Intuthuzelo Kulwazi Oluchanileyo NgoThixo

KWABANYE abantu, oko iBhayibhile ikuthethayo ngothando nenceba kaThixo kuvelisa imibuzo ephazamisayo. Bayabuza: Ukuba uThixo ufuna ukuphelisa ububi, esazi indlela yokubuphelisa, yaye enamandla okwenjenjalo, kutheni ububi buqhubeka busanda? Kubo ingxaki ikukuvisisanisa ezi ngongoma zintathu: (1) uThixo unamandla; (2) uThixo unothando yaye ulungile; yaye (3) kuqhubeka kusenzeka iintlekele. Bathi ekubeni ingongoma yesithathu iyinyaniso emsulwa, ngoko ke ubuncinane enye yezi ngongoma zimbini ayinakuba yinyaniso. Kubo, uThixo akakwazi ukuphelisa ububi okanye akakhathali.

Kwiintsuku ezimbalwa emva kokudilika kweWorld Trade Center eNew York, umfundisi wecawa owaziwayo eUnited States wathi: “Kudala abantu bendibuza . . . isizathu sokuvumela kukaThixo iintlekele nokubandezeleka. Ndimele ndivume ukuba nam andiyazi impendulo.”

Ethetha ngala mazwi, unjingalwazi wezakwalizwi wabhala esithi uchukumisekile “yintshumayelo entle” yalo mfundisi. Kwakhona wavumelana noluvo lomnye umphengululi owabhala esithi: “Ekubeni singenakumazi uThixo, ngokufanayo asinakusazi isizathu sokuvumela kwakhe ukubandezeleka.” Kodwa ngaba ngokwenene asinakusazi isizathu sokuvumela kukaThixo ububi?

Imvelaphi Yobubi

Ngokwahlukileyo koko abefundisi bakuthethayo, iBhayibhile ayibonisi ukuba asinakusazi isizathu sikaThixo sokuvumela ububi. Ingongoma eyintloko esifanele siyazi ngobubi kukuba uYehova akazange adale ihlabathi elingendawo. Wabadala abantu bokuqala ababini bafezeka, bengenasono. UYehova wayijonga indalo yakhe waza wayibona ‘ilunge gqitha.’ (Genesis 1:26, 31) Yayiyinjongo yakhe ukuba uAdam noEva bandise iParadesi yase-Eden ukuze izalise umhlaba wonke ize imiwe ngabantu abonwabileyo bekhuselekile kulawulo lwakhe lothando.—Isaya 45:18.

Ububi baqalwa sisidalwa sokomoya, esathi nangona sasithembekile kuThixo ekuqaleni, safuna ukunqulwa. (Yakobi 1:14, 15) Imvukelo yaso yabonakala emhlabeni xa saphembelela abantu bokuqala ababini ukuba bahambisane naso ekuchaseni uThixo. Kunokuba baphulaphule umyalelo kaThixo ocacileyo wokuba bangasityi okanye bangasichukumisi isiqhamo somthi wokwazi okulungileyo nokubi, uAdam noEva basithabatha baza basitya. (Genesis 3:1-6) Ngokwenjenjalo, abazange bangathobeli uThixo nje kuphela kodwa babonisa ukuba babefuna ukuzimela geqe.

Kwavela Imbambano

Le mvukelo yase-Eden yavelisa imbambano echaphazela uluntu luphela. Aba bantu bangabavukeli babethandabuza enoba uYehova wayelisebenzisa kakuhle kusini na igunya lakhe lokulawula izidalwa zakhe. Ngaba uMdali wayenelungelo lokufuna ukuthotyelwa ngokupheleleyo ngabantu? Ngaba abantu babenokuqhuba kakuhle xa bezilawula?

UYehova wayisingatha le mvukelo yolawulo lwakhe ngendlela eyayibonisa ukulungelelana kothando, okusesikweni, ubulumko namandla akhe. Wayenokusebenzisa amandla akhe ukutshabalalisa abo bavukeli ngoko nangoko. Oko bekuya kubonakala kusesikweni, ekubeni wayenelungelo lokwenjenjalo. Kodwa ukwenjenjalo kwakungayi kuyizinzisa imbambano eyayikho. Kwelinye icala, uThixo wayenokusuka nje asibethe ngoyaba eso sono. Kwabanye namhlanje oko bekunokubonakala njengesenzo sothando. Sekunjalo, oku bekungayi kuliphendula ibango likaSathana lokuba abantu bebeya kuqhuba kakuhle xa bezilawula. Ngapha koko, ngaba oku bekungayi kukhuthaza abanye ukuba baphambuke endleleni kaYehova? Oko bekuya kuphumela kwimbandezelo engapheliyo.

Ngobulumko, uYehova uye wavumela abantu ukuba bahambe ngabayibonayo okwexeshana. Nakuba oku kuye kwathetha ukuvumela ububi okwexeshana, ngaloo ndlela abantu baye bafumana ithuba lokubonisa enoba banokuzilawula ngokuphumelelayo ngaphandle koThixo, bephila ngemilanganiselo yabo yokulungileyo nokubi. Uye waba yintoni umphumo? Imbali yabantu ibisoloko izaliswe ziimfazwe, okungekho sikweni, ingcinezelo nokubandezeleka. Ukungaphumeleli kwabo bavukela uYehova kuya kuyizinzisa ngokupheleleyo imbambano eyaphakanyiswa e-Eden.

Okwangoku, uThixo uye wabonakalisa uthando lwakhe ngokunikela ngoNyana wakhe, uYesu Kristu, owanikela ngobomi bakhe njengedini lentlawulelo. Oku kwenza abantu ukuba bakhululeke kwisigwebo sesono nokufa esabangelwa kukungathobeli kuka-Adam. Le ntlawulelo iye yavulela indlela abo banokholo kuYesu ukuba bafumane ubomi obungunaphakade.—Yohane 3:16.

UYehova uyasithuthuzela ngokusiqinisekisa ukuba ukubandezeleka kwabantu kuyadlula. Umdumisi wabhala: “Kusele ithutyana, angabikho ongendawo; uya kuyikhangela indawo yakhe, abe engekho. Kodwa abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo.”—INdumiso 37:10, 11.

Ikamva Lonqabiseko Nolonwabo

Ukuzaliseka kweziprofeto zeBhayibhile kubonisa ukuba ixesha likaThixo lokuphelisa ukugula, usizi nokufa lisemnyango. Phawula amavandlakanya ezinto ezizayo umpostile uYohane awaboniswa zona embonweni. Wabhala: “Ndabona izulu elitsha nomhlaba omtsha; kuba izulu langaphambili nomhlaba wangaphambili wadlula, nolwandle alusekho. . . . Naye abe nguThixo [woluntu]. Uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.” Kumazwi awayegxininisa ukunyaniseka kwesi sithembiso, uYohane waxelelwa oku: “Bhala, kuba la mazwi athembekile yaye ayinyaniso.”—ISityhilelo 21:1-5.

Kuthekani ngamawaka ezigidi zabantu abamsulwa abaye bafa ukususela kwimvukelo yase-Eden? UYehova uye wathembisa ukuba uya kubavusa abantu ngoku abafileyo. Umpostile uPawulos wathi: “Ndinethemba kuThixo . . . lokuba kuza kubakho uvuko lwamalungisa nabangengomalungisa.” (IZenzo 24:15) Aba bantu banethemba lokuphila kwihlabathi apho “kumi ubulungisa.”—2 Petros 3:13.

Njengokuba ubawo onothando ebeya kuvumela umntwana wakhe enze utyando olubuhlungu kuba ezazi iinzuzo zalo, ngoko uYehova uye wavumela abantu bajamelane nobubi emhlabeni okwexeshana. Sekunjalo, abo bazabalazela ukwenza ukuthanda kukaThixo baya kufumana iintsikelelo ezingunaphakade. UPawulos wacacisa: “Indalo yalulanyiselwa kokuphuthileyo, kungengakuthanda kwayo kodwa ngalowo wayilulamisayo, ngethemba lokuba nayo indalo ngokwayo iya kukhululwa ekukhotyokisweni kukonakala ize ibe nenkululeko ezukileyo yabantwana bakaThixo.”—Roma 8:20, 21.

Ngokwenene ezi zindaba—kungekhona ezo sizibona kumabonwakude okanye sizifunda kwiphephandaba, kodwa iindaba ezilungileyo. Zezona ndaba zimnandi ezivela ‘kuThixo wentuthuzelo yonke,’ osikhathalele ngokwenene.—2 Korinte 1:3.

[Imifanekiso ekwiphepha 6]

Ixesha liye labonisa ukuba abantu abanakuzilawula ngokuphumelelayo ngaphandle koThixo

[Inkcazelo]

Somalian family: UN PHOTO 159849/M. GRANT; atom bomb: USAF photo; concentration camp: U.S. National Archives photo