Iindlela “Iingcwele” Ezijongwa Ngayo Namhlanje

“Ngaba usakhumbula ngexesha esasingafuni nokuva ngamaqhawe? Oku kwabonakala kungenjalo kubemi baseMerika abazizigidi ezisisi-4,2 ababebukele umngcwabo kaMother Teresa ngoSeptemba 13. Ukususela kwixesha lokufa kwakhe ngoSeptemba 5, abantu babethontelana ukuya eVatican becela ukuba enziwe ingcwele ngokusemthethweni. Bambalwa abantu abathandabuzayo ukuba oko kuya kwenzeka.”—Sun-sentinel, United States, Oktobha 3, 1997.

UMSEBENZI wokunceda abantu owawusenziwa ngumvangeli ongumKatolika uMother Teresa umenza agqalwe ngabantu abaninzi njengengcwele yokwenene. Akho amaqhawe nakwezinye iicawa. Noko ke, mhlawumbi abakho abantu abagqalwa ngokusemthethweni njengeengcwele njengabo bamiselwe yiCawa yamaRoma Katolika.

UPopu John Paul II uye wamisela abantu abangaphezu kwama-450 njengeengcwele ebudeni bolawulo lwakhe, inani elingaphezu kwelo lamiselwa ngabo bonke abanye oopopu benkulungwane yama-20 bedibene.a Kutheni zixatyiswe kangaka “iingcwele,” uninzi lwazo olungaziwa nakangako ngamaKatolika amaninzi?

Umfundisi wezakwalizwi uLawrence Cunningham weYunivesithi yaseNotre Dame ucacisa esithi: “Abantu bakholelwa ukuba kusekho abantu abathile abangcwele ehlabathini. Iingcwele zibonisa ukuba akho amaqhawe nanamhlanje.” Ukongezelela, kuthiwa “iingcwele” ziyakwazi ukuthetha noThixo, nto leyo ezenza zibe ngabalamleli babantu abaphilayo. Xa kuye kwafunyanwa izinto zabangasekhoyo okanye amathambo “engcwele,” ezi zinto ziyanqulwa kuba kukholelwa ukuba zisenamandla athile.

ICatechism yeBhunga laseTrent, eyapapashwa kwinkulungwane ye-16 ekwakuqinisekiswa kuyo iimfundiso zamaKatolika, yathi: “Kufanelekile ukugqiba kwelokuba, ukuhlonela iingcwele ‘ezifele eNkosini,’ ukucela ukuba zisilamlele, nokunqula izinto zazo ezingcwele nothuthu lwazo, akulwehlisi uzuko lukaThixo kodwa kuyalwandisa, ngomlinganiselo wethemba nokholo umKristu analo, yaye ukhuthazwa ukuba axelise ukulunga kwazo.” (The Catechism of the Council of Trent, 1905) Ngokuqinisekileyo amaKristu okwenyaniso azabalazela ukwenza okulungileyo, ukuthandaza kuThixo ngendlela efanelekileyo nokufumana uncedo lukaThixo. (Yakobi 4:7, 8) Noko ke, iLizwi likaThixo, lithi ngoobani abafaneleka njengeengcwele zokwenene? Yaye banayiphi indima?

[Umbhalo osemazantsi]