Uyakhumbula Na?

Ngaba uye wakuvuyela ukufunda iinkupho zakutshanje zeMboniselo? Ukuba kunjalo, khawubone ukuba unokuyiphendula kusini na le mibuzo ilandelayo:

• “Amandla okucinga” anokukulondoloza njani? (IMizekeliso 1:4)

Anokusinceda siphawule iingozi zokomoya esijamelana nazo size sithabathe inyathelo elifanelekileyo, njengokuphepha izilingo zokuziphatha kakubi ngokwesini emsebenzini. Asinceda sikwazi ukubona ukuba abazalwana bethu abangamaKristu abafezekanga, nto leyo enokusinceda sikuphephe ukwenza izinto ngokungxama xa sikhutyekiswe ngothile. Kwakhona anokusinceda sikwazi ukuphepha ingcinezelo yokufuna izinto eziphathekayo nto leyo enokusenza siphambuke ngokomoya.—8/15, iphepha 21-4.

• Ubani unokuba luncedo njani njengommelwane?

Iindlela ezimbini ubani anokuba ngummelwane olungileyo ngazo kukuba akulungele ukupha yaye akwamkele ngoxabiso oko akufumanayo. Kuyinto exabisekileyo ukuba ngummelwane olungileyo xa kusehla iintlekele. AmaNgqina kaYehova azabalazela ukuba ngabamelwane abalungileyo ngokulumkisa abanye ngesiganeko esiza kwenzeka kamsinya, ukushenxisa kukaThixo ubungendawo.—9/1, iphepha 4-7.

• Ngokutsho kweBhayibhile, ngoobani iingcwele zokwenene, yaye zinokubanceda njani abantu?

Onke amaKristu okuqala ayeziingcwele zokwenene, okanye abangcwele, emiselwe nguThixo, kungekhona abantu okanye iintlangano ezithile. (Roma 1:7) Xa sele bevuselwe kubomi basezulwini, abo bangcwele baya kuncedisa uKristu ukusikelela abo bathembekileyo emhlabeni. (Efese 1:18-21)—9/15, iphepha 5-7.

• Ukwazi okuthile ngeziganeko zemidlalo kwiGrisi yamandulo kunokumnceda ngantoni umKristu?

UPetros noPawulos babezekelisa ngemidlalo yamandulo kwiincwadi abazibhalayo. (1 Korinte 9:26; 1 Timoti 4:7; 2 Timoti 2:5; 1 Petros 5:10) Kwimbaleki yamandulo, kwakubalulekile ukuba nomqeqeshi ofanelekileyo, ukuzeyisa, nokwalathisa imigudu yayo kakuhle. Kukwanjalo nangokuphathelele imigudu yokomoya yamaKristu namhlanje.—10/1, iphepha 28-31.

• Ziziphi iinzima nemivuzo yokukhulisela abantwana kwelinye ilizwe?

Abantwana abaninzi bafunda ulwimi olutsha ngokukhawuleza kunabazali babo, bona abanokufumanisa kunzima ukuqonda indlela abantwana babo abacinga nabazenza ngayo izinto. Yaye abantwana banokungaziqondi ngokukhawuleza iimfundiso zeBhayibhile ngolwimi lwabazali babo. Sekunjalo, umanyano lwentsapho lunokomelezwa njengoko abazali befundisa abantwana babo ulwimi lwabo, abanokuthi ngaloo ndlela bazi iilwimi ezimbini baze bazazi zombini iindlela zokuphila.—10/15, iphepha 22-6.

• Kutheni kubalulekile ukufunda ukucela uxolo?

Ukucela uxolo ngokunyanisekileyo kudla ngokuba yeyona ndlela iphumelelayo yokuxolelanisa abantu abangasavaniyo. IBhayibhile inemizekelo emihle ebonisa ukubaluleka kokucela uxolo. (1 Samuweli 25:2-35; IZenzo 23:1-5) Ngokuqhelekileyo, xa abantu ababini bengavisisani, badla ngokutyholana. Noko ke, kuye kufuneke ukuba baxolelane.—11/1, iphepha 4-7.

• Kutheni kuphosakele ukungcakaza, enoba kwenziwa ngemali encinane?

Ukungcakaza kunokubangela impakamo, umoya wokhuphiswano nokubawa, nto ezo iBhayibhile ezigwebayo. (1 Korinte 6:9, 10) Abantu abaninzi abangamakhoboka okungcakaza baqalisa beselula ngokubheja ngemali encinane.—11/1, iphepha 31.

• Ekubeni iincwadi ezininzi zeBhayibhile zazibhalwe ngesiGrike, kutheni kuye kwafuneka ukuba iBhayibhile iguqulelwe ngesiGrike, yaye oko kuye kwaba nayiphi imiphumo?

IsiGrike sezi mini sahluke kakhulu kunesiGrike senguqulelo yeSeptuagint yeZibhalo zesiHebhere nakweso seZibhalo zamaKristu zesiGrike. Ukutyhubela iinkulungwane kuye kwenziwa imizamo eliqela yokuguqulela inxalenye ethile okanye iBhayibhile iphela ngesiGrike sezi mini. Namhlanje, kukho iinguqulelo zeBhayibhile ezimalunga nama-30, ngokuyinxalenye okanye ezipheleleyo, ezinokufundwa ngumGrike oqhelekileyo, enye yazo yiNguqulelo Yehlabathi Elitsha YeZibhalo Ezingcwele, epapashwe ngowe-1997.—11/15, iphepha 26-9.

• Kutheni amaKristu engafanele ahlawule izishumi?

Phantsi koMthetho owawunikwe amaSirayeli amandulo, izishumi yayiyindlela yokuxhasa uhlanga lwabaLevi nokunyamekela abo basweleyo. (Levitikus 27:30; Duteronomi 14:28, 29) Ukufa kukaYesu okulidini kwawuphelisa loo Mthetho nemfuneko yokuhlawula izishumi. (Efese 2:13-15) Kwibandla lokuqala, mKristu ngamnye wayefanele anikele ngoko anako nanjengoko egqibe entliziyweni yakhe. (2 Korinte 9:5, 7)—12/1, iphepha 4-6.

• Ngaba ISityhilelo 20:8 sithetha ukuba kuvavanyo lokugqibela, uSathana uya kulahlekisa abantu abaninzi?

Le ndinyana ithi abo baya kulahlekiswa baya kuba “ngangentlabathi yaselwandle.” EBhayibhileni, eli binzana lidla ngokuthetha inani elingaziwayo, kodwa akuthethi ukuba likhulu kakhulu. Imbewu ka-Abraham, eyayiza kuba “njengentlabathi eselunxwemeni lolwandle,” iye yaba ngabantu abali-144,000, ngaphandle kukaYesu Kristu. (Genesis 22:17; ISityhilelo 14:1-4)—12/1, iphepha 29.