Ngoobani Abathobela Iimfundiso ZikaKristu Namhlanje?
EHLABATHINI lonke uYesu Kristu ugqalwa njengomnye wabona bantu babalaseleyo bakha baphila. Abaninzi bamgqala njengoyena mntu ubalasele kakhulu. Sele kuyiminyaka ephantse ibe ngamawaka amabini, iimfundiso zakhe zinempembelelo kakhulu kubomi—“babantu abanobubele nabalungileyo abangajongelwe ntweni, nabantu abadumileyo abaye babonisa isisa,” utsho njalo umbhali oliNgesi uMelvyn Bragg.
Bujongwa Njani UbuKristu?
Bujongwa njani ubuKristu? Buye bachazwa “njengokona kuhambela phambili kwabantu kwizinto zokomoya.” UDavid Kelso waseGlasgow Caledonian University, eSkotlani, wachaza imbono yakhe ngendlela abujonga ngayo ubuKristu. Wabhala: “Kwiminyaka engamawaka amabini bukho buye banegalelo elikhulu kwezobugcisa bokuzoba, ukwakha, intandabulumko, umculo nemicimbi yasekuhlaleni.”
Noko ke, abaninzi ababujongi ngaloo ndlela. Abaluchasanga unqulo olusekelwe kwiimfundiso zikaYesu Kristu nenkolelo yokuba wayengunyana kaThixo. Kunoko, bachase indlela eziziphethe ngayo iintlangano zonqulo ezithi zezobuKristu.
Ngokomzekelo, isithandi-sobulumko saseJamani senkulungwane ye-19 uFriedrich Nietzsche, wachaza ubuKristu “njengebala elibi abantu abaya kuhlala benalo.” Wathi: “Bungoyena nobangela wentlungu, oyena nobangela wokonakala okungathethekiyo, . . . busebenzisa inkohlakalo, ubuqhetseba bukwenza oku ngendlela echuliweyo ukuze buphumeze iinjongo zabo.” Kuyavunywa ukuba, lo kaNietzsche wayegabadele kwindlela awayebujonga ngayo ubuKristu, kodwa kukho nabanye abanengqiqo abaye bafikelela kwisigqibo esifanayo. Kwenzeka njani oko? Kungenxa yokuba ukutyhubela iinkulungwane kunokuba abo bathi bangamaKristu babonakale ngokuba neempawu ezifana nezikaYesu Kristu, baye baziwa “ngokuziphatha okubi, inkohlakalo, ulwaphulo-mthetho nokunyelisa.”
Ngaba UKristu Ukunye Nabo Bathi BangamaKristu?
Ngoko kusengqiqweni ukuzibuza, “Ngaba uKristu usekunye nabo bathi bangamaKristu?” Ngokukhawuleza bambi banokuphendula bathi, “Kakade kunjalo! Akazange na athembise abalandeli bakhe ukuba uya kuba kunye nabo ‘de kube sekuphelisweni kwehlabathi’?” (Mateyu 28:20, King James Version) Ewe, uYesu wakuthetha oko. Kodwa ngaba wayethetha ukuthi uya kuba kunye naye nabani na ozibiza ngokuba ngumlandeli wakhe, enoba uziphatha njani na?
Khumbula ukuba, ezinye iinkokeli zonqulo zomhla kaYesu zazivakalelwa kukuba uThixo unazo enoba ziziphatha njani. Ekubeni uThixo wayekhethe amaSirayeli ngenxa yendima ethile ekhethekileyo, ezinye iinkokeli zonqulo zazicinga ukuba uThixo akasayi kuze azishiye—kungakhathaliseki oko zikwenzayo. (Mika 3:11) Noko ke, ekugqibeleni, zayigatya ngokupheleleyo imithetho nemilinganiselo kaThixo. Ngenxa yoko, uYesu Kristu wazixelela phandle wathi: “Khangelani! Indlu yenu ishiyelwa kuni.” (Mateyu 23:38) Yonke loo nkqubo yonqulo yagatywa nguThixo. Wayishiya waza wavumela umkhosi wamaRoma ukuba utshabalalise isixeko esilikomkhulu sayo, iYerusalem netempile yayo ngowama-70 C.E.
Ngaba kunokwenzeka into efanayo nakubuKristu? Makhe siqwalasele iimeko awayebhekisela kuzo uYesu xa wathembisa ukuba uya kuba kunye nabalandeli bakhe de ‘kube sekuphelisweni kwehlabathi.’
[Imifanekiso ekwiphepha 2, 3]
Imfundiso zikaYesu Kristu zinempembelelo enkulu kwizigidi zabantu ehlabathini lonke