“ILizwi LikaThixo Linamandla Ngokwenene!”

“ILIZWI likaThixo liphilile, linamandla.” (Hebhere 4:12) Ingqina amandla eLizwi likaThixo, iKhalenda YamaNgqina KaYehova Yowama-2003 iye yasibalisela amabali obomi amathandathu avela ehlabathini lonke. Phantsi komxholo othi “Ngaphambi Nasemva,” le khalenda iye yabonisa indlela umsebenzi wokufundisa wamaNgqina kaYehova obanceda ngayo abantu baphucule imilinganiselo yabo yokuziphatha, bashiye indlela abaphila ngayo eyingozi, bomeleze ubomi bentsapho baze babe nolwalamano noThixo.

Iileta zombulelo noxabiso ngale khalenda yowama-2003 zingene zithontelana. Nanga amanye amazwi afumaneke kuzo:

“Le khalenda iqinisekisa amaKristu okwenyaniso ukuba kanye njengawo, bakho abanye abaye balulwela nzima ukholo. Ngoku ukujonga imifanekiso yale khalenda kunokuwakhumbuza ngeenguqulelo azenzileyo.”—USteven, eUnited States.

“Bendifuna ngokwenene ukubhala la mazwi ndize ndinixelele indlela endichukumise ngayo le khalenda yowama-2003. Andizange ndichukunyiswe ngolu hlobo yikhalenda. Le khalenda ndiya kusoloko ndiyiphethe naxa ndisiya entsimini ukuze ndiqinisekise abantu ukuba iBhayibhile iyabaphembelela abantu.”—UMarc, eBelgium.

“Indichukumise gqitha le khalenda, ingakumbi ndakubona indlela uYehova aye wabuguqula ngayo ubomi babantu. Loo nto iye yabangela ukuba ndiqhubeke ndisenza iinguqulelo ebomini bam. Andizange ngaphambili, ndizive ndiyinxalenye yabazalwana bomhlaba wonke njengokuba kunjalo ngoku.”—UMary, eUnited States.

“UYesu wayechukumiseke gqitha yintswelo yokomoya yezihlwele. Ndiyabulela ngokuxelisa umzekelo kaKristu ngokupapasha amabali obomi kwikhalenda yethu yowama-2003. Ziyaqala ukuzehlela iinyembezi xa ndifunda ikhalenda.”—UCassandra, eUnited States.

“Xa ndandineminyaka eli-11 ubudala; ndaqalisa ukutshaya, ndaza ndaphumela nakwiziyobisi. Ndandisoloko ndicinga ngokuzibulala. Ndathi ndakufunda ngoYehova, ndayiyeka yonke loo mikhwa. Le khalenda ibaluleke kakhulu kum. Imizekelo yabazalwana noodadewethu ehlabathini lonke iyandomeleza. Ngoku ndiyazi ukuba andindedwa kulo mlo yaye eyona nto ibaluleke kakhulu luthando ngoYehova nokumkhonza ngentliziyo yonke.”—UMargaret, ePoland.

“ILizwi likaThixo linamandla ngokwenene! Ukufumana kwam ikhalenda yowama-2003, zasuka zazehlela iinyembezi. La mava, kunye nemifanekiso, zilomeleza kakhulu ukholo.”—UDarlene, eUnited States.

“Aba bantu babephila kanye ngendlela endandiphila ngayo ngaphambili. UYehova uye wandinika amandla okoyisa imikhwa ekhobokisayo. Ndiyabulela kakhulu ngala mabali obomi.”—UWilliam, eUnited States.