Bavuyisa Iintliziyo Zabazali Babo
“NYANA wam, ukuba ithe yalumka intliziyo yakho, iya kuba nemihlali intliziyo yam, eyam kanye.” (IMizekeliso 23:15) Eneneni, abazali abangamaKristu baba nemihlali xa abantwana babo besiba nobulumko bukaThixo. NgoMgqibelo, Septemba 10, 2005, abantu abasuka kumazwe ngamazwe abangama-6 859 babeye kuvuyisana nabaphumelele kwiklasi ye-119 yeSikolo seBhayibhile seWatchtower saseGiliyadi. Bonke babechulumance gqitha, ingakumbi abazali babo bangama-56 baphumeleleyo.
UDavid Walker, olilungu elidala lentsapho yaseBheteli eUnited States, wavula ucwangciso ngomthandazo. Emva koko usihlalo, uDavid Splane olilungu leQumrhu Elilawulayo lamaNgqina kaYehova, waqalisa ucwangciso ngokuxelela oobawo nomama babo baphumeleleyo la mazwi: “Simele sinothulel’ umnqwazi. Iimpawu eniye nazihlakulela koonyana neentombi zenu ziye zenza bangenelela le nkonzo yobuvangeli basemazweni.” Abo bazali bamele ukuba babexhalabile, ekubeni kungekudala oonyana neentombi zabo babeza kuya kwizabelo ezikude. Noko ke, uMzalwan’ uSplane wabaqinisekisa esithi: “Musani ukuxhalela abantwana benu. UYehova unokubanyamekela ngaphezu lee kunani.” Emva koko wathi: “Cingani ngezinto ezintle eziya kufezwa ngoonyana neentombi zenu. Abantu ababandezelekileyo nabadimazekileyo baza kufumana intuthuzelo yokwenene okwesihlandlo sokuqala ebomini babo.”
Indlela Yokuqhubeka Uvuyisa Abanye
Usihlalo wabiza izithethi ezine. Esokuqala yayinguRalph Walls olilungu leKomiti yeSebe eUnited States, owayenentetho enomxholo othi, “Hlala Uvule Amehlo.” Wabethelela ingongoma yokuba, ukuba yimfama ngokomoya yeyona nto imbi ngaphezu kokuba yimfama ngokoqobo. Ibandla lenkulungwane yokuqala laseLawodike lamfameka ngokomoya. AmaKristu elo bandla awayeziimfama ngokomoya afumana uncedo, kodwa kusoloko kukuhle ukuzikhusela kubumfama obunjalo ngokuhlala sivule amehlo ethu okomoya. (ISityhilelo 3:14-18) Esi sithethi sathi: “Hlalani nivule amehlo, nize nijonge abazalwana abaneembopheleleko ngendlela uYehova abajonga ngayo.” Abo baphumeleleyo abamele baxhalabe ngokugqith’ emgceni xa kukho iingxaki ebandleni. INkosi uYesu Kristu iyazibona zonke ezo zinto. Iya kuqiniseka ukuba izinto zilungiswa ngexesha elifanelekileyo.
Emva koko, uSamuel Herd weQumrhu Elilawulayo waphendula umbuzo othi, “Ngaba Sele Nilungile?” Kanye njengokuba umntu othabatha uhambo ehamba neempahla aza kuzinxiba, ngoko nabo baphumeleleyo bamele banxibe iimpawu zobuntu obutsha. Bamele babe nemfesane njengoYesu. Xa umntu owayeneqhenqa wathi kuye: “Ukuba nje uyathanda, unako ukundenza ndihlambuluke,” uYesu wathi: “Ndiyathanda. Hlambuluka.” (Marko 1:40-42) Sandula ke isithethi sathi: “Ukuba ngokwenene nifuna ukunceda abantu, niya kuyifumana indlela yokwenjenjalo.” KwabaseFilipi 2:3 kuxelelwa amaKristu ukuba agqale abanye “njengabongamileyo.” UMzalwan’ uHerd wathi: “Ukuthobeka kubaluleke ngaphezu kokuba nolwazi. Abo nidibana nabo kubulungiseleli nabazalwana noodade ebandleni baya kuzuza kulwazi lwenu kuphela ukuba nithobekile.” Waqukumbela ngokuthi ukuba abo baphumeleleyo baqhubeka besambatha uthando lobuKristu, bakulungele ukuya kwizabelo zabo, beqinisekile ukuba baya kuphumelela.—Kolose 3:14.
UMark Noumair, omnye wabahlohli baseGiliyadi, intetho yomxholo wakhe yayisithi, “Ngaba Uya Kuhlala Unawo?” Lo mxholo wakhe wenza abaphulaphuli bazibuza ngoko kuthethwa ngako. Wawubhekisela ekubonakaliseni kwethu uxabiso ngokulunga kukaYehova. INdumiso 103:2 ithi: “Mbonge uYehova, mphefumlo wam, ungakulibali ukwenza kwakhe konke.” AmaSirayeli akazange abe nombulelo ngemana eyayiwagcina ephila, ayeyibiza ngokuthi “esi sonka sinkatshunkatshu.” (Numeri 21:5) Njengoko ixesha lihamba, imana yaqhubeka iwanceda, kodwa wona aphelelwa luxabiso. Lo mhlohli wathi: “Ukuba niyayilibala imisebenzi kaYehova nize niyithabathe lula inkonzo yenu yasemzini, oko kuya kuchaphazela indlela eniwujonga ngayo umsebenzi eniwunikwe nguYehova.” INdumiso 103:4 ithi uYehova ‘ukuthwesa ububele bothando.’ Abo baphumeleleyo baya kubona ububele bothando bukaThixo kumabandla abo amatsha.
Omnye umhlohli waseGiliyadi, uLawrence Bowen, intetho yomxholo wakhe yayisithi, “Ngaba Uya Kuzifumana?” Wathi amalungu eklasi ye-119 yaseGiliyadi aye aziqeqesha ngamandla ukuze aphumelele kubuvangeli basemazweni. Ngoku kufuneka abambelele kuYehova nakumsebenzi awanike wona. KwiSityhilelo 14:1-4, abo bali-144 000 bachazwa njengabo “bahlala beyilandela iMvana kungakhathaliseki apho iya khona.” Lonke elo qela libambelele ngokunyanisekileyo kuYehova nakuNyana wakhe phezu kwazo nje iimvavanyo elijamelana nazo, yaye lifikelela usukelo lwalo. Esi sithethi sathi: “Enoba kwenzeka ntoni, nathi kufuneka sibambelele ngokunyanisekileyo kuYehova nakumsebenzi asinike wona.” Ngokwenjenjalo, abo baphumeleleyo baya ‘kufumana’ iintsikelelo zikaYehova.—Duteronomi 28:2.
Bavelisa Iziqhamo Enkonzweni Yabo
Mpela-veki nganye ebudeni bolu qeqesho, abafundi bebesiya entsimini. Njengoko uWallace Liverance, umamkeli wabafundi, wayethetha nabo ebudeni bolu cwangciso, kwacaca ukuba baye bashumayela ngempumelelo. Bashumayela iindaba ezilungileyo ubuncinane ngeelwimi ezilishumi baza baqalisa izifundo zeBhayibhile ezininzi ezinenkqubela. Esinye isibini esikule klasi saqalisa isifundo seBhayibhile nomnye umfana ongumTshayina. Emva kokumtyelela izihlandlo ezibini, sambuza ukuba uvakalelwa njani njengoko esiba nolwazi ngoYehova. Wavula iBhayibhile yakhe waza wasicela ukuba sifunde uYohane 17:3. Wayevakalelwa kukuba usendleleni esa ebomini.
UAnthony Morris weQumrhu Elilawulayo wathetha nabazalwana abathathu abangamalungu eKomiti yeSebe eCôte d’Ivoire, kwiDominican Republic nase-Ecuador. Aba bazalwana baqinisekisa aba baphumeleleyo ukuba iiKomiti zamaSebe zijonge phambili ekufikeni kwabo yaye ziya kubanceda balungele izabelo zabo.
Emva koko, uLeonard Pearson wentsapho yaseBheteli eUnited States wathetha namalungu eKomiti yeSebe laseDemocratic Republic of the Congo, ePapua New Guinea naseUganda. Aba bazalwana bakhuthaza aba baphumeleleyo ukuba babe nenxaxheba ngokupheleleyo entsimini. Esinye isibini esingabavangeli basemazweni nesichithe ngaphezu kweminyaka engama-21 eCongo siye sanceda abantu abangama-60 bazahlulela baze babhaptizwa. Esi sibini ngoku siqhuba izifundo zeBhayibhile ezingama-30, yaye ezingama-22 zibakho kwiintlanganiso zebandla. Ekubeni kukho ukuvuna kokomoya okukhulu kangako, ngoku lixesha elifanelekileyo lokuba ngumvangeli wasemazweni.
Ukunikela Ubungqina Ngomoya Wongxamiseko
UGerrit Lösch weQumrhu Elilawulayo wanikela intetho yokuqukumbela. Umxholo wakhe wawusithi, “Ukuthetha NgoThixo Nokunikela Ubungqina NgoYesu Ngemini YeNkosi.” Amagama athi “ingqina,” “amangqina” nelithi “ubungqina” avela izihlandlo ezili-19 kwincwadi yeSityhilelo. Ngoko ke, uYehova uwuchaza ngokucacileyo umsebenzi awunike abantu bakhe. Sifanele sibunikele nini ubungqina? Ebudeni ‘bemini yeNkosi.’ (ISityhilelo 1:9, 10) Loo mini yaqala ngowe-1914, iqhubeka ize kutsho kwixesha lethu de iye kufikelela kwikamva. Ngokutsho kweSityhilelo 14:6, 7, umsebenzi wokuthetha ngoThixo uxhaswa ziingelosi. ISityhilelo 22:17 sibonisa ukuba imbopheleleko yokwalathisa umsebenzi wokunikela ubungqina ngoYesu unikwe intsalela yamaKristu athanjisiweyo. Sekunjalo sonke simele silixhakamfule elo lungelo ngoku. Kwindinyana 20, uYesu uthi: “Ndiyeza ngokukhawuleza.” UMzalwan’ uLösch wabongoza bonke abakhoyo wathi: “Xelelani abantu nithi, ‘Yizani, nithabathe amanzi obomi ngesisa.’ UYesu uyeza ngokukhawuleza. Ngaba sele silungile?”
UFred Rusk, naye obengumhlohli weSikolo saseGiliyadi kangangeminyaka eli-11, waqukumbela ucwangciso ngomthandazo wokubulela uYehova oye wachukumisa bonke abebekho. Olu suku lwemigcobo lwaphela ngendlela esemagqabini.
[Ibhokisi ekwiphepha 13]
INKCAZELO ENGABAFUNDI
Inani lamazwe abavela kuwo: 10
Inani lamazwe abathunyelwe kuwo: 25
Inani labafundi: 56
Umlinganiselo wobudala: 32,5
Umlinganiselo weminyaka besenyanisweni: 16,4
Umlinganiselo weminyaka bekwinkonzo yexesha elizeleyo: 12,1
[Umfanekiso okwiphepha 15]
Iklasi Ye-119 Yabaphumelele KwiSikolo SeBhayibhile SeWatchtower SaseGiliyadi
Kuludwe olungezantsi, kuqalwa ukusuka kuluhlu olungaphambili ukusa kolungasemva, yaye amagama adweliswe ukusuka ekhohlo ukusa ekunene kuluhlu ngalunye.
(1) Helgesen, S.; Daugaard, H.; Pierluissi, A.; Joseph, I.; Racanelli, C. (2) Byrge, T.; Butler, D.; Freedlun, J.; Nuñez, K.; Pavageau, C.; Doumen, T. (3) Camacho, O.; Lindqvist, L.; Broomer, A.; Wessels, E.; Burton, J.; Woodhouse, O.; Doumen, A. (4) Tirion, A.; Connally, L.; Fournier, C.; Gil, A.; Johnsson, K.; Hamilton, L. (5) Byrd, D.; Scribner, I.; Camacho, B.; Laschinski, H.; Hallahan, M.; Libuda, O. (6) Joseph, A.; Lindqvist, M.; Helgesen, C.; Nuñez, D.; Scribner, S.; Fournier, J. (7) Pierluissi, F.; Pavageau, T.; Broomer, C.; Racanelli, P.; Butler, T.; Woodhouse, M.; Libuda, J. (8) Laschinski, M.; Freedlun, S.; Burton, I.; Tirion, M.; Byrd, M.; Byrge, J. (9) Wessels, T.; Hallahan, D.; Connally, S.; Gil, D.; Daugaard, P.; Hamilton, S.; Johnsson, T.