Hlakulela Umoya Wokupha
AKAKHO umntu ozalwa enomoya wokupha. Ngokwemvelo usana lutyekele ekwaneliseni iimfuno zalo, aluzinanzi nezilangazelelo zabo balunyamekelayo. Noko ke, ekuhambeni kwexesha lo mntwana uyabona ukuba asinguye yedwa oneentswelo. Ufanele abacingele nabanye, yaye ufanele afunde ukuba angafumani izinto kwabanye kuphela kodwa naye abaphe abanye. Umoya wokupha ufuna ukuhlakulelwa.
Asingabo bonke abantu abaphayo—enoba bapha kakhulu—abanomoya wokupha. Abanye basenokunikela kwimibutho yokucela amalizo kuba befuna ukuzuza okuthile. Abanye basenokunikela kuba befuna ukunconywa. Noko ke, amaKristu okwenyaniso apha abanye izinto enenjongo eyahlukileyo. Ngoko ke, ziziphi iimpawu zokupha ezikhuthazwa kwiLizwi likaThixo? Ukuqwalasela indlela amaKristu enkulungwane yokuqala ayesipha ngayo kuya kusiphendulela lo mbuzo.
Imizekelo Yokupha KwamaKristu
Ukupha kwamaKristu, njengoko kucaciswe eBhayibhileni, ngokuqhelekileyo ‘yayikukwabelana ngezinto nabanye.’ (Hebhere 13:16; Roma 15:26) Kwakungamele kunyanzeliswe. Umpostile uPawulos wabhala: “Ngamnye makenze kanye njengoko egqibile entliziyweni yakhe, kungekhona ngokukrokra okanye ngokunyanzelwa, kuba uThixo uthanda umphi ochwayitileyo.” (2 Korinte 9:7) Kwakhona abantu babengafanele baphe nje kuba befuna ukucela injezu. UAnaniyas noSafira benza kanye oko baza bavuna kabuhlungu.—IZenzo 5:1-10.
Kwavela imfuneko yokupha xa amaYuda namaguquka amaninzi awayevela kwiindawo ezikude ayehlanganisene eYerusalem kumsitho wePentekoste yowama-33 C.E. Abalandeli bakaYesu “bazaliswa ngumoya oyingcwele, baqala ukuthetha ngeelwimi ezahlukileyo.” Isihlwele esikhulu sabangqonga saza saphulaphula intetho kaPetros echukumis’ intliziyo engoYesu Kristu. Kamva, abantu babona indlela uPetros noYohane abayiphilisa ngayo indoda esisiqhwala eyayikumnyango wetempile, yaye bemva uPetros ethetha kwakhona ngoYesu nangemfuneko yokuguquka. Kwaguquka amawaka aza abhaptizwa njengabalandeli bakaKristu.—IZenzo, isahluko 2 nese-3.
Aba basandul’ ukuguquka babefuna ukuhlala eYerusalem baze bafumane eminye imiyalelo kubapostile bakaYesu. Kodwa abapostile babenokuzinyamekela njani iintswelo zazo zonke ezo ndwendwe? Ingxelo yeBhayibhile ithi: “Bonke ababenamasimi okanye izindlu babethengisa ngazo baze bazise amaxabiso ezinto ezithengisiweyo yaye babewabeka ezinyaweni zabapostile. Kwakusabelwa ngamnye, kanye ngokokuswela kwakhe.” (IZenzo 4:33-35) Enyanisweni, ibandla laseYerusalem elalisandul’ ukusekwa lalinomoya wokupha!
Kamva, namanye amabandla abonakalisa umoya wokupha ofanayo. Ngokomzekelo, amaKristu aseMakedoni, nangona ayengamahlwempu, anikela ngaphezu kwamandla awo kubazalwa bawo abasweleyo kwaYuda. (Roma 15:26; 2 Korinte 8:1-7) Ibandla laseFilipi lamxhasa ngeyona ndlela uPawulos kubulungiseleli bakhe. (Filipi 4:15, 16) Ibandla laseYerusalem lalinikela ngokutya imihla ngemihla kubahlolokazi ababeswele, yaye abapostile banyula amadoda afanelekileyo asixhenxe ukuze aqinisekise ukuba abahlolokazi ababeswele abatyeshelwa.—IZenzo 6:1-6.
Amabandla amaKristu okuqala ayekhawuleza ukusabela naxa ayengekafiki amaxesha amanzima. Ngokomzekelo, xa umprofeti uAgabho waxela kwangaphambili ngendlala enkulu, abafundi kwibandla laseSiriya yakwa-Antiyokwe “bazimisela, ngamnye kubo kangangoko wayenako, ukuthumela ulungiselelo lwamancedo kubazalwana ababehlala kwelakwaYuda.” (IZenzo 11:28, 29) Onjani wona umoya abawubonisayo wokuziphaphela iintswelo zabanye!
Yintoni eyashukumisela amaKristu okuqala ukuba abe nesisa nothando? Eneneni, umntu uwuhlakulela njani umoya wokupha? Sinokufunda lukhulu ngokuqwalasela ngokufutshane umzekelo kaKumkani uDavide.
Ukuxhasa KukaDavide Ngesisa Unqulo Lokwenyaniso
Phantse kangangeminyaka engama-500, ityeya yomnqophiso—umkhumbi ongcwele owawumela ubukho bukaYehova—yayingenandawo esisigxina. Yayigcinwa kwintente, okanye kumnquba, ekwakusoloko kuhanjwa nawo ebudeni bokubhadula kwamaSirayeli entlango naxa ayesinge kwiLizwe Lesithembiso. UKumkani uDavide wayefuna ukuthabatha umkhombe owawugcinwa kwintente, aze akhele uYehova indlu efanelekileyo eyayiza kuhlala lo mkhombe ungcwele. Ethetha nomprofeti uNatan, uDavide wathi: “Yabona, ndihlala endlwini yomsedare, kodwa ityeya yomnqophiso kaYehova iphantsi kwamalaphu entente.”—1 Kronike 17:1.
Noko ke, uDavide wayeyindoda ethanda imfazwe. Ngoko uYehova wayalela ukuba ibe ngunyana wakhe uSolomon owakha itempile ebudeni bolawulo loxolo, ukuze uhlale kuyo umkhombe womnqophiso. (1 Kronike 22:7-10) Noko ke, oku akuzange kuwuphelise umoya kaDavide wokupha. Ethuma iqela labantu, walungiselela impahla eyayiza kusetyenziswa xa kusakhiwa itempile. Kamva wathi kuSolomon: “Ndiyilungiselele ikhulu lamawaka eetalente zegolide nesigidi seetalente zesilivere, yaye ubhedu nentsimbi akukho ndlela yakuzilinganisa ngenxa yokuba ziye zaba ninzi kakhulu; namaplanga namatye ndiwalungiselele.” (1 Kronike 22:14) Enganelisekanga koko, kubunewunewu awayenabo, uDavide wanikela ngegolide nesilivere kule mihla yethu exabisa ii-R9 300 000 000. Ngaphezu koko, neenkosana zanikela ngokukhululekileyo. (1 Kronike 29:3-9) Ngokuqinisekileyo, uDavide wayenomoya wesisa nowokupha!
Yintoni eyabangela uDavide anikele kangaka? Wayeqonda ukuba konke anako noko wayekuphumezile kwakungenxa yeentsikelelo zikaYehova. Emthandazweni wakhe wavuma esithi: “Owu Yehova Thixo wethu, yonke le ntabalala siyilungiselela ukulakhela indlu igama lakho elingcwele, ivela esandleni sakho, yaye yeyakho. Ndazi kakuhle, Thixo wam, ukuba ungumgocagoci wentliziyo, nokuba ukholiswa kokuthe tye. Ke mna, ngentliziyo ethe tye ndizinikele zonke ezi zinto ngokuzithandela, ndinandipha ukubona abantu bakho abakhoyo apha besenza iminikelo yokuzithandela kuwe.” (1 Kronike 29:16, 17) UDavide wayeluxabisa ulwalamano awayenalo noYehova. Wayeyiqonda imfuneko yokukhonza uThixo “ngentliziyo epheleleyo nangomphefumlo onoyolo,” yaye oko kwakumvuyisa. (1 Kronike 28:9) Kwakhona ezi mpawu zabangela amaKristu okuqala abonakalisa umoya wokupha.
UYehova—Ubalasele Ngokupha
UYehova ungowona mzekelo ubalaseleyo ekupheni. Unothando yaye unenyameko kangangokuba ‘ulenza ilanga lakhe liphume kubantu abangendawo nabalungileyo nemvula uyinisa kubantu abangamalungisa nabangengomalungisa.’ (Mateyu 5:45) Ubanika bonke abantu “ubomi nempefumlo nezinto zonke.” (IZenzo 17:25) Eneneni, kanye njengokuba umfundi uYakobi watshoyo, “sonke isipho esilungileyo naso sonke isipho esigqibeleleyo sivela phezulu, kuba sihla sivela kuYise wezikhanyiso zesibhakabhaka.”—Yakobi 1:17.
Esona sipho sikhulu uYehova awakha wasipha sona sesokuthumela ‘uNyana wakhe okuphela kwamzeleyo, ukuze wonk’ ubani obonisa ukholo kuye angatshabalali kodwa abe nobomi obungunaphakade.’ (Yohane 3:16) Akakho umntu onokuthi besimfanele eso sipho, ‘kuba sonke sonile saza sasilela kuzuko lukaThixo.’ (Roma 3:23, 24; 1 Yohane 4:9, 10) Intlawulelo kaKristu yindlela esisifumana ngayo ‘isipho sikaThixo sesisa,’ oko kukuthi, ‘ububele obungasifanelanga bukaThixo obugqwesileyo.’ (2 Korinte 9:14, 15) Ngenxa yokuba wayexabisa isipho sikaThixo, uPawulos waqiniseka ukuba “ukunikela ubungqina obucokisekileyo kwiindaba ezilungileyo zobubele obungasifanelanga bukaThixo,” kuza kuqala ebomini bakhe. (IZenzo 20:24) Wayeqonda ukuba yayikukuthanda kukaThixo ukuba “zonke iintlobo zabantu zisindiswe zize zifikelele elwazini oluchanileyo lwenyaniso.”—1 Timoti 2:4.
Namhlanje, oku kuphunyezwa ngomsebenzi omkhulu wokushumayela nokufundisa ngoku oye wanabela kumazwe angama-234 ehlabathini lonke. UYesu wathetha ngalo kwangaphambili olu lwando esithi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga; kwandule ke kufike ukuphela.” (Mateyu 24:14) Ewe, “kumele kushunyayelwe iindaba ezilungileyo kuzo zonke iintlanga kuqala.” (Marko 13:10) Kunyaka ophelileyo abavakalisi abangaphezu kwezigidi ezithandathu beendaba ezilungileyo bachithe iiyure ezingama-1 202 381 302 kulo msebenzi baza baqhuba izifundo zeBhayibhile ezingama-5 300 000. Ekubeni kubandakanyeke ubomi babantu, lo msebenzi ubaluleke kakhulu.—Roma 10:13-15; 1 Korinte 1:21.
Kuye kwashicilelwa iimpapasho nyaka ngamnye—kuquka iiBhayibhile, iincwadi neencwadana ezinemifanekiso—ukuze kuncedwe abo balambele inyaniso yeBhayibhile. Ukongezelela, kuye kwashicilelwa imibhalo engaphezu kwewaka lezigidi eMboniselo noVukani! Njengoko abantu bezamkela iindaba ezilungileyo, kwakhiwa iiHolo zoBukumkani neeHolo zeNdibano ezingakumbi zamaNgqina kaYehova, ndawo ezo ezisisazulu semfundo yeBhayibhile. Kuye kulungiselelwe iindibano zesiphaluka nezosuku olukhethekileyo, kwakunye neendibano zesithili. Kwakhona kusaqhutyekwa kuqeqeshwa abavangeli basemazweni, abaveleli abahambahambayo, abadala nezicaka zolungiselelo. Siyambulela uYehova ngokwenza onke la malungiselelo esebenzisa “ikhoboka elithembekileyo neliyingqondi.” (Mateyu 24:45-47) Ngokwenene simbulela ngokungazenzisiyo!
Ukubulela KuYehova
Ngokufanayo nokwakhiwa kwetempile nokufezwa kwezinye iintswelo zamabandla amaKristu okuqala, inkxaso yemali yonke ivela kwiminikelo yokuzithandela. Noko ke, kumele kukhunjulwe ukuba akakho umntu onokwenza uYehova isityebi, uMnini wezinto zonke. (1 Kronike 29:14; Hagayi 2:8) Ngoko ke, iminikelo esiyenzayo ibonisa uthando esinalo ngoYehova nomnqweno wethu wokuhambisela phambili unqulo lokwenyaniso. UPawulos uthi ezi zenzo zibonakalisa ‘umbulelo kuThixo.’ (2 Korinte 9:8-13) UYehova uyalukhuthaza uhlobo olunjalo lokupha kuba lubonisa ukuba sinomoya ofanelekileyo yaye siyamthanda. Abo banesisa nabathembela ngoYehova uya kubasikelela baze babe zizityebi ngokomoya. (Duteronomi 11:13-15; IMizekeliso 3:9, 10; 11:25) UYesu wasiqinisekisa ukuba siya konwaba esithi: “Kunoyolo ngakumbi ukupha kunokwamkela.”—IZenzo 20:35.
AmaKristu anomoya wokupha awalindi de kubekho intswelo ethile. Kunoko, akhangela amathuba ‘okwenza okulungileyo kubo bonke, ngokukodwa kwabo bahlobene nawo elukholweni.’ (Galati 6:10) Ekhuthaza ukuba abantu babe nesisa, uPawulos wabhala: “Musani ukulibala ukwenza okulungileyo nokwabelana ngezinto nabanye, kuba uThixo uyakholiswa yimibingelelo enjalo.” (Hebhere 13:16) Ukusebenzisa ubugcisa bethu—ixesha, amandla nemali—ukuze sincede abanye size sihambisele phambili unqulo olunyulu kuyamkholisa uYehova uThixo. Liyinyaniso elokuba, uyawuthanda umoya wokupha.
[Ibhokisi/Umfanekiso okwiphepha 28, 29]
Iindlela Abanye Abakhetha Ukunikela Ngazo
IMINIKELO EYA KUMSEBENZI OWENZIWA EHLABATHINI LONKE
Abaninzi babekela bucala, okanye benze uqingqo-mali lwesixa abaza kusifaka kwiibhokisi zeminikelo ezibhalwe “Iminikelo Eya Kumsebenzi Owenziwa Ehlabathini Lonke—Mateyu 24:14.”
Nyanga nganye, amabandla athumela ezi zixa kwiofisi yamaNgqina kaYehova enyamekela ilizwe lawo. Iminikelo yokuzithandela yemali isenokuthunyelwa ngokungqalileyo Watch Tower Bible and Tract Society of Pennsylvania, c/o Accounting Office, Private Bag X2067, Krugersdorp, 1740, South Africa, okanye kwiofisi yesebe enyamekela ilizwe lakho. Iitsheki zimele zibhalwe “Watch Tower.” Kusenokunikelwa ngezinto ezenziwe ngamatye anqabileyo okanye ngezinye izinto ezixabisekileyo. Le minikelo imele iphelekwe yileta emfutshane echaza ukuba le yiminikelo.
IMINIKELO PHANTSI KWEEMEKO EZITHILE
Kusenokunikelwa ngemali phantsi kwelungiselelo elikhethekileyo lokuba, xa lowo unikeleyo ecela ukuba loo mnikelo ubuyiswe, awufumane. Ukuze ufumane inkcazelo engakumbi, nceda uqhagamshelane neAccounting Office yesebe kule dilesi ingasentla.
UKUNIKELA OKUCETYIWEYO
Ukongezelela kwiminikelo yemali neminikelo yemali enikelwa phantsi kweemeko ezithile, zikho nezinye iindlela zokunikela kwinkonzo yoBukumkani ehlabathini lonke. Ezi ziquka:
I-inshorensi: IWatch Tower Society inokubhaliswa njengemele ifumane imali kwi-inshorensi yobomi okanye kwilungiselelo lemali yomhlala-phantsi.
Imali Eselugcinweni Neebond: Kunokunikelwa ngemali eselugcinweni neebond kwiWatch Tower Society njengesipho okanye phantsi kwelungiselelo lokuba lowo wenze umnikelo aqhubeke efumana imali.
Izindlu Nemihlaba: Izindlu nemihlaba enokuthengiswa inokunikelwa njengesipho okanye, kwimeko yendawo yokuhlala, ngokuzigcina zikwilungelo lalowo wenze umnikelo, onokuqhubeka ehlala kuzo ngethuba esaphila. Qhagamshelana neofisi yesebe ekwilizwe lakho ngaphambi kokubhalisa izindlu nemihlaba.
Iminqophiso Yamafa: Izinto okanye imali inokushiyelwa iWatch Tower Society ngomnqophiso welifa osemthethweni.
Ukuze ufumane inkcazelo engakumbi, unokuqhagamshelana neAccounting Office, ngokuyibhalela okanye ngokutsala umnxeba, kwidilesi ebhalwe apha ngezantsi okanye kwiofisi yoMbutho enyamekela ilizwe lakho.
Accounting Office
Watch Tower Bible and Tract Society of Pennsylvania
Private Bag X2067,
Krugersdorp, 1740
Inombolo Yomnxeba: (011) 761-1000
[Umfanekiso okwiphepha 26]
Yintoni eyashukumisela amaKristu okuqala ukuba abe nesisa?