Lisinge Phi Eli Hlabathi?

IHLABATHI ELIMANYENEYO. Ngaba aluyonto enqwenelekayo nelangazelelwa nguye wonk’ ubani? Ewe, kusoloko kuthethwa ngalo, nakwiintlanganiso zeenkokeli zehlabathi. NgoAgasti 2000, iinkokeli zonqulo ezingaphezu kwe-1 000 zahlanganisana kwizakhiwo zeZizwe Ezimanyeneyo eNew York kwiNgqungquthela Yoxolo Lwehlabathi. Ezi nkokeli zazigwadla iqhinga lokucombulula iingxabano zehlabathi. Nakuloo ngqungquthela zabuya nemband’ esikhova kuba amazwe ayengaboni ngasonye. Ingcaphephe yomthetho wamaSilamsi yaseYerusalem ayizange ivume ukuyizimasa loo ngqungquthela kuba yayikhalazela ukumenywa korabhi othile wamaYuda. Abanye bakhathazeka kuba abaququzeleli bale ndibano abazange bammeme uDalai Lama, kwiintsuku ezimbini zokuqala zale ntlanganiso kuba bengafuni ukucaphukisa iTshayina.

Ngo-Oktobha 2003, amazwe angxange uLwandle lwePasifiki ayegwadla imibandela yokhuseleko lwehlabathi kwingqungquthela yeAsia-Pacific Economic Cooperation (APEC) eyayiseThailand. Amazwe angama-21 awayezimase loo ngqungquthela avumelana ngamxhelo-mnye kwelokuba kuza kufuneka awasiphule neengcambu amaqela abagrogrisi aze avumelana nangezinye iindlela zokuphucula ukhuseleko lwehlabathi. Ukanti, kwakuloo ngqungquthela iqela labathunywa latsarhwa ngamazwi entiyo athethwa yenye inkulumbuso nxamnye namaYuda.

Kutheni Lungekho Nje Umanyano?

Nakuba kusoloko kuthethwa ngomanyano lwehlabathi, kodwa alude lubekho. Nangona bebaninzi nje abawa bevuka, kutheni lungekabikho nje umanyano ehlabathini nakule nkulungwane yama-21?

Enye inkulumbuso eyayizimase le ngqungquthela yayiphendula inxalenye yalo mbuzo. Yathi, “Kukho lento kuthiwa kukuzingca ngobuzwe.” Ewe, uluntu luthiwe lwale bubuhlanga. Uhlanga nesizwe ngasinye sithe phithi kukufuna ukuzilawula. Umoya wokuzimela geqe nomoya wokhuphiswano nokunyoluka ziyenze yamaxongo ngakumbi le meko. Kwiimeko ezininzi xa intando yesizwe esithile ingqubana nentando yehlabathi lonke, intando yesizwe idla ngokunkqenkqeza phambili.

Umdumisi ubuchaza kakuhle ubuhlanga xa esithi ‘yindyikitya yokufa ebangela iinkxwaleko.’ (INdumiso 91:3) Ubuhlanga bunjengesibetho, kuba buye babangela ukubandezeleka okungathethekiyo kubantu. Buye bakhuthaza ukuthiyana kwabantu ukutyhubela iinkulungwane. Namhlanje, ubuhlanga busaqhubeka bubahlula abantu, kwaye iinkokeli zabantu azikwazi kubuthintela.

Abantu abaninzi abasemagunyeni bayaqonda ukuba iingxaki ezininzi zehlabathi zibangelwa bubuhlanga nokuzingca. Ngokomzekelo u-U Thant owayesakuba nguNobhala Jikelele weZizwe Ezimanyeneyo wathi: “Inkoliso yezi ngxaki ibangelwa zizimo zengqondo ezingatshongo khona . . . Phakathi kwazo singabalula ubuhlanga obubangelwa kukungabi nangqiqo—‘bokuxhasa ilizwe, nokuba sekumnyam’ entla.’” Nanamhla oku, izizwe zisathe phithi kukuzingca, zifuna ukongama. Izizwe ezisele ziyixhamla le nyhweba azifuni kunyenyisa nakancinane. Ngokomzekelo, i-International Herald Tribune yathi nge-European Union: “Ubutshaba nokungathembani isezezona zinto ziphambili kwezopolitiko eYurophu. Inkoliso yamazwe akwi-EU, awakuthandi ukuphenjelelwa nokukhokelwa lelinye ilizwe.”

ILizwi likaThixo, iBhayibhile, liyichaza kakuhle imiphumo yokulawulana kwabantu lithi: ‘Xa umntu elawula umntu iba kukwenzakala kwakhe.’ (INtshumayeli 8:9) Ngokulahlulahlula ihlabathi libe ngamaqela eentlanga ngeentlanga, nabantu baye bakubona ukuchana komgaqo weBhayibhile othi: “Ozahlulayo uya kufuna ulangazelelo lwakhe lokuzingca; uya kuphambuka kubo bonke ubulumko bobuqili.”—IMizekeliso 18:1.

UMdali wethu, okwaziyo okona kusilungeleyo, akazange alungiselele ukuba abantu bazenzele ababo oorhulumente baze bazilawule. Ngokwenjenjalo, abantu baye abayinanza injongo kaThixo nesibakala sokuba ungumnini-nto-zonke. INdumiso 95:3-5 ithi: “Kuba uYehova nguThixo omkhulu noKumkani omkhulu phezu kwabo bonke abanye oothixo, lowo zisesandleni sakhe iingontsi zomhlaba nalowo zizezakhe iincopho zeentaba; lowo lulolwakhe ulwandle, olo yena walwenzayo nozandla zakhe zawuyilayo umhlaba owomileyo.” UThixo uNgumongami ofanele asilawulwe. Xa iintlanga zifuna ukongama, zingqubana nokuthanda kwakhe.—INdumiso 2:2.

Yintoni Efunekayo?

Ekuphela kwendlela eya kumanyanisa ihlabathi kukuba norhulumente omnye obakhathaleleyo bonke abantu. Abantu abazikisayo ukucinga bayakuqonda oku. Noko ke, kwanabo bakuqondayo oku bakhangela kwindawo ezingafanelekanga. Ngokomzekelo, abahlalutyi abaninzi, kuquka neenkokeli zonqulo, ziye zabongoza abantu ukuba bakhangele kwiZizwe Ezimanyeneyo xa befuna ihlabathi elimanyeneyo. Noko ke, iintlangano zabantu, enokuba zinenjongo ezintle kangakanani, azikwazi ukucombulula iingxaki zoluntu. Kunoko, kwinkoliso yezi ntlangano kusuka kubalasele ukruthakruthwano lwamazwe ahlukahlukeneyo.

IBhayibhile ilumkisa nxamnye nokukholosa ngeentlangano zabantu xa isithi: “Musani ukukholosa ngezidwangube, nangonyana womntu wasemhlabeni, lowo ungenalo usindiso.” (INdumiso 146:3) Ngaba oku kuthetha ukuba simele silahl’ ithemba? Nakanye. Ikhona enye indlela.

Abantu abaninzi abazi ukuba uThixo sele emmisele urhulumente okwaziyo ukumanyanisa ihlabathi. IBhayibhile ithi ngoYehova uThixo: “Mna, ndimmisile ukumkani wam eZiyon, intaba yam engcwele. Cela kum, ukuba ndikunike iintlanga njengelifa lakho neziphelo zomhlaba njengelifa lakho.” (INdumiso 2:6, 8) Phawula ukuba iZibhalo zithi uYehova uThixo ‘ummisele ukumkani wakhe,’ kwindinyana yesi-7, uthi ‘ngunyana wakhe.’ Akukho wumbi ngaphandle, kukaYesu Kristu uNyana kaThixo elinikwe yena igunya phezu kwazo zonke iintlanga.

Liza Kumanyana Njani Ihlabathi?

Inkoliso yabantu ayimnanzanga lo rhulumente wasezulwini umiselwe nguThixo. Iintlanga zizifunela olwazo ulongamo azifuni nokuva ngolongamo lukaThixo. Noko ke, uThixo akasayi kubanyamezela ngonaphakade abo bangafuniyo ukulugqala ulongamo lwakhe norhulumente ammiseleyo. Ithetha ngabo bangafuniyo ukumamkela lo rhulumente, INdumiso 2:9 ithi: “[UNyana, uYesu Kristu] uya kuziqhekeza ngentonga yobukhosi yentsimbi, ngokungathi sisitya sombumbi uya kuziqhekeza zibe ziingceba.” Enokuba ziyakuqonda oko okanye azikuqondi, iintlanga zikuhola wendlela oza kuzikhokelela kungquzulwano noThixo. Incwadi yokugqibela yeBhayibhile ithetha ‘ngookumkani bomhlaba omiweyo uphela’ abahlanganiselwa ndawonye “kwimfazwe yemini enkulu kaThixo uSomandla.” (ISityhilelo 16:14) Iintlanga neendlela zazo ezidala ukwahlukana ziya kuthi shwaka. Oku kuya kutyeneneza umendo ukuze urhulumente kaThixo asebenze ngaphandle kokuphazanyiswa.

NjengoMongami Wendalo Iphela, ngoNyana wakhe uYehova uThixo uya kusebenzisa amandla ngobulumko ukuze enze utshintsho olufunekayo oluya kumanyanisa ihlabathi. Urhulumente kaThixo uya kuzisa umanyano lokwenene kwaye uya kusikelela bonke abo bathanda ubulungisa. Kutheni ungaziphi ixesha ufundisise incwadi yeNdumiso 72 kwiBhayibhile yakho? Kule ndumiso sakhelwa umfanekiso ngqondweni ngezinto aya kuzenzela uluntu urhulumente woNyana kaThixo. Abantu baya kuphila kwihlabathi elimanyeneyo, iingxaki zabo—ezinjengengcinezelo, ugonyamelo, ubuhlwempu nezinye—azisayi kubakho.

Kweli hlabathi liziintlaba-zahlukane, abantu abaninzi bacinga ukuba kulilize ukubambelela kwesi sithembiso. Kodwa ibiya kuba yimpazamo ukucinga ngaloo ndlela. Azizange zisilele izithembiso zikaThixo, zingasayi kuze zisilele nanini na. (Isaya 55:10, 11) Ngaba ubungathanda ukulubona olo tshintsho? Unako. Eneneni sele bekho abantu abazilungiselela elo xesha. Baphuma kuzo zonke iintlanga, kunokuba babe besunduzana, ngamxhelo-mnye bathobela ulongamo lukaThixo. (Isaya 2:2-4) Bangoobani? NgamaNgqina kaYehova. Kutheni ungawatyeleli kwiintlanganiso zawo? Siqinisekile ukuba uya kukunandipha ukuba phakathi kwawo yaye anokukunceda uzithobe kulongamo lukaThixo uze unandiphe umanyano olungasayi kuze luphele.

[Imifanekiso ekwiphepha 7]

Abantu beentlanga zonke balungiselela ukuphila kwihlabathi elitsha

[Inkcazelo Ngomfanekiso okwiphepha 4]

Saeed Khan/AFP/Getty Images

[Inkcazelo Ngemifanekiso ekwiphepha 5]

Woman grieving: Igor Dutina/AFP/Getty Images; protesters: Said Khatib/AFP/Getty Images; armored cars: Joseph Barrak/AFP/Getty Images