Imikrolo Ehambayo YaseNamibia

NGUMBHALELI KAVUKANI! EMZANTSI AFRIKA

ISIMBO segcisa sihlala sitshintsha, ukanti umphumo uyancumisa. Into ekukrolwa kuyo yintlabathi. Ngubani ke umkroli? Ngumoya, obumba iinduli zentlabathi ezihambayo zimile ngendlela ekhethekileyo. Mhlawumbi indlela eqhelekileyo yemile okweceba. Icala “lomkrolo” elijonge ngasemoyeni ekugqibeleni liyathambeka kancinane. Icala elifulatheleyo liqhina kwaye lifutshane. Incochoyi yale nduli ikhangeleka ibukhali okwencaluba, nangona unokuyenza buthuntu ngokuyikhaba nje kancinane ngesihlangu.

INtlango iNamib ekumzantsi-ntshona weAfrika yeyona ndawo ifanelekileyo yokubona le mikrolo ihambayo. Iyenye yeendawo ezineenduli zentlabathi eziphakamileyo, ezinokufikelela ubude beemitha ezingama-400. Noko ke, iNamib le incinane ngobukhulu kuneentlango ezinkulu zehlabathi. Iziikhilomitha ezili-160 ukusuka kuLwandlekazi lweAtlantiki ukuya kutsho kumbindi welizwe elo, yaye iziikhilomitha ezili-1 900 ubude.

Amanye Amagcisa Akulo Msebenzi

Umoya ayikokuphela kwegcisa elikhoyo kule ‘ndawo yobugcisa’ isemagqagaleni. Xa sizihlolisisa ezi nduli zentlabathi sinokubona ezinye iindlela ezikhethekileyo zamanye amagcisa. Ngokomzekelo, usenokubona into ekhangeleka ngathi lityathanga elide, elihle, eliphoswe nje ngokungenankathalo entlabathini. Ukuba ulinda ngokwaneleyo, usenokude uwabone amagcisa esenza umsebenzi wawo. Eli “tyathanga” lenziwe yimizila eshiywe ngooqongqothwane xa bebenqumla kule ntlabathi ebusuku. Kude kufuphi neli ‘tyathanga legolide’ kukho umkrozo olungeleleneyo woko kubonakala ngathi yimingxuma emincinane kule ntlabathi. Nale yimizila yeenyawo, eshiywe luhlobo oluthile lwentuku xa ibitsibatsiba isiya kwindawo yayo. Ngokukhawuleza uyabona ukuba le ndawo yobugcisa isemagqagaleni, ikhangeleka iyinkqantosi inyakazela zizinto eziphilayo.

Ngasemantla, kude kufuphi neSkeloton Coast, usenokubona umsebenzi wamanye amagcisa ale ntlango. Ayayidlakazelisa le ntlabathi, nomsebenzi wawo awumhle kangako. Khawukhangele! Nango egabadula ukuhla kuloo nduli yentlabathi. Ngokuqinisekileyo ayayithanda le nto ayenzayo. Ezi zidalwa zikhulu zehla zigqabadula kule ntlabathi ngamendu amangalisayo, zishiya intlabathi iphephethekela kumacala onke. Zinganelisekanga nje kukubaleka, kwakhona ziyatshibiliza nokutshibiliza, zirhuqa imilenze yazo yangasemva kwaye zivula imisele entlabathini. Ziyagxalathelana ukuya kutsho kwiqula elikufutshane, zize zitsibele kulo, zigxampuze okwabantwana abonwabileyo. La magcisa, ziindlovu, ezinobunzima obunokuba ziitoni ezintandathu inye!

Elinye igcisa elibangel’umdla nelineendlela ezingaqhelekanga, nangona lingekho ndlongondlongo lirhamba iPéringuey. Indlela elizoba ngayo entlabathini ikhangeleka ngathi liqela leenduku ezigosogoso. Le nyoka ishiya le mizila njengoko irhubuluza ngendlela engaqhelekanga isiya phambili. Ngequbuliso umzila uyaphela, yaye irhamba liyanyamalala. Liye phi ke ngoku? Ukuba ujonga ngenyameko, uya kubona amehlo amabini ekuthe ntsho kuloo ntlabathi. Wonke umzimba wenyoka uzulumbelwe entlabathini. Ngaloo ndlela igquke umkhondo, ilindele ngomonde isidlo—ngokuqhelekileyo esidla ngokuba licikilishe elidlulayo.

Kukho nomnye umzobo entlabathini ongemhle kangako. Ngumzila wamavili amakhulu, oshiywe sisithuthuthu esinamavili amathathu esenzelwe ngokukhethekileyo ukuhamba kumhlaba onje ngalo. Nabantu ngokwabo bashiye eyabo imizila.

Igcisa Eliguquguqukayo

Nazo ezinye izilwanyana, ezininzi kakhulu ukuba singazikhankanya zonke, zishiye eyazo imizila kule ntlabathi. Ezi ziquka imikhombe iingonyama, iindlulamthi, kunye noodyakalashe, ezinokubonwa kwipaki yezilwanyana iSkeleton Coast nakwezinye iindawo.

Kodwa umoya ligcisa eliyintloko. Nguwo ogqiba ngenkangeleko yale ndawo yobugcisa yaye uyiguquguqula ngendlela othanda ngayo. Usoloko usenza utshintsho. Ukuba ubuyela kule ndawo yobugcisa emva konyaka ukususela ngoku, ubusenokuphawula ukuba ezinye zeenduli zentlabathi zifuduswe kangangeemitha ezingama-30 ngoxa ubungekho! Oku koko imimoya yaseNamibia inokukwenza.

[Imaphu ekwiphepha 17]

(Ukuba ufuna inkcazelo ehlahlelwe kakuhle, yiya kwimpapasho)

AFRICA

NAMIBIA

[Umfanekiso okwiphepha 16]

Uhlobo oluthile lwentuku

[Inkcazelo Ngomfanekiso okwiphepha 16]

UDes noJen Bartlett