Bavuyiswa Kukwenza Ukuthanda KukaThixo
UYESU wamisela onke amaKristu umzekelo ngokuthandaza kuYise esithi: “Makwenzeke, kungekhona ukuthanda kwam, kodwa okwakho.” (Luka 22:42) Namhlanje, loo mazwi okuzithoba kuYehova, axeliswa zizigidi zabakhonzi bakaThixo. Phakathi kwabo kukho abafundi abangama-52 beklasi ye-120 yeSikolo seBhayibhile seWatchtower saseGiliyadi. NgoMatshi 11, 2006, le klasi yabaphumeleleyo yayichwayitile ijonge phambili ekwenzeni ukuthanda kukaThixo kumazwe awahlukahlukeneyo, enoba ijamelana neemeko ezinzima.
Yintoni ebangela ukuba bavumele ukuthanda kukaYehova kukhokele ubomi babo? UChris noLeslie, isibini esinikwe isabelo sokuba ngabavangeli basemazweni eBolivia, bakuchaza ngala mazwi oku: “Ekubeni siye sazincama, sifuna ukuhlala silungele ukwenza nantoni na enxulumene nentlangano kaYehova.” (Marko 8:34) UJason noChere, abathunyelwe eAlbania, bongezelela besithi: “Isabelo ngasinye esiye sasifumana kwintlangano kaYehova sinocelomngeni oluthile. Kodwa, siye safumanisa ukuba simele sikholose ngoYehova ngokupheleleyo.”
Bakhuthazwa Ukuzithoba Ekwenzeni Ukuthanda KukaYehova
UGeorge Smith, olilungu lentsapho yaseBheteli nosebenza kwiSebe Lobugcisa, wavula olu cwangciso ngomthandazo. UStephen Lett, ilungu leQumrhu Elilawulayo lamaNgqina kaYehova nowayengusihlalo wocwangciso, wamkela bonke abakhoyo. Iindwendwe ezivela kumazwe angama-23 zazize kwesi sihlandlo sovuyo kwiZiko Lemfundo leWatchtower ePatterson, eNew York. UMzalwan’ uLett waxelela abo baphumeleleyo ukuba baza kwenza “into enamandla gqitha.” Wathetha ‘ngezinto ezinqatyisiweyo’—njengeemfundiso zobuxoki—aba bavangeli basemazweni batsha abaza kuzibhukuqa ngamandla eZibhalo. (2 Korinte 10:4, 5) Waqukumbela wathi: “Niya kuvuya gqitha kukusetyenziswa nguYehova ukubhukuqa izinto ezinqatyisiweyo kwiintliziyo zabantu abanyanisekileyo kwizabelo zenu!”
UHarold Jackson, ilungu labo basebenza kwikomkhulu, wathetha ngomxholo othi: “Izinto Enimele Nizikhumbule.” Wathi abavangeli basemazweni abatsha abamele balibale ‘ukufuna kuqala ubukumkani nobulungisa bukaThixo.’ (Mateyu 6:33) Bamele bakhumbule ukuba “uthando luyakha” ibe lungoyena ndoqo ukuze baphumelele. (1 Korinte 8:1) Wathi: “Xa nisebenzisana nabanye khokelwani luthando.”
Emva koko, uGeoffrey Jackson, olilungu leQumrhu Elilawulayo nowayengumvangeli wasemazweni ukususela ngowe-1979 de kwangowama-2003, wabuza aba baphumeleleyo, “Yiyiphi Imbopheleleko Eninayo?” Wabethelela imfuneko yokuba ubani abe nembono elungeleleneyo ngaye nangentsimi. AmaKristu anembopheleleko yokuzibhokoxa ekutyaleni nasekunkcenkcesheleni imbewu yenyaniso. Noko ke, nguYehova onembopheleleko yokukhulisa ngokomoya, ekubeni ‘inguThixo okhulisayo.’ (1 Korinte 3:6-9) Walek’ umsundulo wathi: “UYehova uninike imbopheleleko yokuqinisekisa ukuba nihlala nomelele ngokomoya. Kodwa yiyiphi eyona mbopheleleko enkulu ninayo? Kukuba nithande uYehova nabantu eniza kushumayela kubo.”
Umhlohli waseGiliyadi uLawrence Bowen wanikela intetho ethi “Yazi Indlela Omele Uziphathe Ngayo.” Wakhumbuza abafundi ukuba uYehova wawakhokela waza wawakhusela ngendlela engummangaliso amaSirayeli entlango. (Eksodus 13:21, 22) Namhlanje uyasikhokela aze asikhusele, ngokuyinxalenye esebenzisa ibandla lamaKristu athanjisiweyo, “intsika nesixhaso senyaniso.” (1 Timoti 3:14, 15) Aba bavangeli basemazweni batsha bamele babambelele kwinyaniso yeBhayibhile, ebakhokelayo ize ibakhusele abo bathobekileyo.
UWallace Liverance, naye ongumhlohli waseGiliyadi, wabongoza abafundi ukuba bangalilibali ilizwi likaThixo ‘elisemva’ kwabo. Ilizwi likaThixo lisemva kwethu ngengqiqo yokuba iBhayibhile yagqitywa ukubhalwa kwiinkulungwane ezadlulayo. Njengomalusi obiza izimvu zakhe ngasemva, uYehova usemva kwabantu bakhe, ebalathisa ‘ngekhoboka elithembekileyo neliyingqondi.’ (Isaya 30:21; Mateyu 24:45-47) ISikolo saseGiliyadi siye sanceda abafundi ukuba balixabise ngakumbi olo didi lwekhoboka. Eli “khoboka” liye lenza nelungiselelo lokuba kubekho INguqulelo Yehlabathi Elitsha YeZibhalo Ezingcwele. Isithethi sakhuthaza abafundi sisithi: “Thabathani obu buncwane benkcazelo, nize nibusebenzise ekufundiseni abanye.”—Mateyu 13:52.
Ukwenza Ukuthanda KukaYehova Entsimini
Kwintetho enomxholo othi “Intumekelelo Yokuvakalisa Iindaba Ezilungileyo,” umhlohli waseGiliyadi uMark Noumair wabalaselisa amava athile aye afunyanwa ngabafundi entsimini ngoxa besekwesi Sikolo saseGiliyadi. (Roma 1:15) Udliwano-ndlebe olwenziwe nabafundi lwabonisa ukuba baye babonisa intumekelelo yokwenene yokushumayela nanini na kuvela ithuba.
Aba bafundi bafumana ukhuthazo olungakumbi kudliwano-ndlebe olwalusenziwa nguKenneth Flodin elenza nabaveleli abahambahambayo abathathu abakhonza eUnited States. URichard Keller noAlejandro Lacayo, ngaphambili ababekhonza kuMzantsi nakuMbindi Merika, baye bachaza indlela abaye bahlangabezana ngayo neemvavanyo ezahlukahlukeneyo nangeentsikelelo abaye bazifumana xa babengabavangeli basemazweni. UMoacir Felisbino wabalisa ngoqeqesho awalufumana ngoxa wayesebenza nabavangeli basemazweni eBrazil, apho akhulele khona.
UDavid Schafer wadlan’ indlebe nabavangeli basemazweni abathathu abanamava, uRobert Jones, uWoodworth Mills noChristopher Slay. Aba bazalwana babalisa indlela abaye bafunda ngayo ukuthembela kuYehova xa bejamelene nobunzima. Baqinisekisa abafundi ukuba uqeqesho abalufumanayo kwintlangano kaYehova lwabaxhobisela lo msebenzi wobuvangeli basemazweni. UMzalwan’ uMills wakushwankathela ngale ndlela oku: “Asiyomfundo yaseGiliyadi esemagqabini eyona indincedileyo, kodwa koko isikolo siye sandifundisa kona ngokuphathelele ukuthobeka nothando.”
Ilungu leQumrhu Elilawulayo uGuy Pierce wanikela intetho ephambili, enomxholo othi “UYehova Akanakuze Asilele.” UAdam wasilela, kodwa ngaba oko kuthetha ukuba noThixo wasilela? Ngaba uThixo wasilela ukudala uAdam efezekile, njengoko abanye abantu besitsho? Nakanye, kuba “uThixo oyinyaniso walwenza uluntu lwathi tye.” (INtshumayelo 7:29) Isithethi sathi, ukugcina ingqibelelo kukaYesu phantsi kwezona mvavanyo ziqatha emhlabeni kwangqina ukuba “uAdam wayengenakuzingxengxezela engenaso nesizathu sokusilela.” Uvavanyo lokuthobela olwafunyanwa nguAdam kumyezo wase-Eden aluthathi nto kolo uYesu wajamelana nalo ngempumelelo. Sekunjalo, uAdam wasilela. Noko ke, uYehova akasayi kuze asilele. Injongo yakhe iza kuzaliseka. (Isaya 55:11) UMzalwan’ uPierce wathi kwaba bavangeli basemazweni batsha: “Ninelungelo lokuzukisa uYehova ngomoya wenu wokuzincama. Ngamana uYehova angaba nani naphi na apho niya kumkhonza njengabavangeli basemazweni khona.”
Emva kokuba usihlalo uMzalwan’ uLett edlulisele imibuliso evela kwiiofisi zamasebe awahlukahlukeneyo amaNgqina kaYehova, wanika abafundi iidiploma nezabelo zabo. UVernon Wisegarver, ilungu lentsapho yaseBheteli eliligqala, wavala ngomthandazo.
Abantu ababekho abangama-6 872 bavakalelwa kukuba olu cwangciso luvuselele inzondelelo yabo ekwenzeni ukuthanda kukaThixo. (INdumiso 40:8) Abanye kwabo bafundi uAndrew noAnna bathi: “Sazahlulela kuYehova. Samthembisa ukuba siya kumenzela nantoni na ayicelayo. Ngoku uYehova usicela ukuba siye eCameroon, eAfrika.” Bekunye namanye amalungu ale klasi bakhangele phambili ekwenzeni umsebenzi oza kubanika ulwaneliseko. Ewe, bayavuyiswa kukwenza ukuthanda kukaThixo.
[Ibhokisi ekwiphepha 17]
INKCAZELO NGABAFUNDI
Inani lamazwe abavela kuwo: 6
Inani lamazwe abathunyelwe kuwo: 20
Inani labafundi: 52
Umlinganiselo wobudala: 35,7
Umlinganiselo weminyaka besenyanisweni: 18,3
Umlinganiselo weminyaka bekwinkonzo yexesha elizeleyo: 14,5
[Umfanekiso okwiphepha 18]
Iklasi Ye-120 Yabaphumelele KwiSikolo SeBhayibhile SeWatchtower SaseGiliyadi
Kuludwe olungezantsi, kuqalwa ukusuka kuluhlu olungaphambili ukusa kolungasemva, yaye amagama adweliswe ukusuka ngasekhohlo ukusa ngasekunene kuluhlu ngalunye.
(1) Wright, S.; Suárez, B.; Croisant, B; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.