Isibingelelo—Sinayiphi Indima Kunqulo?

NGABA isibingelelo usijonga njengento ebalulekileyo kunqulo lwakho? Kwabaninzi abahamba iicawa zeNgqobhoko, isibingelelo sisenokuba yeyona nto ibalulekileyo. Ngaba wakhe waqwalasela oko kutyhilwa yiBhayibhile ngokusetyenziswa kwezibingelelo kunqulo?

Isibingelelo sokuqala esikhankanywe eBhayibhileni seso sakhiwa nguNowa ukuze anikele idini lesilwanyana emva kokuba ephumile kumkhombe owabasindisa kuMkhukula.a—Genesis 8:20.

Emva kokudutywa kweelwimi eBhabheli, abantu basasazeka emhlabeni wonke. (Genesis 11:1-9) Benotyekelo lokwemvelo lokunqula, abantu bafuna ukusondela kuThixo, ababengaqhelananga naye, ‘bemphuthaphutha’ ngokungathi baziimfama. (IZenzo 17:27; Roma 2:14, 15) Ukususela kumhla kaNowa, abantu abaninzi baye bakhela izithixo zabo izibingelelo. Iinkonzo nabantu baye basebenzisa izibingelelo kunqulo lobuxoki. Ekubeni behlukanisiwe noThixo oyinyaniso, bambi baye basebenzisa izibingelelo ekwenzeni izithethe ezingamasikizi eziquka ukubulawa kwabantu nabantwana. Xa bamshiya uYehova, abanye ookumkani bakwaSirayeli bakhela oothixo babahedeni izibingelelo, njengoBhahali. (1 Kumkani 16:29-32) Kodwa kuthekani ngokusetyenziswa kwezibingelelo kunqulo lokwenyaniso?

Izibingelelo Nonqulo Lokwenyaniso KwaSirayeli

Emva kwexesha likaNowa, amanye amadoda athembekileyo akha izibingelelo ukuze anqule uThixo oyinyaniso, uYehova. UAbraham wakha izibingelelo kwaShekem, kufuphi neBheteli, eHebron, nakwiNtaba yeMoriya, apho wabingelela khona ngenkunzi yegusha awayinikwa nguThixo kunokubingelela ngoIsake. Kamva, uIsake, uYakobi noMoses bakha izibingelelo ngokuzithandela ukuze bazisebenzise ekunquleni uThixo.—Genesis 12:6-8; 13:3, 18; 22:9-13; 26:23-25; 33:18-20; 35:1, 3, 7; Eksodus 17:15, 16; 24:4-8.

Xa uThixo wabanika uMthetho abantu bakwaSirayeli, wabayalela ukuba bakhe umnquba, intente encinane, ekwabizwa ngokuba ‘yintente yokuhlangana,’ njengesazulu selungiselelo lokusondela kuye. (Eksodus 39:32, 40) Umnquba okanye intente yayinezibingelelo ezimbini. Eso somnikelo otshiswayo, esasenziwe ngomnga saza safulelwa ngobhedu, sasibekwe emnyango yaye sasisetyenziselwa amadini ezilwanyana. (Eksodus 27:1-8; 39:39; 40:6, 29) Isibingelelo sesiqhumiso, naso esasenziwe ngomnga kodwa sifulelwe ngegolide, sona sasibekwe ngaphakathi kumnquba, ngaphambi komkhusane weYona Ngcwele. (Eksodus 30:1-6; 39:38; 40:5, 26, 27) Kwakutshiswa isiqhumiso esikhethekileyo kabini ngosuku, ekuseni nangokuhlwa. (Eksodus 30:7-9) Itempile enkulu eyayakhiwe nguKumkani uSolomon yayenziwe ngendlela efanayo nomnquba, inezibingelelo ezimbini.

‘Intente Yokwenyaniso’ Nesibingelelo Sokomfuziselo

Xa uYehova wanika amaSirayeli uMthetho, wawanika okungakumbi kunemithetho nje yokulawula ubomi babantu bakhe neyokusondela kuye ngamadini nangomthandazo. Amalungiselelo amaninzi ayequka oko umpostile uPawulos awayekubiza ngokuba “yintsobi,” ‘umzekeliso,’ okanye ‘isithunzi sezinto zasezulwini.’ (Hebhere 8:3-5; 9:9; 10:1; Kolose 2:17) Ngamanye amazwi, iinkalo ezininzi zoMthetho azizange ziwakhokele amaSirayeli kuphela nje de kufike uKristu, kodwa zazibonisa iinjongo zikaThixo ezaziya kuzaliseka ngoYesu Kristu. (Galati 3:24) Ewe, iinkalo zoMthetho zazinentsingiselo yesiprofeto. Ngokomzekelo, imvu yePasika, igazi layo elalisetyenziswa njengomqondiso wokusinda kwamaSirayeli, yayifuzisela uYesu Kristu. ‘UyiMvana kaThixo esusa isono sehlabathi,’ igazi lakhe elaphalala ukuze kukhululwe thina esonweni.—Yohane 1:29; Efese 1:7.

Izinto ezininzi eziphathelele umnquba nenkonzo yasetempileni zazifanekisela izinto zokomoya. (Hebhere 8:5; 9:23) Enyanisweni, uPawulos ubhala ‘ngentente yokwenyaniso, emiswe nguYehova, kungekhona umntu.’ Uhlabela mgama esithi: “UKristu weza njengombingeleli omkhulu wezinto ezilungileyo eziye zenzeka, ngentente enkulu ngakumbi negqibelele ngakumbi engenziwanga ngazandla, oko kukuthi, engeyoyale ndalo.” (Hebhere 8:2; 9:11) ‘Intente enkulu ngakumbi negqibelele ngakumbi’ yayililungiselelo letempile enkulu yokomoya kaYehova. Ulwimi olusetyenziswe kwiZibhalo lubonisa ukuba itempile yokomoya lilungiselelo labantu lokusondela kuYehova ngesizinzi sedini lentlawulelo likaYesu Kristu.—Hebhere 9:2-10, 23-28.

Ukufunda kwiLizwi likaThixo ukuba amanye amalungiselelo nemigaqo yoMthetho ayefuzisela izinto zokomoya ezinkulu nezinentsingiselo engakumbi ngokuqinisekileyo kwakha ukholo lokuba iBhayibhile iphefumlelwe. Kwakhona kwandisa uxabiso ngobulumko bukaThixo obubonakaliswa ngokukhethekileyo kwiZibhalo.—Roma 11:33; 2 Timoti 3:16.

Isibingelelo seminikelo etshiswayo naso sinentsingiselo yesiprofeto. Kubonakala ukuba sifuzisela “intando” kaThixo, okanye ukulungela kwakhe ukwamkela idini likaYesu lomntu ofezekileyo.—Hebhere 10:1-10.

Kamva kwincwadi yamaHebhere, uPawulos uthetha la mazwi abangel’ umdla: “Sinesibingelelo abangenagunya lakutya kuso abo benza inkonzo engcwele ententeni.” (Hebhere 13:10) Sisiphi isibingelelo awayebhekisela kuso?

AmaKatolika amaninzi athi isibingelelo esikhankanywe kumaHebhere 13:10 seso sisetyenziswa kwiEucharist, “umthendeleko” wokuhlaziya idini likaKristu ebudeni beMisa. Kodwa usenokubona ngokusuka kumongo ukuba isibingelelo uPawulos awayethetha ngaso sesokomfuziselo. Abaphengululi abahlukahlukeneyo bathi “isibingelelo” ekuthethwa ngaso kule ndinyana sesokomfuziselo. KuGiuseppe Bonsirven, umJesuit, “oko kuhambisana kakuhle nendlela efuziselayo yale ncwadi yompostile [eya kumaHebhere].” Uthi: “Ngolwimi lwamaKristu, igama elithi ‘isibingelelo’ ekuqaleni lalisetyenziswa ngengqiqo engokomoya yaye kuphela kusemva kwexesha likaIrenaeus, yaye ngokukhethekileyo emva kwelikaTertullian noSt. Cyprian, elaqala eli gama ukusetyenziswa kwieucharist yaye ngokukhethekileyo kumthendeleko we-eucharist.”

Njengoko kuchaziwe kwiphephancwadi lamaKatolika, ukusetyenziswa kwesibingelelo kwanda “ngexesha likaConstantine” xa “kwakhiwa izindlu zecawa.” IRivista di Archeologia Cristiana (Christian Archaeology Review) yathi: “Ngokuqinisekileyo kwiinkulungwane ezimbini zokuqala, akukho mntu wayenokuthetha ngendawo ekhethekileyo yonqulo kodwa kwakukho iindibano zonqulo ezaziqhutywa kumagumbi amakhaya abantu . . . , amagumbi awayesithi emva kokuphela komsitho wonqulo ngoko nangoko asetyenziselwe injongo yawo yangaphambili.”

Ukusetyenziswa Kwesibingelelo KwiNgqobhoko

Ulindixesha wamaKatolika iLa Civiltà Cattolica uthi: “Isibingelelo asiyondawo nje ebalulekileyo kwisakhiwo secawa kodwa nakwiCawa ngokwayo.” Sekunjalo, uYesu Kristu akazange ayalele ukuba kwenziwe namnye umsitho wonqulo esibingelelweni; yaye engazange ayalele nabafundi bakhe ukuba benze imisitho ethile besebenzisa sona. Ukukhankanya kukaYesu isibingelelo kuMateyu 5:23, 24 nakwezinye iindawo kubhekisela kwizenzo zonqulo ezazixhaphakile kumaYuda, kodwa ayikho indawo apho axelela abalandeli bakhe ukuba banqule uThixo besebenzisa isibingelelo.

Umbhali-mbali ongumMerika uGeorge Foot Moore (1851-1931), wabhala: “Iinkalo eziphambili zonqulo lwamaKristu zazisoloko zifana, kodwa ekuhambeni kwexesha izithethe eziqhelekileyo ezichazwa nguJustin phakathi kwenkulungwane yesibini zazinobucukubhede obuninzi.” Izithethe zamaKatolika nemisitho yonqulo kawonke-wonke mininzi yaye ineenkcukacha ezininzi kangangokuba ufanele uzifundiswe esikolweni—kwizikolo zonqulo zamaKatolika. Lo kaMoore uhlabela mgama esithi: “Olu tyekelo olwaluqheleke kuyo yonke imisitho, lwakhuthazwa ngakumbi yimpembelelo yeTestamente Endala xa abefundisi abangamaKristu babegqalwa njengabo babengena ezikhundleni zababingeleli bangaphambili. Imiwunduzo eyokoyoko yombingeleli omkhulu, nezambatho zomsitho zabanye abefundisi, ungcelele olungcwele, amaqela emvumi ezingabaLevi acula iingoma zendumiso, imisi yeziqhumiso ezitshangatshangiswayo—zonke ezi zinto zabonakala ngathi ziyalelwe nguThixo njengendlela yokunqula, nto leyo eyabangela ukuba icawa ixelise ubuyokoyoko bamasiko amandulo onqulo.”

Usenokothuka ukwazi ukuba izithethe, imisitho, izambatho nezinye izinto ezisetyenziswa kunqulo ziicawa ezahlukahlukeneyo, asizizo iimfundiso zobuKristu ezifumaneka kwiincwadi zeeVangeli, kodwa ngamasiko nezithethe zamaYuda nezabahedeni. IEnciclopedia Cattolica ithi unqulo lwamaKatolika “lwamkela ukusetyenziswa kwesibingelelo kunqulo lobuYuda yaye ngokuyinxalenye kubuhedeni.” UMinucius Felix, umhlalutyi wonqulo wenkulungwane yesithathu kwiXesha Eliqhelekileyo, wabhala esithi amaKristu ‘ayengenazitempile nazibingelelo.’ Intyilalwazi esisichazi magama iReligioni e Miti (Unqulo Neentsomi) ngokufanayo ithi: “AmaKristu okuqala akazange akwamkele ukusetyenziswa kwesibingelelo ukuze ahluke kunqulo lwamaYuda nolwabahedeni.”

Kuba ubuKristu ngokuyintloko babusekelwe kwimigaqo eyayifanele yamkelwe ize isetyenziswe imihla ngemihla nakuwo onke amazwe, kwakungeyomfuneko ukuba kubekho isixeko esingcwele emhlabeni, okanye itempile yokoqobo enezibingelelo, okanye abefundisi abakudidi olukhethekileyo abanxibe izambatho ezikhethekileyo. UYesu wathi: “Liyeza ilixa ekuya kuthi ngalo ningamnquli uBawo kule ntaba okanye eYerusalem. . . . Abanquli bokwenyaniso baya kumnqula uBawo ngomoya nenyaniso.” (Yohane 4:21, 23) Izithethe ezineenkcukacha ezininzi nokusetyenziswa kwezibingelelo ezicaweni ezininzi akuvisisani noko kwathethwa nguYesu ngendlela uThixo oyinyaniso afanele anqulwe ngayo.

[Umbhalo osemazantsi]