Izithethe Zamandulo KwiMexico Yanamhlanje

NGUMBHALI KAVUKANI! EMEXICO

IZITHETHE neenkolelo zonqulo zamandulo zisaxhathisile phakathi kwesi sizukulwana sanamhlanje sithe phithi ziicell phone neInternet eMexico. Kwiinkulungwane ezigqithileyo ezinye zezithethe zamaIndiya ziye zaxutywa nezithethe zamaRoma Katolika. Enyanisweni, nangoku ezo zithethe ziseneengcamango zamaKatolika aseMexico.

Ngokomzekelo, nyaka ngamnye abantu abaninzi baseMexico baya emangcwabeni ngoNovemba 2 ukuze babhiyozele Imini Yayo Yonke Imiphefumlo, ekwabizwa nangokuthi Imini Yabafileyo. Badla ngokushiyela abafileyo ababathandayo iintyatyambo, ukutya notywala. Abanye bade bameme amaqela eemvumi ukuze acule iingoma ababedla ngokuziphulaphula abo bafileyo babathandayo. Kwakhona amaKatolika amaninzi akha isibingelelo emakhayeni awo, aze maxa wambi abeke kuso ifoto kamfi.

IEnciclopedia de México ithi kubonakala ukuba ezinye izithethe ezenzelwa abafileyo “zinemvelaphi yezithethe zaseIndiya ezenziwa ngenyanga kaochpaniztli nekateotleco, ekuthi ebudeni bazo kunikelwe ngentyatyambo icempasúchil nesidlo sengqolowa kwiimanes [imiphefumlo yabafileyo] ebudeni bexesha lokuvuna—ngasekupheleni kukaOktobha nasekuqaleni kukaNovemba.” Njengoko le ntyilalwazi ibonisa, ezinye izithethe ziyafana nezo zazisenziwa mandulo ngabemi baseMexico.

Izithethe Zonqulo

UDisemba 12 yiholide yamaKatolika aseMexico. Ngolu suku, amawaka abantu abavela kweminye imimandla yaseMexico bahlanganisana kwicawa yeNtombi Enyulu yaseGuadalupe ekufuphi neNduli iTepeyac kwisiXeko saseMexico. Abaninzi bahamba ngeenyawo kangangeentsuku, bethandaza kule Ntombi Inyulu. Ekufikeni kwabo bayaguqa baze bakhase ukungena kuloo cawa (ngasentla) baze banikele ngeentyatyambo.

Namhlanje imifanekiso yeNtombi Enyulu yaseGuadalupe ikho emakhayeni abantu, kwizikhululo zebhasi nakwezinye iindawo zikawonke-wonke. Le Ntombi Inyulu yaseGuadalupe ikwabizwa ngokuthi “uMama kaThixo” nangokuthi “Unomdakazana waseTepeyac.” Ukususela kwinkulungwane ye-16, abantu abaninzi bebekholelwa ukuba le Ntombi Inyulu inamandla okuphilisa nawokwenza eminye imimangaliso.

Imvelaphi Yesi Sithethe

Ukunqulwa kwabantu ababhinqileyo, kunye nezithethe ezihambisana nako, kususela ekunqulweni kothixokazi uCihuacóatl wama-Aztec, okwabizwa ngokuba nguTonantzin, gama elo elithetha “uMama Wethu Omncinane.” Incwadi ethi México a través de los siglos (IMexico Ebudeni Beenkulungwane) ithi lo thixokazi, nonyana wakhe uHuitzilopochtli, waziswa ngama-Aztec eTenochtitlán—eyayikade ilikomkhulu loBukhosi bama-Aztec, ngoku esisiXeko saseMexico.

Itempile kaCihuacóatl ekwiNduli iTepeyac yatshatyalaliswa ngabemi baseSpeyin. Kukho inkolelo yokuba, kwisithuba esingaphantsi kweminyaka engama-40 emva kokugaleleka kukaColumbus kwelo lizwe, iNtombi Enyulu yaseGuadalupe yabonakala kummi othile waseIndiya ogama linguJuan Diego. Kukholelwa ukuba yamcela ukuba ayakhele ingcwele kuloo ndawo.

UCihuacóatl wayehlonelwa gqitha ngama-Aztec. Kubikwa ukuba wayenesihlwitha seenwele yaye enxiba ilokhwe emhlophe qhwa. Umnyango wetempile yakhe wawusezantsi kangangokuba kwakufuneka umntu akhase ngamadolo xa engena kuwo. Ngaphakathi kwakukho umfanekiso wakhe ongqongwe yimifanekiso emincinane, nto leyo yayimenza abonakale “njengonina . . . woothixo.”

Xa kubhiyozelwa uCihuacóatl kwakubingelelwa ngabantu, kudaniswe, kubekho nomkrozo wamajoni ephethe “iintyatyambo ngezandla, ezinye ezigaxe entanyeni, ezinye zisentloko.” Ezi zipho zazishiywa phezu kwetempile njengeminikelo kuHuitzilopochtli. Amanye amaIndiya, kuquka awaseGuatemala, ayehamba ngeenyawo umgama ongaphezu kwe-1 500 eekhilomitha esiya kuloo mbhiyozo kaCihuacóatl.

Ngaba Imvelaphi Ibalulekile?

Ngokucacileyo ukunqulwa komfanekiso wamaKatolika weNtombi Enyulu yaseGuadalupe kuvela kwizithethe zabantu abanganquli uThixo wokwenyaniso ochazwe eBhayibhileni. (INdumiso 83:18) Ngaba oko kwenza umahluko? Ngaba ngokwenene ibalulekile imvelaphi yesithethe sonqulo?

Umpostile uPawulos wanikela isiluleko sobulumko kule nkalo, esithi: “Musani ukubotshwa edyokhweni kunye nabangakholwayo. . . . Unakuvumelana kuni na uKristu noBheliyali? Okanye unakwahlulelana kuni na umntu okholwayo nongakholwayo?” Kwakhona uPawulos wathi: “Qinisekani ngezinto zonke; nibambelele nkqi koko kuhle.”—2 Korinte 6:14, 15; 1 Tesalonika 5:21.

Olo khuthazo lusafanelekile nanamhlanje. Sifanele sicinge ngokukhonza kwethu uThixo size sizibuze: ‘Ngaba unqulo lwam luyavumelana neemfundiso zeLizwi likaThixo iBhayibhile? Okanye ngaba iinkalo ezithile zalo zivela koothixo bobuxoki?’ Umntu onqwenela ukukholisa uYehova, uThixo wenyaniso, uya kuthi ngobulumko azame ukufumana iimpendulo zale mibuzo.

[Umfanekiso okwiphepha 23]

Abakhenkethi abeze kunqula kwicawa yeNtombi Enyulu yaseGuadalupe

[Umfanekiso okwiphepha 23]

Iimvumi emangcwabeni ngoNovemba 2