Ngaba Uyakhumbula?

Ngaba uye wakuvuyela ukufunda iiMboniselo zakutshanje? Ukuba kunjalo, khawubone ukuba unokuyiphendula kusini na le mibuzo ilandelayo:

• Yintoni enokukunceda xa isalamane sakho sishiya uYehova?

Zakhe wena namanye amalungu entsapho athembekileyo. Hlala uxakekile zizinto zokomoya. Nceda abanye. Ungaze ulilahl’ ithemba lokuba eso salamane sakho siya kuze sibuye. Musa ukuzigxeka. Lihlonele ilungiselelo likaThixo loqeqesho, yaye zityand’ igila kubahlobo bakho.—9/1, iphepha 18-21.

• Ziziphi iindlela ezimbini iZibhalo ezisinceda ngazo ukubona ‘imihla yokugqibela’?

IBhayibhile yaxela kwangaphambili iziganeko ezaziya kwenzeka ebudeni ‘bokupheliswa kwenkqubo yezinto.’ (Mateyu 24:3, 7, 8; Luka 21:11) Iphinda ichaze ukutshintsha kwezimo zengqondo nezenzo zabantu abaphila ‘kwimihla yokugqibela.’ (2 Timoti 3:1-5) Okuphawulekayo kukuba, iindaba ezilungileyo zobukumkani zaziza kushunyayelwa ngeli xesha.—9/15, iphepha 4-6.

• Ibandla linayiphi imbopheleleko xa umKristu obeqhuba imoto eye wagaxeleka engozini kwaza kwakho abafayo?

Emva kokuba benze uphando abadala basenokufumanisa ukuba umqhubi akanatyala lagazi kuba bekungekho nto ingako anokuyenza ukuthintela loo ngozi. Kodwa ukuba ufunyaniswe enetyala ibe lowo unetyala uyaguquka, uya kufumana isiluleko esifanelekileyo seZibhalo ibe akayi kuwafanelekela amalungelo athile ebandleni.—9/15, iphepha 30.

• Kutheni ubomi obungunaphakade bungaxhomekekanga kubuchule benzululwazi?

Izazinzulu ziye zenza imigudu yokwandisa iminyaka ephilwa ngabantu, njengokuzama ukongezelela umkhamo ezizihlaziya ngawo iiseli okanye ukusebenzisa unyango olubizwa ngokuba yitherapeutic cloning, ukulungiselela ukuba abantu abagulayo bakwazi ukufumana amalungu omzimba amatsha naza kwamkelwa ngumzimba. Kodwa iBhayibhile ibonisa ukuba abantu banokufumana ubomi obungunaphakade kuphela ngelungiselelo lentlawulelo kaYesu.—10/1, iphepha 3-5.

• Ngaba isiko lamaYuda lokuhlamba umzimba kamva laba lubhaptizo lwamaKristu?

Akunjalo. AmaYuda ayezihlambulula ngokwawo, ukanti kwakungenjalo ngobhaptizo lukaYohane. KuMthetho kaMoses ubani wayezihlambulula ngokuphindaphindiweyo, kodwa ubhaptizo lwamaKristu lwenziwa kube kanye.—10/15, iphepha 12-13.

• Siyintoni iSikolo Sokuqeqesha Abalungiseleli?

Sisikolo seeveki ezisibhozo, esenzelwe abadala bebandla nezicaka zolungiselelo abangatshatanga nabanokukwazi ukuya apho kukho imfuneko yabavakalisi khona. Basenokuthunyelwa kumabandla abavela kuwo, kwenye indawo okanye kwelinye ilizwe.—11/15, iphepha 10-11.

• Yintoni okanye ngubani umchasi-Kristu okhankanywe kweyoku-1 kaYohane 2:18; 4:3?

Ibinzana elithi “umchasi-Kristu” libhekisela kubo bonke abo bamchasayo okanye abo baxokayo besithi banguKristu okanye bangabameli bakhe. Amazwi kaYesu nakaYohane abonisa ukuba umchasi-Kristu liqela elinabachasi-Kristu abaninzi abasasaza iimfundiso zonqulo ezibubuxoki nabachasa uBukumkani bukaThixo.—12/1, iphepha 4-6.