Ibali Lobomi

Nangona Ndandiyimfama, Amehlo Am Avulwa!

KUBALISA UEGON HAUSER

Emva kokuba ndineenyanga ezimbini ndingasaboni, amehlo am avulwa yaye ndakwazi ukubona iinyaniso zeBhayibhile ebendizityeshele ubomi bam bonke.

XA NDICINGA ngeminyaka engaphezu kwamashumi asixhenxe eyadlulayo, zininzi izinto ezindanelisayo ngobomi bam. Kodwa ukuba kukho into endandinokuyiguqula ebomini bam, ngendandikhethe ukumazi uYehova uThixo kusengaphambili.

Ndazalwa ngowe-1927 eUruguay, kwilizwe elimile njengepere phakathi kweArgentina neBrazil nendawo entle kuNxweme lweAtlantiki. Abantu abaninzi balapho babevela eItali naseSpeyin. Noko ke, abazali bam babevela eHungary, xa ndandiselula, sasihlala kwindawo yabantu abangamahlwempu nababesondelelene. Kwakungekho mfuneko yakutshixa iminyango nokufaka iintsimbi zokuthintela amasela kwiifestile zethu. Kwakungekho lucalucalulo lwabuhlanga phakathi kwethu. Abaphambukeli nabantu balapho, abamnyama nabamhlophe—sonke sasingabahlobo.

Abazali bam babengamaKatolika, yaye xa ndandineminyaka elishumi ubudala ndandihambisa isiqhumiso ecaweni. Xa ndandisele ndimdala, ndasebenza necawa yasekuhlaleni yaye ndandililungu leqela labacebisi bakabhishopu kwinqila. Ekubeni ndandikhethe ukuba ngugqirha, ndamenywa kwingqungquthela eVenezuela elungiselelwe yiCawa yamaKatolika. Njengoogqirha bezifo zamabhinqa, iqela lethu labelwa ukuba lihlolisise iipilisi zoqingqo-nzala ezazintsha ngelo xesha.

Uluvo Lwam Njengomfundi Ofundela Ubugqirha

Xa ndandisafundela ubugqirha ndifunda ngomzimba womntu, ndandimangaliswa nangakumbi bubulumko obubonakala kwindlela umzimba womntu odalwe ngayo. Ngokomzekelo, ndamangaliswa yindlela umzimba ozinyanga ngayo nendlela ochacha ngayo emva kokwenzakala, njengokuba isibindi neembambo zikwazi kwakhona ukukhula zibuyele kubukhulu bazo emva kokuba zikhutshiwe.

Kwangaxeshanye, ndandibona abantu abaninzi abonzakele kwiingozi, yaye ndandiba buhlungu xa besifa ngenxa yokutofelwa igazi. Ndisakhumbula indlela ekwakunzima ngayo ukuthetha nezalamane zalowo ufileyo ngenxa yeengxaki zokutofelwa igazi. Ngamaxesha amaninzi, izalamane zazingaxelelwa ukuba loo mntu ubulewe kukutofelwa igazi. Kodwa, zazixelelwa esinye isizathu. Nangona kuye kwadlula iminyaka emininzi, ndisakhumbula indlela endandingaluthandi ngayo utofelo-gazi, yaye ekugqibeleni ndagqiba ngelithi kukho into engafanelekanga ngokwenza oku. Akwaba ndandiwazi umthetho kaYehova ngokuphathelele ubungcwele begazi! Kuloo meko, mhlawumbi ngendasiqonda isizathu sokuba ndizive ndingakhulukelanga ngoko kwakusenziwa.—IZenzo 15:19, 20.

Ukwaneliseka Ngenxa Yokunceda Abantu

Ekuhambeni kwexesha, ndaba ngugqirha wotyando nomalathisi kwisazulu sezonyango eSanta Lucía. Kwakhona ndandinomsebenzi endandiwenza kwiNational Institute of Biological Science. Oku kwakundanelisa ngokwenene. Ndandinceda abantu xa begula, ndibancede xa besezintlungwini, kwiimeko ezininzi ndisindise nobomi babo, yaye ndandibelekisa. Ngenxa yoko kwenzekayo ngaphambili xa kutofelwe igazi, ndandikuphepha ukukwenza oku yaye ndandisenza utyando kwizigidi zabantu ngaphandle kwalo. Ndandiqiqa ngelithi ukopha komntu kufana nokuvuza komphanda. Esona sicombululo kukulungisa oko kuvuza, kungekhona ukuqhubeka uzalisa umphanda.

Ukunyanga AmaNgqina Agulayo

Ndaqalisa ukuqhelana namaNgqina kaYehova ekuqaleni kweminyaka yee-1960 xa aqalisa ukuza kwikliniki yethu ukuze enze utyando ngaphandle kokutofelwa igazi. Andisayi kuyilibala imeko yomnye umguli, uvulindlela (umlungiseleli wexesha elizeleyo) ogama linguMercedes Gonzalez. Umlinganiselo wakhe wegazi wawuphantsi kangangokuba oogqirha kwisibhedlele saseyunivesithi babengafuni ukubeka ubomi bakhe esichengeni ngokumenza utyando, besithi baqinisekile ukuba akayi kuphila. Nangona wayesopha, samenza utyando kwikliniki yethu. Olu tyando lwaphumelela, yaye waqhubeka enguvulindlela kangangeminyaka engama-30 de wafa kutshanje eneminyaka engama-86 ubudala.

Ndandimangaliswa luthando nomdla amaNgqina awayewubonisa ngoxa ayenyamekela abazalwana bawo abangamaKristu. Xa ndandityelela abo bagulayo apha esibhedlele, ndandikuthanda ukuwaphulaphula ethetha ngeenkolelo zawo, yaye ndandizamkela iimpapasho awayendinika zona. Andizange ndiyicinge into yokuba kungekudala andiyi kuba ngugqirha wawo nje kuphela kodwa ndandiza kuba kwangumzalwana wawo wokomoya.

Ndasondelelana nakakhulu namaNgqina xa ndatshata noBeatriz, intombi yomnye umguli. Inkoliso yentsapho yakhe yayinxulumene namaNgqina, yaye emva kokuba sitshatile, naye waba liNgqina elikhutheleyo. Kwelinye icala, mna ndandixakeke kakhulu ngumsebenzi wam yaye ndandinesigxina esiphezulu kwezonyango. Izinto zazibonakala zindihambela kakuhle ebomini. Ndandingazi ukuba kungekudala izinto ziza kuguquka zize zibe mbi.

Yenzek’ Intlekele

Eyona nto ibuhlungu enokwenzeka kugqirha kukungaboni. Oko kwenzeka kum. Ngesiquphe, amehlo am omabini asuka akabona—ndaba yimfama yaye ndandingazi nokuba ndiya kuphinde ndibone. Emva kokuba ndenze utyando, ndandilele ebhedini amehlo am omabini ebotshiwe, yaye ndadandatheka. Ndandivakalelwa ndingento yanto yaye ndingenathemba kangangokuba ndagqiba kwelokuba ndizibulale. Ekubeni ndandikumgangatho wesine, ndehla ebhedini ndaza ndampampatha udonga ndikhangela apho ndihamba khona, kuba ndandizama ukufumana ifestile. Ndandiza kutsiba kuyo ukuze ndizibulale. Noko ke, ndesuka ndangena epasejini, yaye umongikazi wandibuyisela ebhedini yam.

Andizange ndiphinde ndikuzame oko. Kodwa kuba ndandingaboni, ndaqhubeka ndidandathekile yaye ndicaphuka msinya. Ngoxa ndandiseyimfama, ndamthembisa uThixo ukuba, ukuba ndinokuphinda ndibone, ndandiya kuyifunda yonke iBhayibhile. Ekugqibeleni, ndakwazi ukubona kancinane, yaye ndandikwazi nokufunda. Kodwa ndandingenakukwazi ukuqhubeka ndingugqirha. Sekunjalo, eUruguay kukho intetho eyaziwayo ethi “No hay mal que por bien no venga,” “Ayikho into embi ngolo hlobo kangangokuba kungabikho nto intle ephuma kuyo.” Ndandiza kuzibonela ngawam amehlo indlela ayinyaniso ngayo loo mazwi.

Ukuba Nesiqalo Esingesihle

Ndandifuna ukuthenga uhlelo olunoonobumba abakhulu lweThe Jerusalem Bible, kodwa ndafumanisa ukuba amaNgqina kaYehova aneBhayibhile engabizi imali engako, yaye elinye iNgqina eliselula lathi liza kuyizisa ekhayeni lam. Ngosuku olulandelayo, lafika ekhaya lindiphathele iBhayibhile. Umfazi wam wavula umnyango waza wathetha nalo. Ndakhwaza ngendlela ekrwada ndingaphakathi endlwini ndisithi ukuba uyihlawulele loo Bhayibhile, loo mfana angaphinde alubeke unyawo lwakhe apha yaye ufanele ahambe, yaye wahamba ngoko nangoko. Ndandingazi ukuba kungekudala kwaloo mntu wayeza kuba nendima ebalulekileyo ebomini bam.

Ngenye imini ndathembisa umfazi wam into ethile ndaza andakwazi ukusifeza eso sithembiso. Ngoko ke, ukumxolisa ndamthembisa ukuba ndiza kuhamba naye xa esiya kwiSikhumbuzo saminyaka le sokufa kukaKristu. Xa lwafika olo suku, ndasikhumbula isithembiso sam ndaza ndahamba naye ukuya eSikhumbuzweni. Ndayithanda indlela abantu ababenobubele nabandamkela ngayo. Xa isithethi saqalisa intetho yaso, ndothuka ndakubona ukuba yayikwangulaa mfana ndandithethe kakubi naye ndisithi makahambe ekhayeni lam. Intetho yakhe yandichukumisa kakhulu, yaye ndaziva ndibuhlungu ngokumphatha kakubi. Ndandinokwenza ntoni bethu ukuze ndixolise?

Ndacela umfazi wam ukuba ammeme kwisidlo sangokuhlwa, kodwa wabuza: “Ngaba akucingi ukuba kuya kufaneleka nangakumbi ukuba ummeme ngokwakho? Hlala nje apha, uza kuza.” Wayechanile. Weza kusibulisa waza wasamkela isimemo.

Incoko esaba nayo ngobo busuku wayesityelele ngabo yayikukuqalisa kweenguqulelo ezininzi ebomini bam. Wandibonisa incwadi ethi Inyaniso eKhokelela KuBomi obungunaPhakade,a ndaza ndambonisa imibhalo emithandathu yale ncwadi. AmaNgqina awahlukahlukeneyo agulayo aye andinika esibhedlele, kodwa andizange ndizifunde. Ebudeni nasemva kwesidlo, de kwaba sebusuku kakhulu, ndandibuza umbuzo emva komnye—yaye yonke wayeyiphendula esebenzisa iBhayibhile. Le ngxubusho yaphela ekuseni ngentsasa elandelayo. Ngaphambi kokuba ahambe, lo mfana wacela ukufunda iBhayibhile nam, esebenzisa incwadi INyaniso. Sayigqiba ukuyifunda le ncwadi kwiinyanga ezintathu saza saqhubeka nencwadi ethi “Babylon the Great Has Fallen!” God’s Kingdom Rules!b Emva koko, ndazahlulela kuYehova uThixo ndaza ndabhaptizwa.

Ukuziva Ndiluncedo Kwakhona

Ngenxa yobumfama bokoqobo, ‘amehlo entliziyo yam’ akhanyiselwa kwiinyaniso zeBhayibhile endandizityeshele de kwangoko! (Efese 1:18) Ukumazi uYehova neenjongo zakhe zothando kwabuguqula bonke ubomi bam. Ndiziva ndiluncedo yaye ndonwabile kwakhona. Ndinceda abantu ngokwenyama nangokomoya yaye ndibabonisa indlela yokubandisa ubomi babo iminyaka eliqela engakumbi kule nkqubo yezinto nobomi obungunaphakade kwinkqubo entsha.

Ndisahambisana neendlela ezintsha zezonyango, yaye ndiye ndenza uphando ngeengozi zegazi, ezinye iindlela zokunyanga, amalungelo nemigaqo yokuphatha abantu abagulayo (bioethics). Ndiye ndaba namathuba okwabelana ngale nkcazelo noogqirha basekuhlaleni xa bendimenyelwe ukuba ndithethe ngale mibandela kwiingqungquthela zonyango. Ngowe-1994, ndaya kwingqungquthela yokuqala yokunyanga ngaphandle kotofelo-gazi eRio de Janeiro, eBrazil, ndaza ndanikela intetho ngendlela yokuhlangabezana nokopha. Inxalenye yale nkcazelo yaqukwa kwinqaku endalibhalayo elithi, “Una propuesta: Estrategias para el Tratamiento de las Hemorragias” (“Icebo Elithile Lokunyanga Ukopha”), epapashwe kwiphephancwadi lezonyango iHemoterapia.

Ukugcina Ingqibelelo Phantsi Kwengcinezelo

Ekuqaleni, amathandabuzo endandinawo ngotofelo-gazi ayesekelwe kulwazi lwenzululwazi. Noko ke, xa ndagula ndaza ndalala esibhedlele, ndakufumanisa kunzima ukwala utofelo-gazi ndize ndibe nokholo xa ndinyanzelwa ngoogqirha. Emva kokuhlaselwa yintliziyo, kwafuneka ndichaze imeko yam kugqirha wotyando ixesha elingaphezu kweeyure ezimbini. Wayengunyana wabahlobo bam abasenyongweni waza wathi akanakundiyeka ndife xa ecinga ukuba ukutofelwa igazi kusenokubusindisa ubomi bam. Ndathandaza ngaphakathi kuYehova, ndimcela ukuba ancede lo gqirha aqonde aze ahlonele imeko yam nangona wayengavumelani nayo. Ekugqibeleni, lo gqirha wathembisa ukuba uza kuyihlonela iminqweno yam.

Ngesinye isihlandlo, kwafuneka ndisuswe ithumba kwidlala lesinyi. Ndandisopha. Kwakhona, ndazifumanisa ndichaza izizathu zokwala utofelo-gazi, yaye nangona ndandiphulukene negazi elininzi, abantu basesibhedlele bayihlonela imeko yam.

Ukutshintsha Isimo Sengqondo

Njengelungu leInternational Association of Bioethics, ndiye ndaba nolwaneliseko lokubona isimo sengqondo sabantu bezonyango nabasemthethweni siguquka ngokuphathelele amalungelo abantu abagulayo. Isimo sengqondo soogqirha sokufuna ukulawula umguli sathatyathelw’ indawo sisimo sengqondo esibonisa intlonelo ngeminqweno yalowo ugulayo. Ngoku bavumela abagulayo bazikhethele uhlobo lonyango abalufunayo. AmaNgqina kaYehova akasajongwa njenganenzondelelo yempambano nangafuniyo ukunyangwa. Kunoko, agqalwa njenganolwazi nafanelwe ahlonelwe amalungelo awo. Kwiingqungquthela zonyango nakwiinkqubo zikamabonwakude, oonjingalwazi abaziwayo baye bathi: “Siyayibulela imigudu yamaNgqina kaYehova, ngoku siyaqonda . . . ” “Siye safunda kumaNgqina . . . ” yaye, “Aye asinceda siphucule.”

Kuye kwathiwa ubomi yeyona nto ibalulekileyo kuba inkululeko nesidima bezingayi kuba nenjongo ngaphandle kwabo. Ngoku abaninzi bamkela umgaqo obalulekileyo ongokwasemthethweni, beqonda ukuba mntu ngamnye unamalungelo akhe yaye nguye kuphela onokugqiba ukuba ngawaphi amalungelo aza kuqala kwiimeko ezithile. Ngale ndlela, isidima, inkululeko yokuzikhethela, neenkolelo zonqulo ziza kuqala. Umguli unelungelo lokuzikhethela. ISebe Lenkcazelo Ngeenkonzo Zasesibhedlele, elilungiselelwe ngamaNgqina kaYehova, liye lanceda oogqirha abaninzi ukuba bahambele phambili ekuqondeni kwabo le mibandela.

Inkxaso endisoloko ndiyifumana entsatsheni yam iye yandivumela ndaba luncedo kwinkonzo kaYehova yaye ndikhonza njengomdala kwibandla lamaKristu. Njengoko sele nditshilo, eyona nto ndizisola ngayo kukungafundi ngoYehova kusengaphambili ebomini bam. Sekunjalo, ndinombulelo kakhulu kuba endivule amehlo ukuze ndibe nethemba lokuphila phantsi koBukumkani bukaThixo kuba apho “akakho ummi wakhona oya kuthi: ‘Ndiyagula.’”—Isaya 33:24.c

[Imibhalo esemazantsi]

[Umfanekiso okwiphepha 24]

Kwiminyaka yam yama-30 ubudala, ndisebenza kwisibhedlele eSanta Lucía

[Umfanekiso okwiphepha 26]

Ndikunye nomfazi wam, uBeatriz, ngowe-1995