Bashukunyiselwa Ukuba Bakhonze
YINTONI enokushukumisela izibini ezitshatileyo ezingama-24 eziseze ngobuso elizweni ukuba zishiye iintsapho, abahlobo neendawo eziziqhelileyo ukuze zenze umsebenzi wobuvangeli basemazweni kumazwe asemzini? Kutheni zinokuvuyiswa kukuya kwiindawo ezifana nePapua New Guinea neTaiwan, nakumazwe aseAfrika noMbindi Merika? Ngaba kungenxa yokuthanda izinto ezilucelomngeni? Akunjalo. Kunoko, zishukunyiswa luthando lokwenene ngoThixo nangommelwane.—Mateyu 22:37-39.
Ngoobani aba bantu? Ngabaphumelele kwiklasi ye-109 yeSikolo seBhayibhile seWatchtower saseGiliyadi. NgoMgqibelo, ngoSeptemba 9, 2000, abantu abangama-5 198 bahlanganisana kwiZiko Lemfundo leWatchtower—ePatterson, eNew York—nakwiindawo ezazidityaniswe ngonxibelelwano ukuze kuphulaphulwe isiluleko sothando esinokunceda aba baphumeleleyo ukuba babe ngabavangeli basemazweni abaphumelelayo.
Usihlalo wolu cwangciso yayinguStephen Lett, ilungu leKomiti Yokufundisa leQumrhu Elilawulayo lamaNgqina kaYehova. Amagqabaza akhe okuvula ayesekelwe kuMateyu 5:13, “Niyityuwa yomhlaba.” UMzalwan’ uLett wacacisa ukuba ngokuqinisekileyo amazwi kaYesu ayasebenza kwaba bafundi baphumeleleyo. Ngokomzekelo, ityuwa iyakwazi ukwenza izinto zibe nencasa. Ngoko ke, ngomsebenzi wabo wokushumayela onempumelelo, abavangeli basemazweni banjengetyuwa ngendlela yokomfuziselo.
Amazwi Okwahlukana Akhuthazayo
Emva koko uMzalwan’ uLett wabiza abebekhonza uYehova kangangexesha elide nabanikela iintetho ezimfutshane kodwa ezinempembelelo nezisekelwe eZibhalweni. Owokuqala yayinguJohn Wischuk, okhonza kwiSebe Lokubhala. Umxholo wakhe wawusithi, “Eyona Ndumiso Imfutshane Ikhuthaza Umoya Wobuvangeli Basemazweni,” wawusekelwe kwiNdumiso 117. Namhlanje, kukho imfuneko emhlabeni wonke ukuba kunikelwe ubungqina ‘kwiintlanga’ ‘nakwizizwana’ ngokuphathelele uYehova noBukumkani bakhe. Aba bafundi bakhuthazwa ukuba bazalisekise oko kuthethwa yiNdumiso 117 ngokubongoza abanye ‘baDumise uYa.’
Emva koko usihlalo wabiza uGuy Pierce weQumrhu Elilawulayo. Wathetha ngomxholo othi “Yibani Bhetyebhetye, Kodwa Niqine.” ILizwi likaThixo linamandla. UYehova uThixo ubizwa ngokuba nguLiwa kwiDuteronomi 32:4, sekunjalo iLizwi lakhe liyakuvumela ukuba bhetyebhetye kuba labhalelwa onke amaqela eelwimi nabantu abaphila ngeendlela ezahlukahlukeneyo—ewe, lonke uluntu. Abafundi bayalelwa ukuba bashumayele iLizwi likaThixo, bavumele isigidimi salo sichukumise intliziyo nesazela sabantu. (2 Korinte 4:2) “Qinani kwimigaqo yobulungisa, kodwa yibani bhetyebhetye. Musani ukubajongela phantsi abo bakwisabelo senu ngenxa yokuba bephila ngendlela eyahlukileyo kweyenu,” wabongoza njalo uMzalwan’ uPierce.
UKarl Adams, omnye wabahlohli baseGiliyadi, obekhonza kwikomkhulu lehlabathi phantse iminyaka engama-53, wathetha ngomxholo oxhokonxa iingcinga othi “Niza Kuya phi Xa Nisuka Apha?” Kuyinyaniso ukuba, ezi zibini zingama-24 zazifumene izabelo zobuvangeli basemazweni kumazwe angama-20 ahlukahlukeneyo emhlabeni wonke, kodwa kwaphakanyiswa lo mbuzo, Xa sele nilapho naze nayibona loo ndawo, kuza kwenzeka ntoni? Siphila kwihlabathi elinomoya ongazolanga. Abantu bafuna ukuya kwiindawo ezintsha baze benze izinto ezintsha ukuze bakwazi ukuzikholisa. Kwelinye icala, aba bafundi bafumana isabelo esivela kuYehova kwindawo afuna ukuba babe kuyo ukuze banyamekela “izimvu” zakhe ngokungazingci. Abafanele babe njengabo babekuSirayeli wamandulo abathi ngenxa yokuzingca baphulukana nethuba lokusetyenziswa nguYehova ukuze asikelele lonke uluntu. Kunoko, bafanele baxelise uYesu Kristu, owayesoloko esenza ukuthanda kukaYise ngokungazingci nowayethobela phantsi kwazo zonke iimeko awayejamelana nazo.—Yohane 8:29; 10:16.
“Zixabiseni Izinto Ezinzulu ZikaThixo,” lowo yayingumxholo kaWallace Liverance, umgcini weengxelo zeSikolo saseGiliyadi. Ngokuphindaphindiweyo, iZibhalo zithetha ngeLizwi likaThixo njengobutyebi, ubuncwane obuxabisekileyo, izinyithi ezixabisekileyo nezinto ezinexabiso eliphezulu nezifunwayo. IMizekeliso 2:1-5 ibonisa ukuba ukuze sifumane “ukumazi uThixo,” simele sikufune “njengobuncwane obufihliweyo.” Isithethi sakhuthaza abafundi ukuba bembe kwizinto ezinzulu zikaThixo njengoko bekhonza kwizabelo zabo ezitsha. UMzalwan’ uLiverance waqiqa ngelithi: “Oku kuyasebenza, kuba kwakha ukholo nentembelo kuYehova yaye kuya komeleza uzimiselo lokuba uhlale kwisabelo sakho. Kuya kukunceda ukuba uthethe ngolweyiseko yaye ube ngumfundisi ophumelelayo njengoko ucacisa iinjongo zikaThixo kwabanye.”
Ethetha neklasi, omnye umhlohli weSikolo saseGiliyadi waxubusha ngendlela uYehova aye wawusikelela ngayo umsebenzi wenkonzo yasentsimini yabafundi kwiinyanga ezintlanu ezidlulileyo. ULawrence Bowen walatha kumazwi kampostile uPawulos akwiZenzo 20:20 ngokuphathelele ubulungiseleli basesidlangalaleni e-Efese, ebalaselisa ukuba uPawulos wayexhakamfula onke amathuba ukuze anikele ubungqina. Amava abafundi abonisa ukuba, njengompostile uPawulos, abo baqhutywa luthando ngoThixo nangommelwane kwixesha lethu abayeki ukuthetha ngenyaniso yaye bavumela amandla eLizwi likaThixo asebenze kwabanye. Oko kuphumela kwintsikelelo etyebileyo kaYehova.
Iintetho Zamagqala
Ebudeni besikolo, abafundi kule klasi yaseGiliyadi bangenelwa ngakumbi ngokuthi bakwazi ukunxulumana namalungu eeKomiti zamaSebe avela kumazwe angama-23, awayekho nawo kwiZiko Lemfundo lasePatterson eze kufumana uqeqesho olukhethekileyo. ULeon Weaver noMerton Campbell beSebe Lenkonzo benza udliwano-ndlebe namalungu ahlukahlukeneyo eeKomiti zamaSebe, abanye bawo ababephumelele eGiliyadi. Kwakusomeleza kwabo bafundi nakwiintsapho nabahlobo ukuva kwaba bavangeli basemazweni banamava.
Ukunceda abo babekwiklasi yabaphumeleleyo bakwazi ukwenza uhlengahlengiso kwizabelo zabo zasemzini banikwa amacebiso anjengala: “Yiba nesimo sengqondo esifanelekileyo. Ukuba kukho okuthile ongaqhelananga nako okanye ongakuqondiyo, musa ukunikezela. Thembela kuYehova”; “funda ukwaneliseka yiloo nto ifumanekayo, yaye yiba nethemba lokuba uYehova uya kukunika oko kuyimfuneko ebomini.” Amanye amagqabaza anikela ingqalelo ekuncedeni aba bafundi ukuba bahlale benovuyo kwisabelo sabo. Amanye amazwi awathethwayo ngala: “Ungathelekisi isabelo okuso nendawo osuka kuyo”; “funda ulwimi lwasekuhlaleni uze uluthethe kakuhle ukuze ukwazi ukuthetha nabantu”; “funda amasiko nendlela abaphila ngayo abo bantu, kuba oku kuya kukunceda ukuba uhlale kwisabelo sakho.” La magqabaza aba lukhuthazo olukhulu kwaba bavangeli basemazweni batsha.
Emva kodliwano-ndlebe, uDavid Splane, owayesakuba ngumvangeli wasemazweni nowaphumelela kwiklasi yama-42 yaseGiliyadi ngoku okhonza njengelungu leQumrhu Elilawulayo lamaNgqina kaYehova, wanikela intetho eyintloko enomxholo obangela umdla othi “Ningoobani—Ningabafundi Okanye Ningabaphumeleleyo?” Wabuza iklasi yabaphumeleleyo: “Niza kuzijonga njani njengoko nisiya kwisabelo senu sobuvangeli basemazweni? Njengabaphumeleleyo abazi yonke into ngomsebenzi wobuvangeli basemazweni okanye njengabafundi abasafanele bafunde okuninzi?” UMzalwan’ uSplane wabonisa ukuba lowo uphumeleleyo unobulumko uzigqala njengomfundi. Abavangeli basemazweni bafanele babe nembono yokuba wonke umntu abadibana naye kwisabelo sabo sobuvangeli basemazweni unokubafundisa okuthile. (Filipi 2:3) Aba bafundi bakhuthazwa ukuba basebenzisane ngokusondeleyo nabavangeli basemazweni abakunye nabo, iofisi yesebe nebandla lasekuhlaleni. “Uphumelele kuviwo lokugqibela, kodwa awukayeki ukuba ngumfundi. Yenza kucace kubo bonke abantu ukuba uze kufunda apho,” wabongoza njalo uMzalwan’ uSplane.
Emva kwale ntetho, abafundi bafumana iziqinisekiso zabo, yaye abaphulaphuli bachazelwa izabelo zabo. Abafundi abaphumeleleyo bachukumiseka njengoko ummeli weklasi wayefunda isigqibo sabo sokuba bazimisele ukuvumela oko bakufundileyo eLizwini likaThixo ukuba kubashukumisele ukwenza okungakumbi kwinkonzo engcwele.
Akuthandabuzeki ukuba bonke ababekho banokuvuma ukuba icebiso elafumaneka apho lasomeleza isigqibo sabo baphumeleleyo sokubonisa uthando kuThixo nommelwane. Kwakhona kwabenza bazimisela nangakumbi ukuba bancede abantu ngokomoya kwisabelo sabo sobuvangeli basemazweni.
[Ibhokisi ekwiphepha 25]
INKCAZELO ENGABAFUNDI
Inani lamazwe abavela kuwo: 10
Inani lamazwe ababelwe kuwo: 20
Inani labafundi: 48
Umlinganiselo wobudala: 33,7
Umlinganiselo weminyaka besenyanisweni: 16,2
Umlinganiselo weminyaka bekubulungiseleli bexesha elizeleyo: 12,5
[Umfanekiso okwiphepha 26]
Abaphumeleleyo KwiKlasi Ye-109 YeSikolo SeBhayibhile SeWatchtower SaseGiliyadi
Kuludwe olungezantsi, kuqalwa ukusuka kuluhlu olungaphambili ukuya kolungasemva, yaye amagama adweliswe ukusuka ngasekhohlo ukuya ngasekunene kuluhlu ngalunye.
(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, A.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.