IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w03 6/1 iphe. 28-30
  • Ukutshisa Isiqhumiso—Ngaba Kwamkelekile Kunqulo Lokwenyaniso?

No video available for this selection.

Sorry, there was an error loading the video.

  • Ukutshisa Isiqhumiso—Ngaba Kwamkelekile Kunqulo Lokwenyaniso?
  • IMboniselo Evakalisa UBukumkani BukaYehova—2003
  • Imixholwana
  • Amanqaku Afanayo
  • ‘Into Engcwele KuYehova’
  • Isiqhumiso NamaKristu Okuqala
  • Ukutshiswa Kwesiqhumiso Namhlanje
  • Imithandazo ‘Elungiselelwe Njengesiqhumiso’
  • Sinokufunda Ntoni KwiMini Yokuhlawulela?
    Ubomi BamaKristu Nomsebenzi Wokushumayela—Incwadi Yentlanganiso——2020
  • Indlela Yokusondela ‘KuMphulaphuli Wemithandazo’
    IMboniselo Evakalisa UBukumkani BukaYehova—2006
  • Ngaba Imithandazo Yakho ‘Isisiqhumiso’?
    IMboniselo Evakalisa UBukumkani BukaYehova—1999
  • Izinto Esinokuzifunda Kwincwadi YeLevitikus
    IMboniselo Evakalisa UBukumkani BukaYehova (Efundwayo)—2019
Khangela Okunye
IMboniselo Evakalisa UBukumkani BukaYehova—2003
w03 6/1 iphe. 28-30

Ukutshisa Isiqhumiso—Ngaba Kwamkelekile Kunqulo Lokwenyaniso?

“OOTHIXO bayazithanda iziqholo ezinuka kamnandi.” Leyo yayiyintetho eqhelekileyo kumaYiputa amandulo. Ukutshisa isiqhumiso kwakuyinxalenye yonqulo lwawo. Ekholelwa ukuba oothixo abakude, amaYiputa ayetshisa isiqhumiso suku ngalunye kwizibingelelo ezisetempileni nasezindlwini zawo kwanaxa eqhuba imicimbi yawo yoshishino. Nezinye iintlanga zazinezithethe ezifanayo.

Yintoni isiqhumiso? Eli gama linokubhekisela kumsi okanye into etshiswayo. Senziwa ngentlaka enuka kamnandi, njengentlaka emhlophe nebhalsam. Ezi zinto ziyagutywa yaye zidla ngokuxutywa nezinongo, intlaka neentyatyambo ukuze zivelise amavumba asetyenziselwa iinjongo ezithile.

Isiqhumiso sasithandwa yaye sixatyiswe gqitha kumaxesha amandulo kangangokuba izinto ezazisetyenziswa xa sisenziwa zaba zizinto ezibalulekileyo kushishino. Abantu ababehambela imicimbi yezoshishino bevela kumazwe akude babephatha ezi zinto. Usenokuba uyakhumbula ukuba unyana omncinane kaYakobi uYosefu wathengiswa kubarhwebi abangamaIshmayeli ‘ababevela eGiliyadi, yaye iinkamela zabo zazithwele intlaka emhlophe nebhalsam nentlaka emnandi, zisendleleni eya kuzothula eYiputa.’ (Genesis 37:25) Isiqhumiso sasithandwa gqitha kangangokuba urhwebo lwentlaka emhlophe, ngokungathandabuzekiyo olwaqalwa ngabarhwebi besiqhumiso, lwavula indlela yokuhamba phakathi kweAsia neYurophu.

Nanamhlanje isiqhumiso sisatshiswa kwimisitho ethile yeenkonzo ezininzi. Kanti, abantu abaninzi bakhetha ukutshisa isiqhumiso emakhayeni abo ukuze nje kunuke kamnandi. AmaKristu afanele akujonge njani ukutshisa isiqhumiso? Ngaba uThixo uyakwamkela kunqulo? Makhe sihlolisise oko kuthethwa yiBhayibhile ngalo mbandela.

‘Into Engcwele KuYehova’

Phakathi kwamaSirayeli amandulo, ukutshisa isiqhumiso kwakungomnye wemisebenzi ebalulekileyo yababingeleli emnqubeni. ICyclopedia kaMcClintock noStrong ithi: “Enyanisweni, kubonakala ukuba ukutshiswa kwesiqhumiso phakathi kwamaHebhere kwakugqalwa njengesenzo sonqulo okanye umbingelelo ongcwele kangangokuba akukho yimbi enye indlela ebhaliweyo awayesisebenzisa ngayo isiqhumiso ngaphandle kwale.”

UYehova uThixo wayalela ukuba kuxutywe izinto ezine zize zitshiswe emnqubeni esithi: “Zithabathele ubulawu: amafutha estorakisi neonika negalebhana yobulawu nentlaka yokuqhumisa esulungekileyo. Mazibe yimilinganiselo elinganayo. Uze wenze ngabo isiqhumiso, umxube oqholiweyo, ngokomenzi wezithambiso, uwugalele ityuwa, usulungeke, ube yinto engcwele. Woyiguba inxalenye yawo ibe ngumgubo ocolekileyo uze uyibeke phambi kweSingqino ententeni yokuhlangana.” (Eksodus 30:34-36) Abaphengululi bathi kamva oorabhi abangamaYuda bongezelela ezinye izinto ukuze zisetyenziswe etempileni.

Ukutshiswa kwesiqhumiso kumnquba kwakuyinto engcwele, yaye kwakusetyenziswa kuphela kunqulo lukaThixo. UYehova wayalela: “Nize ningazenzeli isiqhumiso esinjengeso uya kusenza ngalo mxube. Kuwe simele sibe njengento engcwele kuYehova. Nabani na owenza esinjengaso ukuze anandiphe ivumba laso makanqunyulwe angabikho ebantwini bakowabo.” (Eksodus 30:37, 38) Ababingeleli babetshisa isiqhumiso kabini ngemini kwisibingelelo abasikhethileyo. (2 Kronike 13:11) Yaye ngoMhla Wocamagusho, umbingeleli oyintloko wayetshisa isibingelelo kweYona Ngcwele.—Levitikus 16:12, 13.

UThixo wayengamkeli nawuphi na umbingelelo wesiqhumiso. Wabohlwaya abo babengengobabingeleli ababesithi ngokugabadela batshise isiqhumiso ngokungathi babengababingeleli. (Numeri 16:16-18, 35-40; 2 Kronike 26:16-20) Umbingelelo wesiqhumiso owenziwa luhlanga lwamaYuda wawulisikizi kuYehova xa kwangaxeshanye lwalusenza izenzo zonqulo lobuxoki yaye nezandla zalo zizele ligazi. Ngenxa yohanahaniso lwalo uYehova wathi: “Isiqhumiso—siyinto ecekisekayo kum.” (Isaya 1:13, 15) AmaSirayeli aphambuka kwindlela yonqulo eyayimiselwe nguYehova kangangokuba ayivala itempile aza atshisa iziqhumiso kwezinye izibingelelo. (2 Kronike 28:24, 25) Kwiminyaka kamva isiqhumiso esingcwele sade sasetyenziswa kunqulo olungcolileyo loothixo bobuxoki. Izenzo ezinjalo wayezithiyile uYehova.—Hezekile 16:2, 17, 18.

Isiqhumiso NamaKristu Okuqala

Umnqophiso woMthetho, kuquka nomyalelo owawunikwe ababingeleli wokunikela ngesiqhumiso esingcwele, waphela xa uKristu wamisela umnqophiso omtsha ngowama-33 C.E. (Kolose 2:14) Akukho ngxelo ebonisa ukuba amaKristu okuqala atshisa isiqhumiso kunqulo lwawo. Ngokuphathelele oku, iCyclopedia kaMcClintock noStrong ithi: “Ngokuqinisekileyo [amaKristu okuqala] akazange asebenzise isiqhumiso. Eneneni sasisetyenziswa ngabahedeni . . . Xa umntu ephosa iinkozo ezimbalwa zesiqhumiso kwisibingelelo sabahedeni loo nto yayisisenzo sonqulo.”

Kwakhona amaKristu okuqala akazange avume ukutshisa isiqhumiso ukuze “anqule” umlawuli waseRoma, nangona oko kwakuthetha ukulahlekelwa bubomi bawo. (Luka 4:8; 1 Korinte 10:14, 20) Ngenxa yokusetyenziswa kwesiqhumiso kunqulo-zithixo ngaloo mihla, akumangalisi ke ngoko ukuba amaKristu okuqala engazange abe nenxaxheba kurhwebo lwesiqhumiso.

Ukutshiswa Kwesiqhumiso Namhlanje

Isiqhumiso sisetyenziswa njani namhlanje? Kwiicawa ezininzi zeNgqobhoko, xa kukho imisitho yonqulo kutshiswa isiqhumiso. Kubantu baseAsia, iintsapho zitshisa isiqhumiso ezitempileni okanye kwizibingelelo zasemakhaya ukunqula oothixo nokukhusela abafileyo. Kwiinkonzo ezithile, isiqhumiso siye sasetyenziswa ngeendlela ezahlukahlukeneyo ukugxotha imimoya emibi, ukuphilisa, ukuhlambulula nokuqinisa.

Mvanje abantu baye baphinda baqalisa ukusebenzisa isiqhumiso kwanabo bangengomakholwa. Bambi batshisa isiqhumiso xa becamngca. Enye incwadi ithi unokusebenzisa isiqhumiso ukuze ufikelele “kwelemimoya” uze ube “namandla” angaphezu kwawemvelo. Kwakhona ukuze ufumane isicombululo kwiingxaki zobomi, kuthiwa ukutshisa isiqhumiso kuyanceda ukuze unxibelelane “nezinyanya.” Ngaba ukwenza ezi zinto kufanelekile kumaKristu?

UYehova ubagweba ngokupheleleyo abo bazama ukuhlanganisa izenzo zonqulo lobuxoki nonqulo olunyulu. Umpostile uPawulos wacaphula isiprofeto sikaIsaya waza wasisebenzisa kumaKristu, ewabongoza ukuba akhwebuke kwimpembelelo engcolileyo yonqulo lobuxoki. Wabhala: “‘Phumani phakathi kwabo, nizahlule,’ utsho uYehova, ‘nento engahlambulukanga ningayichukumisi’; ‘yaye ndiya kunamkela.’” (2 Korinte 6:17; Isaya 52:11) AmaKristu okwenyaniso ayaqiniseka ukuba ayayiphepha nantoni na enxulumene nonqulo lobuxoki okanye ubugqi.—Yohane 4:24.

Ngaba isibakala sokuba isiqhumiso sisetyenziswa kwimisitho yonqulo nasekunxibelelaneni nemimoya kuthetha ukuba ukutshisa isiqhumiso akulunganga kwaphela? Akunjalo. Mhlawumbi ubani unokutshisa isiqhumiso kuba nje efuna kunuke kamnandi endlwini yakhe. (IMizekeliso 27:9) Sekunjalo, xa umKristu egqiba ekubeni atshise isiqhumiso ufanele acinge ngeenkalo ezithile. Ngaba abanye kuloo mmandla uhlala kuwo bakunxulumanisa ukutshisa isiqhumiso nesenzo sonqulo lobuxoki? Ngaba ekuhlaleni, ukutshisa isiqhumiso kudla ngokunxulunyaniswa nokunxibelelana nemimoya? Okanye ngaba ngokuqhelekileyo sisetyenziswa kwizinto ezingenakuthanani nonqulo?

Ukuba ubani ukhetha ukutshisa isiqhumiso, isigqibo sakhe asifanele sisekelwe kuphela kwisazela sakhe nakwindlela yena avakalelwa ngayo kodwa nakwesabanye. (1 Korinte 10:29) Amazwi kampostile uPawulos aya kwabaseRoma ayasebenza nakuthi. Wabhala: “Masisukele izinto ezisingisa eluxolweni nezinto ezakhayo komnye nomnye. Musa ukuchitha umsebenzi kaThixo ngenxa nje yokutya. Enyanisweni, zonke izinto zicocekile, kodwa kubi kuloo mntu uthi ngokutya akhubekise. Kuhle ukuba ungatyi nyama okanye ungaseli wayini okanye ungenzi nantoni na emkhubekisayo umzalwana wakho.”—Roma 14:19-21.

Imithandazo ‘Elungiselelwe Njengesiqhumiso’

Ukutshiswa kwesiqhumiso kumaSirayeli kwakungumqondiso ofanelekileyo wemithandazo uThixo ayiphulaphulayo. Ngenxa yoko, umdumisi uDavide wavumela uYehova ingoma esithi: “Ngamana umthandazo wam ungalungiselelwa njengempepho [isiqhumiso] phambi kwakho.”—INdumiso 141:2.

AmaSirayeli athembekileyo akazange akujonge ukutshisa isiqhumiso njengesithethe nje esingenantsingiselo. Ayeqiniseka ukuba alungisa aze atshise isiqhumiso ngendlela uYehova ayalele ngayo. Kunokusebenzisa isiqhumiso sokoqobo, amaKristu namhlanje athandaza ngendlela ebonisa uxabiso nentlonelo enzulu ngoBawo wethu osezulwini. Njengesiqhumiso esinuka kamnandi esasisenziwa ngababingeleli basetempileni, iLizwi likaThixo lisiqinisekisa lisithi: “Umthandazo wabathe tye uyakholiswa nguwo.”—IMizekeliso 15:8.

[Imifanekiso ekwiphepha 29]

Isiqhumiso esasitshiswa kumnquba nasetempileni sasingcwele

[Umfanekiso okwiphepha 30]

Ngaba ukutshisa isiqhumiso ngenjongo yokucamngca kufanelekile kumaKristu?

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share