Imibuzo Evela Kubafundi
Ngaba uYosefu, umkhonzi kaYehova othembekileyo, wasebenzisa indebe yesilivere ukuze ahlabe izihlabo, njengokuba iGenesis 44:5 ingathi ibonisa oko?
Asikho isizathu sokucinga ukuba uYosefu wayevumisa.
IBhayibhile ibonisa ukuba uYosefu wayekwazi ukwazi izinto eziza kwenzeka kwangaphambili. Xa wayecelwe ukuba alawule iphupha likaFaro, uYosefu wazingisa kwelokuba nguThixo kuphela ‘onokuchaza’ ikamva kwangaphambili. Ngenxa yoko, naye uFaro waqonda ukuba uThixo owayenqulwa nguYosefu—uThixo wokwenyaniso, kungekhona ukuvumisa—wanika uYosefu amandla okwazi izinto eziya kwenzeka kwixa elizayo. (Genesis 41:16, 25, 28, 32, 39) KuMthetho owanikwa uMoses kamva, uYehova wakwalela ukusetyenziswa komlingo okanye ukuvumisa, ngaloo ndlela eqinisekisa ukuba nguye yedwa onokuxela ikamva kwangaphambili.—Duteronomi 18:10-12.
Kwakutheni, ukuze, isicaka sikaYosefu sithi indebe yesilivere wayeyisebenzisela ‘ukuhlaba izihlabo’?a (Genesis 44:5) Kufuneka sihlole iimeko xa kwakuthethwa la mazwi.
Ngenxa yendlala eyayigqugqisile, abantakwaboYosefu baya kuthenga ukutya eYiputa. Kwiminyaka ethile ngaphambili, abantakwabo babemthengise ebukhobokeni. Ekubeni, babe ngasamazi, bacela uncedo kwakuye, kuba ngoku wayengusomaqhuzu owaba ukutya eYiputa. Akazange azazise kubo uYosefu. Kunoko, wabavavanya. Wayefanele ukubavavanya kuba wayefuna ukuqonda ukuba bebeguquke ngokwenene kusini na. Kwakhona wayefuna ukwazi ukuba—babemthanda kangakanani—umninawa wabo uBhenjamin noyise, uYakobi, owayemthanda gqitha uBhenjamin. Ngenxa yoko, uYosefu wabhenel’ emaqhingeni.—Genesis 41:55–44:3.
UYosefu wayalela esinye sezicaka zakhe ukuba sizalise iingxowa zabantakwabo ngokutya, size imali siyishiye kwalapho emilonyeni yeengxowa zabo, size sibeke indebe yesilivere kaYosefu emlonyeni wengxowa kaBhenjamin. Kuyo yonke le nquleqhu uYosefu wazenza umntu wasezintlangeni. Izenzo zakhe, indlela yakhe yokuthetha zamenza wabonakala ngathi ungumlawuli weentlanga, kanye ngendlela awayeza kubonakala ngayo kubantakwabo.
Xa uYosefu wathetha nabo ekugqibeleni, waqhubeka ebaqhatha ebabuza ukuba: “Beningazi na ukuba indoda enjengam nje ingahlaba izihlabo?” (Genesis 44:15) Ngaloo ndlela le ndebe yayiyinxalenye yelo yelenqe. Xa uYosefu wathi uyakwazi ukuhlaba izihlabo kwakungeyonyani kanye njengokuba noBhenjamin wayengelosela.
[Umbhalo osemazantsi]
a Ichaza olu qheliselo lwamandulo, iThe Holy Bible, With an Explanatory and Critical Commentary, ehlelwe nguF. C. Cook, ithi: “Ukuvumisa ngendebe kwakusenziwa ngokuphosa igolide, isilivere, okanye amatye anqabileyo emanzini, kuze kujongwe imbonakalo yawo; okanye ngokukhangela amanzi njengaxa kujongwe isipili.” Umphengululi weBhayibhile uChristopher Wordsworth uthi: “Maxa wambi indebe yayizaliswa ngamanzi, impendulo yayicingelwa ngokujonga ilanga kuloo ndebe inamanzi.”