Ibali Lobomi

UYehova Wasisindisa Ngexesha Lolawulo Loozwilakhe

Kubalisa uHenryk Dornik

NDAZALWA ngowe-1926 ngabazali ababengamaKatolika azinikeleyo. Babehlala eRuda Slaska, idolophu enemigodi kufuphi naseKatowice, kumazantsi ePoland. Mna nomkhuluwa wam uBernard, oodadewethu ababini abancinane, uRóża noEdyta, safundiswa ukuba sithandaze, siye ecaweni sigcine nesithethe sokuxolelwa izono.

Intsapho Yakowethu Ifumana Inyaniso YeBhayibhile

Ngenye imini ngoJanuwari 1937, xa ndandineminyaka elishumi ubudala, uTata wafika ekhaya echwayite ngokwenene. Wafika ephethe incwadi enkulu awayeyifumene kumaNgqina kaYehova. Wathi: “Bantwana bam, jongani ukuba ndize nantoni—iZibhalo Ezingcwele!” Ndandiqala ngqa ukubona iBhayibhile.

ICawa yamaKatolika yayigqugqisile ngempembelelo yayo kubantu baseRuda Slaska nakwimimandla ekufuphi nalapho. Abefundisi babengabahlobo abakhulu babanini-migodi yaye babenyanzela abo babesebenza emigodini neentsapho zabo ukuba babathobele. Xa umntu osebenza emgodini engayanga eMthendelekweni okanye engafuni ukuya kuvuma izono, wayegqalwa njengomhedeni ofanele kukugxothwa emgodini. NoTata watyityinjiselwa umnwe ngenxa yokunxulumana namaNgqina kaYehova. Noko ke, xa umfundisi efika ekhaya, uTata wabhenca ukuhanahanisa konqulo lwakhe phambi komntu wonke. Loo mfundisi wemka esisishwayimbana ziintloni yaye akazange aphinde afune nto imdibanisa noTata, ngenxa yoko akazange agxothwe.

Ukuphulaphula loo ngxoxo kaTata nomfundisi kwandenza ndanomdla ngakumbi wokwazi iBhayibhile. Ndamthanda ngakumbi uYehova, yaye ndaba nolwalamano olusondeleyo naye. Kwiinyanga ezimbalwa emva kwengxoxo kaTata nomfundisi, saya kwiSikhumbuzo Sokufa kukaKristu, yaye uTata waziswa kwabanye abantu abangama-30 ngala mazwi, “Lo ngumYonadabhi.” Ndakhawuleza ndafumanisa ukuba “amaYonadabhi” ngamaKristu anethemba lokuphila emhlabeni yaye inani lawo liya kuqhubeka lisanda.a—2 Kumkani 10:15-17.

“Mfana Wam, Uyazi Ukuba Luthetha Ntoni Ubhaptizo?”

Emva kokuba eyivile inyaniso, uTata wayeka ukusela waza wasiphatha kakuhle. Sekunjalo, uMama akazange azamkele iimbono zakhe zonqulo, yaye wayedla ngokuthi ukhetha ukuba aphile ngalaa ndlela yakhe yangaphambili, ahlale engumKatolika. Noko ke, emva kokuqhambuka kweMfazwe Yehlabathi II, waphawula ukuba abefundisi ababethandazela ukuba iPoland yoyise amaJamani, ngoku babethandaza bebulela kuba uHitler ephumelele! Kamva, ngowe-1941, uMama waba ngumnquli kaYehova njengathi sonke.

Ngaphambi koko, ndandixelele abadala bebandla ukuba ndifuna ukufuzisela uzahlulelo lwam kuThixo ngokubhaptizwa emanzini, kodwa babevakalelwa kukuba ndisemncinane kakhulu. Bathi mandilinde. Noko ke, ngoDisemba 10, 1940, uKonrad Grabowy (umzalwana owafela kwiinkampu zoxinaniso ethembekile) wadlan’ iindlebe nam kwesinye isakhiwo sokuhlala esincinane. Wandibuza imibuzo emihlanu, waza emva kokuba anelisekile ziimpendulo zam, wandibhaptiza. Omnye waloo mibuzo wawusithi, “Mfana wam, uyazi ukuba luthetha ntoni ubhaptizo?” Omnye wawusithi, “Uyazi ukuba njengokuba kusiliwa ngoku, kuza kufuneka ukhethe phakathi kokuthembeka kuHitler okanye kuYehova, yaye isigqibo osenzayo singakwenza uphulukane nobomi bakho?” Ndaphendula ngoko nangoko ndathi, “Ndiyakuqonda oko.”

Kuqalisa Intshutshiso

Kwakutheni ukuze uKonrad Grabowy abuze imibuzo engqale ngolo hlobo? Imikhosi yaseJamani yangena ePoland ngowe-1939, yaye emva koko ukholo lwethu nengqibelelo yethu zavavanywa ngamandla. Imeko yaya isiba maxongo ngakumbi, sisiva ukuba abazalwana noodadewethu abangamaKristu bayabanjwa, abanye bayagxothwa kweli, abanye bavalelwa ezintolongweni okanye bathunyelwe kwiinkampu zoxinaniso. Loo ntshutshiso yayiza kufika nakuthi kungekudala.

AmaNazi ayefuna abantwana abaselula—kuquka thina sobane—babe ngabalandeli boLawulo lukaHitler. Ekubeni uTata noMama bala ngokuphindaphindiweyo ukubhalisa amagama abo kwiVolkslist (uludwe lwabantu ababeneempepha zokuba ngabemi baseJamani okanye ababezifuna), bahluthwa ilungelo elisemthethweni lokukhulisa thina bantwana. UTata wathunyelwa kwinkampu yoxinaniso yaseAuschwitz. NgoFebruwari 1944, mna nomkhuluwa wam sasiwa kwiziko lokuqeqesha abantwana abaziinjubaqa eGrodków (eGrottkau), kufuphi naseNysa, yaye oodadewethu bathunyelwa kwikhaya loonongendi bamaKatolika eCzarnowąsy (eKlosterbrück), kufuphi naseOpole. Ngokwenza oku, abasemagunyeni babefuna sahlukane “neembono ezikhohlisayo zabazali bethu” ngabula bona. UMama wasala yedwa ekhaya.

Kwiziko lokuguqula izimilo, kwakuphakanyiswa indwe yeswastika ntsasa nganye yaye sasiyalelwa ukuba siphakamise izandla zethu zasekunene size sikhahlele sithi “Heil Hitler.” Yayiluvavanyo lokholo oluqatha olu, kodwa asizange sivume ukulalanisa sinoBernard. Ngoko sabethwa kanobom ngenxa yokungabi “nasimilo.” Savavanywa nangezinye iindlela kodwa batsho phantsi, ngoko amajoni eSS asisongela athi: “Ukuba anivumi ukutyikitya uxwebhu oluchazayo ukuba nixhasa uRhulumente waseJamani nize ningene kwiWehrmacht [umkhosi waseJamani], niya kuthunyelwa kwinkampu yoxinaniso.”

NgoAgasti 1944, xa abaphathi bagunyazisa ukuba sithunyelwe kwinkampu yoxinaniso bathi: “Kunzima ukuphembelela aba bafana ukuba benze nantoni na. Bayakuvuyela ukungcungcuthekiswa ngenxa yokholo lwabo. Oku kuvukela kwabo kuyingozi kubo bonke abakweli ziko.” Nangona ndandingenamdla wokungcungcuthekiswa ngale ndlela, ukubonakalisa inkalipho nesidima ngoxa ndingcungcuthekiswa kuba ndifuna ukunyaniseka kuYehova, kwandivuyisa kakhulu. (IZenzo 5:41) Ndandingenakuba nawo mna amandla okunyamezela iimbandezelo endandiza kujamelana nazo. Kwelinye icala, imithandazo esuk’ entliziyweni yandisondeza ngakumbi kuYehova, yaye wandinceda kakhulu.—Hebhere 13:6.

Kwinkampu Yoxinaniso

Kungabanga thuba lide ndasiwa kwinkampu yoxinaniso yaseGross-Rosen eSilesia. Ndanikwa inombolo yebanjwa nepurple triangle, eyayibonisa ukuba ndiliNgqina likaYehova. Amajoni eSS athi ukuba ndiyathanda ndinokukhululwa enkampini ndibe lijoni lomkhosi wamaNazi. “Kodwa umele wahlukane neengcamango zaBafundi BeBhayibhile, ezichaseneyo noLawulo lukaHitler.” Amanye amabanjwa ayengalunikwa ukhetho olunjalo. NgamaNgqina kaYehova kuphela ayenikwa ithuba lokuphuma enkampini. Sekunjalo, mna nabanye abangamawaka, salikhaba ngaw’ omane elo “lungelo.” Ndathi ndakungavumi, amajoni athi: “Jonga laa tshimini yeziko ekutshiswa abantu kulo. Cingisisa ngeli thuba ulinikwayo kungenjalo uya kuphelela kwelaa ziko.” Ndala ndabhebhetha kwakhona, yaye ngelo xesha kanye ndaziva ‘ndinoxolo lukaThixo olungaphaya kokuqonda.’—Filipi 4:6, 7.

Ndathandazela ukuba ndidibane nabanye abazalwana apho enkampini yaye uYehova wawuphendula umthandazo wam. Phakathi kwaloo maKristu ndadibana nawo kwakukho nomzalwana othembekileyo ogama linguGustaw Baumert, owandiphatha ngobubele nothando. Ngokuqinisekileyo, uYehova waba ‘nguBawo onenceba noThixo wentuthuzelo yonke’ kum ngelo xesha.—2 Korinte 1:3.

Emva kweenyanga ezimbalwa, imikhosi yaseRashiya yayalela amaNazi ukuba akhuphe wonk’ umntu enkampini ngokukhawuleza. Njengoko sasilungiselela ukuhamba, sabek’ ubomi bethu esichengeni ngokuya kuhlola oodadewethu ababemalunga nama-20, kwicala lenkampu elalihlala amabhinqa, phakathi kwabo kwakukho uElsa Abt noGertrud Ott.b Bathi bakusibona beza bebaleka kuthi yaye emva kokuba siye sakhuthazana, bacula ingoma yoBukumkani enamazwi athi: “Othembekileyo, enyanisekile, akawunikeli eloyikweni umphefumlo wakhe.”c Sasintywizisa sonke!

Ukuya Kwinkampu Elandelayo

AmaNazi asihlohla kumakhareji kaloliwe okuthutha amalahle, efaka thina mabanjwa ali-100 ukusa kwali-150 kwikhareji ngalinye, singenakutya, singenamanzi yaye elo yayilixesha leqabaka kusina nemvula ebandayo. Sasigqitywa lunxano nefiva. Lancipha inani labantu emakharejini njengoko amabanjwa agulayo naphelelwe ngamandla ayesifa. Ndadumba imilenze namanye amalungu omzimba, kangangokuba ndandingakwazi nokuma. Emva kweentsuku ezilishumi, ibathwana lamabanjwa asindileyo lafika kwinkampu yamabanjwa yaseNordhausen ebizwa ngokuba yiMittelbau-Dora, kufuphi neWeimar, eThuringia. Okumangalisayo kukuba akukho namnye umzalwana owafayo kolo hambo lubuhlungu.

Ndisandul’ ukuchacha emva kolo hambo, abantu baba nesisu segazi kuloo nkampu yaye nabanye abazalwana bagula, nam ndandiphakathi kwelo qela. Sayalelwa ukuba sikhe sithi xha ekutyeni isuphu, sitye itoast kuphela. Ndayeka ukutya isuphu ndaza ndachacha ngokukhawuleza. NgoMatshi 1945, seva ukuba iSibhalo somxholo waloo nyaka nguMateyu 28:19, othi: “Hambani ke ngoko niye kubenza abafundi abantu beentlanga zonke.” Saqonda ukuba siza kukhululwa kungekudala kwezo nkampu size siqhubeke nokushumayela iindaba ezilungileyo! Sakuvuyela oko yaye satsho saba nethemba, kuba sasisele sicinga ukuba ekupheleni kweMfazwe Yehlabathi II, kuza kuqalisa iArmagedon. Hayi indlela awasomeleza ngayo uYehova kuloo maxesha amanzithinzithi!

Ukukhululwa Ezinkampini

NgoAprili 1, 1945, imikhosi yaMazwe Amanyeneyo yaphosa iziqhushumbisi kwindlu yomkhosi wamajoni eSS nakwinkampu yethu eyayikufuphi nalapho. Abantu abaninzi bafa yaye abanye bangxwelerheka. Ngosuku olulandelayo, kwaphoswa uthotho lweebhombu yaye kungelo xesha ke ekwathi emva kokuqhushumba kwebhombu enamandla ndazibona sele ndibhabha emoyeni.

Ndancedwa ngumzalwana ogama linguFritz Ulrich. Wandivumbulula phantsi kwaloo ngqushu, enethemba lokuba ndisaphila. Ekugqibeleni wandifumana waza wanditsala phantsi kwaloo ngqushu yezinto ezaphukileyo. Ndathi ndakubuyela ezingqondweni, ndafumanisa ukuba ndenzakele kakhulu ebusweni nasemzimbeni yaye iindlebe zam zazivaleke ngci. Ingxolo yokudubula kwaloo bhombu yonakalisa iindlebe zam. Ndakhathazwa ziindlebe kangangeminyaka emininzi ngaphambi kokuba ziphile.

Kuloo mawakawaka amabanjwa, ambalwa kakhulu awasindayo kuloo mvula yeebhombu. Bakho nabanye babazalwana bethu abafayo, noGustaw Baumert endimthandayo wayekwelo qela. Ndasala ndinamanxeba awabangela ukuba ndibe nentsholongwane ethile nefiva. Noko ke, kungekudala safunyanwa yimikhosi yaMazwe Amanyeneyo yaza yasikhulula. Kwangaxeshanye, izidumbu ezonakeleyo zamabanjwa zabangela ukuba kubekho isifo seentwala yaye nam ndosulelwa. Ndasiwa nabagulayo esibhedlele. Nangona oogqirha bazama ngandlela zonke ukusinceda, saba bathathu kuphela abasindayo. Hayi indlela endambulela ngayo uYehova ngokundomeleza ukuze ndihlale ndithembekile kuloo maxesha amanzithinzithi! Ndimbulela kakhulu uYehova kuba wabona kufanelekile ukuba andisindise ‘kwithunzi elimnyama’ lokufa.—INdumiso 23:4.

Ekugqibeleni Ndagoduka!

Emva kokunikezela kwemikhosi yaseJamani, ndaba nethemba lokuba ndiza kugoduka ngokukhawuleza kangangoko kunokwenzeka, kodwa akuzange kube lula njengoko ndandilindele. Ndabonwa ngabanye ababefudula bengamabanjwa, ababekwangamalungu oMbutho wamaKatolika. Bakhwaza bathi, “Masimbulale!” bandiwisa baza bandixangxatha ngeenyawo. Kwathi gqi enye indoda yaza yandihlangula kuloo nkohlakalo yabo, kodwa andizange ndichache ngokukhawuleza kuba umzimba wam wawuzele amanxeba yaye ndandibuthathaka ngenxa yesifo seentwala. Noko ke, ekugqibeleni ndagoduka. Hayi indlela endavuya ngayo kukuphinda ndibe kunye nentsapho yakowethu! Yavuya gqitha kukundibona kuba yayicinga ukuba ndafa.

Ngoko nangoko saphinda saqalisa umsebenzi wokushumayela yaye abantu abaninzi ababenxanelwe inyaniso bayamkela. Ndanikwa imbopheleleko yokuthumela uncwadi lweBhayibhile emabandleni. Mna nabanye abazalwana saba nelungelo lokuya kudibana nabazalwana abavela kwiofisi yesebe yaseJamani eWeimar, yaye safumana iinkupho zokuqala ngqa zeMboniselo ezashicilelwa emva kwemfazwe, sabuyela nazo ePoland. Zaguqulelwa ngoko nangoko, kwenziwa istensile, emva koko zashicilelwa. Xa umsebenzi wasePoland waqalisa ukwalathiswa kwiofisi yethu yaseLodz, amabandla akwazi ukufumana iincwadi ngokuthe rhoqo. Ndaqalisa ukukhonza njengovulindlela okhethekileyo okanye umshumayeli wexesha elizeleyo, ndisebenza intsimi enkulu yaseSilesia, enxalenye enkulu yayo yayiphantsi kwePoland ngelo xesha.

Noko ke, kungekudala amaNgqina kaYehova aphinda atshutshiswa phantsi kolawulo lwamaKomanisi olwalusandul’ ukumiselwa ePoland. Ngenxa yokungathabathi cala njengomKristu, ngowe-1948 ndagwetywa iminyaka emibini entolongweni. Ngoxa ndandilapho, ndanceda amabanjwa amaninzi ukuba asondele kuThixo. Omnye wawo wayamkela inyaniso, wazahlulela kuYehova waza wabhaptizwa.

Ngowe-1952, ndaphinda ndavalelwa, ndityholwa ngokuba yimpimpi yeUnited States! Ngoxa ndandilinde ukuthethwa kwetyala lam, ndavalelwa ndedwa yaye ndandincinwa imini nobusuku. Noko ke, kwakhona uYehova wandihlangula kwabo babenditshutshisa yaye kwiminyaka elandelayo andizange ndiphinde nditshutshiswe ngale ndlela.

Into Eyandincedayo Ndakwazi Ukunyamezela

Xa ndicinga ngezo mvavanyo nobunzima endajamelana nabo ngaloo minyaka, ndikhumbula izinto ezithile ezandikhuthazayo. Okokuqala, ndafumana amandla okunyamezela kuYehova nakwiLizwi lakhe iBhayibhile. Ukuthandaza ‘kuThixo wentuthuzelo yonke’ nokufundisisa iLizwi lakhe rhoqo kwasinceda ukuba sihlale siphilile ngokomoya. Enye into eyasiqinisayo ngokomoya kukufunda iiMboniselo ezibhalwe ngesandla. Xa ndandikwiinkampu zoxinaniso, ndomelezwa kakhulu ngamanye amakholwa anenyameko awayekulungele nawayekuvuyela ukusinceda.

UYehova wandisikelela nangenkosikazi uMaria. Satshata ngo-Oktobha 1950 yaye kamva safumana umntwana oyintombazana, uHalina owathi ekukhuleni kwakhe wamthanda uYehova waza waba ngumkhonzi wakhe. Emva kokugula ixesha elide, uMaria wafa sineminyaka engama-35 sitshatile. Oko kwandishiya ndinesingqukru nentlungu engathethekiyo. Nangona okwethutyana ndaziva ngathi ‘ndiphoswe phantsi, andizange nditshatyalaliswe.’ (2 Korinte 4:9) Ngelo xesha lobunzima, ndaxhaswa yintombi yam endiyithandayo nomyeni wayo nabantwana bayo—abazukulwana bam—bonke abakhonza uYehova ngokuthembeka.

Ukususela ngowe-1990, bendikhonza kwiofisi yesebe yasePoland. Ukunxulumana nentsapho yaseBheteli ethandekayo yonke imihla, yintsikelelo engathethekiyo. Ngenxa yokuwohloka kwempilo, andisakwazi ukuphumeza okuninzi. Sekunjalo, ndikhangele kwikamva ngentembelo yaye ‘ndimvumela ingoma uYehova, kuba uqhubene nam ngokunomvuzo’ ukuza kuthi ga ngoku. (INdumiso 13:6) Ndikhangele phambili xa uYehova, uMncedi wam eya kuphelisa wonke umonakalo obangelwe lulawulo lukaSathana olucinezelayo.

[Imibhalo esemazantsi]

[Umfanekiso okwiphepha 10]

Ndanikwa le nombolo ne-“purple triangle” kwinkampu yoxinaniso

[Umfanekiso okwiphepha 12]

Ndikunye nenkosikazi yam uMaria, ngowe-1980