Ibali Lobomi
Ukukholosa Ngenyameko KaYehova Yothando
KUBALISA UANNA DENZ TURPIN
“Ubuza yonk’ into le!” umama watsho encumile. Ndiseyintombazanana, ndandibabuza imibuzo emininzi abazali bam. Kodwa uMama noTata abazange bandingxolise ngemibuzo yam yobuntwana. Kunoko, bandifundisa ukuqiqa nokuba ndizenzele izigqibo ezisekelwe kwisazela esiqeqeshwe ngeBhayibhile. Ndafumana ingqeqesho eyaba luncedo kakhulu! Ngenye imini xa ndandineminyaka eli-14 ubudala, amaNazi andihlutha abazali bam endandibathanda, yaye andizange ndiphinde ndibabone.
UTATA, uOskar Denz, nomama uAnna Maria, babehlala eLörrach, kwisixeko saseJamani esikufuphi nomda weSwitzerland. Xa babeselula, babeququzelela ezobupolitika, yaye abantu basekuhlaleni babebazi yaye babebahlonela. Kodwa ngowe-1922, kungekudala emva kokuba betshatile, abazali bam bazijonga ngenye indlela ezobupolitika yaye baba nolunye usukelo kubomi babo. UMama waqalisa ukufundisisa iBhayibhile naBafundi beBhayibhile, njengoko ayebizwa njalo amaNgqina kaYehova ngelo xesha, yaye wakuvuyela ukuva ukuba uBukumkani bukaThixo buya kuzisa uxolo emhlabeni. Kungekudala uTata waqalisa ukufunda naye kunye noMama, yaye baqalisa ukuya kwiintlanganiso zaBafundi beBhayibhile. UTata wade wamnika isipho seKrismesi uMama esiyincwadi yokufundisisa iBhayibhile ethi, The Harp of God. Ndazalwa ngoMatshi 25, 1923, yaye yayindim ndedwa umntwana ekhaya.
Ndisenenkumbulo entle ngentsapho yasekhaya—sasithanda ukuhambahamba kwihlathi elizolileyo iBlack Forest yaye uMama endifundisa imisebenzi yasekhaya. Ndisamkhumbula emi ekhitshini endifundisa ukupheka. Okubaluleke ngakumbi, abazali bam bandifundisa ukuthanda uYehova uThixo nokukholosa ngaye.
Ibandla lethu lalinabavakalisi boBukumkani abakhutheleyo abangama-40. Abazali bam babenobuchule bokuthetha nabantu ngoBukumkani. Ngenxa yemisebenzi yabo ababeyenza ekuhlaleni, kwakulula kubo ukuthetha nabantu, yaye abantu babebamkela ngokulula. Xa ndandineminyaka esixhenxe ubudala, nam ndandifuna ukushumayela kwindlu ngendlu. Ngosuku lwam lokuqala, umntu endandihamba naye wandinika iincwadi, wakhomba kwenye indlu, waza wathi, “Tshona khona, ubone enoba bayazifuna kusini na.” Ngowe-1931, saya kwindibano yaBafundi beBhayibhile eBasel, eSwitzerland. Abazali bam babhaptizwa kuloo ndibano.
Ukusuka Kwizidubedube Ukusa Kwimbandezelo
IJamani yayinezidubedube ngezo mini, yaye amaqela ahlukahlukeneyo ezobupolitika ayesilwa ezitratweni. Ngobunye ubusuku, ndavuswa zizijwili ezazivela kubamelwane. Abafana abaselula ababini babulala umkhuluwa wabo ngefolokhwe kuba wayenembono eyahlukileyo kweyabo ngezobupolitika. Kwakhona amaYuda athiywa nangakumbi. Esikolweni enye intombazana kwafuneka ime yodwa ekoneni kuba nje ingumYuda. Ndandimsizela, ndingazi ukuba nam kungekudala ndiza kuba kwimeko efanayo.
NgoJanuwari 30, 1933, uAdolf Hitler waba ngumlawuli waseJamani. Kwizindlu nje ezimbalwa ukusuka ekhaya, sasibukela amaNazi ephakamisa iiflegi zawo kwiholo yasekuhlaleni. Esikolweni utitshala wethu onenzondelelo wasifundisa indlela yokubulisa ethi “Heil Hitler!” Ngaloo mvakwemini ndamxelela uTata ngale nto. Kwamkhathaza oku. Wathi: “Andikuthandi oku. Ukuthi ‘Heil’ kuthetha usindiso. Ukuba sithi ‘Heil Hitler’, oko bekuya kuthetha ukuba sithi nguye oza kusisindisa ingenguye uYehova. Andikuboni kufanelekile oko, kodwa zenzele isigqibo ngokwakho ngoko ufanele ukwenze.”
Abantwana endandifunda nabo baqalisa ukundiphatha njengekheswa kuba ndandingathi ‘Heil Hitler.’ Abanye abafana babede bandibethe xa ootitshala babengaboni. Ekugqibeleni, bandiyeka, kodwa nabahlobo bam bandixelela ukuba ooyise bathe mabangadlali nam. Ndandiyingozi kakhulu.
Kwiinyanga ezimbini emva kokuba amaNazi elawula iJamani, awuvala umsebenzi wamaNgqina kaYehova esithi ayingozi kuRhulumente. Amagosa ayivala iofisi yesebe eMagdeburg aza aziphelisa iintlanganiso zethu. Kodwa ngenxa yokuba sasihlala ngasemdeni, uTata wafumana imvume yokuba siwele umda siye eBasel, apho sasisiya kwiintlanganiso zangeCawa. Wayedla ngokuthi wayenqwenela ukuba abazalwana baseJamani bangafumana ukutya kokomoya okufanayo ukuze kubancede bakwazi ukujamelana nekamva ngenkalipho.
Ukuhambahamba Okunengozi
Emva kokuba iofisi yaseMagdeburg ivaliwe, owayesakuba lilungu elalisebenza apho, uJulius Riffel, wabuyela eLörrach, idolophu yakowabo, ukuze alungiselele umsebenzi wokushumayela ngokufihlakeleyo. Ngokukhawuleza uTata wathi uza kumncedisa. Wahlala phantsi kunye nam noMama waza wasicacisela ukuba uye wavuma ukuthubelezisa iincwadi zeBhayibhile eJamani ezivela eSwitzerland. Wathi oku kuyingozi kakhulu yaye unokubanjwa nanini na. Wayengafuni sizive sinyanzelekile ukuba nathi simncedise kuba oku bekuya kusifaka engozini nathi. Ngoko nangoko, uMama wathi, “Ndiza kukuxhasa.” Bobabini bandijonga, ndaza ndathi, “Nam ndiza kukuxhasa!”
UMama wenza ibhegi ngewulu elingana nephephancwadi IMboniselo. Wayedla ngokufaka iincwadi kuyo kwicala elithile lale bhegi aze ayivale ngewulu kwakhona. Wenzela uTata iipokotho ezifihlakeleyo kwiimpahla zakhe nemibhinqo emibini, mna naye esasifihla kuyo iincwadi ezincinane zokufundisisa iBhayibhile. Sihlandlo ngasinye siphumelele ukuzisa ubuncwane bethu esibufihlileyo ekhaya, kwakusithi qabu size simbulele uYehova. Sasizifihla eluphahleni iincwadi.
Ekuqaleni amaNazi akazange asirhanele. Akazange asibuze imibuzo okanye agqogqe ekhayeni lethu. Sekunjalo, sagqiba ngophawu esasiza kulusebenzisa xa silumkisa abazalwana bethu bokomoya xa kukho ingxaki—4711, igama lesiqholo somzimba esithandwayo. Ukuba kwakuyingozi ukuba abazalwana beze ekhaya, sasibalumkisa—ngandlel’ ithile sisebenzisa eli nani. Kwakhona uTata wabaxelela ukuba bajonge ifestile yegumbi lokuphumla ngaphambi kokuba bangene. Ukuba ifestile esekhohlo yayivuliwe, oko kwakuthetha ukuba kukho into engahambi kakuhle, yaye kufanele bangasondeli nokusondela.
Ngowe-1936 nangowe-1937, amaGestapo abamba abantu abaninzi aza afaka amawaka amaNgqina ezintolongweni nakwiinkampu zoxinaniso, apho aphathwa kakubi nangendlela engqwabalala. Iofisi yesebe eBern, eSwitzerland, yaqalisa ukuqokelela iingxelo, kuquka nezo zazithutyeleziswa enkampini, kwaza kwenziwa incwadi ethi Kreuzzug gegen das Christentum (Imfazwe Nxamnye NamaKristu), ukubhencwa kolwaphulo-mthetho lwamaNazi. Sasisenza umsebenzi oyingozi wokuthabatha iingxelo ezifihlakeleyo siziwelise umda sizise eBasel. Ukuba amaNazi ayenokusibamba namaxwebhu angekho mthethweni, sasinokuvalelwa entolongweni kwangoko nangoko. Ndalila njengoko ndandifunda ngendlela ababengcungcuthekiswa ngayo abazalwana bethu. Sekunjalo, ndandingoyiki. Ndandinethemba lokuba uYehova nabazali bam, abahlobo bam abasenyongweni, babeya kundinyamekela.
Ndagqiba esikolweni xa ndandineminyaka eli-14 ubudala yaye ndandisebenza njengonobhala kwivenkile ethengisa izinto zokwakha. Ngokuqhelekileyo sasisiya kuphuthuma iincwadi ngoMgqibelo emva kwemini okanye ngeCawa, xa uTata wayengasebenzi. Ngokuqhelekileyo, sasisiya emva kweeveki ezimbini. Sasikhangeleka njengentsapho eqhelekileyo ezihambahambelayo ngempela-veki, yaye phantse kangangeminyaka emine, amagosa asebenza emdeni akazange asimise okanye ukuhlola izinto esiziphetheyo—oko kukuthi, akazange akwenze oko de kwangenye imini ngoFebruwari 1938.
Sabhaqwa!
Andisoze ndiyilibale indlela utata awayekhangeleka ngayo xa safika kwindawo esasizithabatha kuyo iincwadi kufuphi neBasel waza wabona isixa esikhulu seencwadi ezazisilindile. Ngenxa yokuba enye intsapho eyayithutha iincwadi yayibanjiwe, sasineencwadi ezingakumbi esimele sizithuthe. Emdeni igosa elithile lasijonga laza lasirhanela licela ukuhlola izinto esiziphetheyo. Xa lafumana ezi ncwadi, lasikhomba ngompu laza lasisa kwiimoto zamapolisa ezazime apho. Njengoko amagosa ayehamba nathi, uTata waqinisa isandla sam waza wasebeza esithi: “Ungabi yimpimpi. Ungachazi namnye umntu!” Ndamqinisekisa ndisithi: “Andisoze.” Ukufika kwethu eLörrach, bamthabatha utata endimthandayo. Ndagqibela ukumbona ngoko njengoko babemvalela entolongweni.
Kangangeeyure ezine, amadoda amane angamaGestapo andigocagoca ngemibuzo, esithi mandiwaxelela amagama needilesi zamanye amaNgqina. Xa ndala, elinye igosa lacaphuka laza landoyikisa lisithi, “Sinazo nezinye iindlela zokukwenza uthethe!” Andizange ndiwaxelele nenye into. Andula ke athabatha mna noMama ahamba nathi ukuya ekhaya, aza ayigqogqa indlu yasekhaya okwesihlandlo sokuqala. Umama amvalela entolongweni aza mna aya kundigcinisa kumakazi, engazi kuba naye wayeliNgqina. Nangona ndandivumelekile ukuphangela, amadoda amane eGestapo ayemisa imoto ngaphambi kwendlu ukuze ajonge nantoni na endiyenzayo ngoxa elinye ipolisa lalihambahamba ecaleni kwendlu.
Kwiintsuku ezimbalwa kamva ngexesha lesidlo sasemini, ndaphuma endlwini ndaza ndabona udade othile oselula eqhuba ibhayisekile esiza kum. Njengoko wayesondela kum, ndandimbona ukuba uza kundiphosela iphetshana. Kanye xa ndilibamba, ndaguquka ndaza ndajonga enoba amaGestapo akubonile kusini na oko ndikwenzileyo. Hayi indlela endothuka ngayo kukufumanisa ukuba, kanye ngelo xesha, ayefile yintsini!
Eli phetshana lalo dade lalindiyalela ukuba ndiye kokwabo emini. Kodwa ngenxa yokuba amaGestapo ayendigadile, oko kwakuya kubafaka engozini abazali bakhe. Ndajonga kumadoda amane angamaGestapo asemotweni nepolisa elalinyuka lisihla esitratweni. Ndandingayazi into emandiyenze, ngoko ndathandaza ngokunyanisekileyo kuYehova ukuba andincede. Ngesiquphe, eli polisa laya kwimoto yamaGestapo laza lathetha namadoda awayekuyo. Landula ke langena emotweni, aza onke ahamba!
Kanye ngelo xesha, umakazi wafika. Kwakusele kusemva kwemini. Walifunda eli phetshana waza wandikhuthaza ukuba siye apho njengoko siyalelwe, ecinga ukuba abazalwana bamele ukuba sebelungiselele ukuba ndiye eSwitzerland. Ukufika kwethu apho, le ntsapho yandazisa kumntu endandingamazi, uHeinrich Reiff. Wathi uyavuya ukubona ukuba ndihambe kakuhle yaye uze kundinceda ukuba ndisabele eSwitzerland. Wandiyalela ukuba ndidibane naye ehlathini kwisiqingatha seyure.
Ubomi Njengembacu
Ukudibana kwam noMzalwan’ uReiff ndandilil’ iinyembezi, intliziyo yam ibuhlungu kukucinga ngokushiya abazali bam ngasemva. Konke oku kwenzeka ngesiquphe. Emva kokuxhalaba okwethutyana, sandula ke sangena phakathi kweqela labakhenkethi saza sawuwela umda waseSwitzerland ngokukhuselekileyo.
Ukufika kwam kwiofisi yesebe yaseBern, ndafumanisa ukuba ngabazalwana balapho abandilungiselela ukuba ndisabe. Ngobubele bandinika indawo yokuhlala. Ndandisebenza ekhitshini, nto leyo endandiyithanda gqitha. Kodwa hayi indlela ekwakunzima ngayo ukuphila njengembacu, ndingazi oko kuza kwenzeka kubazali bam, bobabini ababegwetyelwe iminyaka emibini entolongweni! Ngamanye amaxesha, ndandiba buhlungu ndize ndixhalabe, yaye ndadidla ngokuzitshixela kwigumbi langasese ndize ndilile. Kodwa ndandikwazi ukubhalelana nabazali bam ngokuthe rhoqo, yaye babendikhuthaza ukuba ndihlale ndinyanisekile.
Ngenxa yomzekelo wokholo lwabazali bam, ndabahlulela ubomi bam kuYehova ndaza ndabhaptizwa ngoJulayi 25, 1938. Emva konyaka ndiseBheteli, ndaya kusebenza eChanélaz, ifama eyayithengwe lisebe laseSwitzwerland ukuze kulungiselelwe kuyo ukutya kwentsapho yaseBheteli nokuze abazalwana abaziimbacu ngenxa yentshutshiso bafumane indawo yokuhlala.
Xa abazali bam babeyithothoze bayigqiba iminyaka ababegwetywe yona ngowe-1940, amaNazi abathembisa ngokubakhulula ukuba bayalulahla ukholo lwabo. Abazange balulahle baza basiwa kwiinkampu zoxinaniso, uTata wasiwa eDachau yaye uMama wasiwa eRavensbrück. Ebusika ngowe-1941, umama namanye amaNgqina angamabhinqa kulo nkampu akazange avume ukwenza umsebenzi wasemkhosini. Bohlwaywa ngokumiswa engqeleni iintsuku ezi-3 nobusuku obu-3, emva koku bavalelwa kwizisele ezimnyama baza banikwa kutya okuncinane iintsuku ezingama-40. Bandula batywatyushwa. UMama wafa ngoJanuwari 31, 1942, iiveki ezintathu emva kokubethwa kabuhlungu.
UTata wafuduswa eDachau waza wasiwa eMauthausen eOstriya. Kule nkampu amaNazi ayewabulala amabanjwa ngokulandelelana ngokuwalambisa nokuwenzisa umsebenzi onzima kakhulu. Kodwa kwiinyanga ezintandathu emva kokuba uMama efile, amaNazi ambulala utata ngendlela eyahlukileyo—alinga kuye amayeza. Oogqirha ababesebenza kule nkampu ngabom basebenzisa yena ukuze bavavanye amayeza abo bemfaka inaliti enesifo sephepha. Emva koko, amabanjwa ayefumana inaliti ebulalayo entliziyweni. Ingxelo yasemthethweni ithi uTata wafa “ngenxa yesihlunu sentliziyo esiethe-ethe.” Wayeneminyaka engama-43 ubudala. Ndafumanisa ngendlela awafa kabuhlungu ngayo kwiinyanga ezimbalwa kamva. Nanamhlanje ndisalila xa ndicinga ngabazali bam abathandekayo. Sekunjalo, ngelo xesha nangoku, ndiyathuthuzeleka kukwazi ukuba uMama noTata, ababenethemba lokuphila ezulwini, bakhuselekile ezandleni zikaYehova.
Emva kweMfazwe Yehlabathi II, ndaba nelungelo lokuya kwiklasi ye-11 kwiSikolo seBhayibhile seWatchtower saseGiliyadi eNew York. Kwandivuyisa gqitha ukufundisisa iZibhalo kangangeenyanga ezintlanu! Emva kokuba ndigqibile kwesi sikolo ngowe-1948, ndathunyelwa eSwitzerland ukuba ndibe ngumvangeli wasemazweni. Kungekudala emva koko, ndadibana noJames L. Turpin, umzalwana othembekileyo owayekwiklasi yesihlanu yaseGiliyadi. Xa kwasekwa iofisi yesebe yokuqala eTurkey, waba ngumveleli wayo. Satshata ngoMatshi 1951, yaye kungekudala emva koko safumanisa ukuba siza kuba ngabazali! Safudukela eUnited States saza safumana umntwana oyintombazana, uMarlene ngoDisemba.
Ukutyhubela iminyaka, mna noJim siye safumana ulonwabo olukhulu kwinkonzo yethu yoBukumkani. Ndisikhumbula kakuhle esinye isifundo seBhayibhile, ibhinqa eliselula elingumTshayina, uPenny, owayekuthanda ukufunda iBhayibhile. Wabhaptizwa yaye kamva watshata noGuy Pierce, ngoku okhonza kwiQumrhu Elilawulayo lamaNgqina kaYehova. Abantu abanjalo abathandekayo baye bandinceda ndakwazi ukuvala ilahleko ebangelwe kukufelwa ngabazali.
Ekuqaleni kowama-2004, abazalwana eLörrach, kwidolophu endazalelwa kuyo, baye bakha iHolo yoBukumkani eStich Street. Licinga ngoko amaNgqina kaYehova aye akwenza, ibhunga ledolophu lagqiba ngokuthiya esi sitrato ngokuthi yiDenzstraße (Denz Street) ngenjongo yokunikela imbeko kubazali bam. Kwiphephandaba lasekuhlaleni, iBadische Zeitung, phantsi komxholo othi “Kukhunjulwa Isibini SakwaDenz Esabulawayo: Igama Elitsha Lesitrato,” lathi abazali bam “babulawa kwinkampu yoxinaniso ebudeni Bolawulo Lwesithathu ngenxa yokholo lwabo.” Ndandingalindelanga ukuba ibhunga ledolophu lingenza into enjalo kodwa oko kwandichukumisa kuba izinto ziguquka.
UTata wayedla ngokuthi sifanele sicebe kusengaphambili ngokungathi iArmagedon ayisayi kufika kwixesha esiphila kulo kodwa siphile ngokungathi iza ngomso—elo licebiso elibaluleke kakhulu endahlala ndizama ukulisebenzisa. Akusoloko kulula ukuba nomonde kwangaxeshanye ulindele okuthile, ingakumbi ngoku kuba ukwaluphala kundenza ndihlale ndisekhaya. Sekunjalo, andizange khe ndisithandabuze isithembiso sikaYehova awasenza kubo bonke abakhonzi bakhe esithi: “Kholosa ngoYehova ngayo yonke intliziyo yakho . . . Uze umgqale yena ezindleleni zakho zonke, kwaye uya kuwenza uthi tye umendo wakho.”—IMizekeliso 3:5, 6.
[Ibhokisi/Umfanekiso okwiphepha 29]
AMAZWI AMNANDI ABHALWA NGEXESHA ELIDLULEYO
Ibhinqa elithile elivela kwidolophana ekude latyelela iLörrach ngeminyaka yee-1980. Ngelo xesha, abantu balapha babezisa izinto zabo abangazifuniyo kwindawo kawonke-wonke apho abanye banokuzijonga baze bathabathe izinto abazifunayo. Eli bhinqa lafumana ibhokisi enezinto zokuthunga laza lagoduka nayo. Kamva, ezantsi kule bhokisi, lafumana iifoto zentombazanana neeleta ezibhalwe ngamaphepha afumaneka kwinkampu yoxinaniso. Eli bhinqa lalinomdla kakhulu kwezi leta phofu ke lalingayazi le ntombazanana eneenwele eziphothiweyo.
Ngenye imini ngowama-2000, eli bhinqa labona eli nqaku likwiphephandaba elithetha ngomboniso wembali eLörrach. Eli nqaku lalichaza ngembali yamaNgqina kaYehova kuquka nentsapho yasekhaya ebudeni beminyaka yokulawula kwamaNazi. Lalinemifanekiso yam ndisekwishumi elivisayo. Xa lafanisa lo mntu ukule mifanekiso, eli bhinqa laqhagamshelana nentatheli laza layixelela ngezi leta—ezazingama-42 zizonke! Kwiiveki ezimbalwa kwamva, ndazifumana. Kwezi leta abazali bam babebuza kumakazi ngam. Inkathalo ababenayo ngam ayizange iphele. Kwandothusa ukubona ukuba ezi leta zisekho yaye zaphinda zavela emva kweminyaka engaphezu kwama-60!
[Imifanekiso ekwiphepha 25]
Intsapho yasekhaya yahlukaniswa xa uHitler waqalisa ukulawula
[Inkcazelo]
Hitler: U.S. Army photo
[Imifanekiso ekwiphepha 26]
1. Iofisi yaseMagdeburg
2. AmaGestapo abamba amawaka amaNgqina
[Umfanekiso okwiphepha 28]
Mna noJim siye safumana uvuyo olukhulu kwinkonzo yethu yoBukumkani