Kulumkele Ukukhohliswa

UDON QUIXOTE ngumdlali odumileyo wencwadi eyabhalwa ngumbhali waseSpeyin wenkulungwane ye-16 uMiguel de Cervantes. Kuloo ncwadi, uDon Quixote uzalisa ingqondo yakhe ngeentsomi namabali athetha ngamakroti anxibe izivatho zemfazwe ezikhazimlayo nahlangula iinkosazana ezisengozini. Kungekudala, la mabali awafundayo amenza acinge ukuba naye uliqhawe elithile. Kwesinye isiqendu saloo ncwadi uhlasela amaphiko okutsala amanzi kuba ecinga ukuba zizigebenga. Nangona ecinga ukuba uthunywe nguThixo ukuba abulale ezo zigebenga, ekugqibeleni uyadana.

Siyavuma uDon Quixote ngumntu wasentsomini kodwa ukukhohliswa kona akuhlekisi. Ngokomzekelo, cinga ngenxila elicinga ukuba linokusela kakhulu lize lingenzeki nto, suke ekugqibeleni lonakalise impilo yalo nentsapho yalo. Okanye cinga ngomntu onesifo sokoyika ukutyeba (anorexia) ocinga ukuba usegazini nangona esecicini lokufa ngenxa yokungatyi.

Ngaba nathi sinokukhohliswa? Okubuhlungu kukuba kunjalo. Inyaniso kukuba sonke sinokubanjiswa ngulo mgibe. Loo nto iquka nengozi yokukhohliswa ziinkonzo esikuzo. Kutheni kunjalo nje? Yintoni esinokuyenza ukuze singakhohliswa?

Iingozi Zokukhohliswa

Esinye isichazi magama sithi ukukhohlisa “kukwenza umntu akholelwe into ebubuxoki.” Kukwathetha “ukufundisa ubuxoki okanye inkolelo emenza umntu angazi, abhideke okanye angakwazi ukuzinceda.” Eyona nto ithethwa leli gama kunye nezithetha ntonye zalo “ezinjengokulahlekisa” “nokuqhatha” kukulahlekisa umntu ngeendlela ezifihlakeleyo. Ngokuqinisekileyo usengozini engathethekiyo umntu ongaziyo ukuba “ufihlelwa ulwazi, owenziwa abhideke ukuze angakwazi ukuzinceda” ngokufundiswa ubuxoki ngabom.

Eyona nto ibuhlungu kukuba amaxesha amaninzi umntu okhohliswayo udla ngokungafuni ukuzilahla iinkolelo zakhe naxa sele eboniswa ubungqina bokuba zibubuxoki. Mhlawumbi uye azithande kakhulu kangangokuba ade angafuni nokubuva ubungqina obuzichasayo.

Ngaba Sisengozini?

Usenokucinga ukuba siyazibaxa izinto xa sisithi sonke sisengozini yokukhohliswa ziinkonzo zethu. Kodwa ke asizibaxi. Oku kungenxa yokuba uSathana uMtyholi awathi uYesu ‘nguyise wobuxoki’ ufuna ukusilahlekisa sonke. (Yohane 8:44) EBhayibhileni kuthiwa uSathana ‘nguthixo wale nkqubo yezinto.’ ‘Ubesoloko emfamekisa iingqondo’ zezigidi ngezigidi zabantu ukutyhubela imbali. (2 Korinte 4:4) Kanye ngoku sithethayo ‘ulahlekisa umhlaba omiweyo uphela.’—ISityhilelo 12:9.

USathana wabakhohlisa zisuka nje abantu. Ngokomzekelo, wakhohlisa uEva ngelithi wayenganyanzelekanga ukuba athobele uMdali nokuthi ‘wayenokuba njengoThixo, azi okulungileyo nokubi,’ ngaloo ndlela azenzele ngokwakhe izigqibo zento elungileyo nembi. (Genesis 3:1-5) Kwaqala kanjalo ke ukukhohliswa kwabantu kuba nangona babedalwe banenkululeko yokuzikhethela into abaza kuyenza, abantu abakwazi ukuzigqibela phakathi kwento elungileyo nembi. NguThixo onguMdali noMongami wendalo kuphela onelo lungelo negunya. (Yeremiya 10:23; ISityhilelo 4:11) Kukuzikhohlisa ukucinga ukuba ilungelo lokuzikhethela lithetha ukuzenzela izigqibo phakathi kwento elungileyo nembi. Ngelishwa kulula ngathi bantu bangafezekanga ukuwela kulo mgibe.

Ngaba Loo nto Inokwenzeka Nakuwe?

Kusenokwenzeka ukuba izinto ozikholelwayo bezikho ukutyhubela iinkulungwane. Noko ke, loo nto ayithethi ukuthi zichanile. Ngoba? Kaloku iBhayibhile ibonisa ukuba kwathi nje emva kokufa kwabapostile bakaKristu kwavela amadoda akhohlisayo ebandleni awaqalisa ukufundisa “izinto ezijijekileyo ukuze abatsale abafundi emva kwawo.” (IZenzo 20:29, 30) Akhohlisa abantu “ngeengxoxo ezeyisayo” ‘nangeentandabulumko nenkohliso elambathayo esekelwe kwizithethe zabantu.’—Kolose 2:4, 8.

Ngaba izinto zahlukile namhlanje? Azahlukanga kuba umpostile uPawulos walumkisa ngelithi izinto zaziya kuba mbi nakakhulu “ngemihla yokugqibela,” esiphila kuyo namhlanje. Wathi: “Abantu abangendawo namabhedengu baya kuhambela phambili ebubini, belahlekisa yaye belahlekiswa.”—2 Timoti 3:1, 13.

Kububulumko ke ngoko ukusithatha nzulu isilumkiso sikampostile uPawulos esithi: “Ngenxa yoko lowo ucinga ukuba umile makalumke angawi.” (1 Korinte 10:12) Siyavuma, uPawulos wayethetha ngomntu omi phambi koThixo kodwa ke kukuziqaba ngentshongo emehlweni ukucinga ukuba uSathana akasoze akukhohlise. Akakho umntu ongenakukhohliswa ‘ngamaqhinga’ kaSathana. (Efese 6:11) Yiloo nto eyenza umpostile uPawulos wathi wayesoyikela ukuba amaKristu exesha lakhe ‘ngandlel’ ithile, njengoko inyoka yamlukuhlayo uEva ngobuqhokolo bayo, iingqondo zawo zazisenokonakaliswa zisuke ekunyanisekeni nakubunyulu obufanele uKristu.’—2 Korinte 11:3.

Ufanele Wenze Ntoni Ukuze Ungakhohliswa?

Ufanele wenze ntoni ukuze ungakhohliswa nguMtyholi? Ungaqiniseka njani ukuba ‘unqula uThixo ngomoya nangenyaniso’? (Yohane 4:24) Sebenzisa izinto akunike zona uYehova uThixo. Okokuqala, ukunike “amandla okuqonda” ukuze ukwazi ukwahlula phakathi kwenyaniso nobuxoki. (1 Yohane 5:20) Kwakhona ukwenze wakwazi ukuwabona amaqhinga kaSathana. (2 Korinte 2:11) Singatsho sithi ukunike yonke into efunekayo ukuze ukwazi ukulwa noSathana.—IMizekeliso 3:1-6; Efese 6:10-18.

Okona kubaluleke nangakumbi kukuba uThixo ukunike namandla okuzikhusela angenakoyiswa. Ngawaphi loo mandla? Kaloku ngala umpostile uPawulos akhuthaza uTimoti ukuba athembele kuwo xa kufikwa kwizinto ezinokuthanani nokholo. Emva kokulumkisa uTimoti ‘ngabantu abangendawo namabhedengu’ umpostile uPawulos wamxelela ukuba abachase ngokusekela zonke iinkolelo zakhe ‘kwimibhalo engcwele,’ eliLizwi likaThixo elingcwele, iBhayibhile.—2 Timoti 3:15.

Ewe kona, abanye basenokuthi nabani na okholelwa kuThixo novumayo ukuba iBhayibhile liLizwi lakhe eliphefumlelweyo ulahlekisiwe. Eneneni abona bantu balahlekisiweyo ngabo babukhaba ngawo omane ubungqina bokuba kukho uMdali nobokuba iBhayibhile iphefumlelwe nguye.a—Roma 1:18-25; 2 Timoti 3:16, 17; 2 Petros 1:19-21.

Kunokuba ukhohliswe koko kubizwa ngokuba “‘lulwazi’ kuxokwa” fumana eyona nyaniso kwiLizwi likaThixo. (1 Timoti 6:20, 21) Xelisa amadoda namabhinqa aseBhereya awayeshumayela kuwo umpostile uPawulos. “Balamkela ilizwi ngeyona ntumekelelo inkulu yengqondo.” Abazange banele nje ukukholelwa izinto ababezifundiswa ngumpostile uPawulos kodwa ‘bazincina ngenyameko iZibhalo mihla le mayela nokuba zinjalo kusini na ezo zinto.’—IZenzo 17:11.

Awufanele woyike ukuhlola iinkolelo zakho ngale ndlela. Phofu neBhayibhile ikukhuthaza ukuba ‘uqiniseke ngezinto zonke’ ngaphambi kokuba uzikholelwe. (1 Tesalonika 5:21) Ngasekupheleni kwenkulungwane yokuqala yeXesha Eliqhelekileyo umpostile uYohane wabongoza amanye amaKristu esithi: “Zintanda, musani ukuwakholelwa onke amazwi aphefumlelweyo, kodwa wavavanyeni amazwi aphefumlelweyo ukuze nibone enoba aphuma kuThixo kusini na.” (1 Yohane 4:1) Nangona imfundiso ethile isenokubonakala ‘iphefumlelwe’ okanye ivela kuThixo, kububulumko ukuyithelekisa neZibhalo ngaphambi kokuba uyamkele.—Yohane 8:31, 32.

Zisebenzise Izinto Ozifundayo

Noko ke, kukho okungakumbi okufunekayo. Umfundi uYakobi wabhala wathi: “Yibani ngabenzi belizwi, ningabi ngabevayo kuphela, nizikhohlisa ngokuqiqa okuphosakeleyo.” (Yakobi 1:22) Akwanelanga ukwazi oko kufundiswa yiBhayibhile. Kufuneka uyivumele ikulawule. Njani? Ngokwenza izinto athi zenze uThixo uze ungazenzi angazifuniyo.

Ngokomzekelo, ucinga ntoni ngokuziphatha okubi okugqubayo namhlanje? Ngaba loo nto ayibonisi indlela aphumelele ngayo uSathana ekukhohliseni abantu ukuba bacinge ukuba banokwaphula umthetho kaThixo baze bangenziwa nto? Kungenxa yoko le nto umpostile uPawulos waluleka amaKristu esithi: “Ningalahlekiswa: UThixo akanakwenziwa intlekisa. Loo nto ayihlwayelayo umntu, uya kuvuna kwayona.”—Galati 6:7.

Ungafani “nendoda esisidenge,” athi uYesu ‘iva’ amazwi akhe ize ‘ingawenzi.’ NjengoDon Quixote wencwadi kaCervantes owayekhohliswe yimibono yengqondo yakhe, le ndoda ekumzekeliso kaYesu yayikhohlisiwe kuba yayicinga ukuba yayinokwakha indlu eyomeleleyo phezu kwentlabathi. Kunoko, yiba njengendoda “eyakha indlu yayo phezu kolwalwa.” UYesu wathi le ndoda ‘iyingqondi’ kuba iva amazwi akhe ‘ize iwenze.’—Mateyu 7:24-27.

[Umbhalo osemazantsi]

[Ibhokisi/Umfanekiso okwiphepha 12, 13]

Ngaba Izinto Uzibona Zinjengokuba Zinjalo?

Ngeminyaka yee-1930 umzobi waseSweden uOscar Reutersvärd wenza uthotho lwemizobo eyaba ngundaba-mlonyeni. Eminye yaloo mizobo iboniswe ngasekhohlo. Xa uyikrwaqula ibonakala ibonisa izinto ezingenakwenzeka. Kodwa xa uyondela ngokusondeleyo uya kuphawula ukuba umntu owayizobayo wayenza ngobuchule ukuze akhohlise abantu.

Asiyomizobo yezinto ezingenakwenzeka kuphela ekwaziyo ukukhohlisa abantu. Kwiminyaka enokuba ngamawaka amabini eyadlulayo iBhayibhile yalumkisa isithi: “Lumkani, ningathabatheki ziintanda-bulumko nayinkohliso elambathayo esekelwe kwizithethe zabantu, nakwizinto eziziziqalelo zehlabathi, kungekhona kuKristu.”—Kolose 2:8.

Into esenza sibe namandla esi silumkiso kukuba sabhalwa ngumntu owayekhe wakhohliswa. Kwakungenakuba lula ukuyikhohlisa le ndoda kuba yayifunde ezinyaweni zomfundisi wexesha layo owayephum’ izandla ibe yayisazana nabantu ababalulekileyo.—IZenzo 22:3.

Le ndoda yayinguSawule waseTarso yaye yayifundiswe ukuba nabani na owayephikisa izithethe zayo zonqulo wayefanelwe kukufa. USawule owayenikwe igunya ziinkokeli zamaYuda wayekugqala njengomsebenzi awunikwe nguThixo ukutshutshisa amaKristu. Wade waxhasa nokubulawa komnye umYuda owayetyholwa ngokunyelisa uThixo.—IZenzo 22:4, 5, 20.

Kodwa ekuhambeni kwexesha uSawule wancedwa wabona umahluko phakathi kwento elungileyo nembi, naphakathi kokuthanda kukaThixo noko angakufuniyo. Esakuqonda ukuba wayephazama uSawule wazitshintsha iindlela zakhe waza waba nguPawulos, umpostile kaYesu Kristu onenzondelelo. UPawulos owayengaseloxhoba lokukhohliswa wayifumana eyona ndlela yamkelekileyo yokukhonza uThixo.—IZenzo 22:6-16; Roma 1:1.

NjengoPawulos, abantu abaninzi abanyanisekileyo bakhe bakhohliswa ziimfundiso ezinokufaniswa nale mizobo yezinto ezingekhoyo—iinkolelo ezivakala zinengqiqo kodwa zibe zingasekelwanga eLizwini likaThixo. (IMizekeliso 14:12; Roma 10:2, 3) Baye bancedwa babona iinkolelo neziqhamo ezibi zeenkonzo zabo. (Mateyu 7:15-20) Njengoko babefumana ulwazi oluchanileyo lweBhayibhile, bazitshintsha iinkolelo zabo nendlela abaphila ngayo ukuze bakholise uThixo.

Ngaba uyafuna ukulandela umzekelo kampostile uPawulos uze uhlole iinkolelo zakho usebenzisa iLizwi likaThixo iBhayibhile? AmaNgqina kaYehova angathanda ukukunceda.

[Inkcazelo Ngomfanekiso okwiphepha 10]

Engravings by Doré