kulawulwa yimizila yethu yemfuza kuphela? Okanye ngaba yimpembelelo yemizimba yethu nezinto ezisingqongileyo elawula indlela esiziphatha ngayo? Bubonisa ntoni ngokwenene ubungqina?