Ngaba Unokulilawula Ikamva Lakho?

NGABA ikamva lethu limiselwe kwangaphambili? Ngaba ukhetho esilwenzayo ebomini alunampembelelo kwikamva lethu?

Masithi umntu unokulilawula ikamva lakhe. Ukuba kunjalo, ngaba umntu ebenokumiselwa kwangaphambili ekubeni enze umsebenzi othile okanye abe kwisikhundla esithile? Yaye uThixo ebeya kuyiphumeza njani injongo yakhe ngomhlaba ukuba abantu bebenenkululeko yokulawula ikamva labo? IBhayibhile inikela iimpendulo ezanelisayo kule mibuzo.

Ukumiselwa Kwangaphambili Kwekamva Nenkululeko Yokuzikhethela—Ngaba Zombini Ezi Ngcamango Zichanile?

Cinga ngendlela uYehova uThixo asenze ngayo. IBhayibhile ithi: “Wamdala [umntu] ngokomfanekiso kaThixo; wadala indoda nebhinqa.” (Genesis 1:27) Njengoko senziwe ngokomfanekiso kaThixo, sinokukwazi ukubonakalisa iimpawu zakhe, ezinjengothando, okusesikweni, ubulumko namandla. Kwakhona uThixo usinike isipho senkululeko yokuzikhethela. Oku kusenza sahluke kwindalo yakhe yasemhlabeni. Sinokukhetha enoba siza kulandela ukhokelo lukaThixo lwendlela yokuziphatha okanye akunjalo. Kungeso sizathu lento umprofeti uMoses wayenokuthi: “Ndimisela amazulu nehlabathi namhlanje njengamangqina am okuba, ndibeke phambi kwakho ubomi nokufa, intsikelelo nesiqalekiso; nyula ke ubomi ukuze uphile, wena nenzala yakho, ngokuthi umthande uYehova uThixo wakho, uliphulaphule ilizwi lakhe, unamathele kuye.”—Duteronomi 30:19, 20.

Noko ke, ukuba nesipho senkululeko yokuzikhethela, akuthethi ukuba sinenkululeko epheleleyo. Akusiniki inkululeko yokuba singathobeli imithetho yemvelo neyokuziphatha uThixo ayenzele ukuze indalo iphela ilungelelane ize ibe seluxolweni. Le mithetho imiselwe ukuze ibe yinzuzo kuthi, yaye ukuba ayithotyelwa oko kunokukhokelela kwintlekele. Cinga nje ngoko kunokwenzeka ukuba sikhetha ukungawuthobeli umthetho womxhuzulane size sitsibe kuphahla lwesakhiwo esiphakamileyo!—Galati 6:7.

Kwakhona inkululeko yokuzikhethela isenza sibe neembopheleleko ezingenazo izidalwa ezingenankululeko enjalo. Umbhali uCorliss Lamont uyabuza: “Kutheni abantu sibabek’ ityala, size sibohlwaye ngokwenza okuphosakeleyo, ukuba siyavuma . . . ukuba ukhetho nezenzo zabo zimiselwe kwangaphambili?” Kakade ke, asinakukwenza oko. Izilwanyana ezilawulwa lithuku azibekwa tyala ngoko zikwenzayo, neekhompyutha nazo azibekwa tyala ngokungenzi izinto ezilungiselelwe ukuba zizenze. Ngoko ke, inkululeko yokuzikhethela, isenza sibe nembopheleleko enkulu yaye isenza sibe netyala ngezenzo zethu.

UYehova uThixo ebeya kuba akanaluthando nokusesikweni ngokwenene ukuba ngaphambi kokuba sizalwe, wamisela kwangaphambili indlela esiza kuhamba ngayo aze asibek’ ityala ngezenzo zethu! Akakwenzi oku, kuba “uThixo uluthando,” yaye “zonke iindlela zakhe zisesikweni.” (1 Yohane 4:8; Duteronomi 32:4) UThixo akasinikanga inkululeko yokuzikhethela waza kwangaxeshanye ‘wagqiba kwakude kudala ngabo aza kubasindisa nabo aza kubagweba,’ njengoko beqiqa ngolo hlobo abo bakholelwa ekumiselweni kwangaphambili kwekamva. Inkululeko yokuzikhethela ayivisisani nengcamango yokumiselwa kwangaphambili kwekamva.

IBhayibhile ibonisa ngokucacileyo ukuba ukhetho esilwenzayo luya kutshintsha ikamva lethu. Ngokomzekelo, uThixo ubongoza abenzi bobubi, esithi: ‘Khanincede nibuye, wonk’ ubani endleleni yakhe embi nasebubini bezenzo zenu ukuze ningazibizeli intlekele.’ (Yeremiya 25:5, 6) Esi sibongozo besiya kuba asikho ngqiqweni ukuba uThixo sele emisele kwangaphambili ikamva lomntu ngamnye. Ngaphezu koko iLizwi likaThixo lithi: “Guqukani, ke ngoko, nijike khon’ ukuze zicinywe izono zenu, ukuze amaxesha okuhlaziya eze evela kuYehova ngenkqu.” (IZenzo 3:19) UYehova ebengenakucela abantu ukuba baguquke baze bajike ukuba ebesazi kwangaphambili ukuba akukho nto banokuyenza ukuze batshintshe ikamva labo.

IZibhalo zithetha ngabathile abamenywe nguThixo ukuya kulawula njengookumkani ezulwini noYesu Kristu. (Mateyu 22:14; Luka 12:32) Noko ke, iBhayibhile ithi baya kuphulukana nelo lungelo ukuba abanyamezeli kude kuse ekupheleni. (ISityhilelo 2:10) Kutheni uThixo ebamema ukuba sele egqibile ukuba abazukukhethwa? Kwakhona cinga ngamazwi ompostile uPawulos awawathetha kwamanye amakholwa. Wabhala: “Ukuba siqhelisela isono ngabom emva kokufumana ulwazi oluchanileyo lwenyaniso, akusekho mbingelelo wezono useleyo.” (Hebhere 10:26) Isilumkiso esinjalo besingayi kubaluleka ukuba uThixo ebesele emisele kwangaphambili ikamva lawo. Kodwa ngaba uThixo akamiselanga abathile ukuba babe ngabalawuli noYesu Kristu?

Ngaba Kwamiselwa Kwangaphambili Umntu Ngamnye Okanye Njengeqela?

Umpostile uPawulos wabhala: “[UThixo] wasisikelela ngayo yonke intsikelelo yokomoya kwezasezulwini iindawo ngokumanyene noKristu, waza . . . wasinyula ngaphambi kokusekwa kwehlabathi . . . Kuba wasimisela kwangaphambili ukuba senziwe oonyana kuye ngoYesu Kristu.” (Efese 1:3-5) Yintoni uThixo awayimisela kwangaphambili, yaye kuthetha ukuthini ukunyulwa “ngaphambi kokusekwa kwehlabathi”?

Ezi ndinyana zibonisa ukuba uThixo wanyula abathile benzala yomntu wokuqala, uAdam, ukuze balawule noKristu ezulwini. (Roma 8:14-17, 28-30; ISityhilelo 5:9, 10) Noko ke, ingcamango yokuba uYehova uThixo wamisela kwangaphambili abantu abathile ukuze bafumane eli lungelo kwiminyaka emininzi ngaphambi kokuba bazalwe iyangqubana nesibakala sokuba abantu banikwe inkululeko yokuzikhethela. UThixo wamisela kwangaphambili iqela okanye udidi lwabantu, kungekhona umntu ngamnye.

Ngomzekelo: Masithi urhulumente ugqiba ekubeni amisele isebe elithile. Umisela kwangaphambili indlela eliza kusebenza ngayo eli sebe, igunya lalo nokuba liza kuba likhulu kangakanani. Ekugqibeleni eli sebe liqalisa ukusebenza emva kwexesha elithile limiselwe, yaye amalungu alo athi: “Urhulumente wagqiba kwiminyaka eliqela edluleyo ukuba uza kuba yintoni umsebenzi wethu. Ngoku siqalisa umsebenzi esiwunikiweyo.” Ngaba ubuya kugqiba kwelokuba urhulumente kumele ukuba wamisela kwiminyaka ethile ngaphambili ngabo baya kuba ngamalungu eli sebe? Ngokuqinisekileyo akunjalo. Ngokufanayo, uYehova wamisela kwangaphambili ukuba uya kumisela abantu abathile abakhethekileyo abaza kulungisa imiphumo yesono sika-Adam. Wamisela iqela labantu eliya kwenza oko—kungekhona umntu ngamnye. Babeza kukhethwa kamva, yaye ukhetho abalwenzayo ebomini lwaluya kuba negalelo enoba ekugqibeleni bayafaneleka okanye akunjalo.

Umpostile uPawulos wayecinga ngeliphi ihlabathi xa wathi: “[UThixo] wasinyula ngaphambi kokusekwa kwehlabathi”? Ihlabathi uPawulos abhekisela kulo apha asilohlabathi uThixo awaliqalisayo xa wadala uAdam noEva. Elo hlabathi ‘lalilunge gqitha’—lingenaso ngokupheleleyo isono nokonakala. (Genesis 1:31) Kwakungafuneki ukuba ‘likhululwe’ esonweni.—Efese 1:7.

Ihlabathi uPawulos awayethetha ngalo lelo labakho emva kokuba uAdam noEva bevukele e-Eden—ihlabathi elahluke ngokupheleleyo kwelo laliyinjongo kaThixo yangaphambili. Lihlabathi elaqalisa ngabantwana baka-Adam noEva. Elo hlabathi lalinabantu abangamhloneliyo uThixo abangamakhoboka esono nokonakala. Yayilihlabathi labantu abanokuhlangulwa, ngokungafaniyo nabo bona ngabom, uAdam noEva.—Roma 5:12; 8:18-21.

Ngokukhawuleza uYehova uThixo wakwazi ukuhlangabezana nale meko yayingumphumo wemvukelo yase-Eden. Kwakuba nje kuyimfuneko, wamisela kwangaphambili ilungiselelo elithile elikhethekileyo—uBukumkani bukaMesiya obulawulwa nguYesu Kristu—aya kulisebenzisa ekukhululeni abantu kwisono sika-Adam. (Mateyu 6:10) UThixo wakwenza oku “ngaphambi kokusekwa kwehlabathi” labantu abanokuhlangulwa, oko kukuthi, ngaphambi kokuba uAdam noEva abanemvukelo babe nabantwana.

Ngokuqhelekileyo abantu kuye kufuneke benze izicwangciso ukuze baphumeze oko bafuna ukukwenza. Ukumiselwa kwangaphambili kwekamva kunxulunyaniswa nengcamango yokuba uThixo umele ukuba unezicwangciso ezineenkcukacha ngendalo iphela apho yonke into imiselwe kwangaphambili. URoy Weatherford ubhala athi: “Kubonakala ukuba kwizithandi zobulumko ezininzi nasiphi na isiganeko esingacwangciswanga ngokweenkcukacha siyangqubana namandla kaThixo Amakhulu.” Ngaba ngokwenene uThixo ufanele achaze kusengaphambili isiganeko ngasinye ngokweenkcukacha?

Ekubeni enamandla amakhulu yaye enobulumko obungenakuthelekiswa nanto, uYehova unokumelana nayo nayiphi na ingxaki enokubakho njengoko izidalwa zakhe zisebenzisa inkululeko yazo yokuzikhethela. (Isaya 40:25, 26; Roma 11:33) Unokukwenza oku ngokukhawuleza ngaphandle kokwenza izicwangciso. Ngokungafaniyo nabantu abangafezekanga abanobuchule obusikelwe umda, uThixo uSomandla akafuni izicwangciso ezineenkcukacha nenkqubo emisela kwangaphambili ikamva lomntu ngamnye emhlabeni. (IMizekeliso 19:21) Kwiinguqulelo ezininzi zeBhayibhile, kwabase-Efese 3:11 kuthethwa ngoThixo ‘njengonenjongo kanaphakade’ kunokuba abe nezicwangciso ezimiselweyo.

Indlela Onokulilawula Ngayo Ikamva Lakho

UThixo unenjongo ngomhlaba, yaye loo njongo yamiselwa kwangaphambili. ISityhilelo 21:3, 4 sithi: “Khangela! Intente kaThixo iphakathi koluntu, yaye uya kuhlala nalo, lube ngabantu bakhe. Naye abe nguThixo walo. Uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona. Izinto zangaphambili zidlule.” Ewe, lo mhlaba uza kuba yiparadesi, kanye njengokuba uYehova wayecebe njalo ekuqaleni. (Genesis 1:27, 28) Ngoko umbuzo uthi, Uza kuba lapho? Oko kuxhomekeke kukhetho olwenzayo ngoku. UYehova akalimiselanga kwangaphambili ikamva lakho.

Idini lentlawulelo loNyana kaThixo, uYesu Kristu, lenza ukuba wonke umntu obonakalisa ukholo kuye afumane ubomi obungunaphakade. (Yohane 3:16, 17; IZenzo 10:34, 35) IBhayibhile ithi: “Lowo ubonisa ukholo kuNyana unobomi obungunaphakade; lowo ungamthobeliyo uNyana akayi kububona ubomi.” (Yohane 3:36) Unokukhetha ubomi ngokufunda eBhayibhileni ngoThixo, uNyana wakhe neenjongo Zakhe uze ukusebenzise oko ukufundayo. Umntu owenza ngokuvisisana nobulumko bokwenene obubhalwe kwiLizwi likaThixo uqinisekiswa ukuba “uya kuhlala ngonqabiseko aze angaphazamiseki ekunkwantyiseni kwentlekele.”—IMizekeliso 1:20, 33.

[Imifanekiso ekwiphepha 5]

Ngokungafaniyo nezilwanyana, abantu kufuneka baphendule ngezenzo zabo

[Inkcazelo]

Ukhozi: Foto: Cortesía de GREFA