Bazinikela Ngokuvumayo
“ABANTU bakho baya kuzinikela ngokuvumayo.” (INdumiso 110:3) Lo mazwi anentsingiselo ekhethekileyo kubafundi abangama-46 beklasi ye-118 yeSikolo seBhayibhile seWatchtower saseGiliyadi. Yintoni abayenzayo ukuze balungele ukuya kwesi sikolo, esiqeqesha abo baza kuba ngabavangeli basemazweni benceda abantu ngokomoya kumazwe asemzini? UMike noStacie, amalungu ale eklasi ye-118, bathi: “Isigqibo sethu sokuphila ubomi obulula sasinceda sanciphisa izinto eziphazamisayo saza sanikel’ ingqalelo kwizinto zokomoya. Salwela ukungavumeli impumelelo yethu kwezoshishino igqumelele usukelo lokomoya.” NjengoMike noStacie, abanye abafundi bale klasi baye bazinikela ngokuvumayo yaye ngoku bakhonza njengabavakalisi boBukumkani kumazwekazi amane.
NgoMgqibelo, Matshi 12, 2005, abantu abangama-6 843 ngovuyo babephulaphula ucwangciso lwabaphumelele kwesi sikolo. UTheodore Jaracz, ilungu leQumrhu Elilawulayo lamaNgqina kaYehova, wayengusihlalo. Emva kokwamkela ngokufudumeleyo abo babekho bevela kumazwe angama-28, wanikela ingqalelo kwindlela imfundo yeBhayibhile exabiseke ngayo. Ecaphula uWilliam Lyon Phelps, umhlohli ongumMerika, wathi: “Wonke umntu oyazi ngokucokisekileyo iBhayibhile eneneni kunokuthiwa ufundile.” Nangona imfundo yehlabathi isenokuba luncedo, imfundo yeBhayibhile iyodlula lee. Inceda abantu bamazi uThixo, nto leyo ekhokelela kubomi obungunaphakade. (Yohane 17:3) UMzalwan’ uJaracz wancoma abo baphumeleleyo ngokuvuma ngokuzithandela ukuba nenxaxheba kwinkqubo yokufundisa iBhayibhile eyenziwa emhlabeni wonke kumabandla amaNgqina kaYehova angaphezu kwama-98 000.
Ukhuthazo Olufike Ngexesha Elifanelekileyo Kwabo Baphumeleleyo
Emva kwamagqabaza kasihlalo, uWilliam Samuelson waxubusha umxholo othi, “Indlela Onokufana Ngayo Nomthi Womnquma Onabileyo Endlwini KaThixo,” owawusekelwe kwiNdumiso 52:8. Wabonisa ukuba umthi womnquma eBhayibhileni usetyenziswa njengofuzisela ukuchuma, ubuhle nokundiliseka. (Yeremiya 11:16) Sifanisa abafundi nomthi womnquma, isithethi sathi: “UYehova uya kunigqala njengabantu abahle nabandilisekileyo njengoko niwenza ngokuthembeka umsebenzi wenu wokushumayela ngoBukumkani kwizabelo zenu zobuvangeli basemazweni.” Kanye njengokuba umthi womnquma kufuneka ube neengcambu ezomeleleyo ukuze umelane nembalela, abafundi bafanele bomeleze iingcambu zabo zokomoya ukuze banyamezele inkcaso okanye ezinye iimvavanyo abanokujamelana nazo kwinkonzo yabo yasemzini.—Mateyu 13:21; Kolose 2:6, 7.
UJohn E. Barr, omnye wamalungu amathathu eQumrhu Elilawulayo awaba nenxaxheba kolu cwangciso, wanikela intetho enomxholo othi, “Niyityuwa Yomhlaba.” (Mateyu 5:13) Wabonisa ukuba kanye njengokuba ityuwa yokoqobo ikhusela ukutya kungonakali, ngoko ukushumayela kwabavangeli basemazweni ngoBukumkani bukaThixo kuya kusindisa ubomi babo baphulaphulayo, kubakhusela ekonakaleni ngokuziphatha nangokomoya. Waza ke ngobubele, uMzalwan’ uBarr wabongoza abo baphumeleleyo ukuba ‘bahlale benoxolo’ nabanye. (Marko 9:50) Wanikela esi siluleko, “Hlakulelani isiqhamo somoya, nize niqiniseke ukuba nisoloko niziphatha yaye nithetha ngobubele nangolwazelelelo.”
UWallace Liverance, omnye wabahlohli baseGiliyadi, wabalaselisa umxholo othi, “Hlala Kwinqanawa Ekumanzi Anzulu.” Kanye njengokuba inqanawa ehamba emanzini anzulu inokuya kwicala elifanelekileyo, kunjalo nokuqonda ‘izinto ezinzulu zikaThixo’—iinyaniso eziphathelele injongo kaThixo nendlela eza kuphunyezwa ngayo—kunokunceda ubani enze inkqubela ngokomoya. (1 Korinte 2:10) Ukuhlala nje emanzini okomoya angekho nzulu saneliseke ‘zizinto eziziziqalelo zezibhengezo ezingcwele zikaThixo’ kunokusithintela ekwenzeni inkqubela yaye kunokude kukhokelele ‘ekwaphukelweni yinqanawa mayelana nokholo lwethu.’ (Hebhere 5:12, 13; 1 Timoti 1:19) UMzalwan’ uLiverance waqukumbela ngamazwi athi, “Vumela ‘ubunzulu bobutyebi nobobulumko nobolwazi lukaThixo’ bukomeleze kwisabelo sakho sobuvangeli basemazweni.”—Roma 11:33.
UMark Noumair, omnye umhlohli waseGiliyadi, wanikela intetho enomxholo othi, “Ngaba Uza Kuphila Ngokuvisisana Nelifa Onalo?” Ngaphezu kweminyaka engama-60, iSikolo seBhayibhile seWatchtower saseGiliyadi besisoloko sinconywa yaye sisaziwa njengesibalaseleyo ngenxa ‘yemfumba yobungqina’ enikelwa ngabo baphumelele kuso. (Genesis 31:48) Eli lifa laseGiliyadi liye ladluliselwa kubafundi bale klasi ye-118. UMzalwan’ uNoumair wakhuthaza abafundi ukuba baxelise amaTekowa omhla kaNehemiya baze ngokuthobeka basebenzisane nabazalwana abakwibandla abakulo kwanabanye abavangeli basemazweni. Banikwa isiluleko sokuba baphephe isimo sengqondo ‘seengangamsha’ ezinekratshi athetha ngazo uNehemiya baze bakulungele ukusebenza ngokuzolileyo bangafuni ingqalelo yabantu.—Nehemiya 3:5.
Amava Nodliwano-ndlebe Olwakhayo
Inxalenye elandelayo yocwangciso yayinomxholo othi, “Ilizwi LikaThixo Laqhubeka Likhula.” (IZenzo 6:7) Besalathiswa ngumhlohli waseGiliyadi uLawrence Bowen, abafundi benza imiboniso ngamava abaye bawafumana entsimi ngoxa bekwesi sikolo. La mava abonisa ukuba abafundi baye bavakalisa iLizwi likaThixo ngenzondelelo nokuba uYehova uye wayisikelela gqitha imigudu yabo.
URichard Ashe wadlan’ iindlebe namalungu entsapho yaseBheteli asebenza ngokusondeleyo nesi sikolo. Achaza inkxaso enikelwa yintsapho yaseBheteli ukunceda abafundi baseGiliyadi bazuze ngokupheleleyo kwesi sikolo. Emva koko, uGeoffrey Jackson wathetha nabanye abaphumelela kwisikolo saseGiliyadi kwiminyaka edluleyo. Babalaselisa amalungelo amaninzi anika abavangeli basemazweni ithuba lokuzisa indumiso nozuko kuYehova. Omnye wathi: “Abantu bajonga yonke into oyenzayo njengomvangeli wasemazweni. Bayaphulaphula, bayajonga yaye bayakhumbula.” Ngoko, abafundi bakhuthazwa ukuba bakuphaphele ukumisela umzekelo omhle ngalo lonke ixesha. Eli cebiso liya kuba luncedo nakanjani na kwixesha elizayo.
UStephen Lett, ilungu leQumrhu Elilawulayo, wanikela intetho yokuqukumbela, enomxholo othi, “Qhubekani Njengabathwali ‘Bamanzi Aphilayo.’” (Yohane 7:38) Wathi kwiinyanga ezintlanu ezidluleyo, abafundi bazuze lukhulu ngokusela kanobom kwiLizwi likaThixo lenyaniso. Kodwa yintoni abavangeli basemazweni abasebatsha abaza kuyenza ngenkcazelo abayifumeneyo? UMzalwan’ uLett wabongoza abo baphumeleleyo ukuba banike abanye la manzi okomoya ngesisa ukuze babe “ngumthombo wamanzi ampompozayo anika ubomi obungunaphakade.” (Yohane 4:14) Isithethi songezelela sathi: “Ningaze nilibale ukunika uYehova, owona ‘mthombo wamanzi aphilayo,’ imbeko nozuko afanele ukulufumana. Zenibe nomonde xa nifundisa abo bashiya iBhabhiloni Enkulu ethwaxwa yimbalela.” (Yeremiya 2:13) UMzalwan’ uLett waqukumbela ngokukhuthaza abo baphumeleleyo ukuba ngenzondelelo baxelise umoya nomtshakazi baze baqhubeke besithi: “‘Yiza!’ Lowo unxaniweyo makeze; lowo uthandayo makawathabathe amanzi obomi ngesisa.”—ISityhilelo 22:17.
UMzalwan’ uJaracz waqukumbela ucwangciso ngokudlulisela imibuliso evela kumazwe ngamazwe. Emva koko kwafundwa ileta yombulelo lilungu leklasi yabaphumeleleyo.
Ngaba ungakwazi ukuya kunceda apho kufuneka abavakalisi abangakumbi? Ukuba kunjalo, sukela izinto zokomoya, njengokuba baye benza aba bafundi. Zuza uvuyo nolwaneliseko olufumanekayo xa ubani ezinikela ngovuyo enkonzweni kaThixo—enoba ungumvangeli wasemazweni kwilizwe lasemzini okanye umlungiseleli okufuphi nekhaya.
[Ibhokisi ekwiphepha 13]
INKCAZELO ENGABAFUNDI
Inani lamazwe abavela kuwo: 8
Inani lamazwe abathunyelwe kuwo: 19
Inani labafundi: 46
Umlinganiselo wobudala: 33,0
Umlinganiselo weminyaka besenyanisweni: 16,5
Umlinganiselo weminyaka bekwinkonzo yexesha elizeleyo: 12,9
[Umfanekiso okwiphepha 15]
Iklasi Ye-118 Yabaphumelele KwiSikolo SeBhayibhile SeWatchtower SaseGiliyadi
Kuludwe olungezantsi, kuqalwa ukusuka kuluhlu olungaphambili ukusa kolungasemva, yaye amagama adweliswe ukusuka ngasekhohlo ukusa ngasekunene kuluhlu ngalunye.
(1) Brockmeyer, A.; Moloney, S.; Symonds, N.; Lopez, Y.; Howard, C. (2) Jastrzebski, T.; Brown, D.; Hernandez, H.; Malagón, I.; Jones, A.; Connell, L. (3) Howard, J.; Lareau, E.; Shams, B.; Hayes, S.; Brown, O. (4) Burrell, J.; Hammer, M.; Mayer, A.; Kim, K.; Stanley, R.; Rainey, R. (5) Jastrzebski, P.; Zilavetz, K.; Ferris, S.; Torres, B.; Torres, F. (6) Connell, J.; Hernandez, R.; Moloney, M.; Malagón, J.; Shams, R.; Hayes, J. (7) Ferris, A.; Hammer, J.; Stanley, G.; Kim, C.; Symonds, S.; Lopez, D.; Burrell, D. (8) Brockmeyer, D.; Mayer, J.; Rainey, S.; Zilavetz, S.; Jones, R.; Lareau, J.