Indlela Ububi Obuza Koyiswa Ngayo Kokulungileyo

UKumkani uDavide wayeyindoda elungileyo. Wayemthanda ngokunyanisekileyo uThixo, ethanda okusesikweni yaye exhalabele abasweleyo. Sekunjalo, lo kumkani ulungileyo wakrexeza nomfazi womnye wabakhonzi bakhe abathembekileyo. Emva kokuba uDavide efumanise ukuba lo mfazi, uBhatshebha, umithi, wenza iyelenqe lokuba umyeni wakhe abulawe. Emva koko wazama ukuquma ububi bakhe ngokutshata noBhatshebha.—2 Samuweli 11:1-27.

KUYABONAKALA ukuba abantu banako ukwenza izinto ezininzi ezilungileyo. Noko ke, kutheni besenza ububi obungaka nje? IBhayibhile isichazela izizathu eziyintloko eziliqela. Ikwatyhila nendlela uThixo aza kubusiphula neengcambu ngayo ububi esebenzisa uKristu Yesu.

Utyekelo Lokwenza Okubi

UKumkani uDavide wachaza omnye unobangela wezenzo ezibi. Emva kokuba isono sakhe sibhenciwe, walivuma ityala lakhe. Ezisola wabhala wathi: “Khangela! Ngenimba ndazalelwa esiphosweni, yaye uma wandikhawulela esonweni.” (INdumiso 51:5) Yayingeyonjongo kaThixo ukuba oomama bakhawule abantwana ababeza kona. Noko ke, xa uAdam noEva bakhetha ukuvukela uThixo, baphulukana nelungelo lokuzala abantwana abangenasono. (Roma 5:12) Njengoko abantu abangafezekanga babesanda, kwaye kwacaca ukuba “intliziyo yomntu ityekele ebubini kwasebutsheni bakhe.”—Genesis 8:21.

Ukuba olu tyekelo lobubi alulawulwa lukhokelela ‘kuhenyuzo, ubutshaba, iimbambano, amakhwele, ukugqajukelwa yimisindo, usukuzwano, izahlukano, amahlelo, oomona,’ nezinye iindlela zokuziphatha eziyingozi iBhayibhile ezichaza ngokuba ‘yimisebenzi yenyama.’ (Galati 5:19-21) Yena uKumkani uDavide, wanikezela kubuthathaka benyama waza ke wakrexeza, nto leyo eyaphumela kwimbambano. (2 Samuweli 12:1-12) Ngewayeluxhathisile utyekelo lokuziphatha okubi. Kunoko, ngokuhlala ecinga ngoBhatshebha, uDavide walandela ikhondo kamva umfundi uYakobi awalichaza ngale ndlela: “Ngamnye ulingwa ngokutsalwa nokuwexulwa ngumnqweno wakhe. Wandule ke umnqweno, xa uthe wakhawula, uzale isono; isono, xa sithe safezwa, sivelisa ukufa.”—Yakobi 1:14, 15.

Ukubulawa kwenkitha yabantu, ukudlwengula nokuphanga okuchazwe kwinqaku elandulela eli yimizekelo ebonisa okwenzekayo xa abantu bevumela ukulawulwa yiminqweno ephosakeleyo.

Ububi Obubangelwa Kukungazi

Ubomi bukampostile uPawulos bubalaselisa isizathu sesibini sokuba abantu benze izinto ezimbi. Wafa esaziwa ngokuba ngumntu othantamisayo nonothando. Wazinikela ngokungazingci ekuncedeni abazalwana noodade bakhe abangamaKristu. (1 Tesalonika 2:7-9) Noko ke, ebutsheni bakhe, xa wayesaziwa ngokuba nguSawule, ‘wayebafuthela ngesisongelo nokubabulala.’ (IZenzo 9:1, 2) Kwakutheni ukuze uPawulos akhuthaze aze abe nenxaxheba kwizenzo ezibi ezazijoliswe kumaKristu enkulungwane yokuqala? Uthi: “Ngenxa yokuba ndandisenza ngokungazi.” (1 Timoti 1:13) Ewe, ngaphambili uPawulos ‘wayenenzondelelo kuThixo; kodwa kungekhona ngokolwazi oluchanileyo.’—Roma 10:2.

NjengoPawulos, abantu abaninzi abanyanisekileyo baye benza ububi ngenxa yokungabi nalwazi luchanileyo ngokuthanda kukaThixo. Ngokomzekelo, uYesu walumkisa abalandeli bakhe wathi: “Liyeza ilixa laxa wonk’ ubani onibulalayo eya kucinga ukuba unikele inkonzo engcwele kuThixo.” (Yohane 16:2) AmaNgqina kaYehova anamhlanje ayayazi indlela ayinyaniso ngayo la mazwi kaYesu. Kumazwe amaninzi, aye atshutshiswa ada abulawa ngabantu abathi bakhonza uThixo. Licacile elokuba, inzondelelo ephosakele ngolo hlobo ayimkholisi uThixo oyinyaniso.—1 Tesalonika 1:6.

Oyena Nobangela Wobubi

UYesu wachaza oyena nobangela wobubi. Ethetha neenkokeli zonqulo ezazizimisele ukumbulala, wathi: “Nina niphuma kuyihlo uMtyholi, yaye nithanda ukwenza ngokweminqweno kayihlo. Yena wayesisibulala-mntu kwasekuqaleni.” (Yohane 8:44) YayinguSathana owathi ngenxa yokuzingca wakhokelela uAdam noEva ekuvukeleni uThixo. Loo mvukelo yabangela isono—kwaza ekugqibeleni oko kwabangela ukufa—kubantu bonke.

Into yokuba uSathana ungumbulali ibonakala kakuhle koko wakwenza kuYobhi. Xa uYehova wamvumela ukuba avavanye ingqibelelo kaYobhi, uSathana akazange anele nje kukwenza uYobhi aphulukane nazo zonke izinto zakhe. Wabulala nabantwana bakhe abalishumi. (Yobhi 1:9-19) Kule nkulungwane idluleyo, abantu baye bathwaxwa gqitha bububi ngenxa yokungafezeki nokungazi, nangenxa yokuzifaka ngamandla kukaSathana kwimicimbi yabantu. IBhayibhile ithi uMtyholi “waphoswa phantsi emhlabeni, neengelosi zakhe zaphoswa phantsi kunye naye.” Eso siprofeto saxela ngokuchanileyo ukuba ukuphoselwa kukaSathana emhlabeni kwakuya kubangela ‘ooYeha’ abangathethekiyo. Nakubeni uSathana engenakunyanzela abantu ukuba benze ububi, kodwa uyincutshe ‘ekulahlekiseni umhlaba omiweyo uphela.’—ISityhilelo 12:9, 12.

Ukupheliswa Kotyekelo Lokwenza Okubi

Ukuze ububi bushenxiswe ngokupheleleyo ebantwini, kumele kupheliswe utyekelo lomntu lokwenza okubi, abe nolwazi luchanileyo kuze kushenxiswe nempembelelo kaSathana. Okokuqala, lunokushenxiswa njani entliziyweni utyekelo lomntu lokwenza isono?

Akukho gqirha okanye yeza linokwenza oko. Noko ke, uYehova uThixo wenze ilungiselelo lokushenxisa isono esisizuze ilifa nokungafezeki kubo bonke abalamkelayo. Umpostile uYohane wabhala: ‘Igazi likaYesu lisihlambulule kuso sonke isono.’ (1 Yohane 1:7) Xa umntu ofezekileyo uYesu wanikela ngobomi bakhe ngokuzithandela, “wazithwala izono zethu ngomzimba wakhe esibondeni, ukuze singabi saba nanto yakwenza nezono size siphile ebulungiseni.” (1 Petros 2:24) Ukufa kukaYesu okulidini kuya kushenxisa imiphumo yesenzo esibi sika-Adam. UPawulos uthi uKristu Yesu waba “yintlawulelo yabo bonke.” (1 Timoti 2:6) Ewe, ukufa kukaKristu kuvulel’ indlela bonke abantu ukuba baphinde bafezeke nto leyo uAdam awaphulukana nayo.

Noko ke, usenokuzibuza, ‘Ukuba ukufa kukaYesu okwenzeka malunga neminyaka engama-2 000 eyadlulayo kwenza abantu bakwazi ukufezeka kwakhona, kutheni kusekho ukufa nobubi?’ Ukufumana impendulo kulo mbuzo kunokunceda ekushenxiseni unobangela wesibini wobubi—ukungazi kwabantu iinjongo zikaThixo.

Ulwazi Oluchanileyo Luvelisa Ukulunga

Ukuba nolwazi oluchanileyo ngoko uYehova noYesu bakwenzayo ngoku ukushenxisa ububi, kunokuthintela umntu onyanisekileyo kwizenzo zobubi engaqondanga, okanye okubi nakakhulu ‘alwe nxamnye noThixo.’ (IZenzo 5:38, 39) UYehova uThixo ukulungele ukuxolela izenzo eziphosakeleyo zexa elidluleyo ezenziwa ngenxa yokungazi. Ethetha eAthene, umpostile uPawulos wathi: “UThixo uye akawananza amaxesha okungazi okunjalo, kanti ngoku uxelela uluntu ukuba lufanele lonke kuyo yonk’ indawo luguquke. Ngenxa yokuba umise imini anenjongo ngayo yokuba agwebe umhlaba omiweyo ngobulungisa ngendoda ayimiseleyo, yaye ubanike isiqinisekiso bonke abantu ngokuba eye wayivusa kwabafileyo.”—IZenzo 17:30, 31.

UPawulos wayesazi ukuba uYesu uvusiwe kwabafileyo, kuba wathetha naye siqu emnqanda ukuba ayeke ukutshutshisa amaKristu okuqala. (IZenzo 9:3-7) Wathi nje akufumana ulwazi oluchanileyo ngeenjongo zikaThixo, watshintsha waza waba ngumntu olunge ngokwenene exelisa uKristu. (1 Korinte 11:1; Kolose 3:9, 10) Ukongezelela, ngenzondelelo uPawulos washumayela “ezi ndaba zilungileyo zobukumkani.” (Mateyu 24:14) Phantse kuyo yonke le minyaka ingama-2 000 wafayo waza wavuswa, uYesu uye wakhetha ebantwini abo baya kulawula naye eBukumkanini bakhe ezulwini njengoPawulos.—ISityhilelo 5:9, 10.

Kwinkulungwane edluleyo de kube ngoku, amaNgqina kaYehova aye azalisekisa umyalelo kaYesu othi: “Hambani ke ngoko niye kubenza abafundi abantu beentlanga zonke, nibabhaptiza egameni loYise neloNyana nelomoya oyingcwele, nibafundisa ukuba bazigcine zonke izinto endiniyalele zona.” (Mateyu 28:19, 20) Abo basamkelayo esi sigidimi banethemba lokuphila emhlabeni ngonaphakade phantsi korhulumente wasezulwini olawulwa nguKristu. UYesu wathi: “Oku kuthetha ubomi obungunaphakade, ukungenisa kwabo ulwazi ngawe, wena ukuphela koThixo oyinyaniso, nangalowo umthumileyo, uYesu Kristu.” (Yohane 17:3) Ukunceda umntu afumane olu lwazi yeyona nto ilungileyo ubani anokuyenzela omnye umntu.

Abo bamkela ezi ndaba zilungileyo zoBukumkani baba neempawu ‘ezinjengothando, uvuyo, uxolo, ukuzeka kade umsindo, ububele, ukulunga, ukholo, ubulali, ukuzeyisa,’ nangona bengqongwe bububi. (Galati 5:22, 23) Bexelisa uYesu, ‘ababuyiseli ububi ngobubi nakubani na.’ (Roma 12:17) Bazabalazela ‘ukuhlala besoyisa ububi ngokulungileyo.’—Roma 12:21; Mateyu 5:44.

Ukoyiswa Ngokupheleleyo Kobubi

Abantu abanako ukoyisa oyena nobangela wobubi, uSathana uMtyholi. Noko ke, kungekudala, uYehova uza kusebenzisa uYesu ukutyumza intloko kaSathana. (Genesis 3:15; Roma 16:20) Kwakhona uYehova uza kwalathisa uKristu Yesu ukuba ‘atyumze aze aphelise’ zonke iinkqubo zopolitiko, uninzi lwazo olungunobangela wobubi obungaka embalini. (Daniyeli 2:44; INtshumayeli 8:9) Ebudeni bale mini yomgwebo izayo, bonke abo “bangazithobeliyo iindaba ezilungileyo ezingeNkosi yethu uYesu . . . baya kuva isohlwayo sesigwebo sentshabalalo engunaphakade.”—2 Tesalonika 1:8, 9; Zefaniya 1:14-18.

Xa uSathana nabo bamxhasayo beshenxisiwe, uYesu esezulwini uya kunceda abasindileyo ukuba babuyisele umhlaba kwimeko owawukuyo ekuqaleni. UKristu uya kuvusa bonke abafanele bafumane ithuba lokuphila kumhlaba obuyiselweyo. (Luka 23:32, 39-43; Yohane 5:26-29) Ngokwenjenjalo, uya kuphelisa imiphumo yobubi abaye babandezeleka yiyo abantu.

UYehova akayi kunyanzela bantu ukuba bathobele iindaba ezilungileyo ezingoYesu. Noko ke, unika abantu ithuba lokuba nolwazi olukhokelela kubomi obungunaphakade. Kubaluleke ngokwenene ukuba usebenzise eli thuba ngoku! (Zefaniya 2:2, 3) Ukuba wenjenjalo, uya kufunda indlela yokuhlangabezana nabo nabuphi na ububi ojamelana nabo. Uya kubona nendlela uKristu aza kuboyisa ngayo ububi ngokupheleleyo.—ISityhilelo 19:11-16; 20:1-3, 10; 21:3, 4.

[Umfanekiso okwiphepha 5]

USawule wakhuthaza izenzo zobubi kuba wayengenalwazi luchanileyo

[Umfanekiso okwiphepha 7]

Ukunceda umntu abe nolwazi oluchanileyo ngoThixo yeyona nto ilungileyo ubani anokuyenzela omnye umntu