Ngaba Unqulo Lungunobangela Weengxaki Zabantu?
“XA UNQULO lungakhuthazi iingxwabangxwaba lunjengesiyobisi esibulala isazela sabantu nesibangela abantu babe ngathi abaphili kweli hlabathi. . . . Lubangela abantu bacinge ngendlela enye, babe neenkolelo, bazale yintiyo noloyiko.” Owayesakuba ngumvangeli waseWesile owabhala oku wongezelela esithi: “Oku kuyinyaniso. Kukho unqulo olulungileyo nolungalunganga.”—Start Your Own Religion.
Abanye banokuthi ‘ngokuqinisekileyo oku kukudlelw’ indlala.’ Sekunjalo, ngubani onokukuphika oko kwenzekayo embalini? Ubukhulu becala, unqulo—oluchazwa “njengokunqula uThixo”—lunengxelo embi. Lufanele lusikhanyisele luze lusivuselele. Noko ke, into oluyibangelayo ziingxwabangxwaba, ukunganyamezelani nentiyo. Kutheni kunjalo nje?
‘Ingelosi Yokukhanya’ Elahlekisayo
Ngokutsho kweBhayibhile, impendulo icacile. Ezimilisa “okwengelosi yokukhanya,” uSathana uMtyholi uye walahlekisa izigidi zabantu ukuba zilandele iimfundiso zakhe kunezikaThixo. (2 Korinte 11:14) Umpostile uYohane wabonisa ukuba impembelelo kaSathana inkulu kangangokuba “ihlabathi liphela lisemandleni ongendawo.” (1 Yohane 5:19) UYohane wayesazi ukuba uSathana “ulahlekisa umhlaba omiweyo uphela.”—ISityhilelo 12:9.
Uye waba yintoni umphumo woku? USathana uye wavelisa iinkonzo ezibonakala ngathi zingcwele. Ziye ‘zalwamkela unqulo ngembonakalo,’ kodwa imeko yazo ibonwa ngeziqhamo zazo ezibi. (2 Timoti 3:5, IBhayibhile yesiXhosa yowe-1996; Mateyu 7:15-20) Kunokuba luncede ekucombululeni iingxaki zabantu, eneneni unqulo luye lwaba yinxalenye yengxaki.
Musa ukuyityeshela ngokukhawuleza loo ngcamango njengebonakala ingaginyeki ncam. Khumbula ukuba umntu udla ngokuqhathwa engalindelanga. Umpostile uPawulos wanikela umzekelo woku xa wabhala wathi: “Izinto iintlanga ezizibingelelayo zizibingelela kwiidemon, kungekhona kuThixo.” (1 Korinte 10:20) Kusenokwenzeka ukuba abo bantu bothuka xa beva ukuba banqula iidemon. Babecinga ukuba banqula uthixo olungileyo, okanye oothixo abathile. Kodwa, eneneni babelahlekiswe ‘ngoomoya abangendawo kwezasezulwini iindawo,’ abaxhasa uSathana kumalinge akhe okulahlekisa uluntu.—Efese 6:12.
Ngokomzekelo, makhe siqwalasele indlela uSathana akwazi ngayo ukuqhatha nokulahlekisa abaninzi abazibiza ngokuba ngamaKristu abakhetha ukutyeshela isilumkiso sikaYohane esingempembelelo embi.—1 Korinte 10:12.
Oko UYesu Wakufundisayo Kwakuvela KuThixo
UYesu Kristu wathi: “Oko ndikufundisayo asikokwam, kodwa kokwalowo wandithumayo.” (Yohane 7:16) Ewe, oko wayekufundisa kwakuvela kuThixo uSomandla. Ngoko iimfundiso zikaYesu zazinempembelelo enamandla nekhuthazayo kwabo babemphulaphule. Azizange ‘zibulale isazela sabantu okanye zibangele abantu babe ngathi abaphili kweli hlabathi.’ Ngokwahlukileyo koko, iimfundiso zikaYesu zabakhulula abantu kwiimfundiso zobuxoki zonqulo nakwiintandabulumko zabantu ezazivela kwihlabathi ‘elisebumnyameni ngengqondo’ ngenxa yokukhohliswa nguMtyholi.—Efese 4:18; Mateyu 15:14; Yohane 8:31, 32.
AmaKristu okwenyaniso ayesaziwa, kungekhona ngokuthi ahlonela uThixo, kodwa ngokholo olwalubonisa iimpawu ezintle eziveliswa ngumoya kaThixo oyingcwele. (Galati 5:22, 23; Yakobi 1:22; 2:26) Olona lubalulekileyo kwezi mpawu—nolufumaneka kumaKristu okwenyaniso—luphawu olubalaseleyo lothando.—Yohane 13:34, 35.
Noko ke, phawula le ngongoma ibalulekileyo: UYesu nabapostile bakhe babengalindelanga ukuba ibandla lamaKristu lihlale linjengasekuqaleni. Babesazi ukuba kwakuza kuvela uwexuko yaye unqulo lokwenyaniso lwalungasayi kubonakala kangangexesha elithile.
Ukungabonakali Konqulo Lokwenyaniso Kangangexesha Elithile
Kumzekeliso wengqolowa nokhula, uYesu waprofeta ukuba unqulo lokwenyaniso luya kuphantse lungabonakali kangangexesha elithile. Zifundele ingxelo ekuMateyu 13:24-30, 36-43. UYesu wahlwayela kwintsimi yengqolowa, “imbewu entle,” eyayifanekisela abafundi bakhe abathembekileyo ababeza kuyila ibandla lokuqala lamaKristu. Walumkisa ukuba “utshaba,” uSathana uMtyholi, wayeza kuthi ekuhambeni kwexesha ahlwayele “ukhula” kwintsimi yengqolowa—abantu abathi balandela uYesu Kristu kodwa enyanisweni ababezityeshela iimfundiso zakhe.
Kungekudala emva kokufa kwabapostile bakaYesu, kwavela abantu ‘ababelukhula,’ bethanda iimfundiso zabantu beligqwetha “ilizwi likaYehova.” (Yeremiya 8:8, 9; IZenzo 20:29, 30) Ngenxa yoko, kwavela ubuKristu obugqwethekileyo nobobuxoki ehlabathini. Babuzele koko iBhayibhile ikubiza ngokuba ‘ngumchasi-mthetho’—abefundisi abonakeleyo ababandakanyeke kuyo “yonke inkohliso engeyoyabulungisa.” (2 Tesalonika 2:6-10) UYesu waxela kwangaphambili ukuba le meko iya kuguquka “ekuphelisweni kwenkqubo yezinto.” AmaKristu anjengengqolowa aya kumanyana yaye ekugqibeleni “ukhula” luya kutshatyalaliswa.
BubuKristu bobuxoki obubekek’ ityala “ngokungabikho kwenkqubela” nobumnyama bokomoya obukwiNgqobhoko kwiinkulungwane ezalandelayo. Ekubona oku nazo zonke izenzo ezingendawo nogonyamelo olwalukho ngelo xesha egameni lonqulo, umpostile uPetros echanile waprofeta esithi “ngenxa yabo [bathi bangamaKristu] iya kutshabhiswa indlela yenyaniso.”—2 Petros 2:1, 2.
“Unqulo Lukhuthaza Umsindo Nentiyo”
Ngokuqinisekileyo asiyoNgqobhoko kuphela eye yenza abantu bathethe kakubi ngonqulo. Ngokomzekelo, cinga ngeenkonzo ezaziwayo “ezingoophuma silwe,” uKaren Armstrong owayesakuba ngunongendi othi ziye zabakho ngenxa “yeemfundiso yazo zonke iinkonzo eziphambili.” Ngokutsho kuka-Armstrong, enye indlela ebalulekileyo yokuvavanya unqulo “luvelwano olubonakaliswa ngezenzo.” Injani ingxelo yeecawa ezaziwayo kulo mba? Ubhala esithi: “Iinkonzo ezaziwayo enoba bubuYuda, bubuKristu, okanye bubuSilamsi, ziyasilela kolu vavanyo ukuba unqulo lwazo lukhuthaza umsindo nentiyo.” (The Battle for God—Fundamentalism in Judaism, Christianity and Islam) Kodwa ngaba lulo lodwa unqulo “lweenkonzo ezaziwayo” oluye lwasilela kolu vavanyo noluye lwaba “lunqulo olukhuthaza umsindo nentiyo”? Imbali ibonisa okwahlukileyo.
Eneneni, uSathana uye waseka unqulo lobuxoki, olwaziwa ngokuba nomsindo, intiyo nokubulala abantu. IBhayibhile ibiza olo nqulo ngokuthi ‘yiBhabhiloni Enkulu, unina wamahenyukazi nowezinto ezilizothe zomhlaba,’ yaye ifuziselwa lihenyukazi elikhwele kwirhamncwa eliyinkqubo yezobupolitika. Kuyabonakala ukuba libekek’ ityala ‘ngegazi labo bonke abaye babulawa ngogonyamelo emhlabeni.’—ISityhilelo 17:4-6; 18:24.
Asinguye Wonke Ubani Oye Wakhohliswa
Noko ke, imbali iye yangqina ukuba asinguye wonke ubani oye wakhohliswa. Kwanakwelona xesha lobumnyama, uMelvyn Bragg uthi “baninzi abantu ababesenza okulungileyo nangona babengqongwe ngabantu abaninzi ababi.” AmaKristu okwenyaniso aqhubeka ‘enqula uThixo ngomoya nenyaniso.’ (Yohane 4:21-24) Ayehlukile kwiinkqubo zonqulo zasehlabathini eziye zazingcolisa “njengezixhasa imfazwe.” Akwala ukuba nolwalamano neCawa noRhulumente nto leyo eye yatyhilwa yimbali ukuba “iye yaba nempembelelo engamandla kaSathana kunekaYesu umNazarethe.”—Two Thousand Years—The Second Millennium: From Medieval Christendom to Global Christianity.
Kumaxesha akutshanje, amaNgqina kaYehova aye aziwa ngempembelelo yawo entle. Ukuze angangcoliswa lunqulo lobuxoki, aye asekela iinkolelo nezenzo zawo kwiLizwi likaThixo eliphefumlelweyo, iBhayibhile. (2 Timoti 3:16, 17) Yaye njengamaKristu enkulungwane yokuqala, aye alandela umyalelo kaYesu wokungabi ‘yinxalenye yehlabathi.’ (Yohane 15:17-19; 17:14-16) Ngokomzekelo, kwiJamani yamaNazi, akwala ukulalanisa imigaqo yobuKristu yaye ngoko ke akazange amkelwe ngamaNazi. UHitler wayewacaphukela ngenxa yoko. Enye incwadi yesikolo ithi: “AmaNgqina kaYehova . . . ayelandela imfundiso yeBhayibhile yokungabi nanxaxheba kwimfazwe yalo naluphi na uhlobo. Ngoko ayekwala ukuya emkhosini okanye kuyo nantoni na ebandakanya amaNazi. Iziphindezela, iSS yavalela iintsapho zonke zamaNgqina kaYehova. INgqina likaYehova elinye kwamathathu [eJamani] labulawa kwiinkampu zoxinaniso.”—Germany—1918-45.
Kakade ke, abanye abantu abanenkalipho kwiinkonzo ezahlukahlukeneyo babandezeleka ngenxa yeenkolelo zabo. Kodwa amaNgqina kaYehova akwenza oku ngokumanyeneyo njengeqela elimanyeneyo lonqulo. Kodwa inkoliso yawo yagcina umgaqo weZibhalo othi: ‘Thobela uThixo njengomlawuli kunabantu.’—IZenzo 5:29; Marko 12:17.
Unobangela Wengxaki
Ngoko ke yinyaniso engaphelelanga into yokuba unqulo lungunobangela weengxaki zabantu. Lunqulo lobuxoki olungunobangela. Sekunjalo, uThixo uza kuphelisa lonke unqulo lobuxoki ngokukhawuleza. (ISityhilelo 17:16, 17; 18:21) Uyalela wonke ubani othanda okusesikweni nobulungisa esithi: “Phumani kuyo [oko kukuthi, iBhabhiloni Enkulu, ubukhosi behlabathi bonqulo lobuxoki], bantu bam, ukuze ningabelani nayo ngezono zayo, nokuze ningamkeliswa kwizibetho zayo. Kuba izono zayo ziye zafumba zada zafikelela ezulwini, noThixo uye wazikhumbula izenzo zayo zokungekho sikweni.” (ISityhilelo 18:4, 5) Ewe, uThixo ukhathazwa kakhulu lunqulo ‘olukhuthaza iingxwabangxwaba, olubulala isazela sabantu nolubangela abantu babe ngathi abaphili kweli hlabathi, yaye lubangela abantu bacinge ngendlela enye, babe neenkolelo, bazale yintiyo noloyiko’!
Okwangoku, uThixo uhlanganisa abo bathanda inyaniso kunqulo olusulungekileyo. Lunqulo olunamathela kwimigaqo neemfundiso zoMdali onothando, osesikweni nonovelwano. (Mika 4:1, 2; Zefaniya 3:8, 9; Mateyu 13:30) Unokuba yinxalenye yalo. Ukuba ungathanda inkcazelo engakumbi ngendlela yokubona unqulo olunyulu, zive ukhululekile ukubhalela kubapapashi beli phephancwadi okanye ucele uncedo komnye wamaNgqina kaYehova.
[Umfanekiso okwiphepha 7]
Abantu abaneemvelaphi ezahlukahlukeneyo baye bafumana ulonwabo kunqulo olunyulu