Iindawo Zonqulo—Ngaba Ziyimfuneko?
‘Amawaka abantu abakuhambo lwezonqulo banxibe izambatho ezimbejembeje basuka kwiindawo ezahlukeneyo zelo lizwe, amaqela amaIndiya ayangqungqa yaye abetha amagubu ngendlela ekwakusenziwa ngayo ngaphambi kokuba kufike abemi baseSpeyin, ibe amarhamente akhasa ngamadolo ephinyela kweso sihlwele sizalise intendelezo nezitrato ezijikeleze indlu yecawa zisiya kwindawo engcwele.’
LEYO yindlela iphephandaba iEl Economista elasichaza ngayo isihlwele esasinyakazela ngoDisemba 2001. Ngelo xesha abantu abamalunga nezigidi ezithathu babetyelele kwindlu yonqulo eseMexico City beye kubonisa ukholo lwabo kwiNtombi Enyulu yaseGuadalupe. Ezinye izakhiwo ezikhulu zonqulo, ezinjengeSt. Peter Basilica yaseRoma, nazo ziba neendwendwe ezininzi.
Izakhiwo zonqulo ziyathandwa ngabantu abaninzi abanqwenela ukukhonza uThixo. UMaria waseBrazil uthi: “Kum, icawa yayiyindawo endandiziva ndisondele kuThixo xa ndikuyo. Yayiyindawo engcwele. Ndandikholelwa ukuba ukuya ecaweni kwakuhlambulula umphefumlo nokuba kwakusisono ukungayi kwidini leMisa nokuya kuvuma izono ngeCawa.” UConsuelo waseMexico uthi: “Ndandiyithanda gqitha icawa; ndiyixabisa kakhulu. Xa ndisecaweni, ndandiziva ngathi ndisezulwini.”
Nangona kwabaninzi iicawa zibalulekile, abanye bayazibuza enoba ziyafuneka kusini na njengeendawo zonqulo. Ehlomla ngokungayi kwabantu ecaweni, umfundisi ongumKatolika waseNgilani, uPeter Sibert, uthi: “[Abantu] bakhetha izinto abazithandayo kunqulo. Inkoliso yabantu abadala ngamaKatolika yaye iphila ngokuvisisana nonqulo lwayo—kodwa akunjalo ngabantu abaselula.” IDaily Telegraph yaseLondon kaNovemba 20, 1998, yathi: “Ukususela ngowe-1979 kuye kwavalwa iicawa ezinokuba li-1 500 eNgilani xa zithelekiswa nezingama-495 eziye zaqhubeka zisetyenziswa nezili-150 eziye zaphinda zakhiwa.”
Ngowe-1997 iphephandaba laseMunich, eJamani, iSüddeutsche Zeitung, lanikela le ngxelo: “Iicawa ziye zenziwa iindawo zemiboniso bhanya-bhanya namagumbi aqashisayo: Amakholwa akasayihambi icawa, iindawo zonqulo zisetyenziselwa ezinye iinjongo. . . . Le nto ekudala isenzeka eNetherlands okanye eNgilani iyenzeka naseJamani mvanje.” Longezelela lisithi: “Kwiminyaka embalwa edluleyo kuye kwathengiswa iicawa ezinokuba ngama-30 okanye ama-40 eJamani.”
Ngaba izakhiwo zokukhonza uThixo ziyafuneka ngokwenene? Ngaba izindlu zecawa ezinobukhazikhazi kuyathethwa ngazo kwiZibhalo? Luhlobo olunjani lwezakhiwo olunxulunyaniswa nonqulo lokwenyaniso kunye noThixo ophilayo? Yintoni esinokuyifunda kuzo ngemfuneko yeendawo zonqulo nento efanele yenziwe kuzo?