Kutheni Simele Sithethe Inyaniso?

XA WAYENEMINYAKA eli-18 ubudala, uManfred wayeqeqeshelwa ukusebenza eofisini.a Inkampani awayeyisebenzela yalungiselela ukuba yena nabanye baqeqeshwe ekholejini iintsuku ezimbini ngeveki. Ngenye imini iklasi yachithakala ngaphambi kwexesha eliqhelekileyo. Ngokwemithetho yaloo nkampani, babefanele babuyele enkomeni. Kunokuba babuyele emsebenzini, bonke baya eziyolweni, kwabuyela uManfred kuphela enkomeni. Kwenzeka nje ukuba umphathi wenkampani owayephethe eli qela eze kudlula emsebenzini ngaloo mini. Xa wabona uManfred, wambuza: “Kutheni ungayanga esikolweni nje namhlanje? Khona baphi abanye?” Wayeza kuphendula athini uManfred?

UManfred wema nematha. Ngaba wayefanele athethe inyaniso, okanye athethe amaqhinga ukuze abakhusele? Ukuthetha inyaniso kwakuza kufaka abanye enkathazweni kwaye wayengazukuthandwa. Ngaba kufanelekile ukuthetha ubuxoki phantsi kweemeko ezinjalo? Wawuza kuyisingatha njani le meko? Siza kuphinda sibuyele kulo mba kaManfred, kodwa makhe sibone ukuba yintoni ebandakanyekileyo xa kufuneka sikhethe phakathi kokuthetha inyaniso okanye ubuxoki.

Inyaniso Nobuxoki—Iintshaba Ezindala

Ekuqaleni kwembali yabantu, yonke into yayisekelwe kwinyaniso. Kwakungekho kujijwa kwezibakala, ukuqhatha okanye ukukhohlisa. UYehova, uMdali, ‘nguThixo wenyaniso.’ Ilizwi lakhe liyinyaniso; akanakuxoka, kwaye akabufuni ubuxoki namaxoki.—INdumiso 31:5; Yohane 17:17; Tito 1:2.

Ukuba kwakunjalo ke, bavela phi ubuxoki? UYesu Kristu wawuphendula phandle lo mbuzo xa waxelela iinkokeli zonqulo ezazisukuzana naye, zifuna ukumbulala wathi: “Nina niphuma kuyihlo uMtyholi, yaye nithanda ukwenza ngokweminqweno kayihlo. Yena wayesisibulala-mntu kwasekuqaleni, yaye akemi enyanisweni, kuba inyaniso ayikho kuye. Xa ethetha ubuxoki, uthetha ngokotyekelo lwakhe, kuba ulixoki noyise wabo ubuxoki.” (Yohane 8:44) Apha, uYesu wayebhekisa kwisiganeko esenzeka e-Eden xa uSathana wahenda isibini sokuqala ukuba singamthobeli uThixo saza sazuza isono nokufa.—Genesis 3:1-5; Roma 5:12.

Amazwi kaYesu amchaza ngokucacileyo uSathana ukuba “ulixoki noyise wabo ubuxoki,” nguye umsunguli wabo. USathana usaqhubeka ekhuthaza ubuxoki, eneneni “ulahlekisa umhlaba omiweyo uphela.” Ubekek’ ityala ngomonakalo obangelwe bubuxoki obuye basasazeka phakathi kwabantu.—ISityhilelo 12:9.

Ukusukuzana kwenyaniso nobuxoki, okwaqalwa nguSathana uMtyholi, kusaqhubeka nanamhl’ oku. Kutyhutyha lonke ibutho labantu ibe kuchaphazela umntu ngamnye. Yindlela umntu aphila ngayo egqibayo ukuba umi kwiliphi na icala. Abo bakwicala likaThixo baphila ngokuvisisana nenyaniso ekwiLizwi likaThixo, iBhayibhile. Nabani na ongaphili ngenyaniso, enoba uyazi okanye akazi, ukwicala likaSathana kuba “ihlabathi liphela lisemandleni ongendawo.”—1 Yohane 5:19; Mateyu 7:13, 14.

Kutheni Abantu Bekuthanda Nje Ukuxoka?

Isibakala sokuba “ihlabathi liphela” lisemandleni kaSathana sisinika isizathu sokuba abantu abaninzi bekuthanda ukuxoka. Sisenokuzibuza oku, ‘Kwakutheni ukuze uSathana, ‘uyise wobuxoki,’ axoke?’ USathana wayesazi ukuba uYehova unelungelo lokuba nguMongami wayo yonke indalo, kuquka isibini sokuqala esingabantu. Kodwa uSathana wasinqwenela esi sikhundla siphakamileyo nesikhethekileyo, nto leyo awayengenalungelo layo. Eqhutywa kukunyoluka nokuzingca, waqulunqa iyelenqe lokurhwaphiliza isikhundla sikaYehova. Ukuze, aphumeze oku wabhenela kubuxoki nenkohliso.—1 Timoti 3:6.

Kuthekani namhlanje? Ngaba awuvumi ukuba ukunyoluka nokuzingca zizinto ezenza abantu abaninzi baxoke nanamhlanje? Oosomashishini ababawayo, abezopolitiko abanamaqhinga nonqulo lobuxoki bonke bankone ngamaqhinga, bubuxoki ukurhwaphiliza nokuhanahanisa. Kutheni? Asikokunyoluka namabhongo okudla ngokuqhuba abantu ukuze bafune ubutyebi, igunya okanye isikhundla abangenalungelo laso? Umlawuli osisilumko, uKumkani uSolomon wakwaSirayeli, walumkisa wathi: “Ongxamela ukuzuza ubutyebi akayi kuhlala emsulwa.” (IMizekeliso 28:20) Umpostile uPawulos wathi: “Ukuthanda imali yingcambu yazo zonke iintlobo zobubi.” (1 Timoti 6:10) Kunjalo nangomnqweno wokufuna igunya okanye isikhundla.

Omnye unobangela wokuxoka kukoyika—ukoyika imiphumo okanye into eya kucingwa ngabanye. Yinto yokwemvelo ukufuna ukuthandwa okanye ukwamkeleka kwabanye. Noko ke, lo mnqweno, unokubenza bangayithethi inyaniso, enokuba obo buxoki buncinane, ukuze bafihle iintsilelo, amasolotya angathandekiyo okanye bazenze bahle. USolomon wathi: “Ukungcangcazela ngumntu kubeka umgibe, kodwa okholosa ngoYehova uya kukhuselwa.”—IMizekeliso 29:25.

Ukunyaniseka KuThixo Wenyaniso

Wathini uManfred xa wayebuzwa ngumphathi wakhe? Wathetha inyaniso. Wathi: “Utitshala uye wasindulula kamsinya namhlanje, ngoko ndiye ndabuyela emsebenzini. Abanye andinakubaphendulela, mhlawumbi ungazivela kubo.”

UManfred, wayenokusuka aphek’ iqhinga aze ke athandwe ngoogxa bakhe. Kodwa wayenezizathu ezivakalayo zokuthetha inyaniso. UManfred uliNgqina likaYehova. Ukunyaniseka kwakhe kwamenza wanesazela esicocekileyo. Loo nto yenza wathenjwa nangumqeshi wakhe. Ngoxa wayesaqeqeshwa, uManfred wanikwa umsebenzi kwisebe lezacholo, apho babengafane bavunyelwe ukusebenza khona abantu abaqeqeshwayo. Kwiminyaka eli-15 kamva xa uManfred wanyuselwayo kulo nkampani, la mphathi wakhe wamtsalela umnxeba evuyisana naye waza wamkhumbuza ngeso siganeko sokunyaniseka.

Ekubeni uYehova enguThixo wenyaniso, nabani na onqwenela ukuba nolwalamano naye umele ‘akulahle ukuxoka’ aze ‘athethe inyaniso.’ Umkhonzi kaThixo umele ayithande inyaniso. Indoda esisilumko yabhala yathi: “Ingqina elithembekileyo aliyi kuxoka.” Kodwa yintoni ubuxoki?—Efese 4:25; IMizekeliso 14:5.

Buyintoni Ubuxoki?

Bonke ubuxoki abuyonyaniso, kodwa asiyiyo yonke into engeyonyaniso ebubuxoki. Ngoba? Isichazi-magama sichaza ubuxoki ngokuthi “kukuthetha into oyaziyo okanye oyikholelwayo ukuba asiyonyaniso ngenjongo yokukhohlisa.” Ewe ubuxoki buquka ukuqhatha omnye umntu ngabom. Ngenxa yoko ukuthetha into engeyonyaniso ngempazamo—njengokunika omnye umntu ingcombolo okanye amanani angachananga ngempazamo—akufani nokuthetha ubuxoki.

Ukongezelela koko, kufuneka siqiniseke ukuba loo mntu ufuna inkcazelo unegunya lokuyifumana kusini na. Masithi mhlawumbi uManfred wayebuzwe lo mbuzo mnye ngumphathi wenye inkampani. Ngaba uManfred wayeza kunyanzeleka ukuba amchazele yonke into? Kwakungeyomfuneko. Ekubeni wayeza kube engenalungelo lakwazi loo ngcombolo kwakungayi kunyanzeleka ukuba amchazele. Kodwa, nakule imeko kwakuya kuphosakala ukuthetha ubuxoki.

Nguwuphi umzekelo owamiselwa nguYesu Kristu kule nkalo? Ngesinye isihlandlo, uYesu wayencokola nabantu ababengengabo abafundi bakhe ababenomdla wokwazi ngohambo lwakhe. Bambongoza bathi: “Mka apha uye kwelakwaYuda.” Yathini impendulo kaYesu? “Nyukani niye emthendelekweni [eYerusalem]; mna andikazi kunyuka ndiye kulo mthendeleko, ngenxa yokuba ixesha lam elililo alikafiki ngokupheleleyo.” Ngemva koko, uYesu, waya emthendelekweni eYerusalem. Kwakutheni ukuze abaphendule ngaloo ndlela? Babengenalo ilungelo lokwazi iinkcukacha ngohambo lwakhe. Ngoxa engazange athethe ubuxoki uYesu, wabanika impendulo ebafaneleyo ukuze bangamenzakalisi okanye benzakalise abafundi bakhe. Obu yayingebobuxoki kuba umpostile uPetros wabhala wathi ngoKristu: “Akazange enze sono, kungazange kufunyanwe nankohliso emlonyeni wakhe.”—Yohane 7:1-13; 1 Petros 2:22.

Kuthekani ngaye yena uPetros? Kubusuku bokubanjwa kukaYesu, ngaba uPetros akazange axoke amkhanyele izihlandlo ezithathu? Ewe kunjalo, uPetros wabanjwa kukoyika abantu waze waxoka. Kodwa ngoko nangoko, “walila ngokukrakra” waze waguquka, kwaye isono sakhe saxolelwa. Ngaphezu, wafunda kwimpazamo yakhe. Emva kweentsuku ezithile, wathetha esidlangalaleni ngoYesu waze wala ukuyeka ukuthetha ngaye xa wayesongelwa ngamaYuda asemagunyeni eYerusalem. Ngokuqinisekileyo ukunikezela kukaPetros umzuzwana waza wabuyela ezingqondweni kwangoko, kufanele kusikhuthaze sonke, xa siye sanikezela ngenxa yobuthathaka saza sathetha into okanye senza impazamo.—Mateyu 26:69-75; IZenzo 4:18-20; 5:27-32; Yakobi 3:2.

Inyaniso Iya Kuhlala Ikho Ngonaphakade

IMizekeliso 12:19 ithi: “Ngumlebe wenyaniso oya kumiselwa ngokuqinileyo ngonaphakade, kodwa ulwimi lobuxoki luya kuba lolwephanyazo.” Ewe inyaniso ayiphelelwa ihlala ikho. Nolwalamano lwabantu luyazinza luze lwanelise xa bezimisele ukuthetha inyaniso baze baphile ngokuvisisana nayo. Ewe, inyaniso inomvuzo okhawulezayo. Lo mvuzo uquka isazela esicocekileyo, igama elihle nolwalamano oluhle emtshatweni, entsatsheni phakathi kwabahlobo nakushishino.

Kwelinye icala, ubuxoki abunakumelana nezanzwili zexesha. Umntu oxokayo usenokuphumelela okomzuzwana, kodwa ubuxoki abunakuma ixesha elide. Ukoleka koko, uYehova, uThixo wenyaniso, ulibekile ixesha lokuphelelwa kobuxoki nabo babukhuthazayo. IBhayibhile ithembisa ukuba uYehova uza kuyisiphula neengcambu impembelelo kaSathana uMtyholi, uyise wamaxoki, olahlekisa elimiweyo liphela. UYehova uza kubutshabalalisa bonke ubuxoki namaxoki.—ISityhilelo 21:8.

Kuya kutsho athi qabu unoqolomba xa “inyaniso” imi ngonaphakade!

[Umbhalo osemazantsi]

[Amagama acatshulweyo akwiphepha 5]

Ukunyoluka nokuzingca zizinto ezenza abaninzi baxoke

[Amagama acatshulweyo akwiphepha 6]

Bonke ubuxoki abuyonyaniso, kodwa asiyiyo yonke into engeyonyaniso ebubuxoki

[Umfanekiso okwiphepha 6]

Yintoni esiyifundayo ekukhanyeleni kukaPetros uKristu?

[Umfanekiso okwiphepha 7]

Ukuthetha inyaniso kwenza ulwalamano luzinze luze lwanelise