ILizwi LikaYehova Liphilile
Iimbalasane Zencwadi YeNgoma yazo iiNgoma
“NJENGENYIBIBA phakathi kokhula olunameva, injalo intombazana eliqabane lam phakathi kweentombi.” “Njengom-apile phakathi kwemithi yehlathi, sinjalo isithandwa sam phakathi koonyana.” “Ngubani na eli bhinqa likhangele phantsi njengesifingo, lihle njengenyanga ehlangeneyo, lisulungeke njengelanga eliqaqambileyo?” (INgoma yazo iiNgoma 2:2, 3; 6:10) Hayi indlela atsho kamnandi ngayo amazwi ezi ndinyana zencwadi yeBhayibhile yeNgoma yazo iiNgoma! Yonke nje le ncwadi ingumbongo obalaseleyo omazwi amyoli yaye kuthiwa ‘uyeyona ngoma ibalaseleyo.’—INgoma yazo iiNgoma 1:1.
Yaqanjwa nguKumkani uSolomon wakwaSirayeli mandulo, malunga nowe-1020 B.C.E., ekuqaleni kolawulo lwakhe lweminyaka engama-40. Le ngoma libali lothando lomfana ongumalusi nentombazana yasemaphandleni, engumShulami. Abanye abakhankanywa kulo mbongo ngunina nabantakwayo le ntombazana, ‘iintombi zaseYerusalem [iintokazi zasebhotwe],’ ‘neentombi zaseZiyon [abafazi baseYerusalem].’ (INgoma yazo iiNgoma 1:5; 3:11) Kumfundi weBhayibhile kuba nzima ukuqonda zonke izithethi ezikule ncwadi, uye uzifumane xa unikel’ ingqalelo kumazwi azo okanye abhekiswa kuzo.
Njengenxalenye yeLizwi likaThixo, isigidimi sale ncwadi sibaluleke gqitha ngezinto ezimbini. (Hebhere 4:12) Okokuqala, sisifundisa ngeyona nto luyiyo uthando lokwenene lwendoda nomfazi. Okwesibini, le ngoma isibonisa uthando oluphakathi kukaYesu Kristu nebandla lamaKristu athanjisiweyo.—2 Korinte 11:2; Efese 5:25-31.
MUSANI UKUZAMA “UKULUVUSELELA UTHANDO LWAM”
“Kwanga angandanga ngomlomo wakhe, ngokuba izincokoliso zakho zothando zilunge ngakumbi kunewayini.” (INgoma yazo iiNgoma 1:2) Incoko ekule ncwadi ivulwa ngala mazwi entombazana ethobekileyo yasemaphandleni neziswe kwintente yasebukhosini kaSolomon. Ibekwe yintoni apho?
Ithi: “Oonyana bakamama baba nomsindo kum; bandimisela ukuba ngumgcini wezidiliya.” Abantakwayo bacatshukiswe kukuthandana kwayo nomfana ongumalusi waza wayimema ukuba babethwe ngumoya ngosuku olumyoli yimpepho yasentwasahlobo. Bezama ukuyithintela ingayi apho, bayithuma ukuba iye kulinda “iimpungutye ezincinane ezonakalisa izidiliya.” Ngulo msebenzi obangele ukuba ibe kufuphi nenkampu kaSolomon. Ubuhle bayo buyabonwa njengoko isihla isiya “emyezweni womthi weenqoba,” ize ke ithatyathwe ingeniswe apho enkampini.—INgoma yazo iiNgoma 1:6; 2:10-15; 6:11.
Njengoko ichaza indlela esikhumbula ngayo isithandwa sayo umalusi, iintokazi zasebhotwe ziyixelela ukuba ‘ihambe ngemikhondo yomhlambi’ iye kumkhangela ngokwayo umalusi lowo. Kodwa uSolomon akayikhululi ihambe. Echaza indlela awe ngayo bubuhle bayo, uyithembisa ‘ngeengcaca zegolide, nengqukuva yokuhombisa yesilivere.’ Noko ke, le ntombazana ayothuswa kwaphela zezo zinto. Kufika umalusi kwinkampu kaSolomon, aze athi kuyo: “Khangela! Umhle, ntombazana eliqabane lam. Khangela! Umhle.” Le ntombazana ifungisa iintokazi zasebhotwe ithi: “Ningazami ukuluvusa okanye ukuluvuselela uthando lwam lude luzivukele ngokwalo.”—INgoma yazo iiNgoma 1:8-11, 15; 2:7; 3:5.
Iimpendulo Kwimibuzo YeZibhalo:
1:2, 3—Kutheni ukukhumbula amazwi othando alo malusi kufana newayini negama lakhe linjengeoli? Kanye njengokuba iwayini isenza intliziyo yomntu ibe nemihlali nokuthululwa kweoli entloko kuhlaziya, iinkumbulo zothando lwalo mfana negama lakhe kwalomeleza kwaza kwayithuthuzela le ntombazana. (INdumiso 23:5; 104:15) AmaKristu okwenyaniso, ngakumbi lawo athanjisiweyo, ayomelezwa aze akhuthazeke xa ecinga ngothando oluboniswe nguYesu Kristu kuwo.
1:5—Kutheni le ntombazana ifanisa ibala layo elintsundu ‘neentente zakwaKedare’? Ziliqela izinto ezazisenziwa ngelaphu loboya bebhokhwe. (Numeri 31:20) Ngokomzekelo, ‘amalaphu oboya bebhokhwe’ ayesenziwa abe “yintente phezu komnquba.” (Eksodus 26:7) Njengokuba zisenjalo nanamhla iintente zama-Arabhu, iintente zakwaKedare zimele ukuba zazisenziwa ngoboya bebhokhwe.
1:15—Uthetha ukuthini umalusi xa esithi: “Amehlo akho ngawamahobe”? Eyona nto ayitshoyo kukuba amehlo esithandwa sakhe mahle, kanye njengawehobe.
2:7; 3:5—Kutheni iintombi zaseYerusalem zifungiswa “ngamabhadakazi okanye ngamaxhamakazi asendle” nje? Amabhadakazi namaxhamakazi aziwa ngomtsalane nobuhle bawo. Enyanisweni, umShulamikazi ufungisa ezi ntombi zaseYerusalem ngayo nantoni na enomtsalane nobuhle ukuze ziyeke ukuzama ukuvuselela uthando lwakhe.
Oko Sikufundayo:
1:2; 2:6. Kusenokungabikho nto iphosakeleyo ekubonakaliseni uthando ngendlela efanelekileyo kwabo bathandanayo. Kodwa, isibini esithandanayo simele siqonde ukuba zezi zimbonakaliso zothando lokwenene kungekhona ezokungcola ezinokukhokelela ekuziphatheni okubi kwesini.—Galati 5:19.
1:6; 2:10-15. Abantakwabo umShulamikazi bala ukuba udadewabo ahambe nesithandwa sakhe baye kwindawo engenamntu, babe bodwa ezintabeni hayi ngenxa yokuba wayeziphatha kakubi okanye eneenjongo ezimbi. Isizathu kukuba babemlumkisa ukuze angabi kwimeko embeka esilingweni. Isifundo kukuba abo bathandanayo bamele bakuphephe ukuzikhetha babe kwiindawo ezingenabantu.
2:1-3, 8, 9. Nakuba emanz’ andonga nje, lo mShulamikazi uzibona ‘eyisafroni [intyatyambo nje eqhelekileyo] yethafa eliselunxwemeni.’ Ngenxa yobuhle nokuthembeka kwale ntombazana kuYehova, umalusi uyibona “njengenyibiba phakathi kokhula olunameva.” Kunokuthiwani ngaye yena lo malusi? Ekubeni wayeyinzwana, kule ntokazi wayefana “nebhadi.” Umele ukuba wayezithanda nezinto zokomoya ezinikele kuYehova. Le nzwakazi ithi: “Njengom-apile [onomthunzi neziqhamo] phakathi kwemithi yehlathi, sinjalo isithandwa sam phakathi koonyana.” Kanene ukholo nokuzinikela kuThixo asizompawu zintle esimele sizijonge na kumntu esiza kutshata naye?
2:7; 3:5. Iphuma emaphandleni injalo le ntokazi ayizange iwe nakancinane nguSolomon. Yade yafungisa iintombi zaseYerusalem ukuba zingazami ukuvuselela uthando lwayo ngenjongo yokuba ithande omnye umntu ngaphandle kwalo malusi wayo. Ayenzeki yaye ayifanelekanga into yokuba umntu asuke atsaleleke kuye nabani na. UmKristu onqwenela ukutshata umele acinge ngokuthandana nomkhonzi kaYehova othembekileyo kuphela.—1 Korinte 7:39.
“NIBONA NTONI NA KUMSHULAMI?”
Kukho “le nto inyuka isuka entlango njengemiqulu yomsi.” (INgoma yazo iiNgoma 3:6) Yintoni abafika bayibone abafazi baseYerusalem njengoko besiya kukroba phandle? Nanko uSolomon nabalindi bakhe bebuyela esixekweni! Ibe ukumkani uza naye lo mShulamikazi.
Umalusi uye wayilandela le ntokazi waza ngokukhawuleza wafumana ithuba lokubonana nayo. Njengoko eyiqinisekisa ngothando, ichaza umnqweno wayo wokushiya eso sixeko, ithi: “Ide iphole imini anabe amathunzi, ndiya kuhamba ndiye entabeni yemore nakwinduli yentlaka yokuqhumisa.” Icela umalusi ukuba ‘angene emyezweni wakhe adle ezona ziqhamo zibalaseleyo zawo.’ Ephendula umalusi uthi: “Ndifikile emyezweni wam, dade wethu, mtshakazi wam.” Abafazi baseYerusalem bathi kubo: ‘Yidlani, maqabane! Selani nize ninxile zizincokoliso zothando!’—INgoma yazo iiNgoma 4:6, 16; 5:1.
Emva kokubalisela iintokazi zasebhotwe iphupha lakhe, umShulamikazi uthi kuzo: “Ndiyafa luthando.” Nazo ziyambuza: “Sahluke njani isithandwa sakho kunesinye isithandwa?” Uphendula athi: “Isithandwa sam siyabengezela yaye sibubomvurha, sisesona sibalaseleyo kwishumi lamawaka.” (INgoma yazo iiNgoma 5:2-10) Xa uSolomon eyibonga eyityibela le nzwakazi iphendula ithi: “Nibona ntoni na kumShulami?” (INgoma yazo iiNgoma 6:4-13) Ecinga ukuba elo lithuba lakhe lokuyeyisela, ukumkani uthi chatha ukuyityibela oku. Noko ke, le ntombazana ayigungqi nakancinane kwindlela emthanda ngayo umalusi wayo. Ekugqibeleni uSolomon ufa namthanyana ayikhulule igoduke.
Iimpendulo Kwimibuzo YeZibhalo:
4:1; 6:5—Kutheni iinwele zale ntombazana zifaniswa ‘nomhlambi weebhokhwe’? Oku kubonisa ukuba iinwele zayo zazimenyezela yaye zinde okoboya beebhokhwe ezimnyama.
4:11—Yintoni le ibalaseleyo ‘ngemilebe yomShulami evuza ubusi obusenqatheni’ ‘nangobusi nobisi oluphantsi kolwimi lwakhe’? Ubusi obusesenqatheni, ikhaphela lobusi bobona bunencasa yaye buswiti ngakumbi kunobusi ekudala bubhudlwa ngumoya. Le ntelekiso, kwanento yokuba ubusi nobisi zazingaphantsi kolwimi lwale ntokazi, kubethelela ubuhle nokuba mnandi kwamazwi ayo.
5:12—Athetha ukuthini amazwi athi “amehlo aso anjengamahobe ngakumjelo wamanzi, ezihlamba elubisini”? Le ntwazana ithetha ngamehlo amahle esithandwa sayo. Mhlawumbi yenza umbongo ifanisa isangqa seliso esingqongwe yile ndawo imhlophe namahobe angwevu-buzuba ehlamba elubisini.
5:14, 15—Kutheni zichazwa ngolu hlobo nje izandla nemilenze yomalusi? Kuyacaca ukuba le ntombazana ifanisa iminwe yomalusi nemiqulu yegolide iinzipho zakhe nekrizolite. Ngenxa yobuhle nokomelela kwayo, imilenze iyifanisa ‘neentsika zemabhile.’
6:4—Ngaba esi ‘siXeko Sithandekayo’ yiYerusalem? Akunjalo. ‘IsiXeko Esithandekayo yiTirtsa.’ Esi sixeko samaKanan sathinjwa nguYoshuwa ibe emva kokulawula kukaSolomon yaba sesokuqala ukuba likomkhulu lobukumkani bakwaSirayeli basemntla bezizwe ezilishumi. (Yoshuwa 12:7, 24; 1 Kumkani 16:5, 6, 8, 15) Enye incwadi ithi: “Kuyabonakala ukuba esi sixeko sasigqwesile ngobuhle, nto leyo ebonisa isizathu sokukhankanywa kwaso apha.”
6:13—Yintoni ‘umngqungqo wamaqela amabini’? Eli binzana linokuchazwa ngokuthi “umngqungqo waseMahanayim.” Isixeko esasibizwa njalo sasikwimpuma yoMlambo iYordan kufuphi nentlango yeYabhoki. (Genesis 32:2, 22; 2 Samuweli 2:29) ‘Umngqungqo wamaqela amabini’ unokubhekisela kuhlobo oluthile lomdaniso owawukweso sixeko xa kubhiyozwa.
7:4—Kutheni uSolomon efanisa intamo yomShulami ‘nenqaba yophondo lwendlovu’? Ngaphambili, le ntombazana iye yanconywa kwathiwa: “Intamo yakho injengenqaba kaDavide.” (INgoma yazo iiNgoma 4:4) Inqaba yinto ende nengcokochileyo, ngoxa uphondo lwendlovu lugudile. USolomon uthabatheke bubuncinane nokuguda kwentamo yale ntwazana.
Oko Sikufundayo:
4:1-7. Nakuba engafezekanga, ngokuxhathisa ukulukuhlwa kwakhe nguSolomon, umShulami wazingqina ukuba uyakwazi ukuziphatha. Ngoko, ukuziphatha kwakhe kwabutsho banomtsalane ngakumbi ubuhle bakhe. Amele abe njalo namanye amabhinqa angamaKristu.
4:12. Njengomyezo omhle obiyelwe ngodonga ongenandawo yakungena ngaphandle kwasesangweni, umShulami wabonisa uthando lwakhe kulowo wayeza kutshata naye kuphela. Ngumzekelo omhle gqitha lo kumabhinqa namadoda angamaKristu angekatshati!
“IDANGATYE LIKAYA”
Bakumbona esiza ekhaya abantakwabo bathi: “Ngubani na eli bhinqa linyuka livela entlango, lisayama kwisithandwa salo?” Ngaphambilana omnye kubo wathi: “Ukuba uya kuba ludonga, siya kwakhela phezu kwakhe uqoqo lwesilivere; kodwa ukuba uya kuba lucango, siya kumthintela ngeplanga lomsedare.” Ekubeni ngoku ezingqine enyanisekile kuthando lwakhe loo mShulami, uthi: “Ndiludonga mna, namabele am anjengeenqaba. Emehlweni akhe ndibe njengalowo ufumene uxolo.”—INgoma yazo iiNgoma 8:5, 9, 10.
Uthando lokwenene ‘lidangatye likaYa.’ Kutheni kusitshiwo nje? Kungenxa yokuba umthombo wolo thando nguYehova. Nguye osifake uthando olunjalo. Uthando lidangatye elimalangatye angenakucinywa. INgoma yazo iiNgoma ibonisa kakuhle ukuba uthando lwendoda nomfazi ‘lunokuba namandla angapheliyo njengokufa.’—INgoma yazo iiNgoma 8:6.
Le ngoma isemagqabini kaSolomon isithela thsuphe nangothando lukaYesu Kristu namalungu ‘omtshakazi wakhe’ wasezulwini. (ISityhilelo 21:2, 9) Indlela awathanda ngayo uYesu amaKristu athanjisiweyo yodlula naluphi na uthando lwendoda nomfazi. Amalungu olu didi lomtshakazi akagungqi ekuzinikeleni kwawo. Ngenxa yothando uYesu wanikela ngobomi bakhe efela “nezinye izimvu.” (Yohane 10:16) Ngoko, bonke abanquli bokwenyaniso, banokuxelisa umzekelo womShulamikazi wothando olungagungqiyo nokuzinikela.
[Umfanekiso okwiphepha 18, 19]
INgoma yazo iiNgoma isifundisa ukuba sijonge ntoni kumntu esiza kutshata naye?