Ibali Lobomi

Ileta Emfutshane Eyaguqula Ubomi Bam

NGOKUBALISWA NGUIRENE HOCHSTENBACH

Oku kwenzeka ngokuhlwa ngoLwesibini ngowe-1972. Ndandineminyaka eli-16 ubudala yaye ndandihambe nabazali bam ukuya kwintlanganiso yonqulo e-Eindhoven, isixeko kwiphondo laseBrabant, eNetherlands. Ndandiziva ndingakhuselekanga yaye ndandinqwenela ukuba kwenye indawo. Andula ke amabhinqa aselula amabini andinika ileta emfutshane eyayisithi: “Molo Irene, singathanda ukukunceda.” Ndandingazi ukuba loo leta yayinokubuguqula ubomi bam. Kodwa ngaphambi kokuba ndibalise okwenzekayo emva koko, mandinixelele okuthile ngemvelaphi yam.

NDAZALWA kwisiqithi saseBelitung, eIndonesia. Ndisazikhumbula ezinye zezandi zeso siqithi sishushu—ukurhashaziswa kwemithi yesundu ngumoya, isandi somlambo okufutshane, ukuhleka kwabantwana abadlala ngasekhaya, kwanesandi somculo owawusekhaya. Ngowe-1960, xa ndandineminyaka emine ubudala intsapho yakowethu yafudukela eNetherlands isuka eIndonesia. Sahamba uhambo olude ngenqanawa, yaye esona sandi ndisikhumbula ngokukhethekileyo sesento yokudlala endandiyithanda nendandiyiphethe—unodoli owayenamagubu. Xa ndandineminyaka esixhenxe ubudala, ndaba sisithulu ngenxa yokugula, yaye ukususela ngoko andiva nasiphi na isandi. Ndiyazikhumbula nje kuphela ezo zandi.

Ukukhula Ndisisithulu

Ngenxa yenyameko nothando lwabazali bam, ekuqaleni ndandingayiqondi imiphumo yokuba sisithulu. Njengomntwana, ndandicinga ukuba kwanesixhobo sam esikhulu sokuva sasihlekisa, nangona sasingandincedi kangako. Ukuze bathethe nam, abantwana basekuhlaleni babebhala phantsi endleleni oko babefuna ukukuthetha yaye ndandibaphendula, nangona ndandingakuva oko ndandikuthetha.

Njengoko ndandikhula, ndaye ndaphawula ukuba ndandahlukile kwabanye abantu. Kwakhona ndaqalisa ukubona ukuba abanye abantu babendihleka kuba ndandisisithulu, ngoxa abanye babezikhetha kum. Ndaqalisa ukuziva ndililolo. Ndaqalisa ukuqonda ukuba kunjani ukuba sisithulu, yaye njengoko ndikhula, ndandiboyika nangakumbi abantu abevayo.

Ukuze ndikwazi ukuya kwisikolo esikhethekileyo sabantu abazizithulu, abazali bam nentsapho yonke salishiya iphondo laseLimburg saza safudukela kwisixeko sase-Eindhoven. Apho, utata wafuna umsebenzi, yaye umnakwethu noodadewethu baya kwisikolo esitsha. Ndinombulelo ngako konke oko bakwenzayo ngenxa yam. Esikolweni, ndafundiswa ukulungelelanisa ilizwi lam nokuthetha ngokucacileyo. Yaye nangona ootitshala bengazange basebenzise iintetho yezandla, abantwana endandifunda nabo bandifundisa.

Ubomi Bam Njengesithulu

Njengoko ndandikhula, abazali bam babezama ngamandla ukuthetha nam, kodwa zazininzi izinto endandingaziqondi. Ngokomzekelo, ndandingazi ukuba abazali bam bafundisisa iBhayibhile namaNgqina kaYehova. Kodwa ndikhumbula ukuba ngenye imini intsapho yakowethu yatyelela indawo eyayinabantu abaninzi ababehleli ezitulweni. Bonke babejonge phambili, maxa wambi beqhwaba izandla, yaye ngamaxesha athile besima ngeenyawo—kodwa ndandingazi ukuba kwakutheni aba bantu besenza konke oko. Kamva, ndafumanisa ukuba ndandikwindibano yamaNgqina kaYehova. Kwakhona abazali bam babedla ngokundisa kwiholo encinane kwisixeko sase-Eindhoven. Ndandiziva ndikhululekile apho kuba wonke umntu wayenobubele yaye intsapho yakowethu yayibonakala yonwabile, kodwa ndandingasazi isizathu sokuba sisoloko sisiya apho. Ngoku ndiyazi ukuba loo holo incinane yayiyiHolo yoBukumkani yamaNgqina kaYehova.

Ngelishwa, kwakungekho mntu owayenokunditolikela ucwangciso. Ngoku ndaqonda ukuba abo babelapho babefuna ukundinceda kodwa babengayazi indlela yokunceda umntu osisithulu. Kwezi ntlanganiso, ndandiziva ndililolo yaye ndandicinga ndisithi, ‘akwaba bendisesikolweni kunokuba ndibe lapha.’ Kodwa kanye xa ndandicinga loo nto, amabhinqa aselula amabini andibhalela ileta kwiphetshana aze andinika. Leyo yiloo leta ekhankanywe ekuqaleni. Ndandingazi ukuba le leta yayiza kuba sisiqalo sobuhlobo obuxabisekileyo obabuya kundenza ndiyeke ukuba lilolo.

Ukuba Nobuhlobo Obuxabisekileyo

UColette noHermine, abandinika loo leta, babekwiminyaka yabo yama-20 ubudala. Kamva ndeva ukuba babeze kwelo bandla lamaNgqina kaYehova endandilityelele njengoovulindlela abathe ngxi, okanye abalungiseleli bexesha elizeleyo. Nangona uColette noHermine babengayazi intetho yezandla, ndandikwazi ukufunda imilebe yabo njengoko babethetha, yaye ngaloo ndlela sasikwazi ukuncokola kakuhle.

Abazali bam bavuya xa uColette noHermine bacela ukufundisisa iBhayibhile nam, kodwa la mabhinqa aselula enza okungakumbi kunoko. Ayesenza konke okusemandleni ukundiguqulela oko kuthethwa ezintlanganisweni kwiHolo yoBukumkani naxa ndandithetha nabanye ebandleni. Ayelungiselela kunye nam oko ndandiza kukuthetha entsimini ngeBhayibhile, yaye ayendinceda ndilungiselele iintetho zabafundi zeSikolo Sobulungiseleli Sobuthixo. Khawufan’ ucinge, ngoku ndaba nenkalipho yokunikela intetho phambi kwabantu abevayo!

Ngapha koko, uColette noHermine baye bandenza ndabathemba. Babenomonde yaye bandiphulaphula. Nangona sasidla ngokuhleka iimpazamo zam, abazange bahlekise ngam, okanye babe neentloni xa ndiphakathi kwabo. Bazama ukuqonda indlela endivakalelwa ngayo baza bandiphatha njengabanye abantu. La mantombazana anobubele andinika isipho esihle—uthando nobuhlobo babo.

Okubaluleke ngakumbi, uColette noHermine bandifundisa ukuba ndimazi uThixo wethu, uYehova, njengomhlobo onokuthenjwa. Bandichazela ukuba uYehova wandibona xa ndandihleli kwiHolo yoBukumkani waza wayiqonda indlela ekuyiyo ukuba sisithulu. Hayi indlela endinombulelo ngayo ukuba uthando lwethu ngoYehova luye lwasenza thina sobathathu saba ngabahlobo! Ngenxa yokundinyamekela kukaYehova, ngothando ndafuzisela uzahlulelo lwam ngokubhaptizwa emanzini ngoJulayi 1975.

Ukuhamba Nomhlobo Okhethekileyo

Kwiminyaka elandelayo, ndaqhelana nabazalwana noodade abangamaKristu abaninzi. Omnye umzalwana waba ngumhlobo wam okhethekileyo, yaye satshata ngowe-1980. Kungekudala emva koko, ndaqalisa ukuba nguvulindlela, yaye ngowe-1994 mna nomyeni wam, uHarry, sabelwa ukuba sibe ngoovulindlela abakhethekileyo kwintsimi yeNtetho Yezandla yesiDatshi. Kunyaka olandelayo, ndajamelana nesabelo esilucelomngeni. Ukuhamba nomyeni wam, ovayo, njengoko wayetyelela amabandla ahlukahlukeneyo njengomveleli wesiphaluka obambeleyo.

Le yindlela endandihlangabezana ngayo naso. Xa sityelela ibandla okokuqala, ngokukhawuleza ndiya kubazalwana noodade abaninzi kangangoko kunokwenzeka ndize ndizazise. Ndiye ndibaxelele ukuba ndisisithulu ndize ndibacele ukuba bandijonge xa bethetha nam yaye bangathethi ngokukhawuleza. Kwakhona ndiye ndizame ukuphendula ngoko nangoko kwiintlanganiso zebandla. Yaye ndiye ndicele nabani na ofuna ukunditolikela kwiintlanganiso nasentsimini ngaloo veki.

Le ndlela isebenza kakuhle kangangokuba maxa wambi, abazalwana noodade baye balibale ukuba andiva, nto leyo iye ihlekise ngamanye amaxesha. Ngokomzekelo, baye bandixelele ukuba baye bandibona ndihamba edolophini, baza bandibulisa bendikhalisela ixilongo lemoto, kodwa andababulisa. Maxa wambi nam ndiye ndilibale ukuba andiva—njengaxa ndizama ukuhlebela umyeni wam into eyimfihlelo. Xa ndimbona ngokukhawuleza esothuka, ndiye ndiqonde ukuba “bendihlebela” phezulu.

Abantwana baye babe luncedo ngendlela engalindelekanga. Kwelinye ibandla esasilityelele okokuqala, inkwenkwe eneminyaka esithoba ubudala yaphawula ukuba bambi kwiHolo yoBukumkani babethingaza ukuthetha nam, yaza yagqiba kwelokuba yenze okuthile. Yeza kum, yanditsala ngesandla, yandimisa kanye phakathi kweHolo yoBukumkani, yaza yakhwaza isithi, “Ndinganazisa kuIrene—usisithulu!” Abo babekho beza kum baza bazazisa.

Njengoko ndihamba nomyeni wam kumsebenzi wesiphaluka, ndiya ndisiba nabahlobo abangakumbi. Hayi indlela obahluke ngayo ubomi bam namhlanje kuneminyaka eyadlulayo endandiziva ndililolo! Ukususela ngengokuhlwa uColette noHermine abandinika ngayo la leta, ndiye ndabona indlela ubuhlobo obunamandla ngayo ndaza ndadibana nabantu abaye baba ngabakhethekileyo kum. Ngaphezu kwako konke, ndiye ndazi uYehova, oyena Mhlobo uxabisekileyo kubo bonke. (Roma 8:38, 39) Hayi indlela loo leta emfutshane eyabutshintsha ngayo ubomi bam!

[Umfanekiso okwiphepha 24]

Ndiyasikhumbula isandi sento yam yokudlala endandiyithanda

[Imifanekiso ekwiphepha 25]

Ndisentsimini yaye ndikunye nomyeni wam, uHarry