Kuphephe Ukukhohliswa

‘Lumkani, ningathabatheki ziintanda-bulumko nayinkohliso elambathayo yabantu.’—KOLOSE 2:8.

1-3. (a) Yiyiphi imizekelo ebonisa ukuba inkohliso ikho phantse kuzo zonke iinkalo zobomi? (b) Kutheni ingafanele isothuse inkohliso esehlabathini?

“BANGAPHI kuni abangazange bakhe baxokiswe ngumntu oze kufuna uncedo?” Kwiminyaka ethile edluleyo, igqwetha elingumakhwekhwetha lakhe labuza loo mbuzo. Lafumana yiphi impendulo? Liyacacisa: “Kumagqwetha aliwaka, linye kuphela elingazange lixokiswe.” Lona lasinda njani? “Eli gqwetha lalisandul’ ukuqala ukusebenza kwinkampani enkulu yamagqwetha yaye lalingekathethi namntu ofuna uncedo.” Oku kucacisa inyaniso ebuhlungu—ukuxoka nokukhohlisa kuyinto eqhelekileyo kwihlabathi lanamhlanje.

² Abantu bakhohlisa ngeendlela ezininzi yaye oku kuye kwenzeka phantse kuzo zonke iinkalo zobomi bale mihla. Imithombo yeendaba izaliswe yimizekelo yoku—abezobupolitika bayaxoka, abagcini beencwadi namagqwetha bayayibaxa ingeniso yeenkampani ezinkulu, iintengiso zikhohlisa abathengi, abo bahlawula i-inshorensi baqhatha iinkampani abahlawula kuzo, xa sibala nje iimeko ezimbalwa. Kwakhona kukho inkohliso kunqulo. Abefundisi bakhohlisa amarhamente ngeemfundiso zobuxoki, njengokungafi komphefumlo, isihogo somlilo, nemfundiso kaBathathu Emnye.—2 Timoti 4:3, 4.

³ Ngaba sifanele sothuswe yiyo yonke le nkohliso? Nakancinane. Ngokuphathelele ‘imihla yokugqibela,’ iBhayibhile yalumkisa: “Abantu abangendawo namabhedengu baya kuhambela phambili ebubini, belahlekisa yaye belahlekiswa.” (2 Timoti 3:1, 13) NjengamaKristu, sifanele sizilumkele iingcamango ezilahlekisayo ezinokusiphambukisa kwinyaniso. Oku kusenza sibuze imibuzo emibini eyile: Kutheni inkohliso ixhaphake kangaka namhlanje, yaye sinokukuphepha njani ukukhohliswa?

Kutheni Kukho Inkohliso Engaka Namhlanje?

4. IBhayibhile isichaza njani isizathu sokuba kukho inkohliso engaka ehlabathini?

⁴ IBhayibhile isichaza ngokucacileyo isizathu sokuba kukho inkohliso engaka kweli hlabathi. Umpostile uYohane wabhala esithi “ihlabathi liphela lisemandleni ongendawo.” (1 Yohane 5:19) Lo “ongendawo” nguSathana uMtyholi. Ethetha ngaye, uYesu wathi: “Akemi enyanisweni, kuba inyaniso ayikho kuye. Xa ethetha ubuxoki, uthetha ngokotyekelo lwakhe, kuba ulixoki noyise wabo ubuxoki.” Ngaba kuyamangalisa ke ngoko, ukuba eli hlabathi libonakalisa umoya, imigaqo nokukhohlisa komlawuli walo?—Yohane 8:44; 14:30; Efese 2:1-3.

5. Yiyiphi imizamo engakumbi kaSathana yokukhohlisa kweli xesha lesiphelo, yaye ngoobani abangamaxhoba akhe akhethekileyo?

⁵ Kweli xesha lokugqibela, uSathana wenza imizamo engakumbi yokukhohlisa. Walahlelwa emhlabeni. Uyazi ukuba ixesha analo lincinane, yaye ‘unomsindo omkhulu.’ Ezimisele ukutshabalalisa abantu abaninzi kangangoko anako, “ulahlekisa umhlaba omiweyo uphela.” (ISityhilelo 12:9, 12) USathana akakhohlisi nje ngamaxesha athile. Ulibhedengu lokwenene elisoloko lifuna ukukhohlisa abantu.a Usebenzisa lonke uhlobo lwenkohliso alwaziyo—kuquka amaqhinga nobuqhophololo—ukuze amfamekise iingqondo zabangakholwayo aze abagcine bekude noThixo. (2 Korinte 4:4) Lo mkhohlisi uvunyiweyo uzimisele ukuhlasela abo bakhonza uThixo “ngomoya nenyaniso.” (Yohane 4:24; 1 Petros 5:8) Ungaze ulibale ukuba uSathana eneneni wathi: ‘Ndingabenza bonke abantu bangamkhonzi uThixo.’ (Yobhi 1:9-12) Makhe siqwalasele amanye “amaqhinga” kaSathana nendlela yokuzikhusela kuwo.—Efese 6:11.

Kuphephe Ukukhohliswa Ngabawexuki

6, 7. (a) Yintoni esenokuthethwa ngabawexuki? (b) IZibhalo zikubonisa njani ngokucacileyo oko abawexuki abafuna ukukwenza?

⁶ Kudala uSathana wasebenzisa abawexuki kumalinge akhe okulukuhla abakhonzi bakaThixo. (Mateyu 13:36-39) Abawexuki basenokuthi bakhonza uYehova yaye bayakholelwa eBhayibhileni, kodwa bayayigatya inxalenye ebonakalayo yentlangano yakhe. Abanye bade babuyele kwiimfundiso ezinyelisa uThixo ‘zeBhabhiloni Enkulu,’ ubukhosi behlabathi bonqulo lobuxoki. (ISityhilelo 17:5; 2 Petros 2:19-22) Bephefumlelwe nguThixo, ababhali beBhayibhile basebenzisa amazwi aqatha ukubhenca iinjongo neendlela ezisetyenziswa ngabawexuki.

⁷ Yintoni efunwa ngabawexuki? Inkoliso yabo abaneli nje kukulushiya unqulo ababelujonga ngaphambili luyinyaniso. Ngamaxesha amaninzi, bafuna ukuhamba nabanye. Kunokuba bahambe baye kuzenzela ababo abafundi, abawexuki abaninzi ‘batsala abafundi [ekuthetha ukuthi, abafundi bakaKristu] emva kwabo.’ (IZenzo 20:29, 30) Ngokuphathelele abafundisi bobuxoki, umpostile uPawulos walumkisa esithi: “Lumkani, ningathabatheki.” (Kolose 2:8) Ngaba oku akuchazi kanye into abazama ukuyenza abawexuki abaninzi? Njengomntu oqweqwedisa omnye engalindelanga ukuze abe kude nentsapho yakhe, abawexuki bahlasela amalungu ebandla lawo abathembayo, ngenjongo yokubashenxisa kumhlambi.

8. Abawexuki baziphumeza njani iinjongo zabo?

⁸ Ziziphi iindlela abawexuki abazisebenzisayo ukuphumeza iinjongo zabo? Ngamaxesha amaninzi bagqwetha inyaniso, bayingxenge, baze baxoke ngokuphandle. UYesu wayesazi ukuba abalandeli bakhe babeya kuba ngamaxhoba abo ‘bathetha ngabo lonke uhlobo lwento engendawo bexoka.’ (Mateyu 5:11) Abachasi abanjalo abanolunya baya kuthetha ubuxoki ngenjongo yokukhohlisa abanye. Umpostile uPetros walumkisa ngabawexuki abaya kusebenzisa “amazwi alalanisayo,” basasaze “iimfundiso . . . ezikhohlisayo,” baze ‘bajije iZibhalo’ ukuze bafeze iinjongo zabo. (2 Petros 2:3, 13; 3:16) Ngelishwa, abawexuki “bayalubhukuqa ukholo lwabathile.”—2 Timoti 2:18.

9, 10. (a) Sinokukuphepha njani ukukhohliswa ngabawexuki? (b) Kutheni singaphazamiseki ukuba ulwazi lwethu ngenjongo kaThixo lufanele lulungiswe?

⁹ Sinokukuphepha njani ukukhohliswa ngabawexuki? Ngokuphulaphula icebiso elifumaneka kwiLizwi likaThixo, elithi: “Nibabeke esweni abo bahlukanisayo nabakhubekisayo ngokuchaseneyo nemfundiso eniyifundileyo, nize nibaphephe.” (Roma 16:17) ‘Siyabaphepha’ ngokungazamkeli iingcamango zabo—enoba bazidlulisela ngomlomo, ngezinto ezibhaliweyo, okanye nge-Internet. Kutheni sifanele senjenjalo? Okokuqala, kungokuba iLizwi likaThixo lisiyalela ukuba senjenjalo, yaye sinethemba lokuba uYehova usoloko ekwazi oko kusilungeleyo.—Isaya 48:17, 18.

¹⁰ Okwesibini, siyayithanda intlangano esifundise iinyaniso ezibalulekileyo ezisenza sahluke ngokupheleleyo kwiBhabhiloni Enkulu. Kwangaxeshanye, siyaqonda ukuba asinalwazi lugqibeleleyo ngeenjongo zikaThixo; indlela esiziqonda ngayo izinto iye yaguquka ekuhambeni kweminyaka. AmaKristu anyanisekileyo anelisekile kukulindela uYehova ukuze asulungekise izinto. (IMizekeliso 4:18) Okwangoku, asisayi kuyishiya intlangano uThixo ayisebenzisayo, ngoba siyibona ngokucacileyo intsikelelo yakhe kuyo.—IZenzo 6:7; 1 Korinte 3:6.

Kuphephe Ukuzikhohlisa

11. Kutheni abantu abangafezekanga benotyekelo lokuzikhohlisa?

¹¹ Abantu abangafezekanga banotyekelo uSathana akhawulezayo ukulusebenzisa—ukuzikhohlisa. KuYeremiya 17:9 kuthiwa: “Intliziyo inenkohliso kunayo nantoni na yaye iyatyhudisa.” Yaye uYakobi wabhala: “Ngamnye ulingwa ngokutsalwa nokuwexulwa ngumnqweno wakhe.” (Yakobi 1:14) Ukuba intliziyo yethu ilukuhlekile, isenokusenza sirhalele ukwenza isono, isenze sibonakale sinomtsalane yaye singeyongozi. Imbono enjalo yinkohliso, kuba ukuzimisela ukwenza isono ekugqibeleni kuya kukhokelela kwintshabalalo.—Roma 8:6.

12. Sinokubanjiswa njani kukuzikhohlisa?

¹² Ukuzikhohlisa kusenokusibambisa ngokulula. Intliziyo yethu enenkohliso isenokusenza sizithethelele ngesiphoso esinzulu kubuntu bethu okanye sizingxengxezele ngesono esinzulu. (1 Samuweli 15:13-15, 20, 21) Kwakhona, intliziyo yethu etyhudisayo isenokwenza siyamkele ihambo ethandabuzekayo. Ngokomzekelo, makhe sithethe ngombandela wokuzonwabisa. Ezinye iindlela zokuzonwabisa zilungile yaye ziyonwabisa. Noko ke, inkoliso yeendlela zehlabathi zokuzonwabisa—iifilimu neenkqubo zikamabonwakude nakwi-Internet—ingcolile yaye zikhuthaza ukuziphatha okubi. Kulula ukuzikhohlisa sithi sinokuyibukela inkqubo ethile ethandabuzekayo kodwa singenzakali. Bambi bade baqiqe ngokuthi, “Isazela sam sikhululekile, ngoko ke iphi ingxaki?” Kodwa abantu abanjalo ‘bayazikhohlisa ngokuqiqa okuphosakeleyo.’—Yakobi 1:22.

13, 14. (a) Yiyiphi imizekelo engokweZibhalo ebonisa ukuba isazela sethu asinakuthenjwa ngamaxesha onke? (b) Sinokukuphepha njani ukuzikhohlisa?

¹³ Sinokukuphepha njani ukuzikhohlisa? Okokuqala, sifanele sikhumbule ukuba isazela asinakuthenjwa ngamaxesha onke. Cinga ngemeko kampostile uPawulos. Ngaphambi kokuba ngumKristu, wayetshutshisa abalandeli bakaKristu. (IZenzo 9:1, 2) Kusenokuba wayengakhathazwa sisazela ngelo xesha. Ngokucacileyo, isazela sakhe sasingaqeqeshwanga kakuhle. UPawulos uthi: “Ndandisenza ngokungazi, ndiswele ukholo.” (1 Timoti 1:13) Ngoko ke into yokuba isazela sethu asisimangaleli ngendlela ethile yokuzonwabisa oko kukodwa akuqinisekisi ukuba sisendleleni. Kuphela sisazela esiqeqeshwe kakuhle ngeLizwi likaThixo esinokusikhokela ngokufanelekileyo.

¹⁴ Ukuze sikuphephe ukuzikhohlisa, kukho amacebiso aluncedo ekufanele singawalibali. Zigocagoce ngomthandazo. (INdumiso 26:2; 2 Korinte 13:5) Ukuzigocagoca ngokunyaniseka kusenokukubonisa iindawo ofanele wenze inguqulelo kuzo kwindlela ozijonga nozenza ngayo izinto. Phulaphula kwabanye. (Yakobi 1:19) Ekubeni ukuzigocagoca kuxhomekeke kwindlela thina esizijonga ngayo, kubalulekile ukuphulaphula oko kuthethwa ngamanye amaKristu aqolileyo. Ukuba ufumanisa ukuba wenza izigqibo okanye wenza izinto ngendlela ethandabuzekayo emehlweni amanye amakholwa azinzileyo nanamava, usenokuzibuza, ‘Ngaba kusenokwenzeka ukuba isazela sam asiqeqeshwanga kakuhle okanye intliziyo yam iyandikhohlisa?’ Zondle rhoqo ngeBhayibhile nangeempapasho ezisekelwe eBhayibhileni. (INdumiso 1:2) Ukwenjenjalo kuya kukunceda ukuze iingcinga zakho, isimo sakho sengqondo nendlela ovakalelwa ngayo ivisisana nemigaqo kaThixo.

Buphephe Ubuxoki BukaSathana

15, 16. (a) Ezama ukusikhohlisa, uSathana usebenzisa buphi ubuxoki? (b) Sinokukuphepha njani ukukhohliswa bubuxoki obunjalo?

¹⁵ USathana usebenzisa ubuxoki obahlukahlukeneyo ukuzama ukusikhohlisa. Uzama ukusenza sikholelwe ukuba xa sinezinto eziphathekayo siya konwaba size saneliseke, yaye ngamaxesha amaninzi oku akubi njalo. (INtshumayeli 5:10-12) Angavuya xa sinokukholelwa ukuba eli hlabathi lingendawo liza kuhlala ngonaphakade, nangona kukho ubungqina obucacileyo bokuba siphila ‘kwimihla yokugqibela.’ (2 Timoti 3:1-5) USathana ukhuthaza ingcamango yokuba akuyongozi ukuziphatha okubi, nangona abantu abathanda iziyolo bedla ngokufumana imiphumo emibi. (Galati 6:7) Sinokuphepha njani ukukhohliswa bubuxoki obunjalo?

¹⁶ Zuza kwimizekelo yeBhayibhile. IBhayibhile inemizekelo esisilumkiso yabantu abakhohliswa bubuxoki bukaSathana. Babezithanda izinto eziphathekayo, abanikela ngqalelo kumaxesha esiphila kuwo, okanye baziphatha kakubi—yaye kubo bonke oko kwaphumela kwintlekele. (Mateyu 19:16-22; 24:36-42; Luka 16:14; 1 Korinte 10:8-11) Funda kwimizekelo yale mihla. Kubuhlungu ukuthi amanye amaKristu ayalibala ukuba amaxesha mabi aze acinge ukuba alahlekelwa yinto ethile elungileyo ngokukhonza uThixo. Asenokuyishiya inyaniso aze aphile ubomi ekuthiwa kukuzonwabisa. Noko ke, abantu abanjalo ‘basemhlabeni omtyibilizi,’ kuba kungekudala indlela yokuziphatha yokungahloneli Thixo iya kubafaka engozini. (INdumiso 73:18, 19) Siya kuba silumkile ukuba siyafunda kwiimpazamo zabanye.—IMizekeliso 22:3.

17. Kutheni uSathana esasaza ubuxoki bokuba uYehova akasithandi okanye asixabisekanga kuye?

¹⁷ Kukho obunye ubuxoki uSathana abusebenzise ngokuphumelelayo—ubuxoki bokuba uYehova akasithandi yaye akasixabisi. USathana ebesoloko eqwalasele abantu abangafezekanga kangangamawaka eminyaka. Uyazi ukuba ukudimazeka kusenokusenza buthathaka. (IMizekeliso 24:10) Ngenxa yoko, usasaza ubuxoki bokuba asixabisekanga emehlweni kaThixo. Ukuba “siphoswa phantsi” size sikholelwe kukuba uYehova akasikhathelele, sisenokufuna ukunikezela. (2 Korinte 4:9). Leyo yinto kanye lo Mkhohlisi mkhulu afuna siyenze! Ngoko ke, yintoni esinokuyenza ukuze sikuphephe ukukhohliswa bubuxoki bukaSathana?

18. IBhayibhile isiqinisekisa njani ukuba uYehova uyasithanda?

¹⁸ Camngca ngoko iBhayibhile ikuthethayo ngendlela uThixo asithanda ngayo. ILizwi likaThixo lisebenzisa imizekeliso echukumisayo ukusiqinisekisa ukuba uYehova unikela ingqalelo kuthi yaye uyasithanda. Ugalela iinyembezi zakho “kwintsuba,” nto leyo ethetha ukuba uyazibona yaye uyazikhumbula iinyembezi zakho xa ulila uzama ukuhlala uthembekile. (INdumiso 56:8) Uyazi xa ‘waphuke intliziyo’ yaye usondele kuwe ngamaxesha anjalo. (INdumiso 34:18) Wazi zonke iinkcukacha ngawe, kuquka nenani ‘leenwele ezi zentloko yakho.’ (Mateyu 10:29-31) Ngaphezu koko, uThixo “wanikela ngoNyana wakhe okuphela kwamzeleyo” ngenxa yakho. (Yohane 3:16; Galati 2:20) Maxa wambi, usenokukufumanisa kunzima ukukukholelwa ukuba ezo zibhalo ziyasebenza kuwe. Noko ke, sifanele sikuthembe oko uYehova akuthethileyo. Ufuna sikholelwe ukuba uthanda umntu ngamnye kuthi kungekhona njengeqela.

19, 20. (a) Kutheni kubalulekile ukubuqonda nokubuphepha ubuxoki bukaSathana bokuba uYehova akasithandi? (b) Omnye umveleli ohambahambayo ubancede njani abadimazekileyo?

¹⁹ Buqonde uze ungabamkeli ubuxoki. Ukuba uyazi ukuba umntu othile uyaxoka, unokuzikhusela ukuze ungakhohliswa. Ngoko ke, ngokufanayo, ukwazi ukuba uSathana ufuna ubukholelwe ubuxoki bokuba uYehova akakuthandi oko kunokuba luncedo gqitha. Ethetha ngenqaku leMboniselo elalilumkisa ngamaqhinga kaSathana, omnye umKristu wathi: “Andizange ndiqonde ukuba uSathana uzama ukusebenzisa indlela endivakalelwa ngayo ukuze andidimaze. Ukwazi oku kundikhuthaza ukuba ndilwe nendlela endivakalelwa ngayo.”

²⁰ Khawucinge ngoko kwenzeka komnye umveleli ohambahambayo kwilizwe laseMzantsi Merika. Xa esenza amatyelelo okubuyela kwamanye amakholwa adimazekileyo, udla ngokuwabuza, ‘Ngaba uyakholelwa kuBathathu Emnye?’ Lowo udimazekileyo udla ngokuphendula athi, ‘Akunjalo,’ eqonda ukuba obu bobunye ubuxoki bukaSathana. Lo mdala udla ngokwandula abuze, ‘Ngaba uyakholelwa kwisihogo somlilo?’ Kwakhona omnye udla ngokuphendula athi, ‘Andikholelwa kuloo nto, mna!’ Wandula ke lo mdala uhambahambayo athi kukho nobunye ubuxoki bukaSathana ngokuqhelekileyo obungaqondwayo. Utyhila kwiphepha 249, isiqendu 21, kwincwadi ethi Sondela KuYehova,b ebubhenca ngokupheleleyo ubuxoki bokuba uYehova akasithandi. Lo mveleli uhambahambayo unikela ingxelo entle esithi uyabanceda abadimazekileyo ukuba bakuqonde oku baze bangabukholelwa obu buxoki bukaSathana.

Kuphephe Ukukhohliswa

21, 22. Kutheni singekho ebumnyameni ngokuphathelele amaqhinga kaSathana, yaye sifanele sizimisele ukwenza ntoni?

²¹ Ebudeni bale nxalenye yokugqibela yemihla yokugqibela, kufanele kulindelwe ukuba uSathana uza kuqhubeka ethetha ubuxoki nenkohliso. Kuyavuyisa ukuba, uYehova akasishiyanga singawazi amaqhinga kaSathana okusikhohlisa. IBhayibhile neempapasho ezisekelwe eBhayibhileni ‘zekhoboka elithembekileyo neliyingqondi’ zizibhenca ngokucacileyo iindlela ezingendawo zikaMtyholi. (Mateyu 24:45) Ukulunyukiswa kusengaphambili kusinceda sikwazi ukuhlala siphaphile.—2 Korinte 2:11.

²² Ngoko ke, masiphephe indlela abawexuki abaqiqa ngayo. Masizimisele ukuwuphepha umgibe wokuzikhohlisa ngendlela echuliweyo. Masibuqonde size sibugatye bonke ubuxoki bukaSathana. Ngokwenjenjalo, siya kululondoloza ulwalamano lwethu ‘noThixo wenyaniso,’ oyithiyileyo inkohliso.—INdumiso 31:5; IMizekeliso 3:32.

[Imibhalo esemazantsi]

Usakhumbula?

• Kutheni kukho inkohliso engaka ehlabathini namhlanje?

• Sinokukuphepha njani ukukhohliswa ngabawexuki?

• Sinokuluphepha njani utyekelo lokuzikhohlisa?

• Sinokukuphepha njani ukukhohliswa bubuxoki bukaSathana?

[Umfanekiso okwiphepha 17]

Ungazikhohlisi ngokuphathelele ukuzonwabisa

[Imifanekiso ekwiphepha 18]

Ukuze ukuphephe ukuzikhohlisa, zigocagoce ngomthandazo, baphulaphule abanye, uze uzondle rhoqo ngeLizwi likaThixo