Wathetha Ngeenkolelo Zakhe Nabantwana Afunda Nabo
NGABA ungathanda ukunceda abantwana ofunda nabo baziqonde ngakumbi iinkolelo zakho ezisekelwe eBhayibhileni? UMagdalena, umfundi kwisikolo samabanga aphakamileyo noneminyaka eli-18 ubudala ePoland, udla ngokuthetha nabantwana afunda nabo ngeenkolelo zakhe njengomnye wamaNgqina kaYehova. Ngenxa yoko, udla ngokubuzwa umbuzo enjengothi ‘Kuthetha ukuthini ukuba ngomnye wamaNgqina kaYehova?’ nothi ‘Ngaba anikholelwa kuYesu Kristu?’ Wayenokubanceda njani abantwana awayefunda nabo? UMagdalena wathandaza kuYehova ecela uncedo waza wenza ngokuvisisana nemithandazo yakhe.—Yakobi 1:5.
Ngenye imini, uMagdalena wacela kutitshalakazi wakhe owayezihlonela iinkolelo zakhe ukuba abonise iklasi ividiyo ethi Jehovah’s Witnesses—The Organization Behind the Name.a Lo titshalakazi wavuma. Wandula ke uMagdalena wathi kubantwana afunda nabo eklasini: “Ndicele umhlobo wam ukuba athethe neklasi imizuzu engama-90. Kule ntetho kuza kuboniswa ividiyo kuze kuthethwe ngamaNgqina kaYehova. Ngaba ningathanda ukuza?” Wonke ubani wavuma. UMagdalena noWojciech, umvangeli wexesha elizeleyo onamava, baqalisa ukulungiselela le ntetho.
Babecebe ukuqalisa ngokuthetha imizuzu engama-20 ngezinto ezikwincwadana enemifanekiso ethi AmaNgqina KaYehova—Angoobani? Akholelwa Kwintoni?b bandule baxubushe imibuzo neempendulo. Yaye ividiyo yayiza kuboniswa kwigumbi logcino-zincwadi wesikolo. Mfundi ngamnye eklasini wayeza kufumana isipho—imvulophu enkulu eneencwadana ezinemifanekiso, incwadi ethi Abantu Abaselula Bayabuza—Iimpendulo Eziluncedo,c amaphecana namaphephancwadi.
Ngosuku lwale ntetho, abantu ababephulaphule babequka abantwana awayefunda nabo eklasini abali-14, utitshalakazi, nabanye abafundi aba-4 ababekwigumbi logcino-zincwadi. UWojciech waqalisa ngokucacisa ukuba iimbongi nababhali abaliqela basePoland balisebenzisa igama likaThixo, uYehova kwiincwadi zabo. Kwakhona wabonisa ukuba iincwadi ezingeemfundiso zonqulo zamaKatolika zazinalo igama likaThixo. Echaza umsebenzi wale mihla wamaNgqina kaYehova, wababonisa iincwadana ezinemifanekiso zeeofisi zamasebe nemifanekiso yeeHolo zeNdibano.
Kwaqalisa ingxoxo emnandi. UMagdalena noWojciech basebenzisa iBhayibhile ukuphendula loo mibuzo. Oku kwabachukumisa abantu ababephulaphule kwaza kwabeyisela ekubeni amaNgqina kaYehova ayengashumayeli nje iingcinga zawo. Yayisithini eminye imibuzo, yaye yaphendulwa njani?
Umbuzo: IBhayibhile isebenzisa ulwimi nezafobe ezingacacanga, nto leyo enokubangela abantu bayitolike ngeendlela ezininzi ezahlukahlukeneyo. Kunokwenzeka njani ukuba ubani aphile ngokuvisisana neBhayibhile?
Impendulo: Abanye bathi iBhayibhile ifana nevayolin onokudlala kuyo nayiphi na ingoma oyithandayo. Kodwa khawucinge: Ukuba ubufuna ukwazi ngoko umbhali othile akuthethayo ngoko akubhalileyo, ngaba bekungayi kuba lula ukubuza yena? Ngokungafaniyo nababhali beencwadi abangabantu abafayo, uMbhali weBhayibhile, uYehova uThixo, uyaphila. (Roma 1:20; 1 Korinte 8:5, 6) Umongo wesibhalo unokubonisa oko kuchanileyo okuthethwe seso sibhalo. Ngaphezu koko, iBhayibhile idla ngokuthetha ngento efanayo kwiindawo eziliqela, ngoko ke kuyanceda ukuzithelekisa. Ngaloo ndlela sinokuvumela uThixo akhokele iingcinga zethu, ngokungathi yena ngokwakhe ucacisa isibhalo esithile kuthi. Ngokwenjenjalo, sinokumazi size siphile ngokuvisisana nokuthanda kwakhe njengoko kubhaliwe eBhayibhileni, ngaba akunjalo na?
Umbuzo: Yintoni umahluko phakathi kwamaKristu namaNgqina kaYehova?
Impendulo: SingamaKristu! Kodwa kunokuba athi angamaKristu nje, amaNgqina kaYehova azabalazela ukuphila ngokuvisisana noko akukholelwayo noko uThixo akufundisayo ukuze kungenelwe wona. (Isaya 48:17, 18) Ekubeni zonke iimfundiso zawo zisekelwe eBhayibhileni, ayazi ukuba oko akukholelwayo kuyinyaniso.—Mateyu 7:13, 14, 21-23.
Umbuzo: Kutheni nisiya kubantu eningabaziyo nibanyanzele ukuba nithethe nabo? Ngaba oko akuthethi ukunyanzela unqulo lwenu kwabanye?
Impendulo: Ngaba ucinga ukuba kuphosakele xa umntu osesitratweni ethetha nawe kakuhle aze akubuze ngembono yakho ngento ethile? (Yeremiya 5:1; Zefaniya 2:2, 3) (UWojciech noMagdalena bandula babonisa indlela abababuza ngayo abantu abasesitratweni enoba uThixo ubakhathalele abo babandezeleka kwisikhukula sakutshanje ePoland.) Emva kokuba loo mntu esixelele imbono yakhe, simbonisa oko kuthethwa yiBhayibhile. Ukuba ubani akafuni ukuthetha, simshiya ngoxolo size sidlulele kwabanye. (Mateyu 10:11-14) Ngaba oko kuthetha ukuba siyabanyanzela abantu ekubeni bancokole nathi? Okanye ngaba abantu abasafanele ngoku bancokole?
Umbuzo: Kutheni ningazibhiyozeli iiholide?
Impendulo: Sibhiyozela kuphela isiganeko iBhayibhile esiyalela ukuba sisibhiyozele—iSikhumbuzo sokufa kukaYesu Kristu. (1 Korinte 11:23-26) Ngokuphathelele iiholide, unokuzifumanela imvelaphi yazo kwiintyilalwazi nezinye iincwadi ezinokuthenjwa. Xa usenjenjalo, uya kuzibonela ngokulula isizathu sokungazibhiyozeli iziganeko ezinjalo.—2 Korinte 6:14-18.
Kwabuzwa imibuzo emininzi engakumbi yaza yaphendulwa. Le ngxoxo yathabatha ixesha elide kangangokuba kwafuneka ividiyo ibukelwe ngelinye ixesha.
Bathini abafundi? Makhe sivumele uMagdalena asixelele: “Ndamangaliswa kukuba abanye abafundi ababedla ngokugeza nokuhleka abanye babebuza imibuzo ebhadlileyo. Nangona babesithi abakholelwa kubukho bukaThixo, ebudeni bengxoxo babebonakalisa ukholo kuThixo!” Abo babekho bazivuyela izipho—kwahanjiswa iincwadi ezingama-35, iincwadana ezinemifanekiso ezingama-63 namaphephancwadi angama-34 kwaba bantwana.
Eneneni lo msebenzi wesikolo wavelisa iziqhamo ezihle! Oku akuzange nje kuncede abantwana abafunda noMagdalena ukuba bazi baze baqonde amaNgqina kaYehova kakuhle kodwa kwakhuthaza abantwana abaninzi abaselula ukuba bacinge nzulu ngenjongo yobomi. Kutheni ungazami ukunceda abantwana ofunda nabo ukuba bafunde okungakumbi ngeenkolelo zakho?
[Umbhalo osemazantsi]
a Ipapashwe ngamaNgqina kaYehova.
b Ipapashwe ngamaNgqina kaYehova.
c Ipapashwe ngamaNgqina kaYehova.
[Umfanekiso okwiphepha 31]
UMagdalena noWojciech balungiselela ingxoxo