Imibuzo Evela Kubafundi
Ngaba kuphosakele ukungcakaza nje ngemali encinane?
ILizwi likaThixo alichazi ngokweenkcukacha ngokungcakaza, kodwa lisixelela okwaneleyo ukubonisa ukuba zonke iintlobo zokungcakaza ziyangqubana nemigaqo yeBhayibhile.a Ngokomzekelo, wonke ubani uyazi ukuba ukungcakaza kukhokelela ekubaweni. Loo nto nje iyodwa sisizathu esibalulekileyo amaKristu afanele asiqwalasele, ekubeni iBhayibhile isithi “ababawayo” abayi kubudla ilifa uBukumkani bukaThixo, yaye ukubawa kunxulunyaniswa nokunqula izithixo.—1 Korinte 6:9, 10; Kolose 3:5.
Kwakhona ukungcakaza kubangela ukuziphakamisa nomoya ongafanelekanga wokhuphiswano, ukufuna ukuphumelela nokuba sekumnyam’ entla. Umpostile uPawulos walumkisa ngezinto ezinjalo xa wabhala esithi: “Masingazigwagwisi, sikhuphisana, simonelana.” (Galati 5:26) Kwakhona, ukungcakaza kukhuthaza ukuthembela kwiinkolelo zokuba ubani uza kuba namathamsanqa. Abangcakazi baba neenkolelo ezahlukahlukeneyo, benethemba lokuba baza kuba nethamsanqa. Basikhumbuza ngamaSirayeli awayengathembekanga awathi “amisela ngolungelelwano uthixo weThamsanqa itafile nabo bazalisela uthixo weSihlo iwayini ephithikeziweyo.”—Isaya 65:11.
Abanye basenokucinga ukuba ukubheja ngemali encinane ngoxa udlala amakhasi okanye imidlalo edlalwa kwibhodi yeplanga nezalamane okanye abahlobo abasenyongweni kukuzonwabisa nje okungenangozi. Enyanisweni, umntu obheja ngemali encinane usenokungazijongi njengomntu obawayo, oziphakamisileyo onomoya wokhuphiswano okanye oneenkolelo. Sekunjalo, kunokubachaphazela njani abo angcakaza nabo? Amakhoboka okungcakaza amaninzi aqala ngokubheja nje ngemali encinane ‘ukuze aziyolise.’ (Luka 16:10) Ukuzihlaziya okubonakala kungenamsebenzi kuphumela ekubeni benze into embi gqitha.
Oku kunjalo ngokukodwa xa kubandakanyeke nabantwana. Abantwana abaninzi baye bakuvuyele ukuzuza xa bebheja ngemali encinane yaye baye balingeke ekubeni basebenzise imali eninzi. (1 Timoti 6:10) Uhlolisiso olwathabatha ixesha elide olwapapashwa eUnited States yiArizona Council on Compulsive Gambling luyasiqinisekisa ukuba amakhoboka okungcakaza amaninzi aqalisa esemancinane “ngokubheja ngemali encinane kwimidlalo okanye ukudlala amakhasi nabahlobo okanye izalamane.” Enye ingxelo ithi “abantwana baqalisa ukungcakaza ekhaya, ngokuqhelekileyo xa bedlala amakhasi nentsapho nabahlobo.” Le ngxelo yongezelela isithi “amashumi amathathu ekhulwini kubantwana abangcakazayo baqalisa ngaphambi kokuba babe neminyaka elishumi elinanye ubudala.” Ngokutsho kohlolisiso oluthi Why Do People Gamble Too Much—Pathological and Problem Gambling, abangcakazi abaninzi abakwishumi elivisayo baye bafumane imali ngokwaphula umthetho okanye ngokuziphatha kakubi. Into ebibonakala ingenabungozi ekuqaleni isenokuba nemiphumo eyintlekele!
Ekubeni siphila kwihlabathi elisele linemigibe nezilingo ezininzi, kutheni ngokungeyomfuneko sizichanaba kweminye? (IMizekeliso 27:12) Enoba kungcakazwa abantwana bekho okanye bengekho—kungcakazwa ngemali encinane okanye eninzi—kuyingozi ngokomoya yaye kufanele kuphetshwe. AmaKristu ayithandayo imidlalo edlalwa kwibhodi yeplanga namakhasi njengokuzihlaziya kucetyiswa ukuba abhale phantsi amanqaku okanye adlale nje ngaphandle kokubhala amanqaku. AmaKristu alumkileyo ayikhathaleleyo imeko yawo yokomoya neyabahlobo neentsapho zawo ayakuphepha ukungcakaza—enoba kungcakazwa ngemali encinane.
[Umbhalo osemazantsi]
a IWorld Book Encyclopedia ichaza ukungcakaza ngokuthi “ukubheja emdlalweni, kwisiganeko, okanye oko kusenokwenzeka.” Ihlabela mgama isithi “abangcakazi okanye abadlali ngokuqhelekileyo babheja ngemali . . . kwimidlalo enjengelottery, amakhasi okanye amadayisi.”