Bakha Ngokumanyeneyo Ukuze Kuzukiswe UThixo

ABANTU abahlala kwiiSolomon Islands babebona iHolo yoBukumkani entsha yamaNgqina kaYehova. Elinye inenekazi lathi: “Ecaweni senza amatheko amaninzi okuzama ukunyusa ingxowa-mali yecawa. Sicela imali kumalungu ecawa, kodwa asikabi namali yaneleyo yokwakha icawa entsha nangoku. Nina maNgqina niyifumana phi imali?” INgqina elalithetha neli nenekazi lathi: “Sinqula uYehova njengentsapho esehlabathini lonke. Ibandla lethu kunye nabazalwana bethu abasehlabathini baye banikela ngezinto eziyimfuneko ukuze kwakhiwe le Holo yoBukumkani. UYehova usifundise ukuba zonke izinto sizenze ngokumanyeneyo.”

AmaNgqina kaYehova amanyene kuyo yonke into ayenzayo, nasekwakheni amawaka eeHolo zoBukumkani. Ukwenza imisebenzi efana nale ngokumanyeneyo akuqali namhlanje. Abantu bakaThixo bebekwenza oku ukutyhubela amawaka eminyaka. Kutheni sisitsho nje?

Ukwakha Umnquba Netempile

Kwiminyaka engama-3 500 eyadlulayo, ethetha ngamaSirayeli uYehova wathi kuMoses: “Bamele bandenzele ingcwele.” (Eksodus 25:8) Echaza indlela eyayiza kwakhiwa ngayo le ngcwele, uYehova wongezelela ngelithi: “Njengako konke endikubonisa kona okungumfanekiselo womnquba nomfanekiselo wempahla yawo yonke, yindlela leyo enowenza ngayo.” (Eksodus 25:9) Emva koko uYehova wayichaza ngokweenkcukacha iplani yale ngcwele, iimpahla zayo, nezinto zokuyihombisa. (Eksodus 25:10–27:19) Lo “mnquba,” okanye intente, wawuza kuba sisazulu sonqulo lokwenyaniso kuwo onke amaSirayeli.

Asazi ukuba bangaphi abantu ababesebenza kweso sakhiwo, kodwa kwamenywa onke amaSirayeli ukuba afak’ isandla. UMoses wathi kuwo: “Thabathani phakathi kwenu umnikelo kaYehova. Bonke abantliziyo zivumayo mabawuzise ube ngumnikelo kuYehova.” (Eksodus 35:4-9) Asabela njani amaSirayeli? KwiEksodus 36:3 sixelelwa oku: “Bawuthabatha ke phambi kukaMoses wonke umnikelo womsebenzi wenkonzo engcwele, ababewuzisile oonyana bakaSirayeli, yaye baqhubeka bona beyizisa iminikelo yokuzithandela imiso ngemiso.”

Ngokuqhwanyaza kweliso kwakusele kunikelwe ngezinto ezininzi, yaye abantu baqhubeka besizisa ezingakumbi. Ekugqibeleni abakhi bathi kuMoses: “Abantu bazisa okuninzi kakhulu kunoko kufunekayo enkonzweni yomsebenzi athe uYehova wayalela ukuba wenziwe.” Ngoko uMoses wathi ebantwini: “Madoda nani bafazi, musani ukuba senza mpahla engakumbi yomnikelo ongcwele.” Waba yintoni umphumo? “Yawanela ke impahla leyo wonke umsebenzi owawufanele ukwenziwa, yada yangaphezu kwaleyo ifunekayo.”—Eksodus 36:4-7.

Ngenxa yokuba amaSirayeli asivula isandla sawo, kwisithuba nje esingangonyaka, umnquba wawusele ugqityiwe ukwakhiwa. (Eksodus 19:1; 40:1, 2) Ngokuxhasa unqulo lokwenyaniso, abantu bakaThixo babezukisa uYehova. (IMizekeliso 3:9) Ekuhambeni kwexesha, babeza kujamelana nomsebenzi omkhulu wokwakha. Kwakhona, bonke abafunayo babeza kufak’ isandla kulo msebenzi, enoba banobuchule bokwakha okanye akunjalo.

Malunga neenkulungwane ezintlanu emva kokuba amaSirayeli akhe umnquba, aqalisa ukwakha itempile yaseYerusalem. (1 Kumkani 6:1) Esi yayiza kuba sesona sakhiwo sibalaseleyo, esasiza kuba nesiseko samatye namaplanga. (1 Kumkani 5:17, 18) “Ngempefumlelo” uYehova wanika uDavide iiplani zokwakha itempile eziyilwe ngobugcisa. (1 Kronike 28:11-19) Kodwa wanyula uSolomon unyana kaDavide ukuba akhokele kulo msebenzi. (1 Kronike 22:6-10) UDavide wawuxhasa ngentliziyo yakhe yonke lo msebenzi. Wafuna amatye, imiqadi, nezinye izinto waza wanikela ngezixa ezikhulu zegolide nesilivere awayenayo. Wakhuthaza namanye amaSirayeli ukuba asivule isandla sawo, ewabuza oku: “Ngubani okhoyo ozinikela ngokuzithandela ukuba azalise namhlanje isandla sakhe ngesipho sikaYehova?” Basabela njani abantu?—1 Kronike 29:1-5.

Wathi eqalisa ukwakha itempile uSolomon, kwabe sele kukho amawaka eetoni zegolide nesilivere. Lwaluluninzi ngokwenene ubhedu nentsimbi kangangokuba kwakungekho ndlela yokuzilinganisa. (1 Kronike 22:14-16) Ngenkxaso kaYehova nawo onke amaSirayeli, eso sakhiwo sagqitywa kwiminyaka esixhenxe enesiqingatha.—1 Kumkani 6:1, 37, 38.

“Indlu YoThixo Oyinyaniso”

Umnquba kunye netempile zazibizwa ngokuba ‘yindlu yoThixo oyinyaniso.’ (ABagwebi 18:31; 2 Kronike 24:7) UYehova akazange afune ukwenzelwa ndawo yokufihla intloko. (Isaya 66:1) Ezo zakhiwo wayezenzela ukuba kungenelwe abantu. Xa kwakunikezelwa itempile, uSolomon wabuza: “Ngaba ngokwenene uThixo uya kuhlala emhlabeni? Khangela! Amazulu, ewe, izulu lawo amazulu, alikulingene; kobeka phi, ke, kule ndlu ndiyakhileyo!”—1 Kumkani 8:27.

Esebenzisa umprofeti wakhe uIsaya, uYehova wathi: “Indlu yam iya kubizwa nangokuba yindlu yomthandazo yazo zonke izizwana.” (Isaiah 56:7) Amadini nemithandazo eyayisenziwa etempileni, kwanemibhiyozo eyayisenzelwa apho, yabangela ukuba abantu bakaThixo—amaYuda nabangengomaYuda—basondele kuThixo oyinyaniso. Baba ngabahlobo bakaYehova yaye wayebakhusela kuba babenqula endlwini yakhe. Le yinyaniso eyabalaseliswa nguSolomon kumthandazo wokunikezelwa kwetempile. Unokuwafunda loo mazwi akhe achukumisayo kweyoku-1 yooKumkani 8:22-53 neyesi-2 yeziKronike 6:12-42.

Loo ndlu yamandulo kaThixo oyinyaniso yatshatyalaliswa kudala, kodwa iLizwi likaThixo lithetha ngexesha laxa abantu bazo zonke iintlanga beya kumanyana ekunquleni uYehova kwitempile yokomoya engaphezulu lee kweyaseYerusalem. (Isaya 2:2) Babeza kusondela kuYehova ngedini eligqibeleleyo lokuphela koNyana ozelwe nguThixo, elalifanekiselwa ngamadini ezilwanyana awayenikelwa etempileni. (Yohane 14:6; Hebhere 7:27; 9:12) Ngoku amaNgqina kaYehova amnqula ngaloo ndlela ibalaseleyo uThixo, yaye anceda abantu abaninzi ukuba benjenjalo.

Umsebenzi Wokwakha Namhlanje

Ehlabathini lonke, amaNgqina kaYehova akhonza uThixo oyinyaniso. ‘Aluhlanga olunamandla’ nolwanda okomlilo wedobo. (Isaya 60:22) Eyona ndawo ahlanganisana kuyo yiHolo yoBukumkani.a Sele kukho amawaka ezi ndawo zokuhlanganisana, kodwa kusafuneka ezingakumbi.

AmaNgqina kaYehova ‘azinikela ngokuvumayo’ ekwakheni iiHolo zoBukumkani ezifunekayo. (INdumiso 110:3) Noko ke, amaNgqina asekuhlaleni adla ngokungabi nabugcisa bokwakha, yaye imimandla enolwando oluncumisayo ithwaxwa bubuhlwempu. Ngowe-1999 iQumrhu Elilawulayo lamaNgqina kaYehova lasungula inkqubo yokwakhiwa kweeHolo zoBukumkani ukuze koyiswe iingxaki ezifana nezi. Le nkqubo iye yabangela ukuba amaNgqina anobugcisa bokwakha aye kwimimandla ethe qelele ukuze aqeqeshe abazalwana noodade ukuba bakhe iiHolo zoBukumkani. Abo basebenzi baqeqeshiweyo baye baqhubeka besakha kuloo mimandla. Uye wayintoni umphumo walo mgudu ukhethekileyo?

NgoFebruwari 2006, amaNgqina kaYehova akumazwe angathabathi ntweni kangako aye aneeHolo zoBukumkani ezintsha ezingaphezu kwe-13 000. Khawuve la mazwi aye athethwa ngabanye abasebenzisa iiHolo zoBukumkani ezintsha.

“Ebandleni bekusiza abantu abamalunga ne-160. Kwiintlanganiso zokuqala ezaqhutyelwa kwiHolo yoBukumkani entsha, kwakuze abantu abangama-200. Ngoku, kwiinyanga ezintandathu kamva, bangama-230 abantu abeza kwiintlanganiso. Sinobungqina bokuba uYehova uyazisikelela ezi zakhiwo zindilisekileyo neziluncedo.”—Umveleli wesiphaluka e-Ecuador.

“Kangangeminyaka abantu bebesibuza oku, ‘Niya kuze nibe nayo nini iHolo yoBukumkani efana nezi sizibona kwiimpapasho zenu?’ Siyambulela uYehova ngenxa yokuba ekugqibeleni side sayifumana indawo efanelekileyo yokunqula. Iintlanganiso besidla ngokuziqhubela kwivenkile yomnye umzalwana, apho bekusiza abantu abamalunga nama-30. Kwintlanganiso yokuqala eyaqhutyelwa kwiHolo yoBukumkani entsha, kwakuze abantu abali-110.”—Ibandla eliseUganda.

“Abanye oodade ababini abangoovulindlela banikela ingxelo yokuba bayinandipha kakhulu intsimi ukususela oko kwabakho iHolo yoBukumkani. Kwindlu ngendlu abantu bayaphulaphula, ngokufanayo naxa kunikelwa ubungqina obungacwangciswanga. Sithetha nje aba dade baqhuba izifundo zeBhayibhile ezili-17, yaye abaninzi kwezi zifundo bayaya ezintlanganisweni.”—Iofisi yesebe ekwiiSolomon Islands.

“Omnye umfundisi ohlala kufutshane uthi le Holo yoBukumkani intsha isinyusile isidima sendawo yasekuhlaleni yaye abantu balapha bayaziqhenya ngayo. Abaninzi abadlula ngendlela bathetha ngobuhle bale holo. Oku kubangela ukuba abazalwana bafumane amathuba amahle okushumayela. Baninzi ngakumbi abantu abafuna ukwazi ngobuzalwana bethu obusehlabathini. Abaninzi ababengasalubeki ezintlanganisweni baye bathabatha apho babeyeke khona.”—Iofisi yesebe yaseMyanmar.

“Omnye udade wamema indoda eyayinomdla ukuba iye kwindawo ekwakusakhiwa kuyo ekufutshane. Kamva le ndoda yathi: ‘Ndandicinga ukuba andizukuvunyelwa ukuba ndingene. Ndamangaliswa kukuba amaNgqina andibulisa ngobubele. Amadoda nabafazi babezibhokoxa, bengadlali ngexesha. Kwakusetyenzwa ngemvisiswano nangomoya omhle.’ Le ndoda yasamkela isifundo seBhayibhile yaza yaqalisa ukuya ezintlanganisweni. Kamva yathi: ‘Indlela ebendicinga ngayo itshintshile. Ekubeni sele ndimfumene uThixo, andinakuze ndimshiye.’”—Iofisi yesebe yaseColombia.

Inkxaso Yethu Ibalulekile

Ukwakha iiHolo zoBukumkani yinxalenye ebalulekileyo yenkonzo yethu engcwele. Indlela amaNgqina kaYehova awuxhasa ngayo lo msebenzi wenziwa ehlabathini lonke—ngemali nangezinye iindlela—incomeka ngokwenene. Sekunjalo, asifanele silibale ukuba nezinye iinkalo zenkonzo engcwele zibalulekile. Ngamathub’ athile, amaKristu aba ngamaxhoba eentlekele zemvelo, yaye ngaloo maxesha kuye kufuneke uncedo lwethu. Ukushicilelwa kweempapasho zokufunda iBhayibhile kunendima enkulu ekuxhaseni inkonzo engcwele. Abaninzi kuthi baye bawabona amandla anawo amaphephancwadi okanye uncwadi olusekelwe eBhayibhileni olunikwa abantu abanotyekelo olufanelekileyo. Ukongezelela, kubaluleke kakhulu ukuxhasa abavangeli basemazweni kunye nabanye abakwinkonzo ekhethekileyo yexesha elizeleyo. La maKristu aye azincama anendima enkulu ekuhambiseleni phambili umsebenzi wokushumayela kule mihla yokugqibela.

Abo babefak’ isandla kumsebenzi wokwakha itempile baba nemihlali ngokwenene. (1 Kronike 29:9) Nanamhlanje, ukuxhasa unqulo lokwenyaniso ngeminikelo kuyasivuyisa. (IZenzo 20:35) Oko sikubona xa sifaka iminikelo ebhokisini yeNgxowa-mali YeeHolo ZoBukumkani naxa sinikela kumsebenzi owenziwa ehlabathini lonke, ngaloo ndlela sixhasa eminye imisebenzi enxulumene nokushumayela iindaba ezilungileyo zoBukumkani. Namhlanje, amaNgqina kaYehova amanyene kunqulo lokwenyaniso ngendlela emangalisayo. Ngamana sonke singazaliswa yimincili ebangelwa kukuxhasa olo nqulo!

[Umbhalo osemazantsi]

[Ibhokisi/Umfanekiso okwiphepha 20, 21]

IINDLELA ABANYE ABAKHETHA UKUNIKELA NGAZO

IMINIKELO EYA KUMSEBENZI OWENZIWA EHLABATHINI LONKE

Abaninzi babekela bucala imali ethile okanye baqingqe imali abaza kunikela ngayo kwibhokisi ebhalwe “Iminikelo Eya Kumsebenzi Owenziwa Ehlabathini—Mateyu 24:14.”

Nyanga nganye, amabandla athumela le mali kwiofisi yamaNgqina kaYehova enyamekela ilizwe lawo. Iminikelo yokuzithandela inokuthunyelwa ngokungqalileyo kwiWatch Tower Bible and Tract Society of South Africa, Attention: Accounting Office, Private Bag X2067, Krugersdorp, 1740, South Africa, okanye kwiofisi yesebe yamaNgqina kaYehova enyamekela ilizwe lakho. Iitsheki ezithunyelwa kule adresi ingasentla zimele zibhalwe “Watch Tower.” Kusenokunikelwa nangezinto ezenziwe ngamatye anqabileyo okanye ezinye izinto ezixabisekileyo. Le minikelo ifanele ihambe neleta emfutshane echazayo ukuba yiminikelo.

UKUNIKELA OKUCETYIWEYO

Ukongezelela kwiminikelo yemali enikelwa phantsi kweemeko ezithile, zikho nezinye iindlela zokunikela kwinkonzo yoBukumkani ehlabathini lonke. Ezi ziquka:

I-inshorensi: IWatch Tower inokubhaliswa njengemele ifumane imali kwi-inshorensi yobomi okanye kwilungiselelo lemali yomhlala-phantsi.

Imali Eselugcinweni NeeBond: Kunokunikelwa ngemali eselugcinweni neebond kwiWatch Tower njengesipho.

Izindlu Nemihlaba: Izindlu nemihlaba enokuthengiswa inokunikelwa njengesipho okanye, kwimeko yendawo yokuhlala, ngokuyigcina ikwilungelo lalowo wenze umnikelo, onokuqhubeka ehlala kuyo ngoxa esaphila. Qhagamshelana neofisi yesebe ekwilizwe lakho ngaphambi kokubhalisa izindlu nemihlaba.

Iminqophiso Yamafa: Izinto okanye imali inokushiyelwa iWatch Tower ngomnqophiso welifa osemthethweni.

Ukuze ufumane inkcazelo engakumbi, unokuqhagamshelana neAccounting Office, ngokuyitsalela umnxeba okanye uyibhalele kule adresi ibhalwe ngezantsi okanye kwiofisi yesebe lamaNgqina kaYehova enyamekela ilizwe lakho.

Accounting Office:

Watch Tower Bible and Tract Society of South Africa

Private Bag X2067

Krugersdorp 1740 South Africa

Inombolo yefowuni: (011) 761-1000

[Umfanekiso okwiphepha 18]

Imigudu esiyenza ngokumanyeneyo ibangela ukuba ehlabathini lonke kwakhiwe iiHolo zoBukumkani ezithi ndijonge

[Umfanekiso okwiphepha 18]

IHolo yoBukumkani entsha yaseGhana