Imibuzo Evela Kubafundi
Ngaba sifanele sigqibe kwelokuba oko kuthethwa kwiSityhilelo 20:8 kuthetha ukuba uSathana uya kulahlekisa inkitha yabantu kuvavanyo lokugqibela?
ISityhilelo 20:8 sichaza ukuhlasela kukaSathana okokugqibela abantu abaphila emhlabeni ekupheleni kweminyaka eliwaka yolawulo loBukumkani bukaMesiya. Ithetha ngoSathana, le ndinyana ithi: “Aphume aye kulahlekisa iintlanga ezikwiimbombo zone zomhlaba, uGogi noMagogi, abahlanganisele emfazweni. Inani lingangentlabathi yaselwandle.”
Phezu kwako nje ukuhambela phambili kwezinto nezixhobo ezisetyenziswa zizazinzulu, “intlabathi yaselwandle” ayaziwa ukuba ingakanani. Ngenxa yoko, kunokuthiwa eli binzana lithetha inani elingaziwayo nelingenakubaleka. Kodwa ngaba kuthetha inani elikhulu ngokungathethekiyo, elingenakubaleka, okanye kuthetha nje inani elingaziwayo kodwa elikhulu?
EBhayibhileni, ibinzana elithi “intlabathi yaselwandle” lisetyenziswa ngeendlela ezahlukahlukeneyo. Ngokomzekelo, kwiGenesis 41:49, sifunda oku: “Waqhubeka uYosefu efumba ukudla okuziinkozo ngezixa ezikhulu kakhulu, njengentlabathi yaselwandle, bada ekugqibeleni bayeka nokuzibala, kuba zazingenakubalwa.” Eyona nto ibethelelwayo apha kukungabi nakubaleka. Ngokufanayo, uYehova wathi: “Kanye njengoko umkhosi wamazulu ungenakubalwa, nentlabathi yolwandle ingenakulinganiswa, ngoko ndiya kuyandisa imbewu kaDavide umkhonzi wam.” Njengoko ngokuqinisekileyo iinkwenkwezi zezulu nentlabathi yolwandle zingenakubaleka, ngokuqinisekileyo uYehova wayeya kusizalisekisa isithembiso sakhe kuDavide.—Yeremiya 33:22.
Ngokufuthi ibinzana elithi ‘intlabathi yaselwandle’ libhekisela kwinto enkulu okanye kwizinto ezininzi gqitha. AmaSirayeli eGiligali oyikiswa ngumkhosi omkhulu wamaFilisti owawuhlanganisene eMikimashe, owawufana ‘nentlabathi eselunxwemeni lolwandle ukuba mninzi.’ (1 Samuweli 13:5, 6; ABagwebi 7:12) Yaye “uThixo waqhubeka emnika uSolomon ubulumko nokuqonda ngomlinganiselo omkhulu kakhulu nobubanzi bentliziyo, njengentlabathi eselunxwemeni lolwandle.” (1 Kumkani 4:29) Nangona kwimeko nganye kwakubhekiselwa kwinani elikhulu, kodwa lalilinganiselwe.
“Intlabathi yaselwandle” inokumela inani elingaziwayo, kungathethi ukuba likhulu kakhulu. UYehova wathi kuAbraham: “Ngokuqinisekileyo ndiya kukusikelela yaye ngokuqinisekileyo ndiya kuyandisa imbewu yakho njengeenkwenkwezi zasemazulwini nanjengentlabathi eselunxwemeni lolwandle.” (Genesis 22:17) Ephinda esi sithembiso kumzukulwana ka-Abraham uYakobi, uYehova wasebenzisa ibinzana elithi “njengamasuntswana othuli lomhlaba,” yaye uYakobi walichaza njengelithi “njengentlabathi yolwandle.” (Genesis 28:14; 32:12) Ekuhambeni kwexesha, ngaphandle kukaYesu Kristu, “imbewu” ka-Abraham iye yaba li-144,000, uYesu ayibiza ngokuba ‘ngumhlambi mncinane.’—Luka 12:32; Galati 3:16, 29; ISityhilelo 7:4; 14:1, 3.
Sifunda ntoni kule mizekelo? Sifunda ukuba ibinzana elithi “njengentlabathi yolwandle” alisoloko lithetha inani elingenakubaleka, elikhulu gqitha; yaye alisoloko lisetyenziswa ukucacisa into enkulu kakhulu nengathethekiyo. Lidla ngokumela inani elingaziwayo kodwa elinokubalwa. Ngenxa yoko, kusengqiqweni ukukholelwa ukuba isihlwele esinemvukelo esixhasa uSathana kuhlaselo lwakhe lokugqibela kubantu bakaThixo, asiyi kuba sikhulu ngokungathethekiyo, kodwa siya kuba sikhulu ngokwaneleyo ukuze sibe yingxaki. Noko ke, eli nani alaziwa okwangoku.