Ngaba Ukho Umntu Onokulitshintsha Ngokwenene Ihlabathi?

“Amahlwempu athi eyona nto ayifunayo luxolo nonqabiseko—aze emva koko anikwe amathuba okuphucula ubomi bawo. Afuna ihlabathi lisebenzise iinkqubo ezinobulungisa khon’ ukuze imigudu yawo ingasingelwa phantsi ngamazwe afumileyo neenkampani zoongxowa-nkulu.”

LEYO yindlela achazwa ngayo amathemba namaphupha amahlwempu ngomnye umalathisi weziko loncedo lwezizwe ngezizwe. Enyanisweni, amazwi akhe achaza kakuhle iminqweno yawo onke amaxhoba eentlekele zehlabathi nokungabikho kokusesikweni kwalo. Onke alangazelela ukuphila kwihlabathi elinoxolo nonqabiseko lokwenene. Ngaba lingaze libe njalo ihlabathi? Ngaba ukho umntu onamandla okutshintsha eli hlabathi lingenabulungisa?

Imigudu Yokuzisa Iinguqu

Abantu abaninzi baye bazama ukutshintsha eli hlabathi. Ngokomzekelo, uFlorence Nightingale, iNgesikazi lenkulungwane ye-19, lachitha ubomi balo lizama ukunyamekela abagulayo ngendlela ecocekileyo, nenovelwano. Ngaloo mihla—engekabikho amayeza athintela ukubola nezibulala-ntsholongwane—unyango lwesibhedlele lwalwahluke ngokupheleleyo kwinto oluyiyo namhlanje. Enye incwadi ithi: “Abongikazi babengafundanga, bengacocekanga yaye bedume ngokunxila nokuziphath’ okubi.” Ngaba uFlorence Nightingale waphumelela kwimigudu yakhe yokuphucula umsebenzi wabongikazi? Kunjalo kanye. Ngokufanayo, kukho uthotho lwabantu abanenyameko nabazinikeleyo abaye baphumelela ekuncedeni abantu kwiinkalo eziliqela zobomi—njengemfundo, ezonyango, ukubakhela izindlu, iinkqubo zokubondla, xa sibala nje ezimbalwa. Ngenxa yoko, kukho indima ebonakalayo yokuphuculwa kobomi bezigidi zabantu ababesebugxwayibeni.

Sekunjalo, asinakuyibetha ngoyaba le meko imandundu yokuba: Amakhulu ezigidi zabantu asathwaxwa yimfazwe, ulwaphulo-mthetho, izifo, indlala nezinye iintlekele zobomi. Elinye iziko loncedo laseIreland iConcern lithi, “mihla le bangama-30 000 abantu abafa ngenxa yobuhlwempu.” Nkqu nobukhoboka, into eyayisiliwa ngabalweli beenguqu kangangeenkulungwane ezadlulayo, busagqugqisile. IDisposable People—New Slavery in the Global Economy ithi: “Amakhoboka akhoyo namhlanje angaphezulu lee kunabantu abaqweqwediswayo besuka eAfrika besiya kuthengiswa ebukhobokeni phesheya kolwandle lweatlantiki.”

Yintoni ethintela abantu bangakwazi ukwenza utshintsho olupheleleyo, noluhlala luhleli? Ngaba boyiswa ligunya lezinhanha nabo basemagunyeni, okanye kukho enye into ebandakanyekileyo?

Imiqobo Ethintela Utshintsho

Ngokutsho kweLizwi likaThixo, owona mqobo kwimigudu yabantu yokutshintsha eli hlabathi libe nobulungisa nguSathana uMtyholi. Umpostile uYohane usixelela ukuba “ihlabathi liphela lisemandleni ongendawo.” (1 Yohane 5:19) Enyanisweni, kanye ngalo mzuzu, uSathana “ulahlekisa umhlaba omiweyo uphela.” (ISityhilelo 12:9) De impembelelo yakhe engendawo itshayelwe neengcambu, akayi kuphela amaxhoba obungendawo nokungabikho kokusesikweni. Yabangelwa yintoni yonke le ntlungu?

Abazali bethu bokuqala, uAdam noEva, banikwa umhlaba owawulungiselelwe ukuba likhaya eliyiparadesi egqibeleleyo ukuze bahlale kulo abantu—ihlabathi ‘elilunge gqitha.’ (Genesis 1:31) Konakaliswa yintoni oko? Akakho omnye, nguSathana. Wacel’ umngeni ilungelo likaThixo lokumisela imithetho abafanele baphile ngayo abantu. Waveza into yokuba kukho amakhwiniba kulawulo lukaThixo. Walukuhlela uAdam noEva ukuba bakhethe ukuzimela geqe khon’ ukuze bazenzele izigqibo ngoko kulungileyo nokubi. (Genesis 3:1-6) Oku kweza nomqobo wesibini owenza abantu bawe phantsi kwimigudu yabo yokuguqula ihlabathi libe nobulungisa nolwazelelelo—loo mqobo sisono nokungafezeki.—Roma 5:12.

Kutheni Ekuvumele Nje Oku?

Bambi banokubuza oku, ‘Kwakutheni ukuze uThixo avumele isono nokungafezeki? Kwakutheni ukuze angasebenzisi amandla akhe angenakuthelekiswa nanto, atshayele bonke abavukeli aze aphinde aqale phantsi ukudala?’ Kusenokuvakala kulula oko. Kodwa ukusebenzisa kwakhe amandla kuphakamisa eminye imibuzo enzima. Kanene asikokusetyenziswa kakubi kwegunya okubangela ezinye zeentlungu ezithwaxa amahlwempu nabo bacinezelekileyo kweli hlabathi? Ngaba akudli ngokwenza abantliziyo zinyanisekileyo bamthandabuze uzwilakhe osebenzisa igunya lakhe ukutshayela abo bangavumelaniyo nolawulo lwakhe?

Ukuze aqinisekise abo bantliziyo zinyanisekileyo ukuba akangozwilakhe osebenzisa kakubi igunya, uThixo wavumela uSathana nabantu abamvukelayo ukuba bahambe ngabayibonayo, bengalawulwa yimithetho nemigaqo kaThixo—okwexeshana elithile elimiselweyo. Ukuhamba kwexesha kwakuya kungqina ukuba ulawulo lukaThixo kuphela kwendlela efanelekileyo. Oko kwakuza kubonisa ukuba nayiphi na imiqathango asibekela yona wenzela ukunceda thina. Enyanisweni, imiphumo ebuhlungu yokuvukela imithetho kaThixo sele ibonakala phandle. Iye yangqina ukuba uThixo unezizathu zokusebenzisa amandla akhe ukuze atshayele ubungendawo xa efuna. Yiloo nto kanye aza kuyenza kungentsuku zatywala.—Genesis 18:23-32; Duteronomi 32:4; INdumiso 37:9, 10, 38.

Logama nje uThixo engekakwenzi oko, siseza kuhlala kule nkqubo ingenalwazelelelo, ‘sigcuma kwaye sisentlungwini.’ (Roma 8:22) Nokuba yintoni esiyenzayo ukuzama iinguqu, asinakuze simtshabalalise uSathana, singenakuze sikuphelise nokungafezeki okubangela konke ukubandezeleka kwethu. Asinawo amandla okususa isono esasizuza ilifa kuAdam.—INdumiso 49:7-9.

UYesu Kristu Uza Kwenza Utshintsho Olupheleleyo

Ngaba oku kuthetha ukuba akukho themba kwaphela? Limele libekho nakanjani. Ukho mntu onamandla angaphaya kwawomntu ofayo onikwe ilungelo lokuzisa iinguqu ezipheleleyo. Ngubani lowo? NguYesu Kristu, ochazwa yiBhayibhile njengomMeli Oyintloko kaThixo wokusindisa abantu.—IZenzo 5:31.

Ulinde nje “ixesha elimisiweyo” likaThixo ukuze enze umsebenzi wakhe. (ISityhilelo 11:18) Yintoni kanye le aza kuyenza? Uza ‘kubuyisela izinto zonke awathetha ngazo uThixo ngomlomo wabaprofeti bakhe abangcwele bexesha lakudala.’ (IZenzo 3:21) Ngokomzekelo, uYesu uya “kumhlangula lowo ulihlwempu ukhalela uncedo, kwanalowo uxhwalekileyo nabani na ongenamncedi. . . . Uya kuwukhulula umphefumlo wabo kwingcinezelo nakugonyamelo.” (INdumiso 72:12-16) Esebenzisa uYesu Kristu, uThixo uthembisa ‘ukuphelisa iimfazwe kuse esiphelweni somhlaba.’ (INdumiso 46:9) Uthembisa ukuba: “Akakho ummi [wehlabathi lakhe elicocekileyo] oya kuthi: ‘Ndiyagula.’” Iimfama, izithulu, neziqhwala—bonke abo bagulayo nabanezifo—baya kubuyiselwa empilweni efezekileyo. (Isaya 33:24; 35:5, 6; ISityhilelo 21:3, 4) Kwanabo bafa kwiinkulungwane ezadlulayo baya kuzuza kweli lungiselelo. UThixo uthembisa ukuwabuyisela ebomini amaxhoba okungekho sesikweni nengcinezelo.—Yohane 5:28, 29.

UYesu Kristu akayi kuzisa nje iinguqu ezingephi zokwexeshana. Uya kususa yonk’ imiqobo ebangela lungabikho ulwazelelelo ehlabathini. Uya kususa isono nokungafezeki aze atshabalalise uSathana uMtyholi nabo bonke abalandeli bakhe abanemvukelo. (ISityhilelo 19:19, 20; 20:1-3, 10) Inkxwaleko nokubandezeleka eziye zavunyelwa okwexeshana nguThixo ‘aziyi kuvuka isihlandlo sesibini.’ (Nahum 1:9) UYesu wayecinga ngoku xa wayesifundisa ukuthandazela ukuba uBukumkani bukaThixo bufike ukuze ukuthanda kukaThixo kwenziwe “nasemhlabeni, njengasezulwini.”—Mateyu 6:10.

Usenokuphikisa ngelithi, ‘Akazange na uYesu athi “amahlwempu siya kusoloko sikunye nawo”? Ngaba oko akuthethi kuthi ukungabikho kokusesikweni nobuhlwempu zizinto eziya kuhlala zikho?’ (Mateyu 26:11) Ewe, uYesu watsho ukuba amahlwempu ayeya kuhlala ekho. Kodwa, umongo wamazwi kaYesu nezithembiso zeLizwi likaThixo, ubonisa ukuba wayethetha ukuba amahlwempu ayeya kuhlala ekho logama nje isekho le nkqubo yezinto. Wayesazi ukuba akakho umntu onokubuphelisa ubuhlwempu nokungabikho kokusesikweni emhlabeni. Wayesazi nokuba yena uya kukutshintsha konke oko. Kungekudala uza kuzisa inkqubo yezinto entsha ngokupheleleyo—“amazulu amatsha nomhlaba omtsha” apho kungayi kubakho zintlungu, kugula, buhlwempu nokufa kungabi sabakho tu.—2 Petros 3:13; ISityhilelo 21:1.

“Musani Ukulibala Ukwenza Okulungileyo”

Ngaba oku kuthetha ukuba ililize imigudu yethu yokuzama ukunceda abanye? Nakanye. IBhayibhile isikhuthaza ukuba sincede abanye xa bejamelene nezilingo neentlungu ezithile. UKumkani uSolomon wamandulo wathi: “Musa ukwala nokulungileyo kwabo kuselungelweni labo ukukufumana, xa kusemandleni esandla sakho ukukwenza.” (IMizekeliso 3:27) Umpostile uPawulos usibongoza athi: “Musani ukulibala ukwenza okulungileyo nokwabelana ngezinto nabanye.”—Hebhere 13:16.

NoYesu Kristu wasikhuthaza ukuba senze konke okusemandleni ethu ukuze sincede abanye. Wenza umzekeliso womSamariya owadibana nendoda eyayingxwelerhekile yaye iphangiwe. UYesu wathi, loo mSamariya “waba nosizi” waza wasebenzisa ubuncwane bakhe ukuze ayibophe amanxeba loo ndoda ilutywantsi waza wayinceda ukuba iphile. (Luka 10:29-37) Loo mSamariya unovelwano akazange alitshintshe ihlabathi, kodwa wenza umahluko omkhulu kubomi bomnye umntu. Nathi sinokuzeka mzekweni.

Noko ke, uYesu Kristu unokwenza okungakumbi kunokunceda nje abantu abathile kuphela. Unokuzisa iinguqu zokwenene, ibe uza kwenza oko kungekudala. Xa esenza oko, amaxhoba okungekho kokusesikweni okwenzeka namhlanje aya kutsho akwazi ukuphucula iimeko zawo aze anandiphe uxolo nonqabiseko lokwenene.—INdumiso 4:8; 37:10, 11.

Ngoxa sisalindele oko, masingalibali ukwenza nantoni na esemandleni ethu ukuba siyenze, enoba luncedo lokomoya okanye lwezinto eziphathekayo, ukuze “senze okulungileyo” kubo bonke abo bangamaxhoba eli hlabathi lingenalwazelelelo.—Galati 6:10.

[Imifanekiso ekwiphepha 5]

UFlorence Nightingale wenza iinguqulelo zokwenene kwiindlela zokonga

[Inkcazelo]

Courtesy National Library of Medicine

[Imifanekiso ekwiphepha 7]

Abalandeli bakaKristu benza okulungileyo kwabanye

[Inkcazelo Ngomfanekiso okwiphepha 4]

The Star, Johannesburg, S.A.