“Yilwa Umlo Omhle Wokholo”
NGABA ucinga ukuba likho ijoni ngexesha lemfazwe elingenakuvuya xa kusithiwa kulo: “Goduka uye kuhlala nomfazi wakho nabantwana bakho okwethutyana”?
Ijoni elithile ngexesha likaKumkani uDavide wakwaSirayeli layalelwa ukuba lenjenjalo. U-Uriya umHeti wayalelwa ngukumkani ukuba agoduke. Sekunjalo, u-Uriya akazange avume ukugoduka. Xa wabuzwa isizathu, u-Uriya waphendula wathi ityeya yomnqophiso, efuzisela ubukho bukaThixo, nomkhosi wamaSirayeli usedabini. Wabuza: “Ndiye endlwini yam na ukuze ndidle ndisele nokuze ndilale nomfazi wam?” U-Uriya wayengakucingi nokukucinga ukwenjenjalo ngexesha elinzima kangaka.—2 Samuweli 11:8-11.
Into eyenziwa ngu-Uriya ivusa imibuzo ebalulekileyo, kuba nathi siphila kwixesha lemfazwe. Kukho imfazwe eliwa ngoku engafani nayo nayiphi na imfazwe eyakha yaliwa ziintlanga zehlabathi. Le yenza ukuba iimfazwe ezimbini zehlabathi zibonakale ziyindlalo, yaye nawe ubandakanyekile kule mfazwe. Ujamelene nengozi enkulu, utshaba lunamandla gqitha. Kule mfazwe, akudutyulwana, akuphoswa zibhombu, kodwa kuf’ ayayo.
Ngaphambi kokuba uye emfazweni, kubalulekile ukwazi enoba ulwela into efanelekileyo kusini na. Uza kuzuza ntoni kule mfazwe? Injongo yalo mlo ichazwa ngumpostile uPawulos kwincwadi yakhe eyayisiya kuTimoti esithi: “Yilwa umlo omhle wokholo.” Ewe, kule mfazwe akufanele ukhusele inqaba, kodwa “ukholo”—iinyaniso azikholelwayo amaKristu ezichazwe eBhayibhileni. Ngokucacileyo, ufanele ube ‘nokholo’ oluqinileyo ukuze ukwazi ukululwela uze woyise.—1 Timoti 6:12.
Ijoni elilumkileyo lizabalazela ukulwazi utshaba. Kulo mlo, utshaba lunamava ekulweni, yaye linenqwaba yezixhobo. Yaye lunamandla angaphezu kwawomntu. Lukhohlakele, yaye lunamaqhinga; nguSathana. (1 Petros 5:8) Izixhobo zenyama nobulumko babantu abusebenzi kolu tshaba. (2 Korinte 10:4) Yintoni onokuyisebenzisa kule mfazwe?
Esona sixhobo siphambili ‘likrele lomoya, oko kukuthi, ilizwi likaThixo.’ (Efese 6:17) Umpostile uPawulos ubonisa indlela eliphumelela ngayo esithi: “Ilizwi likaThixo liphilile, linamandla yaye libukhali ngaphezu kwalo naliphi na ikrele elintlangothi-mbini, lihlaba lide lahlule umphefumlo nomoya, kwanamalungu nomongo wawo, yaye liyakwazi ukuphicotha iingcamango notyekelo lwentliziyo.” (Hebhere 4:12) Ngokuqinisekileyo, isixhobo esibukhali nesiyingozi kangako, esinokugqobhoza iingcamango ngaphakathi neentshukumisa zomntu sifanele sisetyenziswe ngobuchule nangenyameko.
Kusenokwenzeka uyazi ukuba umkhosi usenokuba nezona zixhobo ziphucukileyo, kodwa azithethi nto ezo zixhobo ukuba amajoni akakwazi ukuzisebenzisa kakuhle. Ngokufanayo nawe ufuna ukufundiswa ukuze ulisebenzise ikrele lakho ngendlela ephumelelayo. Siyavuya ukukuxelela ukuba, usenokufumana uqeqesho kwawona majoni anamava. UYesu wababiza aba bafundisi bangamajoni ngokuthi “likhoboka elithembekileyo neliyingqondi,” elinikwe imbopheleleko yokudlulisela ukutya kokomoya ngexesha elifanelekileyo, okanye imfundiso, kubalandeli bakhe. (Mateyu 24:45) Unokulibona eli khoboka njengeqela ngokuphawula indlela elikhuthele ngayo ekufundiseni nasekunikeleni izilumkiso ngamaqhinga otshaba. Ubungqina bubonisa ukuba eli khoboka ngamalungu athanjiswe ngomoya ebandla lobuKristu lamaNgqina kaYehova.—ISityhilelo 14:1.
Eli khoboka njengeqela lenze okungakumbi kunokufundisa. Libonise umoya awayenawo umpostile uPawulos, owabhalela ibandla laseTesalonika esithi: “Siye saba ngabathantamisayo phakathi kwenu, njengaxa umama oncancisayo ebaphatha ngononophelo abakhe abantwana. Ngokunjalo, ngenxa yokuba sinomsa ngani, kuye kwakholeka kuthi ukuba sininike, kungekuphela nje iindaba ezilungileyo zikaThixo, kodwa kwanemiphefumlo yethu, ngenxa yokuba naba ziintanda kuthi.” (1 Tesalonika 2:7, 8) Kuxhomekeke kumKristu ngamanye olijoni ukulusebenzisa olu qeqesho lunikelwa ngothando.
Zonke Izikrweqe
Kulungiselwe ukuba ufumane zonke izikrweqe ukuze ukwazi ukuzikhusela. Unokufumana uludwe lwezi zikrweqe kweyabase-Efese 6:13-18. Ijoni elilumkileyo alisayi kuya emfazweni ukuba isixhobo salo sokomoya silahlekile okanye sifuna ukulungiswa.
UmKristu ufanele abe nazo zonke izikrweqe zokumkhusela, kodwa ikhaka elikhulu lokholo libalulekile. Kungenxa yoko le nto uPawulos wabhala esithi: “Ngaphezu kwezinto zonke, thabathani ikhaka elikhulu lokholo, enothi ngalo nikwazi ukucima yonke imijukujelwa evuthayo yalowo ungendawo.”—Efese 6:16.
Ikhaka elikhulu, elinokugquma umzimba wonke, limela umgangatho wokholo. Ufanele ube nokholo oluqinileyo kulwalathiso lukaYehova, ukwamkele ngaphandle kokuthandabuza ukuba zonke izithembiso zakhe ziya kuzaliseka. Ufanele uvakalelwe ngokungathi ezo zithembiso sezizalisekile. Musa ukukuthandabuza nakancinane ukuba inkqubo yehlabathi likaSathana iphela iza kutshatyalaliswa, yaye abantu abanyaniseke kuThixo baza kuphinda benziwe bafezeke.—Isaya 33:24; 35:1, 2; ISityhilelo 19:17-21.
Noko ke, kulo mlo ukhethekileyo ufanele ufumane enye into—umhlobo. Ngexesha lemfazwe kwakhiwa ulwalamano olusenyongweni njengoko amaqabane ekhuthazana aze akhuselane, maxa wambi esindisana ekufeni. Nangona kubalulekile ukuba neqabane, ukuze usinde kule mfazwe, ufanele ube nobuhlobo noYehova. Kungenxa yoko le nto uPawulos equkumbela uludwe lwakhe lwezikrweqe ngala mazwi: “Ngoxa ngazo zonke izihlandlo niqhubeka nithandaza ngako konke ukuthandaza nokukhunga nikuwo umoya.”—Efese 6:18.
Siyakuthanda ukuba nomhlobo osenyongweni. Senza umzamo wokuba kunye naye. Ngokuthetha rhoqo noYehova ngomthandazo, uba ngumntu wokwenene kuthi, umhlobo esinokumthemba. Umfundi uYakobi uyasikhuthaza: “Sondelani kuThixo, naye uya kusondela kuni.”—Yakobi 4:8.
Amaqhinga Otshaba
Ukuphila kweli hlabathi maxa wambi kusenokufana nokuhamba kwindawo enezigcayiseli. Intlaselo isenokuvela macala onke, yaye utshaba lusenokuzama ukukuhlasela ungalindelanga. Noko ke, qiniseka ukuba uYehova ukukhusele ngandlela zonke.—1 Korinte 10:13.
Utshaba lusenokuhlasela iinyaniso zeBhayibhile ezisisiseko kukholo lwakho. Abawexuki basenokusebenzisa amazwi agudileyo nakhohlisayo nengqiqo egqwethekileyo ukuzama ukukoyisa. Kodwa umwexuki akakukhathelele kwaphela. IMizekeliso 11:9 ithi: “Ngomlomo wakhe umwexuki uyalonakalisa idlelane lakhe, kodwa ngokwazi amalungisa ayahlangulwa.”
Kuya kuba yimpazamo ukucinga ukuba ufanele ubaphulaphule abawexuki okanye ufunde iincwadi zabo ukuze ukwazi ukuphikisa iimfundiso zabo. Ingqiqo yabo egqwethekileyo neyityhefu isenokuba yingozi ngokomoya yaye isenokuba yingozi kukholo lwakho njengesilonda esinwenwayo. (2 Timoti 2:16, 17) Kunoko baphathe abawexuki ngendlela uThixo abaphatha ngayo. UYobhi wathi ethetha ngoYehova: “Kuba phambi kwakhe akukho mwexuki uya kungena.”—Yobhi 13:16.
Utshaba lusenokuzama ukusebenzisa iqhinga elahlukileyo, elo liphumelelayo. Ukuba umkhosi unokulukuhlwa ukuba usasazeke uze uziphathe kakubi, oku kusenokuphelisa ucwangco.
Ukuzonwabisa kwehlabathi, njengeefilimu neenkqubo zikamabonwakude ezingcolileyo nomculo ongandilisekanga, sisithiyelo esisebenzayo. Bambi bathi banokubukela iinkqubo ezingcolileyo okanye bafunde izinto ezingcolileyo kodwa oko kungabaphembeleli. Kodwa omnye umntu owayedla ngokubukela rhoqo iifilimu ezingcolileyo ngokuphandle uyavuma esithi: “Azilibaleki ezo zinto uzibonileyo, okukhona ucinga ngazo kokukhona ufuna ukwenza oko ukubonileyo . . . Loo filimu ikwenza ucinge ukuba kukho into olahlekelwa yiyo.” Ngaba sifanele sizibeke esichengeni sokwenzakaliswa lolu hlaselo luchuliweyo?
Esinye isixhobo utshaba olusisebenzisayo kukuthanda izinto eziphathekayo. Kunzima ukuyibona le ngxaki kuba sonke siyazifuna izinto eziphathekayo. Siyayifuna indlu, ukutya, impahla, yaye akuyonto imbi ukuba nezinto ezintle. Ingxaki yindlela ubani azijonga ngayo ezo zinto. Imali isenokubaluleka ngakumbi kunezinto zokomoya. Sisenokuba ngabathandi bemali. Kubalulekile ukukhumbula ukuba ubutyebi abunakusenza sifumane yonke into. Bukhawuleza buphele, kanti ubutyebi bokomoya buhlala ngonaphakade.—Mateyu 6:19, 20.
Ukuba umkhosi utyhafile, ambalwa amathuba okoyisa. “Ngaba uzibonakalise udimazekile ngomhla wokubandezeleka? Uya kuphelelwa ngamandla.” (IMizekeliso 24:10) Ukudimazeka sisixhobo uSathana aye wasisebenzisa ngokuphumelelayo. Ukunxiba ‘isigcina-ntloko esilithemba losindiso’ kuya kukunceda ulwe nokudimazeka. (1 Tesalonika 5:8) Zama ukuligcina ithemba lakho liqaqambile njengelika-Abraham. Xa waxelelwa ukuba anikele ngonyana wakhe ekuphela kwakhe, uIsake njengomnikelo, uAbraham akazange azilazile. Wakholelwa ukuba uThixo uya kusizalisekisa isithembiso Sakhe sokusikelela zonke iintlanga ngembewu yakhe yaye uThixo unokumvusa uIsake kwabafileyo ukuba kuyimfuneko ukuze azalisekise eso sithembiso.—Hebhere 11:17-19.
Musa Ukunikezela
Bambi abaye balwa ngenkalipho kangangexesha elide basenokuba ngoku badiniwe yaye ngenxa yoko abasazimiselanga kulo mlo njengokuba kwakunjalo ngaphambili. Umzekelo kaUriya, okhankanywe ekuqaleni kweli nqaku, usenokusinceda sonke thina sisemfazweni ukuze sihlale sinesimo sengqondo esifanelekileyo. Amanye amajoni amaninzi angamaKristu aye ajamelana nobunzima, aba sezingozini, okanye aye athwaxwa yingqele naliphango. NjengoUriya, asifuni kucinga ngokuphila tofotofo ngoku okanye sifune ukuphila ubomi obulula. Sifuna ukuhlala sikunye nomkhosi kaYehova wamajoni athembekileyo omhlaba wonke size siqhubeke sisilwa de sifumane iintsikelelo esizigcinelweyo.—Hebhere 10:32-34.
Bekuya kuba yingozi ukuthob’ umxakatho, mhlawumbi sicinga ukuba uhlaselo lokugqibela lusekude. Umzekelo kaKumkani uDavide ubalaselisa le ngozi. Ngenxa yesizathu esithile wayengekho kunye namajoni akhe edabini. Ngenxa yoko, uDavide wenza isono esinzulu esambangela usizi nembandezelo kubomi bakhe bonke.—2 Samuweli 12:10-14.
Ngaba kuyinzuzo ukulwa, ukujamelana nobunzima bokuba sedabini, ukunyamezela ukugculelwa, nokuphepha ukuzonwabisa kwehlabathi okuthandabuzekayo? Abo baqhubeka besilwa ngokuphumelelayo bayavuma ukuba oko kubonakala kufumaneka ehlabathini kusenokuba nomtsalane, njengenkcenkce ekhazimlayo, kodwa xa uyijongele kufuphi ayinaxabiso lingako. (Filipi 3:8) Ngaphezu koko, ngamaxesha amaninzi iziyolo zalo ziphelela kudano nakwiinkxwaleko.
UmKristu okulo mlo wokomoya unabahlobo abasenyongweni, isazela esicocekileyo, nethemba elimangalisayo. AmaKristu athanjiswe ngomoya ajonge phambili kubomi basezulwini bokungafi noKristu Yesu. (1 Korinte 15:54) Inkoliso yamajoni angamaKristu anethemba lobomi obufezekileyo kwiparadesi esemhlabeni. Ngokuqinisekileyo imivuzo enjalo ifanele nawuphi na umgudu. Yaye ngokungafaniyo neemfazwe zehlabathi, umphumo wale mfazwe uqinisekile lo gama nje sihlala sithembekile. (Hebhere 11:1) Noko ke, le nkqubo ilawulwa nguSathana, iza kutshatyalaliswa ngokupheleleyo.—2 Petros 3:10.
Njengokuba uqhubeka usilwa, khumbula amazwi kaYesu athi: “Yomelelani! mna ndiloyisile ihlabathi.” (Yohane 16:33) Waloyisa ngokuhlala ephaphile nangokugcina ingqibelelo xa wayelingwa. Sinokwenza okufanayo.
[Amagama acatshulweyo akwiphepha 27]
Akudutyulwana, akuphoswa zibhombu, kodwa kuf’ ayayo
[Amagama acatshulweyo akwiphepha 30]
Umphumo wale mfazwe uqinisekile lo gama nje sihlala sithembekile
[Umfanekiso okwiphepha 26]
Isigcina-ntloko sosindiso siya kusinceda silwe nokudimazeka
Sebenzisa ikhaka elikhulu lokholo ukuze uzikhusele ‘kwimijukujelwa yomlilo’ kaSathana
[Umfanekiso okwiphepha 28]
“Sondelani kuThixo, naye uya kusondela kuni”
[Umfanekiso okwiphepha 29]
Sifanele sibe nokholo ekuzalisekeni kwezithembiso zikaThixo