Ubuhle Bendalo KaYehova

“Intabalala Yobutyebi Beelwandle”

EKUTSHONENI kwelanga kubetha impepho epholileyo elwandle, yaye amaza amana ebetheka elunxwemeni. Ingxolo yala maza itsala abo bathonteleka elwandle beze kuphumza ingqondo.a

Zonke iilwandle ezisemhlabeni zihamba ziye kuma ngonxweme. Enoba amaza olwandle angalatyuza aye kuma phi, akanakuze adlulele ngaphaya kwentlabathi. Le yindlela uMdali awadala ngayo. Ethetha ngaye, uThixo uthi ‘ubeke intlabathi yangumda wolwandle.’ Wongezelela athi: “Nangona amaza alo elatyuza, sekunjalo akanakoyisa; yaye nangona exokozela, sekunjalo akanakudlula.”—Yeremiya 5:22; Yobhi 38:8; INdumiso 33:7.

Eneneni umhlaba usesona sijikelezi-langa sizaliswe ngamanzi, ngaphezu kwaso nasiphi na esinye. Ngaphezu kwama-70 ekhulwini omhlaba azaliswe ngamanzi. Xa uYehova wayelungiselela ukuba umhlaba uhlalwe ngabantu, wathi: “Amanzi angaphantsi kwamazulu makabuthelane ndawonye kuze kuvele indawo eyomileyo.” Yaye “kwaba njalo.” Ingxelo yongezelela ngelithi: “UThixo wayibiza indawo eyomileyo ngokuthi nguMhlaba, kodwa amanzi abuthelene ndawonye wawabiza ngokuthi ziiLwandle. Ngoko ke, uThixo wabona ukuba kulungile.” (Genesis 1:9, 10) Iilwandle zinceda entwenini?

Ngeendlela ezininzi ezimangalisayo, amanzi eelwandle ayelungiselelwe ukusinceda sihlale siphila. Ngokomzekelo, amanzi ayakwazi ukugcina ubushushu. Ngaloo ndlela, iilwandlekazi zinceda ekugcineni ubushushu, ize loo nto ibangele ukuba singabulawa yingqele ebusika.

Ikho nenye indlela amanzi azixhasa ngayo izinto eziphilayo. Anokunyibilikisa izinto ezininzi kunalo naluphi na olunye ulwelo. Ekubeni ubomi buxhomekeke ekudibaneni kwemichiza, amanzi ayafuneka ukuze anyibilikise aze adibanise le michiza. Imichiza emininzi efumaneka kwizinto eziphilayo inamanzi. Incwadi ethi The Sea ithi: “Zonke izinto eziphilayo, nkqu nezityalo nezilwanyana eziphila emhlabeni, zixhomekeke emanzini avela kwiilwandlekazi.”

Enye indlela eziluncedo ngayo iilwandlekazi zomhlaba kukucoca umoya. Izidalwa ezincinane zaselwandle zifunxa ikharbhon diokside zize zikhuphe ioksijini. Ngokutsho komnye umphengululi, “ama-70 ekhulwini eoksijini eyongezwa emoyeni nyaka ngamnye, avela kwizidalwa ezincinane zaselwandle.”

Kanti elwandle kukwafumaneka amayeza okunyanga izifo ezithile. Kangangeenkulungwane, incidi ephuma kwiintlanzi ibisetyenziswa njengeyeza. Icod-liver oil kudala isetyenziswa ngabantu. Kutshanje, kuye kwasetyenziswa imichiza yeentlanzi nezinye izidalwa zaselwandle ukuze kunyangwe isifo sesifuba, kuliwe iintsholongwane kwakunye nomhlaza.

Kukhe kwenziwa imizamo kukhangelwa indlela ezixabiseke ngayo izinto eziselwandle. Nakuba bengakhange beze neziphumo eziqinisekileyo, abaphengululi baqikelela ukuba phantse isibini kwisithathu sezinto eziphilayo ezixabisekileyo zivela kwiilwandlekazi. Oku kungqina ukuba iilwandle zazidalelwe injongo—ukuxhasa ubomi. Loo njongo ivisisana kanye noko iBhayibhile ikubiza ngokuba ‘yintabalala yobutyebi beelwandle’!—Duteronomi 33:19.

NguYehova omele azukiswe njengoMyili Omkhulu noMenzi wobu butyebi. UNehemiya washukumiseleka ukuba amdumise ngala mazwi alandelayo: “Wena unguYehova wedwa; wena wenze amazulu, . . iilwandle nako konke okukuzo; yaye zonke uzigcine ziphila.”—Nehemiya 9:6.

[Umbhalo osemazantsi]

[Ibhokisi/Imifanekiso ekwiphepha 9]

Amanzi, Umoya Namaza

Amanzi nomoya abangela ukuba amaza amakhulu antlaleke ngamandla kumawa anamatye, kanye njengawaseKhalifoniya, eUnited States. Amaza ahombisa iilwandlekazi, ekwalulo nophawu lwamandla azo. Kwakhona asikhumbuza amandla oMdali amangalisayo. UYehova ngulowo “uhamba phezu kwamaza amakhulu olwandle.” “Ngamandla akhe uzamazamisa ulwandle, yaye ngokuqonda kwakhe waphule umhlaseli wamqoba.” (Yobhi 9:8; 26:12) Enyanisweni, “ngaphezu kwezandi zamanzi amaninzi, amaza anobungangamsha olwandle, uYehova uyingangamsha kwindawo ephakamileyo.”—INdumiso 93:4.

Imifanekiso Emihle Yentlabathi

Maxa wambi intlabathi eselunxwemeni iba nemiwewe ebukekayo, njengale ikunxweme lwaseNamibia, kumazantsi eAfrika. Intlabathi ibhudlwa ngumoya kuze kudaleke imiwewe ethi ndijonge. Ngoxa eminye yale miwewe inokubonakala iziingqumbana nje, eminye ide ibe ziimitha ezingama-400 ukuphakama. Ubuninzi baloo ntlabathi businceda siqonde amazwi eBhayibhile athi “njengentlabathi eselunxwemeni lolwandle.” Isetyenziswa xa kuchazwa into ekunzima gqitha ukuyiqonda ukuba ingakanani. (Genesis 22:17) Siyakhwankqiswa yimisebenzi yoMdali, owadala intlabathi enjalo elunxwemeni lolwandle olugqumayo.

[Umfanekiso okwiphepha 9]

Unxweme olungasentshonalanga, iTheku elikhulu laseBiafra, eCameroon