Zigcineni Kuthando LukaThixo!
“Zintanda, . . . zigcineni kuthando lukaThixo, . . . nikhangele kubomi obungunaphakade.”—YUDE 20, 21.
1, 2. Umntu unokwenza njani ukuze ahlale eluthandweni lukaThixo?
UYEHOVA ulithanda gqitha ihlabathi kangangokuba wanikela ngoNyana wakhe ekuphela kwamzeleyo ukuze abo babonisa ukholo kuye bazuze ubomi obungunaphakade. (Yohane 3:16) Luyamangalisa ngokwenene olo thando! Ukuba ungumkhonzi kaYehova, umele ukuba uyakufuna nakanjani ukuxhamla olo thando ngonaphakade.
2 Umfundi uYude wayichaza indlela umntu anokuhlala ngayo kuthando lukaThixo. Wathi: “Ngokuzakha kolwenu ukholo olulolona lungcwele, nokuthandaza ninomoya oyingcwele, zigcineni kuthando lukaThixo, ngoxa nilindele inceba yeNkosi yethu uYesu Kristu nikhangele kubomi obungunaphakade.” (Yude 20, 21) Ukufunda iLizwi likaThixo nokushumayela iindaba ezilungileyo kukunceda uzakhele ‘kolona kholo lungcwele’—iimfundiso zobuKristu. Ukuze uhlale eluthandweni lukaThixo, umele uthandaze ‘unomoya oyingcwele,’ okanye uphenjelelwa nguwo. Ukuze uxhamle intsikelelo yobomi obungunaphakade, kufuneka ube nokholo kwidini lentlawulelo likaYesu Kristu.—1 Yohane 4:10.
3. Kutheni abanye bengasengawo amaNgqina kaYehova?
3 Abanye ababefudula benokholo khange bahlale kuthando lukaThixo. Ekubeni beye bakhetha ikhondo lesono, abasengawo amaNgqina kaYehova. Unokuyiphepha njani loo ntlekele? Ukucamngca ngezi ngongoma zilandelayo kungakunceda uphephe isono uze uhlale eluthandweni lukaThixo.
Bonisa Indlela Omthanda Ngayo UThixo
4. Kubaluleke kangakanani ukuthobela uThixo?
4 Mbonise uThixo ukuba uyamthanda ngokumthobela. (Mateyu 22:37) Umpostile uYohane wathi: “Ukumthanda uThixo kuko ukuthi, siyigcine imiyalelo yakhe; kwaye ayinzima imiyalelo yakhe.” (1 Yohane 5:3) Xa uthobela uThixo ungaba namandla okuxhathisa izilingo utsho ukwazi nokuvuya. Umdumisi wathi: “Unoyolo umntu ongahambanga ngecebo labangendawo, ongemanga endleleni yaboni, . . . kodwa oyoliswa ngumthetho kaYehova.”—INdumiso 1:1, 2.
5. Ukuthanda uYehova kuya kubangela wenze ntoni?
5 Ukuba uyamthanda uYehova uya kukuphepha ukwenza isono esinzulu esiya kwenza igama lakhe ligculelwe. UAgure wathandaza wathi: “Musa ukundinika ubuhlwempu okanye ubutyebi. Mandidle ukutya endikumiselweyo, ukuze ndingabi nakwanela ndize ndikukhanyele ndithi: ‘Ngubani na uYehova?’ nokuze ndingabi nakuhlwempuzeka ndize ndibe, ndilihlasele igama loThixo wam.” (IMizekeliso 30:1, 8, 9) Zimisele ‘ukungalihlasel’ igama likaThixo’ ngokubangela ukuba ligculelwe. Kunoko, zama ukwenza izinto eziza kuzukisa igama lakhe.—INdumiso 86:12.
6. Yintoni enokwenzeka ukuba wenza isono ngabom?
6 Hlala uthandaza kuYihlo wasezulwini ucele akuncede uxhathise izilingo. (Mateyu 6:13; Roma 12:12) Qhubeka uthobela isiluleko sakhe ukuze ingathinteleki imithandazo yakho. (1 Petros 3:7) Ukuba wenza isono ngabom, imiphumo inokuba buhlungu, kuba ngokungathi kunjalo uYehova uyithintela ngengqimba yamafu imithandazo yabantu abavukelayo ingafiki kuye. (IZililo 3:42-44) Thobeka, uze uthandazele ukuba ungenzi nantoni na eya kukuthintela ungakwazi ukuthandaza kuThixo.—2 Korinte 13:7.
Bonisa Ukuba Uyamthanda UNyana KaThixo
7, 8. Ukuthobela isiluleko sikaYesu kunokumnceda njani ubani agatye ikhondo lesono?
7 Bonisa ukuba uyamthanda uYesu Kristu ngokuthobela imithetho yakhe, oko kuya kukunceda ugatye ikhondo lesono. UYesu wathi: “Ukuba niyayigcina imiyalelo yam, niya kuhlala eluthandweni lwam, kanye njengoko nam ndiyigcinile imiyalelo kaBawo ndaza ndahlala eluthandweni lwakhe.” (Yohane 15:10) Ukuphila ngokuvisisana nala mazwi kaYesu kungakunceda njani uhlale eluthandweni lukaThixo?
8 Xa unikela ingqalelo kumazwi kaYesu ungahlala unemilinganiselo yokuziphatha efanelekileyo. Umthetho kaThixo kumaSirayeli wawusithi: “Uze ungakrexezi.” (Eksodus 20:14) Kodwa uYesu wachaza umgaqo osekelwe kuwo lo mthetho xa wathi: “Wonk’ ubani oqhubeka ekhangela umfazi ngokokude amkhanuke sele emkrexezile entliziyweni yakhe.” (Mateyu 5:27, 28) Umpostile uPetros wathi kwinkulungwane yokuqala abanye ‘babe namehlo azele lukrexezo, bewexula imiphefumlo engazinzanga.’ (2 Petros 2:14) Noko ke, ngokwahlukileyo kubo unokuziphepha izono ezinxibelelene nesondo ukuba uyabathanda yaye uyabathobela uThixo noKristu naxa uzimisele ukuhlala unolwalamano nabo.
Vumela Umoya KaYehova Ukukhokele
9. Yintoni enokwenzeka xa ubani eqhubeka nesono ngabom?
9 Thandazela umoya kaThixo, uze uwuvumele ukukhokele. (Luka 11:13; Galati 5:19-25) Xa ubunokuqhubeka usenza isono, uThixo ebenokuwususa umoya wakhe kuwe. Emva kokukrexeza noBhatshebha, uDavide wabongoza uThixo wathi: “Musa ukundilahla phambi kobuso bakho; nomoya wakho oyingcwele musa ukuwususa kum.” (INdumiso 51:11) Ngenxa yokungaguquki uKumkani uSawule, waphulukana nomoya kaThixo. USawule wona ngokwenza idini elitshiswayo nangokusindisa umhlambi weegusha, iibhokhwe neenkomo nokumkani wama-Amaleki. Emva koko uYehova wawususa umoya wakhe kuSawule.—1 Samuweli 13:1-14; 15:1-35; 16:14-23.
10. Kutheni umele uyigatye kwainto yokucinga ngesono?
10 Gatya kwaukucinga ngesono. Umpostile uPawulos wathi: “Ukuba siqhelisela isono ngabom emva kokufumana ulwazi oluchanileyo lwenyaniso, . . . akusekho mbingelelo wezono useleyo.” (Hebhere 10:26-31) Hayi indlela ebekuya kuba lusizi ngayo ukuba ungenza isono ude ufikelele kwelo nqanaba!
Bonisa Uthando Lokwenene Kwabanye
11, 12. Uthando nentlonelo zinokumthintela njani ubani angaziphathi kakubi ngokwesondo?
11 Ukuthanda abanye abantu kuya kukuthintela ekuziphatheni kakubi ngokwesondo. (Mateyu 22:39) Ukuthanda ummelwane kuya kukhusela intliziyo yakho ingakuhendi ukrexeze neqabane lomnye umntu. (IMizekeliso 4:23; Yeremiya 4:14; 17:9, 10) Yiba njengoYobhi, ongazange anikele ngqalelo kwelinye ibhinqa ngaphandle komfazi wakhe.—Yobhi 31:1.
12 Ukuhlonela ubungcwele bomtshato kunokukunceda uphephe ukwenza isono esinzulu. Injongo kaThixo yayikukuba umtshato obekekileyo nesondo zisetyenziselwe ukuvelisa ubomi. (Genesis 1:26-28) Khumbula ukuba amalungu esini enzelwe ukuvelisa ubomi, ibe ubomi bungcwele. Abahenyuzi nabakrexezi abamthobeli uThixo, bakwenza kungabi nasidima ukwabelana ngesondo, ababuhlonel’ ubungcwele bomtshato kwaye bona nxamnye nemizimba yabo. (1 Korinte 6:18) Ukuthanda uThixo nommelwane nokoyik’ uThixo kuya kunceda ubani aphephe ihambo enokukhokelela ekubeni asuswe kwibandla lamaKristu.
13. Umntu oziphethe kakubi ‘uzitshabalalisa njani izinto zexabiso’?
13 Simele silwe neengcamango zesono ukuze zingabi sentlungwini iintsapho zethu. IMizekeliso 29:3 ithi: “Oliqabane noonongogo utshabalalisa izinto zexabiso.” Umkrexezi ongaguqukiyo wonakalisa ulwalamano lwakhe noThixo nolwentsapho. Umfazi wakhe unelungelo lokuwuqhawula umtshato. (Mateyu 19:9) Enoba yindoda okanye ngumfazi owonileyo, ukuqhawulwa komtshato kungaba yintlungu gqitha kwiqabane elimsulwa, abantwana nabanye. Ngaba akuvumi ukuba ukwazi umonakalo obangelwa kukuziphatha okubi kumele kusenze sikuxhathise?
14. Ziziphi izifundo eziphathelele ububi ezinokufundwa kwiMizekeliso 6:30-35?
14 Ukwazi ukuba umonakalo wokukrexeza awunako ukulungiswa kufanele kusenze sisiphephe esi senzo sokuzingca. IMizekeliso 6:30-35 ibonisa ukuba ngoxa abantu benokuvelana nesela eliye leba kuba lilambile, kodwa bayamthiya umntu okrexezayo kuba unentsusa embi. “Wonakalisa umphefumlo wakhe [okanye ubomi bakhe].” KuMthetho kaMoses, wayenokubulawa. (Levitikus 20:10) Umntu okrexezayo uvisa abanye intlungu kuba nje efuna ukwanelisa umnqweno wakhe, kwaye umkrexezi ongaguqukiyo akanakuhlala eluthandweni lukaThixo kodwa uyagxothwa kwibandla lamaKristu.
Hlala Unesazela Esicocekileyo
15. Sinjani isazela ‘esitshiswe ngentsimbi’?
15 Ukuze sihlale kuthando lukaThixo, asimele siyeke isazela sethu siqaqadeke. Ngokuqinisekileyo, asimele siyamkele imilinganiselo ephantsi yehlabathi, kwaye kufuneka sibakhethe ngobulumko abantu esinxulumana nabo, izinto esizifundayo nesizonwabisa ngazo. UPawulos walumkisa wathi: “Kuya kubakho ixesha laxa abathile beya kuphambuka elukholweni, benikela ingqalelo kumazwi aphefumlelweyo alahlekisayo nakwiimfundiso zeedemon, ngohanahaniso lwabantu abathetha ubuxoki, abazazela zabo ziphawulwe ngokungathi kungentsimbi yokutshisela.” (1 Timoti 4:1, 2) Isazela ‘esitshiswe ngentsimbi’ sinjengenyama efileyo engeva buhlungu. Isazela esinjalo asikwazi ukusilumkisa siphephe abawexuki neemeko ezinokusenza silahle ukholo.
16. Kutheni sibalulekile nje isazela esicocekileyo?
16 Ukusindiswa kwethu kuxhomekeke ekuhlaleni kwethu sinesazela esicocekileyo. (1 Petros 3:21) Ekubeni sinokholo kwigazi likaYesu elaphalalayo, isazela sethu sicociwe kwimisebenzi efileyo, “ukuze sinikele inkonzo engcwele kuThixo ophilayo.” (Hebhere 9:13, 14) Ukuba sona ngabom, isazela sethu singangcola kwaye asinakuba ngabacocekileyo ukuze sikhonze uThixo. (Tito 1:15) UYehova unako ukusinceda sibe nesazela esicocekileyo.
Ezinye Iindlela Zokuphepha Ikhondo Elibi
17. Kuluncedo njani ‘ukulandela uYehova ngokupheleleyo’?
17 ‘Landela uYehova ngokupheleleyo,’ njengoKalebhi wakwaSirayeli mandulo. (Duteronomi 1:34-36) Yenza ukuthanda kwakhe, ungaze utye ‘kwitafile yeedemon.’ (1 Korinte 10:21) Luchase uwexuko. Yitya ukutya kokomoya kwitafile kaYehova kuphela, awuyi kulahlekiswa ngabafundisi bobuxoki okanye ngoomoya abakhohlakeleyo. (Efese 6:12; Yude 3, 4) Nikela ingqalelo kwizinto zokomoya, njengokufunda iBhayibhile, ukuya kwiintlanganiso nokushumayela. Ukuba ulandela uYehova ngokupheleleyo, uya konwaba nakanjani na uze ube nokuninzi kokwenza kumsebenzi weNkosi.—1 Korinte 15:58.
18. Ukoyika uYehova kuya kuyichaphazela njani indlela oziphethe ngayo?
18 Zimisele ‘ukunikela inkonzo engcwele kuThixo unoloyiko lobuthixo nentlonelo.’ (Hebhere 12:28) Ukoyika uYehova kuya kwenza uchase naliphi na ikhondo elibi. Kuya kukunceda uziphathe ngokuvisisana nesiluleko sikaPetros kwabanye abathanjiswa: “Ukuba nibiza kuBawo ogweba ngokungakhethi buso ngokomsebenzi wakhe ngamnye, ziphatheni ngoloyiko ebudeni bexesha lokuhlala kwenu njengabaphambukeli.”—1 Petros 1:17.
19. Kutheni umele wenze oko ukufunda kwiLizwi likaThixo?
19 Hlala usenza oko ukufunda kwiLizwi likaThixo. Oko kuya kukunceda uphephe izono ezinzulu kuba uya kuba phakathi kwabo “amandla abo okuqonda bawaqeqeshela ukwahlula okulungileyo nokubi.” (Hebhere 5:14) Kunokuba lipholopholo elingakwazi kuziphatha, yithi qwa ukuze uhambe njengesilumko, ‘uzongele ixesha’ kule mihla ingendawo. ‘Qhubeka ukuqonda into okuyiyo ukuthanda kukaYehova,’ uze uqhubeke ukwenza.—Efese 5:15-17; 2 Petros 3:17.
20. Kutheni sifanele siyiphephe inkanuko?
20 Kuphephe ngokupheleleyo ukunqwenela izinto zabanye abantu. Omnye kwiMithetho Elishumi uthi: “Uze ungayinqweneli indlu yedlelane lakho. Uze ungamnqweneli umfazi wedlelane lakho, nekhoboka lalo, nekhobokazana lalo, nenkunzi yalo yenkomo, ne-esile lalo, nantoni na eyeyedlelane lakho.” (Eksodus 20:17) Lo mthetho wawukhusela umzi kabani, umfazi, isicaka, isilwanyana nezinye izinto zakhe. Kodwa eyona nto ibalulekileyo ngamazwi kaYesu athi inkanuko iyamngcolisa umntu.—Marko 7:20-23.
21, 22. Angenza ntoni umKristu ukuze aphephe ukwenza isono?
21 Yenza konke okusemandleni ukuze iinkanuko ingakhokeleli kwisono. Umfundi uYakobi wathi: “Ngamnye ulingwa ngokutsalwa nokuwexulwa ngumnqweno wakhe. Wandule ke umnqweno, xa uthe wakhawula, uzale isono; isono, xa sithe safezwa, sivelisa ukufa.” (Yakobi 1:14, 15) Ngokomzekelo, ukuba umntu ukhe wanengxaki yotywala kwixa elidluleyo, usenokugqiba ekubeni bungabikho utywala kwakhe. Ukuze umKristu aphephe ukuziphatha kakubi, kusenokufuneka atshintshe indawo asebenza kuyo okanye umsebenzi.—IMizekeliso 6:23-28.
22 Sukucinga nokucinga ngokwenza isono. Ukubonisa umdla wothando okanye ukucinga ngokuziphatha kakubi kunokuphumela ekuziphatheni kakubi okanye ekukrexezeni. Ubuxoki obuncinane bunokumenza umntu axoke nakwizinto ezinkulu ekugqibeleni abe lixoki. Ukuba izinto ezincinane kunokusenza buthuntu isazela somntu ade ebe izinto ezinkulu ekugqibeleni. Kwanowexuko oluncinane lunokuphumela kuwexuko olupheleleyo.—IMizekeliso 11:9; ISityhilelo 21:8.
Kuthekani Ukuba Uye Wona?
23, 24. Yiyiphi intuthuzelo efumaneka kweye-2 yeziKronike 6:29, 30 neMizekeliso 28:13?
23 Bonke abantu abafezekanga. (INtshumayeli 7:20) Ukuba wenze isono esinzulu, ungathuthuzelwa ngumthandazo owenziwa nguKumkani uSolomon xa kwakunikezelwa itempile kuYehova. USolomon wathandaza kuThixo wathi: “Nawuphi na umthandazo, nasiphi na isicelo sobabalo esinokubakho kuye nawuphi na umntu kubo bonke abantu bakho amaSirayeli, ngenxa yokuba bayazi ngamnye isibetho sakhe nentlungu yakhe; baze bazolulele kule ndlu izandla zabo, kwanga ungeva usemazulwini, kwindawo ohlala kuyo, uze uxolele yaye unike ngamnye ngokweendlela zakhe zonke, ngenxa yokuba uyayazi intliziyo yakhe (kuba nguwe kuphela oyazi kakuhle intliziyo yoonyana boluntu).”—2 Kronike 6:29, 30.
24 Ewe, uThixo uyazi kakuhle intliziyo kwaye uyaxolela. IMizekeliso 28:13 ithi: “Okugubungelayo ukunxaxha kwakhe akayi kuphumelela, kodwa okuvumayo aze akushiye uya kwenzelwa inceba.” Xa uguquka, usivume uze usishiye isono sakho, uThixo ukwenzela inceba. Kodwa yintoni enokukunceda uhlale eluthandweni lukaThixo ukuba ubuthathaka ngokomoya?
Ngaba Unokuphendula?
• Sinokuzigcina njani eluthandweni lukaThixo?
• Ukuthanda uThixo noKristu kunokusinceda njani sigatye ikhondo lesono?
• Ukubathanda ngokunyanisekileyo abanye kunokusithintela njani ekuziphatheni kakubi kwesondo?
• Ziziphi ezinye indlela zokuphepha ukuziphatha okubi?
[Umfanekiso okwiphepha 21]
UYude usibonisa indlela yokuhlala eluthandweni lukaThixo
[Umfanekiso okwiphepha 23]
Ukuqhawulwa komtshato kunokubangela intlungu kwiqabane elimsulwa nasebantwaneni
[Umfanekiso okwiphepha 24]
NjengoKalebhi, ngaba uzimisele ‘ukulandela uYehova ngokupheleleyo’?
[Umfanekiso okwiphepha 25]
Cela uncedo ngokuhlala uthandaza ukuze uxhathise izilingo