Unqulo—Ngaba Lunempembelelo Entle Okanye Embi?
“NDIYABUBULELA ubuKristu ngoko bundenzele kona, yaye ndikholelwa ukuba nehlabathi lifanele libe nombulelo kule minyaka engama-2 000 edluleyo.”—Intshayelelo, Two Thousand Years—The First Millennium: The Birth of Christianity to the Crusades.
Loo mazwi ombulelo “ngobuKristu” avela kumbhali oliNgesi nongumsasazi uMelvyn Bragg. Amazwi akhe avisisana nendlela abantu abaninzi ehlabathini abavakalelwa ngayo besithi bafanele babe nombulelo baze banyaniseke kunqulo oluthile. Baqinisekile ukuba unqulo luye lwabaphembelela kakuhle ebomini babo. Ngokomzekelo, omnye umbhali uthi ubuSilamsi “buye babangela impucuko engakumbi . . . [nto leyo] eye yazuzisa ihlabathi lonke.”
Indima Yonqulo—Ngaba Intle Okanye Imbi?
Noko ke, amazwi alandelayo kaBragg enza kubekho umbuzo obalulekileyo enoba unqulo ngokuqhelekileyo luye lwanempembelelo entle kusini na. Wongezelela ngelithi: “Kusekho into ethile endifanele ndiyiqonde ngobuKristu.” Yintoni le afanele ayiqonde? Uthi: “Ukunganyamezelani kwalo, ububi balo, inkohlakalo nokuzibetha ngoyaba izinto eziye zabonakala ‘kwimbali’ yalo.”
Abantu abaninzi banokuthi ukunganyamezelani, ububi, inkohlakalo nokuzibetha ngoyaba izinto kuye kwabonakala kwimbali yeenkonzo ezininzi zomhlaba. Baqiqa ngelithi unqulo lubonakala ngathi lubangela uluntu luzuze—yaye nangona luzenza ngokungathi lulungile yaye lungcwele, enyanisweni luyahanahanisa yaye luyaxoka. (Mateyu 23:27, 28) IA Rationalist Encyclopædia ithi: “Eyona nto iphambili kwiincwadi zethu kukuba unqulo ngokukhethekileyo luhambisana nempucuko.” Iqhubeka isithi: “Sekunjalo akukho nto egxekwa ngamandla njengonqulo ngenxa yoko kwenzeke embalini.”
Funda enoba liliphi iphephandaba namhlanje, yaye uya kufumana imizekelo emininzi yeenkokeli zonqulo ezishumayela ngothando, ngoxolo nangovelwano kodwa ezibangela intiyo yaye ezisebenzisa igama likaThixo ukuthethelela iimfazwe ezazinenkohlakalo. Akumangalisi ke ngoko ukuba abantu abaninzi bevakalelwe kukuba unqulo ludla ngokuba yimpembelelo embi ebomini!
Ngaba Izinto Beziya Kuba Bhetele Ukuba Unqulo Belungekho?
Bambi, njengesithandi sobulumko esiliNgesi uBertrand Russell, bagqiba ngelithi bekuya kuba kuhle ukuba ekugqibeleni “[beziya] kuphela zonke iinkonzo.” Ngokwembono yabo, esona sicombululo seengxaki zoluntu kukuphelisa lonke unqulo. Noko ke, basenokukhetha ukusityeshela isibakala sokuba abo bacekisa unqulo basenokuba nentiyo nokunganyamezelani kanye njengabo baluxhasayo. Umbhali ngemibandela yonqulo uKaren Armstrong usikhumbuza esithi: “Ubuncinane ukuBulawa Kwabantu Ngenkohlakalo kubonisa ukuba ukungabi namdla kunqulo [kusenokuba] yingozi ngendlela efanayo neemfazwe zonqulo.”—The Battle for God—Fundamentalism in Judaism, Christianity and Islam.
Ngoko ngaba unqulo luyimpembelelo entle okanye enyanisweni lulo olubangela iingxaki zabantu? Ngaba isicombululo sezo ngxaki kukuphelisa lonke unqulo? Phawula oko iBhayibhile ikuthethayo ngoku kwinqaku elilandelayo. Unokumangaliswa yimpendulo.