Ufundisiso Lobuqu Olusixhobisayo Njengabafundisi
“Ziphonononge ezi zinto; wendele kuzo, ukuze ukuhambela kwakho phambili kubonakale ebantwini bonke. Zilumkele wena nemfundiso yakho.”—1 TIMOTI 4:15, 16.
1. Yintoni esiyaziyo ngexesha nofundisiso lobuqu?
KWINTSHUMAYELI 3:1 iBhayibhile ithi: “Yonke into inexesha layo elimisiweyo.” Ngokuqinisekileyo oko kunjalo ngofundisiso lobuqu. Abaninzi bakufumanisa kunzima ukuphonononga izinto zokomoya ukuba kwenziwa ngexesha okanye kwindawo engafanelekanga. Ngokomzekelo, emva kokubulaleka emsebenzini nasemva kokutya kakhulu ebusuku, ngaba ubunokuziva ufuna ukufundisisa ingakumbi xa uhleli kwesona sihlalo sitofo-tofo phambi komabonwakude? Unotshe. Ngoko ke, yintoni esifanele siyenze? Licacile elokuba, sifanele sikhethe ixesha nendawo yokufundisisa sicinga ngokuzuza lukhulu kwimigudu yethu.
2. Ngokuqhelekileyo liliphi elona xesha lifanelekileyo lofundisiso lobuqu?
2 Abaninzi bakufumanisa ukufundisisa ekuseni ilelona xesha lifanelekileyo kuba ngokuqhelekileyo bathe qwa. Abanye basebenzisa ixesha lekhefu emini ukuze bafundisise ixesha elifutshane. Phawula indlela yokuzibekela ixesha kwizinto zokomoya ezibalulekileyo kule mizekelo elandelayo. UKumkani uDavide kaSirayeli wamandulo wabhala esithi: “Kusasa ndivise ububele bakho bothando, kuba ndikholose ngawe. Ndazise indlela endifanele ndihambe ngayo, kuba ndiwuphakamisele kuwe umphefumlo wam.” (INdumiso 143:8) Umprofeti uIsaya wabonakalisa uxabiso olufanayo xa wathi: “INkosi enguMongami uYehova indinike ulwimi lwabafundileyo, ukuze ndiyazi indlela yokuphendula odiniweyo ngelizwi. Iyandivusa iintsasa ngeentsasa; iyayivusa indlebe yam ukuze ive njengabafundileyo.” Ingongoma ikukuba sifanele sifundisise size sithethe noYehova xa sithe qwa, enoba liliphi ixesha losuku.—Isaya 50:4, 5; INdumiso 5:3; 88:13.
3. Ziziphi ezona meko zifanelekileyo zokufundisisa ngokuphumelelayo?
3 Enye inkalo yokufundisisa ngendlela ephumelelayo kukukhetha ukungahlali kwesona sihlalo sitofo-tofo. Le asiyondlela enokukwenza uhlale uthe qwa. Xa sifundisisa, ingqondo yethu ifanele ihlale iphaphile, yaye ukuhlala kwindawo etofo-tofo akuloncedo kule nkalo. Kwakhona eyona ndawo ifanelekileyo yokufundisisa nokucamngca, yezolileyo nengenaziphazamiso. Akunakukwazi ukufundisisa ngokuphumelelayo ukuba kukhala unomathotholo, umabonwakude, okanye abantwana benza ingxolo. Xa uYesu wayefuna ukucamngca, waya kwindawo ezolileyo. Kwakhona wathetha ngokuxabiseka kokufumana indawo ezolileyo yokuthandaza.—Mateyu 6:6; 14:13; Marko 6:30-32.
Ufundisiso Lobuqu Olusenza Sikwazi Ukuphendula
4, 5. Incwadana enemifanekiso ethi Okufunwa NguThixo iluncedo ngaziphi iindlela?
4 Ufundisiso lobuqu luyanelisa xa sisebenzisa iincwadi ezahlukahlukeneyo zeBhayibhile ukuze sembe ngokunzulu kumbandela othile, ingakumbi xa senjenjalo ukuze siphendule imibuzo enyanisekileyo yomntu othile. (1 Timoti 1:4; 2 Timoti 2:23) Xa beqalisa ukufundisisa, abaninzi abasebatsha baqala ngencwadana enemifanekiso ethi Yintoni UThixo Ayifunayo Kuthi?,a ngoku efumaneka ngeelwimi ezingama-261. Le yimpapasho elula kakhulu nengqalileyo, esekelwe ngokupheleleyo eBhayibhileni. Inceda abafundi bakuqonde ngokukhawuleza oko uThixo akufunayo kunqulo lokwenyaniso. Noko ke, indlela ebhalwe ngayo ayinikeli zinkcukacha zokufundisisa ngombandela ngamnye. Ukuba umntu ofunda naye iBhayibhile ubuza imibuzo enyanisekileyo ngemibandela yeBhayibhile ethile enifunda ngayo, yintoni onokuyenza ukuze ufumane inkcazelo engakumbi yeBhayibhile eya kumnceda aphendule loo mibuzo?
5 Abo baneWatchtower Library kwiCD-ROM ngolwimi lwabo, kulula kubo ukufumana inkcazelo eninzi kwikhompyutha. Kodwa kuthekani ngabantu abangenaso esi sixhobo? Makhe sihlolisise imixholo emibini eqwalaselwa kule ncwadana enemifanekiso ethi Okufunwa NguThixo ukuze sibone indlela esinokwandisa ngayo ukuqonda kwethu size sikwazi ukunikela iinkcukacha ezingakumbi—ingakumbi xa umntu ebuza umbuzo onjengothi, Ngubani uThixo, nothi wayenjani ngokwenene uYesu?—Eksodus 5:2; Luka 9:18-20; 1 Petros 3:15.
Ngubani UThixo?
6, 7. (a) Nguwuphi umbuzo ovelayo ngokuphathelele uThixo? (b) Yiyiphi eyona ngongoma ibalulekileyo awayiphosayo omnye umfundisi kwintetho yakhe?
6 Isifundo 2 kwincwadana enemifanekiso ethi Okufunwa NguThixo siphendula lo mbuzo obalulekileyo, Ngubani UThixo? Le ngongoma ibalulekile kuba umntu akanakunqula uThixo wokwenyaniso ukuba akamazi okanye uyathandabuza ukuba ukho. (Roma 1:19, 20; Hebhere 11:6) Sekunjalo, abantu emhlabeni wonke baneengcamango ezininzi ngokuba ungubani uThixo. (1 Korinte 8:4-6) Unqulo ngalunye luwuphendula ngendlela eyahlukileyo umbuzo othi ngubani uThixo. KwiNgqobhoko inkoliso yeecawa zimgqala uThixo njengoBathathu Emnye. Omnye umfundisi owaziwayo waseUnited States wanikela intetho enomxholo othi “Ngaba Uyamazi UThixo?” kodwa akazange alibize nakanye igama likaThixo kule ntetho, nangona wayecaphula kwiZibhalo zesiHebhere izihlandlo eziliqela. Kakade ke, wayefunda kwinguqulelo yeBhayibhile eyayisebenzisa igama elineentsingiselo ezimbini okanye ngaphezulu nelingabhekisi mntwini ngokuthe ngqo elithi “Nkosi” kunelithi Yehova okanye Yahweh.
7 Lo mfundisi waphosa eyona ngongoma ibalulekileyo xa wacaphula uYeremiya 31:33, 34 othi: “‘Abayi kuba safundisana ngamnye ummelwane wakhe, nomnye umntakwabo, besithi, “Yazini iNkosi” [ngesiHebhere, “Mazini uYehova”], kuba bonke baya kundazi, ukususela koyena mncinane nokusa koyena mkhulu kubo,’ itsho iNkosi [ngesiHebhere, uYehova].” Le nguqulelo awayisebenzisayo yayingenalo igama elikhethekileyo likaThixo, uYehova.—INdumiso 103:1, 2.
8. Yintoni ebonisa ukubaluleka kokusebenzisa igama likaThixo?
8 INdumiso 8:9 ibonisa isizathu sokubaluleka kokusebenzisa igama likaYehova isithi: “Owu Yehova Nkosi yethu, hayi indlela elinobungangamsha ngayo igama lakho emhlabeni wonke!” Thelekisa la mazwi nala athi: “Hayi ukubaluleka kwalo igama lakho ehlabathini liphela, . . . NKOSI yethu!” (IBhayibhile yesiXhosa yowe-1996) Sekunjalo, njengoko kukhankanywe kwinqaku elandulelayo, sinokufumana “ukumazi uThixo” ukuba sivumela iLizwi lakhe lisikhanyisele. Kodwa yiyiphi incwadi yokufundisisa iBhayibhile enokuyiphendula ngokukhawuleza imibuzo yethu ngokubaluleka kwegama likaThixo?—IMizekeliso 2:1-6.
9. (a) Yiyiphi impapasho enokusinceda ukuze sicacise ukubaluleka kokusebenzisa igama likaThixo? (b) Abaguquleli abaninzi baye basilela njani ukubonisa intlonelo ngegama likaThixo?
9 Sinokusebenzisa incwadana enemifanekiso ethi Igama LikaThixo Eliya Kuhlala Ngonaphakade, eguqulelwe kwiilwimi ezingama-69.b Icandelo elinomxholo othi “Igama LikaThixo—Intsingiselo Yalo Nendlela Yokulibiza” (iphepha 6-11) libonisa ngokucacileyo ukuba iTetragrammaton yesiHebhere (ngesiGrike, ithetha “oonobumba abane”) ivela izihlandlo ezinokuba ngama-7 000 kwimibhalo yamandulo yesiHebhere. Sekunjalo, abefundisi nabaguquleli bonqulo lobuYuda nabeNgqobhoko baye balishiya ngabom kwinkoliso yeenguqulelo zabo zeBhayibhile.c Banokutsho njani ukuba bayamazi uThixo yaye banolwalamano olwamkelekileyo naye ukuba abafuni ukumbiza ngegama lakhe? Igama lakhe lokwenene libangela ubani aqonde iinjongo zakhe nomntu anguye. Ngaphezu koko, abaluleke ngantoni amazwi kaYesu akumthandazo weNkosi athi “Bawo wethu osemazulwini, malingcwaliswe igama lakho” ukuba igama likaThixo alifanele lisetyenziswe?—Mateyu 6:9; Yohane 5:43; 17:6.
Ngubani UYesu Kristu?
10. Ziziphi iindlela esinokufumana ngazo iinkcukacha ezipheleleyo ngobomi nobulungiseleli bukaYesu?
10 Isifundo 3 kwincwadana enemifanekiso ethi Okufunwa NguThixo sinomxholo othi “Ngubani UYesu Kristu?” Kwiziqendu nje ezintandathu, ichaza ngokufutshane ngoYesu, imvelaphi yakhe nenjongo yokuza kwakhe emhlabeni. Noko ke, ukuba ufuna ingxelo epheleleyo ngobomi bakhe, ayikho emchaza kakuhle kunencwadi ethi Oyena Mntu Ubalaseleyo Wakha Waphila, efumaneka ngeelwimi ezili-111—ngaphandle kweengxelo zeVangeli.d Le ncwadi izichaza ngokulandelelana zonke iziganeko zobomi bukaKristu neemfundiso zakhe, ngokusekelwe kwiincwadi ezine zeVangeli. Izahluko zayo ezili-133 zigubungela iziganeko zobomi nobulungiseleli bukaYesu. Ukuze ufumane inkcazelo eyahlukileyo, usenokukhangela kwi-Insight, uMqulu 2, kumxholo othi “Jesus Christ (UYesu Kristu).”
11. (a) Yintoni eyenza amaNgqina kaYehova ahluke koko akukholelwayo ngoYesu? (b) Ziziphi ezinye zezibhalo zeBhayibhile ezibhenca ubuxoki bemfundiso kaBathathu Emnye, yaye yiyiphi impapasho eluncedo kule nkalo?
11 KwiNgqobhoko imbambano engoYesu kukungaqiniseki enoba “unguNyana kaThixo” aze kwangaxeshanye abe “nguThixo uNyana”—ngamanye amazwi, imbambano yileyo iCatechism of the Catholic Church eyibiza ngokuba “yimfihlelo yokholo lobuKristu,” uBathathu Emnye. Abantu abangavumelaniyo neenkonzo zeNgqobhoko, ngamaNgqina kaYehova akholelwa ukuba uYesu wadalwa nguThixo kodwa akanguye uThixo. Inkcazelo eenenkcukacha ngalo mbandela ifumaneka kwincwadana enemifanekiso ethi Ngaba Ufanele Ukholelwe KuBathathu Emnye?, eguqulelwe ngeelwimi ezingama-95.e Phakathi kwenkitha yezibhalo ezisebenzisayo ukubhenca imfundiso kaBathathu Emnye kukho uMarko 13:32; neyoku-1 yabaseKorinte 15:24, 28.
12. Nguwuphi omnye umbuzo esifanele sizibuze wona?
12 Ezi ngxubusho zingentla ezingoThixo noYesu Kristu zingumzekelo weendlela esinokufundisisa ngazo thina ngokobuqu ngenjongo yokunceda abo bangaqhelananga neenyaniso zeBhayibhile ukuze bazuze ulwazi oluchanileyo. (Yohane 17:3) Noko ke, kuthekani ngabo bebenxulumana nebandla lamaKristu kangangeminyaka emininzi? Nangona benolwazi oluninzi lweBhayibhile, ngaba kusafuneka banikele ingqalelo kufundisiso lobuqu leLizwi likaYehova?
Kutheni Sifanele ‘Sihlale Silumkile’?
13. Yiyiphi imbono ephosakeleyo bambi abanokuba nayo ngokuphathelele ufundisiso lobuqu?
13 Bambi abaye bangamalungu ebandla kangangeminyaka emininzi basenokuqalisa umkhwa wokwaneliseka lulwazi lweBhayibhile abalufumene kwiminyaka yabo yokuqala njengamaNgqina kaYehova. Kulula ukuqiqa ngelithi: “Akuyomfuneko ukuba ndifundisise nzulu ngokungathi ndisemtsha. Ngapha koko, ekuhambeni kweminyaka ndiye ndayifunda iBhayibhile ndayigqiba izihlandlo eziliqela kuquka neempapasho zeBhayibhile.” Oku bekuya kufana nokuthi: “Akuyomfuneko yokuzixhalabisa ngento endiyityayo ngoku, kuba kudala ndatya.” Siyazi ukuba umzimba ufuna ukondliwa ngokuthe rhoqo ngokutya okunesondlo, nokuphekwe kakuhle, ukuze siwugcine usempilweni yaye unamandla. Kuyimfuneko kangakanani ke ukwenza oku ukuze silondoloze impilo namandla ethu angokomoya!—Hebhere 5:12-14.
14. Kutheni sifanele sihlale silumkile?
14 Ngoko ke, sonke, enoba singabafundi beBhayibhile abangamagqala okanye akunjalo, sifanele sithobele isiluleko sikaPawulos esasisiya kuTimoti, ngelo xesha owayengumveleli oqolileyo esasisithi: “Zilumkele wena nemfundiso yakho. Hlala kwezi zinto, kuba ngokwenza oko uya kuzisindisa wena nabo bakuphulaphulayo.” (1 Timoti 4:15, 16) Kutheni sifanele sicinge nzulu ngecebiso likaPawulos? Khumbula ukuba, kwayena uPawulos wathi silwa nxamnye “namaqhinga kaMtyholi” kwakunye “nemikhosi yoomoya abangendawo kwezasezulwini iindawo.” Yaye umpostile uPetros walumkisa esithi uMtyholi ‘ufuna ubani engamqwengayo,’ yaye loo “bani” usenokuba ngomnye wethu. Ukuzithemba ngokugqithiseleyo kusenokuba lithuba kanye alikhangelayo.—Efese 6:11, 12; 1 Petros 5:8.
15. Yiyiphi indlela yokuzikhusela ngokomoya esinayo, yaye sinokuyigcina njani isemgangathweni?
15 Ngoko ke, yintoni esinayo yokuzikhusela? Umpostile uPawulos uyasikhumbuza: “Thabathani sonke isikrweqe sikaThixo, ukuze nikwazi ukuxhathisa ngemini embi nize, nakuba nenze zonke izinto ngokucokisekileyo, nime niqinile.” (Efese 6:13) Ukusebenza kweso sikrweqe somoya akuxhomekekanga kuphela kwindlela esisifumene singayo kodwa kwakhona ekusigcineni ngamaxesha onke sisemgangathweni. Ngoko ke, eso sikrweqe sivela kuThixo, simele siquke ulwazi olusexesheni lweLizwi likaThixo. Oku kugxininisa ukubaluleka kokugcina ulwazi lwethu luhambisana nenyaniso etyhilwe nguYehova ngeLizwi lakhe nangodidi lwekhoboka elithembekileyo neliyingqondi. Ukufundisisa ngokuthe rhoqo iBhayibhile neempapasho ezisekelwe eBhayibhileni kubalulekile ukuze sigcine isikrweqe sethu sokomoya sisemgangathweni.—Mateyu 24:45-47; Efese 6:14, 15.
16. Yintoni esinokuyenza ukuze siqiniseke ukuba “ikhaka lethu elikhulu lokholo” lisemgangathweni?
16 UPawulos ubalaselisa “ikhaka elikhulu lokholo” njengenxalenye ebalulekileyo yesikrweqe, ukuze siyiphephe size siyicime imijukujelwa yomlilo kaSathana ezizityholo zobuxoki neemfundiso zabawexuki. (Efese 6:16) Ngoko ke, kubalulekile ukuba siqiniseke ngendlela elomelele ngayo ikhaka lethu lokholo namanyathelo esiwathabathayo ukuligcina lisemgangathweni size siligcine lomelele. Ngokomzekelo, usenokuzibuza: ‘Ndisilungiselela njani isifundo seBhayibhile seeveki ngeeveki ndisebenzisa IMboniselo? Ngaba ndiye ndafundisisa ngokwaneleyo ukuze ndikwazi ‘ukuvuselela abanye eluthandweni nasemisebenzini emihle’ ngokunikela iimpendulo ezicingisisiweyo ebudeni beentlanganiso? Ngaba ndiyayivula iBhayibhile ndize ndifunde izibhalo ezalathiweyo kodwa ezingacatshulwanga? Ngaba ndiyabakhuthaza abanye ngokuba nenxaxheba ngokuzeleyo kwiintlanganiso?’ Ukutya kwethu kokomoya kuqinile, yaye sifanele sikwetyise ukuze sizuze kuko ngokupheleleyo.—Hebhere 5:14; 10:24.
17. (a) Yiyiphi ityhefu uSathana ayisebenzisayo ukuze azame ukusenza buthathaka ngokomoya? (b) Sinokuzikhusela njani kwityhefu kaSathana?
17 USathana uyabazi ubuthathaka benyama enesono, yaye akulula ukuwabona amaqhinga akhe. Enye yeendlela asasaza ngayo impembelelo yakhe engendawo kukwenza ukuba kube lula ukubona imifanekiso engamanyala kumabonwakude, kwi-Internet, kwiividiyo nasezincwadini. Wambi amaKristu aye avumela ukuba le tyhefu iwenze buthathaka, yaye loo nto iye yakhokelela ekubeni alahlekelwe ngamalungelo ebandleni okanye yaphumela kwezinye izinto ezibuhlungu kakhulu. (Efese 4:17-19) Sinokuzikhusela njani kwityhefu kaSathana engokomoya? Asimele silutyeshele ufundisiso oluthe rhoqo lobuqu lweBhayibhile, iintlanganiso zethu zamaKristu nesikrweqe esivela kuThixo. Xa zizonke ezi zinto, ziya kusinceda sikwazi ukwahlula okulungileyo kokubi size sikuthiye oko uThixo akuthiyileyo.—INdumiso 97:10; Roma 12:9.
18. Linokusinceda njani “ikrele lomoya” kumlo wethu wokomoya?
18 Ukuba sihlala sinemikhwa emihle yokufundisisa iBhayibhile ngokuthe rhoqo, asisayi kuba namandla okuzikhusela nje kuphela kuba sinolwazi oluchanileyo lweLizwi likaThixo kodwa kwakhona siya kuba namandla okuhlasela ‘ngekrele lomoya, oko kukuthi, ilizwi likaThixo.’ Ilizwi likaThixo “libukhali ngaphezu kwalo naliphi na ikrele elintlangothi-mbini, lihlaba lide lahlule umphefumlo nomoya, kwanamalungu nomongo wawo, yaye liyakwazi ukuphicotha iingcamango notyekelo lwentliziyo.” (Efese 6:17; Hebhere 4:12) Ukuba siba nobuchule bokusebenzisa elo “krele,” siya kwandula ke xa sijamelene nezilingo, sikwazi ukukuqonda oko kusenokubonakala kungeyongozi okanye kuthandeka, size sikugqale njengomgibe obulalayo wongendawo. Uvimba wethu wolwazi lweBhayibhile nokuqonda uya kusinceda sikuchase oko kungendawo size senze oko kuhle. Ngoko ke, sonke sifanele sizibuze: ‘Ngaba ikrele lam libukhali okanye lilele umhlwa? Ngaba ndinengxaki yokukhumbula izibhalo zeBhayibhile endinokuhlasela ngazo?’ Masihlale sinemikhwa emihle yofundisiso lobuqu lweBhayibhile size ngaloo ndlela simchase uMtyholi.—Efese 4:22-24.
19. Ziziphi iinzuzo esinokuzifumana xa sizibhokoxa kufundisiso lobuqu?
19 UPawulos wabhala: “Sonke iSibhalo siphefumlelwe nguThixo kwaye siyingenelo ekufundiseni, ekohlwayeni, ekulungelelaniseni izinto, ekuqeqesheleni ebulungiseni, ukuze umntu kaThixo awufanelekele aze awuxhobele ngokupheleleyo wonke umsebenzi olungileyo.” Ukuba siwathabatha nzulu amazwi kaPawulos aya kuTimoti, sinokomelela ngokomoya yaye sinokuphumelela ngakumbi kubulungiseleli. Abadala bokomoya nezicaka zolungiselelo banokuba yinzuzo ebandleni, yaye sonke sinokuhlala siqinile elukholweni.—2 Timoti 3:16, 17; Mateyu 7:24-27.
[Imibhalo esemazantsi]
a Ngokuqhelekileyo, umntu osandul’ ukuba nomdla ofundisisa incwadana enemifanekiso ethi Okufunwa NguThixo uya kudlulela kwincwadi ethi Ulwazi Olukhokelela Kubomi Obungunaphakade, zombini ezipapashwe ngamaNgqina kaYehova. Amacebiso anikelwa apha aya kususa imiqobo nto leyo enokwenza loo mntu enze inkqubela ngokomoya.
b Ipapashwe ngamaNgqina kaYehova. Abo baneInsight on the Scriptures ngolwimi lwabo basenokukhangela kuMqulu 2, kumxholo othi “Jehovah (Yehova).”
c Abaguquleli abaliqela besiSpanish nesiCatalonian baye bohluka ngokuphawulekayo ekuguquleleni kwabo iTetragrammaton yesiHebhere, besebenzisa igama elithi “Yavé,” “Yahveh,” “Jahvè” nelithi “Jehová.”
d Ipapashwe ngamaNgqina kaYehova.
e Ipapashwe ngamaNgqina kaYehova.
Ngaba Usakhumbula?
• Ziziphi izinto ezifaka isandla kufundisiso lobuqu oluphumelelayo?
• Yiyiphi impazamo eyenziwa ngabaguquleli beBhayibhile abaninzi ngokuphathelele igama likaThixo?
• Ziziphi izibhalo zeBhayibhile obunokuzisebenzisa ukubhenca imfundiso kaBathathu Emnye?
• Yintoni esimele siyenze ukuze sizikhusele kumaqhinga kaSathana, enoba besingamaKristu okwenyaniso kangangeminyaka emininzi?
[Imifanekiso ekwiphepha 19]
Ukuze ube nofundisiso lobuqu oluphumelelayo, ufanele ube kwindawo efanelekileyo nezolileyo
[Imifanekiso ekwiphepha 23]
Ngaba “ikrele” lakho libukhali okanye lilele umhlwa?