Ukunyaniseka—Ngaba Sikulindele Kwabanye Ngoxa Thina Singanyanisekanga?
INTOMBAZANA eneminyaka eli-16 ubudala yathi: “Ndibuthiyile ubuxoki, nokuxokiswa.” Inkoliso yethu injalo. Sithanda ukuba into esiyixelelwayo enokuba—kungomlomo okanye ibhaliwe, ibe yinyaniso. Ngaba thina sibaxelela inyaniso abanye?
Kuhlolisiso olwenziwa eJamani, inkoliso yabantu yathi: “Akukho nto imbi ngokuxoka kwizinto ezincinane ukuze uzikhusele okanye ukhusele abanye, kufanelekile nokuze wamkeleke kwabanye.” Enye intatheli yathi: “Yinto entle ukuthetha inyaniso lonk’ ixesha, kodwa kuyakruqula.”
Ngaba inokwenzeka into yokuba sithande ukuba abanye abantu bathethe inyaniso kodwa sibe thina sivakalelwa kukuba sinesizathu zokungayithethi maxa wambi? Ngaba ibalulekile into yokuthetha inyaniso nokungayithethi? Iba yintoni imiphumo yokungatheth’ inyaniso?
Ingozi Yokungathethi Inyaniso
Khawuqwalasele ingozi enokubangelwa kukungathethi inyaniso. Ubuxoki bubangela ukungathembani phakathi kwamaqabane omtshato okanye kwamalungu entsapho. Intlebendwane inokulonakalisa igama elihle ebenalo umntu. Xa abaqeshwa benganyaniseka oko kubangela ukunyuka kwamaxabiso okuvelisa izinto, atsho anyuke ke namaxabiso okuthenga ezo zinto. Ukukhohlisa kwirhafu kwenza urhulumente aphulukane nemali yokuhambisa iinkonzo zikawonke wonke. Ubuqhophololo obuthethwa ngabaphandi buphulukanisa abantu nemisebenzi buze bonakalise udumo lwamaziko ahlonelwayo. Amaphulo okutyeba ngondlel’ amnyama ngesiquphe aphuca abatyali-zimali abaqhatheka lula imali abazigcinele yona okanye imiphumo ibe mibi ngaphezu koko. Akumangalisi ukuba iBhayibhile isithi phakathi kwezinto azicekisayo uYehova uThixo “lulwimi oluxokayo” ‘nengqina elixokayo elifutha ubuxoki’!—IMizekeliso 6:16-19.
Ubuxoki bunokonakalisa amagama abantu nelebutho liphela. Bambalwa abanokuyikhanyela loo nto. Kutheni ke, kukho abantu bethetha ubuxoki ngabom? Ngaba yonk’ into engeyonyanisi bubuxoki? Le mibuzo neminye siza kuxubusha ngayo kwinqaku elilandelayo.
[Umfanekiso okwiphepha 3]
Ubuxoki benza amaqabane atshatileyo angathembani