Yomelezanani
‘Aba bandomeleza.’—KOLOSE 4:11.
1, 2. Phezu kwazo nje iingozi, kwakutheni ukuze abahlobo bakaPawulos bamtyelele entolongweni?
KUSENOKUBA yingozi ukuba ngumhlobo womntu othothoza entolongweni—enoba loo mhlobo wakho udlelwe indlala. Amagosa entolongo asenokukurhanela, esoloko ekujongile ukuqinisekisa ukuba akwaphuli mthetho. Ngoko ke, kufun’ inkalipho ukuba nolwalamano olusenyongweni nokutyelela umhlobo osentolongweni.
2 Kanti, leyo yinto kanye abanye babahlobo bompostile uPawulos abayenzayo kwiminyaka enokuba li-1 900 eyadlulayo. Babesoloko bemtyelela uPawulos entolongweni ukuze bamthuthuzele yaye bamkhuthaze baze bamomeleze ngokomoya. Yayingoobani aba bahlobo bakhe banyanisekileyo? Yaye yintoni esinokuyifunda kwinkalipho ababenayo, ukunyaniseka nakubuhlobo babo?—IMizekeliso 17:17.
‘Bandomeleza’
3, 4. (a) Ngoobani abahlobo bakaPawulos abahlanu, yaye yintoni abamenzela yona? (b) Kukuthini ‘ukomeleza’?
3 Makhe sibuyele emva malunga nonyaka wama-60 C.E. Umpostile uPawulos usentolongweni eRoma etyholwa ngokuvukel’ urhulumente. (IZenzo 24:5; 25:11, 12) Ngokukhethekileyo uPawulos ukhankanya amagama amaKristu amahlanu amxhasayo: UTikiko, umthunywa wakhe owayevela kwisithili saseAsiya “kwanekhoboka elilidlelane . . . eNkosini”; uOnesimo, “umzalwana . . . othembekileyo noyintanda” waseKolose; uAristarko, ummi waseMakedoni owayesuka eTesalonika yaye “umthinjwa olidlelane” likaPawulos ngaxa lithile; uMarko, umza weqabane likaPawulos kumsebenzi wokushumayela, uBharnabhas nombhali wencwadi yeVangeli ebizwa ngegama lakhe; noYusto, owayesebenza nalo mpostile “ngenxa yobukumkani bukaThixo.” UPawulos uthi ngaba bahlanu: ‘Bandomeleza.’—Kolose 4:7-11.
4 UPawulos wathetha amazwi abalulekileyo ngoncedo awalufumana kubahlobo bakhe abanyanisekileyo. Wasebenzisa igama lesiGrike elithi (pa·re·go·riʹa) eliguqulelwe ngokuthi ‘bandomeleza,’ elifumaneka kule ndinyana kuphela eBhayibhileni. Eli gama lineentsingiselo ezininzi yaye lalisetyenziswa ngokukhethekileyo kwimicimbi yezonyango.a Lisenokuthetha ‘intuthuzelo, ukudambisa okanye ukunika isiqabu.’ UPawulos wayefun’ ukomelezwa ngaloo ndlela, yaye la madoda mahlanu enza kanye loo nto.
Isizathu Sokuba UPawulos Afune ‘Ukomelezwa’
5. Nakuba wayengumpostile, yintoni uPawulos awayeyifuna, yaye yintoni sonke esiyifunayo ngamaxesha athile?
5 Basenokothuka abanye kukucinga ukuba uPawulos, umpostile, wayefuna ukomelezwa. Kanti, wayekufuna ngokwenene. Kuyavunywa ukuba, uPawulos wayenokholo olomeleleyo, yaye wanyamezela ukuphathwa kakubi ngokwasenyameni, ‘izithonga ezigqithiseleyo,’ ‘ukusinda cebetshu ekufeni ngokufuthi,’ nezinye izinto ezibuhlungu. (2 Korinte 11:23-27) Sekunjalo, wayengumntu, yaye bonke abantu ngamaxesha athile bafuna ukuthuthuzelwa nokomelezwa kokholo lwabo ngokuncedwa ngabanye. Oku kwakunjalo nangoYesu. Ngobusuku bakhe bokugqibela, ingelosi yeza kuye eGetsemane yaza “yamomeleza.”—Luka 22:43.
6, 7. (a) ERoma, ngoobani abamdanisayo uPawulos, yaye ngoobani abamkhuthazayo? (b) Abazalwana abangamaKristu bamenzela ntoni uPawulos eRoma, ngaloo ndlela ‘bemomeleza’?
6 Kwanaye uPawulos wayefuna ukomelezwa. Xa wafika eRoma elibanjwa, abazange bamamkele ngobubele abantu bohlanga lwakhe. Inkoliso yala maYuda, ayizange asamkele isigidimi soBukumkani. Emva kokuba amadoda aziintloko angamaYuda atyelela uPawulos kwindawo awayevalelwe kuyo, ingxelo yeZenzo ithi: “Bambi bazikholelwa izinto awayezitsho; abanye babengakholwa. Ngoko, ngenxa yokuba babengavumelani, bemka.” (IZenzo 28:17, 24, 25) Hayi indlela enoba wayebuhlungu ngayo uPawulos ngenxa yokungabi naluxabiso kwawo ngobubele bukaYehova obungasifanelanga! Ukukhathazeka kwakhe ngenxa yoku kwakubonakala kwincwadi awayeyibhalele ibandla eliseRoma kwiminyaka embalwa ngaphambilana esithi: “Ndinentlungu enkulu nengapheliyo entliziyweni yam. Kuba bendingade ndinqwenele ukuba mna ngokwam ndibe bendahlukanisiwe kuKristu njengalowo uqalekisiweyo esikhundleni sabazalwana bam [amaYuda], abazizalamane zam ngokwasenyameni.” (Roma 9:2, 3) Sekunjalo, eRoma wafumana abahlobo bokwenene nabanyanisekileyo abamkhuthaza ngenkalipho nothando abalubonakalisa kuye. Ngokwenene, aba yayingabazalwana bokomoya.
7 Abo bazalwana bahlanu bamomeleza njani? Abazange bambaleke uPawulos ngenxa yokuba wayesentolongweni. Kunoko, ngomoya ovumayo nangothando bamnceda uPawulos, bemenzela izinto awayengakwazi ukuzenzela ngenxa yokuba esentolongweni. Ngokomzekelo, baba ngabathunywa behambisa iincwadi zikaPawulos nemiyalelo edluliselwa ngomlomo kumabandla awahlukahlukeneyo; bemphathela iingxelo ezikhuthazayo uPawulos ngempilo-ntle yabazalwana baseRoma nabakwezinye iindawo. Kusenokwenzeka ukuba bamfunela izinto awayeziswele, njengempahla yasebusika, imisongo, nezinto zokubhala. (Efese 6:21, 22; 2 Timoti 4:11-13) Zonke ezo zinto ezaziluncedo zamomeleza zaza zamkhuthaza lo mpostile owayesentolongweni ukuze, naye ‘omeleze’ abanye, kuquka namabandla ephela.—Roma 1:11, 12.
Indlela ‘Yokomeleza’ Abanye
8. Yintoni esinokuyifunda ekuvumeni kukaPawulos ngokuzithoba ukuba uyakufuna ‘ukomelezwa’?
8 Yintoni esinokuyifunda kule ngxelo kaPawulos namaqabane akhe amahlanu? Ngokukhethekileyo makhe sihlole isifundo esinye: Kufun’ inkalipho nokuzincama ukunceda abanye kwiinkxwaleko zabo. Kwakhona, kufuna ukuthobeka ukuvuma ukuba sisenokulufuna uncedo lwabanye ngamaxesha kaxakeka. UPawulos akazange avume nje kuphela ukuba ufuna uncedo kodwa walwamkela ngoxabiso olo ncedo waza wababulela abo babemncedile. Akazange acinge ukuba ukwamkela uncedo kwabanye kuya kumenza abonakale ngathi ubuthathaka okanye uzithob’ isidima, yaye nathi asifanele sicinge njalo. Ukuthi asisayi kuze nanini na sifune ukomelezwa kuthetha ukuba thina singabantu abanamandla angaphezu kwawemvelo. Khumbula ukuba, umzekelo kaYesu ubonisa ukuba nomntu ofezekileyo ngamaxesha athile usenokucel’ uncedo.—Hebhere 5:7.
9, 10. Nguwuphi umphumo omhle onokubakho xa ubani evuma ukuba ufuna uncedo, yaye oku kunokubaphembelela njani abanye entsatsheni nasebandleni?
9 Oku kunokuba nemiphumo emihle ukuba abo bakwizigxina ezithile banokuvuma ukuba baneentsilelo yaye nabo baxhomekeke kwabanye ukuze bafumane inkxaso. (Yakobi 3:2) Ukukuvuma oko komeleza ulwalamano lwabo basegunyeni nabo bafanele bathobele igunya, nto leyo enza kube lula ukuthetha nabo ngokukhululekileyo. Ukuzithoba kwabo bakulungeleyo ukwamkela uncedo kusisifundo kwabanye abajamelene nemeko efanayo. Kubonisa ukuba abo bakhokelayo bangabantu nje yaye kulula ukuthetha nabo.—INtshumayeli 7:20.
10 Ngokomzekelo, abantwana basenokufumanisa kulula ukwamkela uncedo lwabazali lokusingatha iingxaki nezilingo xa besazi ukuba abazali babo nabo bajamelana neengxaki ezifanayo xa babengabantwana. (Kolose 3:21) Ngenxa yoku kunokuba lula ukuncokolisana phakathi komzali nomntwana. Zisenokudluliselwa ngokulula nangendlela ephumelelayo izicombululo ezingokweZibhalo yaye zamkelwe msinya. (Efese 6:4) Ngokufanayo, amalungu ebandla aya kulwamkela lula ngakumbi uncedo lwabadala xa eqonda ukuba nabo abadala baneengxaki, izinto ezibaxhalabisayo nezibadidayo. (Roma 12:3; 1 Petros 5:3) Kwakhona, banokuthetha ngokukhululekileyo, yaye kusenokudluliselwa isiluleko esingokweZibhalo, yaye kusenokomelezwana ngokwaselukholweni. Khumbula ukuba, abazalwana noodade bafuna ukomelezwa ngoku kunanini na ngaphambili.—2 Timoti 3:1.
11. Kutheni bebaninzi kangaka namhlanje abafuna ‘ukomelezwa’?
11 Enoba sihlala phi na, singoobani, okanye sibadala kangakanani na, sonke maxa wambi sijamelana neengxaki ebomini. Leyo yinto esingenakuyiphepha kwihlabathi lanamhlanje. (ISityhilelo 12:12) Izinto ezinjalo eziphazamisayo enyameni nangokweemvakalelo zivavanya ukholo lwethu. Kusenokuvela izilingo emsebenzini, esikolweni, entsatsheni, okanye ebandleni. Sisenokugula ngokunzulu okanye sijamelane nentlekele. Ukuba iqabane lomtshato, umdala, okanye umhlobo uyasikhuthaza ngamazwi ovelwano nangezenzo zobubele—oko kunik’ isiqabu sokwenene! Kaloku, kunjengamafutha kwindawo enesilonda! Ngenxa yoko, ukuba uphawula ukuba omnye wabazalwana bakho ukwimeko enjalo, momeleze. Okanye ukuba unengxaki ekhethekileyo ekukhathazayo, cela uncedo kwabo bafanelekayo ngokomoya.—Yakobi 5:14, 15.
Indlela Ibandla Elinokunceda Ngayo
12. Yintoni ngamnye ebandleni anokuyenza ukomeleza abazalwana bakhe?
12 Bonke ebandleni, kuquka nabaselula, banokwenza okuthile ukomeleza abanye. Ngokomzekelo, ukubakho kwakho rhoqo ezintlanganisweni nakwinkonzo yasentsimini kwenza lukhulu ekomelezeni ukholo lwabanye. (Hebhere 10:24, 25) Ukukhuthala kwakho kwinkonzo engcwele kububungqina bokunyaniseka kwakho kuYehova yaye kubonisa ukuba uphaphile ngokomoya phezu kwazo nje iingxaki osenokuba ujamelene nazo. (Efese 6:18) Ukukhuthala kwakho kusenokubomeleza abanye.—Yakobi 2:18.
13. Kutheni abanye besenokuphola, yaye yintoni enokwenziwa ukubanceda?
13 Maxa wambi, iingcinezelo zobomi okanye ezinye iingxaki zinokubangela abanye bathob’ isantya okanye baphole. (Marko 4:18, 19) Sisenokungababoni abo bapholileyo kwiintlanganiso zebandla. Kodwa, kusenokwenzeka ukuba bamthanda ngokunzulu uThixo. Yintoni enokwenziwa ukomeleza ukholo lwabo? Abadala banokubanceda ngobubele ngokubatyelela. (IZenzo 20:35) Namanye amalungu ebandla anokucelwa ukuba nawo ancede. Utyelelo olunjalo lothando lusenokuba yiloo nto kanye ibifuneka ukuvuselela abo babuthathaka elukholweni.
14, 15. Sisiphi isiluleko uPawulos asinikelayo ngokomeleza abanye? Nikela umzekelo welinye ibandla elasisebenzisayo isiluleko sakhe.
14 IBhayibhile isibongoza isithi ‘masiyithuthuzele imiphefumlo edandathekileyo, sibaxhase ababuthathaka.’ (1 Tesalonika 5:14) Mhlawumbi loo “miphefumlo edandathekileyo” iphelelwa ngamandla okujamelana neengxaki ngaphandle koncedo. Ngaba unokunikela olo ncedo? Amazwi athi, “baxhaseni ababuthathaka” aye aguqulelwa ngokuthi “ukubamba nkqi” okanye “ukusondela” kwababuthathaka. UYehova uzixabisile yaye uyazithanda zonke izimvu zakhe. Akazigqali njengezingabalulekanga, yaye akanqweneli nokuba ibenye ikhukuliseke. Ngaba unokulinceda ibandla ukuze ‘libabambe nkqi’ abo babuthathaka bade bomelele?—Hebhere 2:1.
15 Omnye umdala watyelela isibini esitshatileyo esasiphole kangangeminyaka emithandathu. Lo mdala ubhala esithi: “Ububele nothando olubonakaliswe kuso libandla liphela luye lwasichukumisa kangangokuba siye sagqiba kwelokuba sibuyele emhlambini.” Omnye udade owayepholile wayevakalelwa njani xa etyelelwe ngamalungu ebandla? Ngoku uthi: “Into esincedileyo saphinda savuseleleka kukuba abazalwana ababesityelela noodade ababehamba nabo abazange basigwebe okanye basigxeke. Kunoko, babenolwazelelelo yaye basikhuthaza ngeZibhalo.”
16. Ngubani osoloko ekulungele ukunceda abo bafuna ukomelezwa?
16 Ewe, umKristu onyanisekileyo uyakuvuyela ukomeleza abanye. Yaye njengokuba iimeko ziguquka ebomini bethu, nathi sinokomelezwa ngabazalwana bethu. Noko ke, inyaniso ikukuba kusenokwenzeka ukuba xa usengxakini, kungabikho mntu uza kukunceda. Sekunjalo, kukho uMthombo wamandla osoloko ukho, umntu osoloko ekulungele ukunceda—uYehova uThixo.—INdumiso 27:10.
UYehova—Owona Mthombo Wamandla
17, 18. UYehova wamomeleza ngaziphi iindlela uNyana wakhe, uYesu Kristu?
17 Ngoxa wayebethelelwe kwisibonda, uYesu wadanduluka wathi: “Bawo, ndiwuyekela ezandleni zakho umoya wam.” (Luka 23:46) Emva koko wafa. Kwiiyure ezimbalwa ngaphambilana, wayebanjiwe yaye abahlobo bakhe abasenyongweni babaleka bamshiya ngenxa yoloyiko. (Mateyu 26:56) UYesu wayeshiywe yedwa noMntu omnye kuphela wokumomeleza—uYise osezulwini. Sekunjalo, akuzange kube lilize ukukholosa kwakhe ngoYehova. Ukunyaniseka kukaYesu kuYise kwambangela ukuba naye uYehova amxhase ngokunyanisekileyo.—INdumiso 18:25; Hebhere 7:26.
18 Ebudeni bobulungiseleli bukaYesu emhlabeni, uYehova walungiselela konke uNyana wakhe awayekufuna ukuze agcin’ ingqibelelo kude kube sekufeni. Ngokomzekelo, emva kokubhaptizwa kukaYesu, nto leyo eyayiphawula isiqalo sobulungiseleli bakhe, wamva uYise emamkela yaye emqinisekisa ukuba uyamthanda. Xa uYesu wayefuna ukuxhaswa, uYehova wathumela iingelosi ukuze zize kumomeleza. Xa uYesu wayejamelene nolona vavanyo luqatha kubomi bakhe basemhlabeni, uYehova wamphulaphula waza wayiphendula imithandazo nezibongozo zakhe. Ngokuqinisekileyo konke oku kwamomeleza uYesu.—Marko 1:11, 13; Luka 22:43.
19, 20. Sinokuqiniseka njani ukuba uYehova uya kusomeleza ngamaxesha anzima?
19 UYehova ufuna sithembele kuye ngokupheleleyo ukuze asomeleze. (2 Kronike 16:9) UMthombo wokwenyaniso wamandla amakhulu nokomelela usenokusomeleza nathi ngamaxesha anzima. (Isaya 40:26) Imfazwe, ubuhlwempu, ukugula, ukufa, okanye nobuthathaka bethu busenokubangela ingcinezelo enkulu. Xa songanyelwa zizilingo zobomi ezingathi ‘lutshaba olomeleleyo,’ uYehova usenokuba ngamandla ethu aze asomeleze. (INdumiso 18:17; Eksodus 15:2) Usilungiselele into eluncedo gqitha—umoya wakhe oyingcwele. Ngomoya wakhe oyingcwele, uYehova unokunika “odiniweyo amandla” ukuze akwazi ‘ukunyuka ngamaphiko njengeenkozi.’—Isaya 40:29, 31.
20 Umoya kaThixo ungawona mandla makhulu emhlabeni wonke. UPawulos wathi: “Ezintweni zonke ndinamandla ngenxa yalowo undomelezayo.” Ewe, uBawo wethu wasezulwini onothando unokusinika “amandla angaphaya koko kuqhelekileyo” ukuze sikwazi ukuzinyamezela zonke iingxaki ezibuhlungu de azenze ‘zonke izinto zibe ntsha’ kwiParadesi asithembise yona engekude.—Filipi 4:13; 2 Korinte 4:7; ISityhilelo 21:4, 5.
[Umbhalo osemazantsi]
a I-Vine’s Complete Expository Dictionary of Old and New Testament Words, ka-W. E. Vine, ithi: “Isenzi segama elithi [pa·re·go·ría] sigxininisa kumayeza anokuthomalalisa iintlungu.”
Usakhumbula?
• Abazalwana eRoma ‘bamomeleza’ njani uPawulos?
• ‘Sinokubomeleza’ ngaziphi iindlela abanye ebandleni?
• UYehova ungoyena Mthombo wethu wamandla njani?
[Umfanekiso okwiphepha 18]
Abazalwana ‘bamomeleza’ uPawulos ngokumxhasa ngokunyanisekileyo, ngokumkhuthaza nokumnceda kwiingxaki zakhe
[Umfanekiso okwiphepha 21]
Abadala bayakhokela ekomelezeni umhlambi