Ngaba Unokuyigcina Ingqibelelo Yakho?

BANGAPHI oongqatyana abafileyo izolo? Akukho mntu waziyo, mhlawumbi bambalwa nabanomdla wokwazi—zininzi kangaka nje iintaka. Noko ke, uYehova unomdla. Ebhekisela kwezi ntaka zibonakala zingabalulekanga, uYesu waxelela abafundi bakhe esithi: “Akukho namnye kubo oya kuwela emhlabeni ngaphandle kolwazi lukaYihlo.” Wongezelela esithi: “Musani ukoyika: nixabiseke ngaphezu koongqatyana abaninzi.”—Mateyu 10:29, 31.

Kamva abafundi bakhe bayiqonda ngokucacileyo indlela uYehova abaxabise ngayo. Omnye wabo, umpostile uYohane, wabhala: “Kwabonakaliswa ngale nto ukusithanda kukaThixo, ngokuthi uThixo athumele uNyana wakhe okuphela kwamzeleyo ehlabathini ukuze sizuze ubomi ngaye.” (1 Yohane 4:9) UYehova akanikelanga ngedini nje kuphela kodwa ukwaqinisekisa bonke abakhonzi bakhe esithi: “Andiyi kuze ndikushiye, ndingayi kuze ndikutyeshele.”—Hebhere 13:5.

Kucacile ukuba, uYehova uya kuhlala ebathanda abantu bakhe. Noko ke, nanku umbuzo, ‘Ngaba sinamathele ngaloo ndlela kuYehova kangangokuba asisoze simshiye?’

Amalinge KaSathana Okusenza Singayigcini Ingqibelelo Yethu

Xa uYehova waxelela uSathana ngokugcina ingqibelelo kukaYobhi, uSathana waphendula wathi: “Ngaba uYobhi wayenokukukhonza ukuba wayengayi kufumana nto?” (Yobhi 1:9, Today’s English Version) Ngamanye amazwi wayesithi abantu banokunyaniseka kuphela kuThixo ‘kuba beza kufumana okuthile.’ Ukuba oku bekuyinyaniso, onke amaKristu ebengasayi kugcina ingqibelelo—ngaphandle kokuba athenjiswa into ayithanda gqitha.

Kwimeko kaYobhi, ekuqaleni uSathana wathi uYobhi wayeza kuyeka ukunyaniseka kuThixo ukuba wayenokuphulukana nezona zinto zakhe azithandayo. (Yobhi 1:10, 11) Xa esi sinyeliso sangqineka sibubuxoki, uSathana wathi: “Umntu uya kuncama nantoni na ngenxa yobomi bakhe.” (Yobhi 2:4, TEV) Nangona amazwi kaSathana engqineke eyinyaniso kwabathile, uYobhi akazange ayilahle ingqibelelo yakhe. Imbali iyakungqina oko. (Yobhi 27:5; 42:10-17) Ngaba nawe unyaniseke ngaloo ndlela? Okanye unokuvumela uSathana akubangele ulahle ingqibelelo yakho? Zihlolisise njengoko siqwalasela iinyaniso ezibandakanya umKristu ngamnye.

Umpostile uPawulos wayekholelwa ukuba umKristu wokwenyaniso unokunyaniseka ngokwenene. Wabhala: “Ndeyisekile kukuba nakufa nabomi . . . nazinto zilapha ngoku nazinto zizayo . . . nasiphi na esinye isidalwa aziyi kuba nako ukusahlula eluthandweni lukaThixo olukuye uKristu Yesu iNkosi yethu.” (Roma 8:38, 39) Sisenokweyiseka ngokufanayo ukuba uthando lwethu ngoYehova lomelele. Uthando olunjalo lunokomelela kangangokuba nokufa akunakuluphelisa.

Ukuba sinolwalamano olunjalo noThixo, asisayi kuze sibe nombuzo othi, ‘Ngaba ndiya kube ndisamkhonza uYehova kwiminyaka embalwa ezayo?’ Ukungaqiniseki okunjalo kunokubonisa ukuba ukunyaniseka kwethu kuThixo kuxhomekeke koko kunokwenzeka ebomini bethu. Ukunyaniseka kokwenene akuxhomekekanga kwiimeko esikuzo. Kuxhomekeke kwindlela esiyiyo ngaphakathi. (2 Korinte 4:16-18) Ukuba siyamthanda uYehova ngentliziyo yethu iphela, asisayi kuze simphoxe.—Mateyu 22:37; 1 Korinte 13:8.

Noko ke, simele sikhumbule ukuba uSathana uhlala efuna iindlela zokusenza singayigcini ingqibelelo yethu. Usenokusilinga ukuba siyekelele kwiminqweno yenyama, sinikezele kwingcinezelo yoontanga, okanye sivumele ubunzima obuthile busenze silahle inyaniso. Ihlabathi elingamhloneliyo uThixo lisebenzisana noSathana kolu hlaselo, nangona ukungafezeki kwethu kwenza lo msebenzi wakhe ube lula nangakumbi. (Roma 7:19, 20; 1 Yohane 2:16) Sekunjalo, sinezinto eziliqela ezinokusinceda kulo mlo, yaye eyona inkulu kuzo kukuba siyawazi amacebo kaSathana.—2 Korinte 2:11.

Ngawaphi la macebo kaSathana? UPawulos wawachaza kwincwadi yakhe eya kwabase-Efese ‘njengamaqhinga’ akhe.a (Efese 6:11) USathana uyasiqhatha ukuze silahle ingqibelelo yethu. Okuvuyisayo kukuba, sinokuwabona amaqhinga awasebenzisayo uMtyholi, ekubeni siwabhalelwe kwiLizwi likaThixo. Amalinge kaSathana okutshabalalisa ingqibelelo kaYesu noYobhi abonisa ezinye iindlela azisebenzisayo ukuze asenze silahle ingqibelelo yethu yobuKristu.

UYesu Wayengenakwenziwa Ayilahle Ingqibelelo Yakhe

Ekuqaleni kobulungiseleli bukaYesu, uSathana wazama ukulinga lo Nyana kaThixo ngokuthi makajike ilitye libe sisonka. Hayi indlela awayenamaqhinga ngayo! UYesu wayengatyanga kangangeentsuku ezingama-40, ngoko ngokungathandabuzekiyo wayefile yindlala. (Luka 4:2, 3) USathana wamxelela uYesu ukuba anelise lo mnqweno wakhe wokwemvelo ngesiquphe, ngendlela eyayingavisisani nokuthanda kukaYehova. Ngokufanayo namhlanje, ihlabathi likhuthaza ukufumana yonke into ngoku, ungakhange uyicinge nokuyicinga imiphumo yoko. Ihlabathi lithi, ‘Ufanele uyifumane ngoku,’ okanye, ‘Yenze ngoku!’

Ukuba uYesu ngewayesuke nje wagxoth’ iphango engakhange acinge ngemiphumo yoko, uSathana ngewayemenze uYesu wayilahla ingqibelelo yakhe. UYesu wayezijonga izinto ngeliso lokomoya, yaye engathandabuzi wathi: “Kubhaliwe kwathiwa, ‘Akaphili ngasonka sodwa umntu.’”—Luka 4:4; Mateyu 4:4.

Emva koko uSathana weza nelinye iqhinga. Ephixanisa iZibhalo, kwaezi uYesu ebezicaphula, uMtyholi wathi kuYesu makaziphose esuka phezu koqoqo lwetempile. USathana wathi: ‘Ingelosi iza kukuhlangula.’ UYesu wayengafuni ukumnyanzela uYise ukuba amkhusele kuba nje ecel’ injezu. UYesu wathi: “Uze ungamvavanyi uYehova uThixo wakho.”—Mateyu 4:5-7; Luka 4:9-12.

Iqhinga lokugqibela uSathana awalisebenzisayo lalicacile. Wazama ukwenza isivumelwano noYesu ngokumthembisa lonke ihlabathi nobunewunewu balo ukuba wayeza kuqubuda kuye nje kube kanye. Phofu ke uSathana wathembisa ngayo yonke into awayenayo. Kodwa uYesu wayenokuqubuda njani kutshaba olukhulu lukaYise? Wayengenakuyenza into enjalo! UYesu waphendula: “NguYehova uThixo wakho omele umnqule, yaye nguye yedwa omele unikele inkonzo engcwele kuye.”—Mateyu 4:8-11; Luka 4:5-8.

Emva kokuba loo malinge mathathu awa phantsi, uSathana ‘wemka kuYesu de kwaba lelinye ixesha elimlungeleyo.’ (Luka 4:13) Oku kuthetha ukuba uSathana wayesoloko ekhangela ithuba lokuvavanya ingqibelelo kaYesu. Kwavela elinye ithuba kwiminyaka emibini enesiqingatha kamva xa uYesu wayelungisa isimo sengqondo sabafundi bakhe ngokuphathelele ukufa kwakhe okwakusondele. Umpostile uPetros wathi: “Yiba nobubele kuwe, Nkosi; akuyi kuba nesi siphelo konke konke.”—Mateyu 16:21, 22.

Ngaba uYesu wayenokulamkela eli cebiso elalibonakala lilihle kodwa liyinkohliso, ekubeni lalivela komnye wabafundi bakhe? Ngoko nangoko uYesu waqonda ukuba loo mazwi ayebonisa iminqweno kaSathana, kungekhona ekaYehova. Eqinisekile uKristu wathi: “Suka uye emva kwam, Sathana! Usisikhubekiso kum, ngenxa yokuba ucinga, kungekhona iingcamango zikaThixo, kodwa ezabantu.”—Mateyu 16:23.

Kuba uYesu wayenothando olungatshitshiyo ngoYehova, uSathana akazange akwazi ukumenza ayilahle ingqibelelo yakhe. Akukho nto uMtyholi awayenokunikela ngayo, kungekho nasilingo, enoba sasiqatha kangakanani na, esasinokwenza kube nzima ngoYesu ukuba anyaniseke kuYise wasezulwini. Ngaba siya kwenza okufanayo ukuba iimeko zenza kube nzima ngathi ukugcina ingqibelelo? Umzekelo kaYobhi uya kusinceda siziqonde kakuhle iingxaki esisenokujamelana nazo.

Ukunyaniseka Xa Sijamelene Neenkxwaleko

Njengoko uYobhi wafumanisayo, sisenokuthwaxwa ziinkxwaleko nanini na. Wayeyindoda eyonwabileyo emtshatweni, enabantwana abalishumi yaye enocwangciso oluhle lwezinto zokomoya. (Yobhi 1:5) Kodwa uYobhi engazi, kwakukho imbambano kwinkundla yasemazulwini ephathelele ingqibelelo yakhe kuThixo, yaye uSathana wayezimisele ukumenza angayigcini nangayiphi na indlela.

Ngethuba nje elifutshane, uYobhi waphulukana nobutyebi bakhe. (Yobhi 1:14-17) Sekunjalo, uYobhi akazange ayilahle ingqibelelo kuba wayengakholosanga ngemali. Ecinga ngexesha esesisityebi, uYobhi wathi: “Ukuba bendithembele kwigolide, . . . ukuba bendidla ngokuba nemihlali ngenxa yokuba impahla yam ininzi, . . . nako oko bekuya kuba sisiphoso . . . , kuba bendiya kuba ndimkhanyele uThixo oyinyaniso ophezulu.”—Yobhi 31:24, 25, 28.

Namhlanje, sinokuphulukana phantse nayo yonke into esinayo ngesiquphe. Omnye usomashishini oliNgqina likaYehova waphulakana nemali eninzi ngenxa yokuqhathwa, nto leyo eyamshiya engumpha. Ngeliphandle uyavuma: “Ndaphantsa ndamelwa yintliziyo. Enyanisweni, ndicinga ukuba ngeyayimile ukuba ndandingenalo ulwalamano noThixo. Sekunjalo, oku kwandehlelayo kwandenza ndaqonda ukuba izinto zokomoya zazingezi kuqala ebomini bam. Uvuyo lokuzuza imali lwalulukhulu kunayo nantoni na enye.” Ukususela ngoko, eli Ngqina lalinciphisa ishishini lalo kangangoko kunokwenzeka, yaye ngokuthe rhoqo liba nguvulindlela ongumncedani, lichitha iiyure ezingama-50 okanye ezingaphezulu ngenyanga kubulungiseleli bamaKristu. Noko ke, ezinye iingxaki zisenokuba buhlungu nakakhulu kunokulahlekelwa zizinto.

UYobhi wayesandul’ ukufumana iindaba ezingokulahlekelwa kwakhe bubutyebi bakhe xa weva ukuba abantwana bakhe abalishumi bafile. Sekunjalo wagxininisa esithi: “Maliqhubeke libongwa igama likaYehova.” (Yobhi 1:18-21) Ngaba besiya kugcina ingqibelelo ukuba ngequbuliso sinokufelwa ngamalungu aliqela entsapho yethu? UFrancisco, umveleli ongumKristu eSpeyin, wafelwa ngabantwana bakhe ababini kwingozi embi yebhasi. Wathuthuzelwa kukwakha ulwalamano olusenyongweni noYehova nokwandisa ixesha alichithayo kubulungiseleli bamaKristu.

Kwanasemva kokufelwa ngabantwana bakhe, iingxaki zikaYobhi zazingekapheli. USathana wamthwaxa ngesifo esibuhlungu nesenyanyekayo. Ngelo xesha, uYobhi wafumana icebiso elingelihle kumfazi wakhe. Wathi: “Mqalekise uThixo uze ufe!” UYobhi walityeshela elo cebiso, yaye “akonanga ngemilebe yakhe.” (Yobhi 2:9, 10) Ukugcina kwakhe ingqibelelo kwakuxhomekeke kungekhona kwinkxaso yentsapho yakhe, kodwa kulwalamano lwakhe noYehova.

UFlora uyayiqonda indlela uYobhi awayevakalelwa ngayo, ekubeni umyeni nonyana wakhe omdala bashiya indlela yobuKristu ngaphezu kweminyaka elishumi eyadlulayo. Uvuma esithi: “Kubuhlungu gqitha ukuphulukana ngequbuliso nenkxaso yentsapho yakho. Kodwa ndandisazi ukuba ndandingayi kufumana ulonwabo xa ndingaphandle kwentlangano kaYehova. Ngoko ndahlala ndiqinile ndaza ndambeka uYehova kuqala ngoxa ndizabalazela ukuba ndiqhubeke ndingumfazi nomama olungileyo. Ndandithandaza rhoqo, yaye uYehova wandomeleza. Ndonwabile kuba, phezu kwayo nje inkcaso eqatha yomyeni wam, ndiye ndafunda ukukholosa ngoYehova ngokupheleleyo.”

Iqhinga likaSathana elilandelayo lokwenza uYobhi alahle ingqibelelo yakhe laliquka amaqabane akhe amathathu. (Yobhi 2:11-13) Hayi indlela ekumele ukuba kwakumdimaza ngayo xa baqalisa ukumgxeka. Ukuba wayezikholelwe ezi zityholo zabo, ngewayephulukene nentembelo yakhe kuYehova uThixo. Amacebiso abo ayenokumdimaza aze alahle ingqibelelo yakhe, yaye ngaloo ndlela iqhinga likaSathana ngelaliphumelele.

Kunoko, uYobhi wama ngelithi: “Ndide ndibhubhe andiyi kuyisusa kum ingqibelelo yam!” (Yobhi 27:5) Akazange athi, ‘Bafondini, andizukunivumela ukuba nindenze ndilahle ingqibelelo yam!’ UYobhi wayesazi ukuba ingqibelelo yakhe yayixhomekeke kuye nakuthando lwakhe ngoYehova.

Iqhinga Elidala Lokubambisa Ixhoba Elitsha

USathana usasebenzisa amacebiso alahlekisayo okanye amazwi angakhiyo avela kubahlobo bethu nakwamanye amakholwa. Ukudimazeka okubangelwa ngabanye ebandleni kunokwenza sityhafe ngokulula kunentshutshiso esinokuyifumana ngaphandle kulo. Umdala ongumKristu owayesemfazweni ngaphambili wakuthelekisa oko nentlungu awayenayo ngenxa yamazwi angakhiyo nezenzo zamanye amaKristu. Wayesithi ngoko kwenziwa ngala maKristu: “Yeyona nto inzima endakha ndajamelana nayo.”

Kwelinye icala, sisenokukhathazeka kakhulu ziintsilelo zamanye amakholwa kangangokuba siyeke ukuthetha nabathile okanye side siqalise ukungayi kwiintlanganiso zamaKristu. Kuba sikhathazekile, sisenokuvakalelwa kukuba eyona nto ibalulekileyo kukuba oko kuphele. Kodwa hayi indlela okulusizi ngayo ukungabi nambono iphangaleleyo size sivumele ukuba eyona nto ixabisekileyo esinayo—ulwalamano lwethu noYehova—yenziwe buthathaka koko abanye bakwenzayo okanye bakuthethayo. Ukuba sivumela oko kwenzeke, siya kuba ngamaxhoba amaqhinga amadala kaSathana.

Ngokufanelekileyo, silindele ukuba kubekho imilinganiselo ephakamileyo kwibandla lamaKristu. Kodwa ukuba silindele okukhulu gqitha kwamanye amakholwa, angafezekanga, ngokuqinisekileyo siya kudana. Yena uYehova akanjalo, ulindele okusengqiqweni kubakhonzi bakhe. Ukuba sixelisa umzekelo wakhe, siyakukulungela ukunyamezela ukungafezeki kwabo. (Efese 4:2, 32) Umpostile uPawulos wanikela eli cebiso: “Xa nicaphukile, umsindo mawunganiqweqwediseli esonweni; futhi malingade litshone ilanga ninomsindo. Umtyholi musani ukumvulela indawo ebomini benu.”—Efese 4:26, 27, IBhayibhile yesiXhosa yowe-1996.

Njengoko iBhayibhile ibonisa ngokucacileyo, uSathana usebenzisa amaqhinga amaninzi ukuze afumanise—ukuba unako—indlela yokwenza amaKristu angayigcini ingqibelelo yawo. Amanye amaqhinga akhe abonakala enomtsalane kwinyama enesono, amanye abangela intlungu. Kule ngxubusho, unokubona isizathu sokuhlala siphaphile. Unothando olusuk’ entliziyweni ngoThixo, zimisele ukumngqina uMtyholi elixoki, uze uvuyise intliziyo kaYehova. (IMizekeliso 27:11; Yohane 8:44) Khumbula ukuba, amaKristu okwenyaniso akamele alahle ingqibelelo yawo, enoba ajamelana naziphi na izilingo.

[Umbhalo osemazantsi]