“Simele Sithobele UThixo Njengomlawuli Kunabantu”

‘UThixo Wethu Unako Ukusihlangula’

ESI yayisisiganeko esikhwankqisayo. Kwakumiswe umfanekiso omkhulu wegolide kwithafa laseDura, mhlawumbi elikufuphi nesixeko saseBhabhiloni. Lo mfanekiso wawuza kumiselwa ngokusemthethweni kumsitho okhethekileyo owawuzinyaswe ngamagosa aphakamileyo. La magosa ayeyalelwe ukuba athi akuva isandi sexilongo, aqubude kulo mfanekiso. UKumkani uNebhukadenetsare waseBhabhiloni wayewise umthetho wokuba nabani na ongaqubudanga kuwo aphoswe kwiziko elitshisa ngokuphindaphindiweyo. Ngubani owayengenakuwuthobela lo mthetho?

Ababelapho babamb’ ongezantsi xa bebona abakhonzi bakaYehova abathathu—uShadraki, uMeshaki, noAbhednego—bengaqubudi. Aba bakhonzi babesazi ukuba xa bathe baqubuda kuloo mfanekiso baya kuba benza okuchaseneyo nemigaqo yokuzinikela kwabo ngokukhethekileyo kuYehova uThixo. (Duteronomi 5:8-10) Xa kwakufuneka bachazele uNebhukadenetsare isizathu sokuba bangajiki kwisigqibo abasenzileyo, bengoyiki bathi: “Ukuba kumele kube njalo uThixo wethu esimkhonzayo, unako ukusihlangula. Uya kusihlangula ezikweni elivutha umlilo, nasesandleni sakho kumkani. Kodwa ukuba akunjalo, makwazeke kuwe, kumkani, ukuba asiyi kubakhonza oothixo bakho, nomfanekiso wegolide owumisileyo asiyi kuwunqula.”—Daniyeli 3:17, 18.

Xa la maHebhere mathathu aphoswa kwiziko lomlilo, asinda ngendlela engummangaliso. UThixo wathumela ingelosi ukuba iye kuhlangula aba bakhonzi bakhe bathembekileyo, ababexolele ukufa kunokuba bangamthobeli.a Babefana nabapostile bakaYesu Kristu abathi emva kweminyaka engaphezu kweenkulungwane ezintandathu baxelela inkundla ephakamileyo yakwaYuda oku: “Simele sithobele uThixo njengomlawuli kunabantu.”—IZenzo 5:29.

Izifundo Ezibalulekileyo

UShadraki, uMeshaki noAbhednego bayimizekelo emihle yabantu abanokholo, abathobekileyo nabanyanisekileyo. La maHebhere mathathu ayenokholo kuYehova. Isazela sawo esiqeqeshwe ngeBhayibhile asizange siwavumele ukuba abandakanyeke kwizenzo zonqulo lobuxoki okanye ukuthanda isizwe. Ngokufanayo, namhlanje amaKristu akholose ngoThixo oyinyaniso ngokupheleleyo. Akhokelwa sisazela sawo esiqeqeshwe ngeBhayibhile yaye ngenxa yoko akabandakanyeki kwizenzo zonqulo lobuxoki okanye kwimisitho echaseneyo nemithetho kwanemilinganiselo kaThixo.

AmaHebhere amathathu athembekileyo ayekholose ngoYehova aza akavuma ukuba izinto ezazithenjiswa buBukhosi baseBhabhiloni obabufuna ukwamkeleka, iwonga okanye uzuko, zibenze bangamthobeli. Aba bafana babexolele ukubandezeleka nokufa kunokuba bonakalise ulwalamano lwabo noThixo. Ngokufanayo noMoses owayephila ngaphambi kwexesha labo, baqhubeka ‘beqinile ngokungathi bayambona Lowo ungabonakaliyo.’ (Hebhere 11:27) Enoba uYehova wayeza kubahlangula ekufeni okanye akunjalo, babezimisele ukuyigcina ingqibelelo yabo kunokuba balalanise ngenxa yokuba besoyika ukufa. Mhlawumbi umpostile uPawulos wayebhekisela kumzekelo wabo xa wayethetha ngabantu abathembekileyo ‘abaphelisa amandla omlilo.’ (Hebhere 11:34) Nanamhlanje, xa kuvavanywa ingqibelelo yabo, abakhonzi bakaYehova baba nokholo baze bathobeke ngendlela efanayo.

Kwakhona oko kwenzeka kuShadraki, uMeshaki, noAbhednego kusifundisa ukuba uThixo uyabavuza abo banyanisekileyo kuye. Umdumisi wavuma le ngoma: “UYehova . . . akayi kubashiya abanyanisekileyo bakhe.” (INdumiso 37:28) Namhlanje, asinakulindela ukuba uThixo asihlangule ngendlela engummangaliso, njengoko wenzayo kumaHebhere amathathu. Kodwa sinokuqiniseka ukuba nokuba sijamelene nabuphi ubunzima, uBawo wethu osemazulwini uya kusinceda. UThixo unokuyishenxisa ingxaki esijamelene nayo, unokusipha amandla okuyinyamezela, okanye asivuse ukuba siye sagcina ingqibelelo kwada kwasa ekufeni. (INdumiso 37:10, 11, 29; Yohane 5:28, 29) Sihlandlo ngasinye kuvavanywa ingqibelelo yethu siya koyisa xa sinokholo, sithobekile yaye sinyanisekile, naxa sikhetha ukuthobela uThixo kunabantu.

[Umbhalo osemazantsi]

[Ibhokisi/Umfanekiso okwiphepha 9]

UBUSAZI?

• AmaHebhere amathathu ayesondele kwiminyaka engamashumi amathathu xa kwakuvavanywa ingqibelelo yawo.

• Iziko lomlilo lalenziwe lashushu ngendlela egqithiseleyo.—Daniyeli 3:19.