Ndandisoloko Ndifumana Okuthile Endandinokukwenzela UYehova

Ngokubaliswa nguJean Queyroi

KWAKUSEMVA phayaa ngehlobo elaliqaqambile lowe-1939. Ummandla wasemaphandleni ongqonge iMartigny, okwingingqi yaseValais iSwitzerland, wawubengezela phantsi kwelanga lika-Agasti. Phezu kwethu kwakumi ezinye zeentaba ezinde ezinezona ncopho ziphakamileyo kwiiAlps, njengentaba esoloko inekhephu iGrand Combin, encopho yayo ifikelela kwiimitha ezingama-4 314. Kangangeentsuku ezimbalwa ndandithe gcobho ndinandipha ububele endandibenzelwa yintsapho engamaKristu, yaye sasichitha iiyure ezininzi esasingenzi nto ngazo sinyuka sisehla kwiindledlana zezo ntaba. Ndandivakalelwa kukuba ndandisele ndiseParadisi.

Kungekudala kwafika ixesha lokuba ndibashiye ndize ndibuyele eParis. Ndathenga iphephandaba ukuze ndilifunde kuloliwe, ibe iindaba ezazikulo zandothusa ndatsho ndabuyela ezingqondweni. Imeko yehlabathi yayimandundu ngeyona ndlela ingathethekiyo, ibe imfazwe yayisemnyango.

Ndabuyela emsebenzini wam kwiofisi yeWatch Tower Society eParis, apho ndandikhonza khona ithuba elingaphezu konyaka. Kodwa kwiintsuku ezimbalwa kamva, ndafumana isaziso esasindibizela emkhosini ibe ndayalelwa ukuba ndiye kuzazisa kwikampu yamajoni yaseFort Vincennes, eyayikwimpuma yeParis. Kwakungasasele thuba lingakanani ukuba kwenzeke inguqulelo ephawulekayo kubomi bam.

Ubundilele

NgoSeptemba 3, 1939, iFransi neBritani zathi zafuna undikho kwiJamani. Ndazazisa eVincennes ndaza ndayimela imbambano yobundilele bobuKristu. Ngokukhawuleza ndazifumanisa ndikwinqwelana encanyatheliswe ecaleni kwesithuthuthu sasemkhosini esasiqhutywa lijoni eliselula elaliyalelwe ukuba lindise kwiNqaba yaseCharenton eyayikufutshane. Phezu kwako nje ukugquma kwesithuthuthu okwakuzenza zivaleke iindlebe, eli joni liselula elalisazi isizathu sokuba ndithunyelwe apho, lazama ukundiqiqisa. Landibongoza lisithi: “Queyroi, nceda musa ukuzimisela kule nto. Musa ukwala ukulwa, okanye izinto aziyi kukuhambela kakuhle.” Ndakhawuleza ndaliqinisekisa ukuba ndandingenadyudyu.

Sandula ke safika isihlandlo sam sokuqala sokuba ndilale kwisisele sentolongo. Esi sisele sasilingana neemitha ezimbini eziphindaphindwe ngeemitha ezisisi-1,5 ibe sasineengubo ezimbalwa kuphela neplanga ekwakulalwa phezu kwalo. Kwakungekho kukhanya. Ndandicinga ngento endandinokumenzela yona uYehova kwimeko endandikuyo. Xa ndavukayo, ndafumanisa ukuba kwakungekho kwanefestile le engangenqindi eyayinokungenisa ilitha lokukhanya kwemini. Kangangemizuzu elishumi elinesihlanu suku ngalunye, ndandivunyelwa ukuba ndiphume ndiye kuhlamba, ndiphelekwa ngusajini owayephatha ivolovolo ukuya esinkini, ekhatshwa ngamajoni amabini awayephatha imibhaxa. Ndandiphethwe njengesaphuli-mthetho esiyingozi!

Ukutya ndandikuziselwa ngamajoni awahlukahlukeneyo. Achukunyiswa kukuma kwam, yaye oku kwandinika ithuba lokuba ndenzele uYehova okuthile. Ndanikela kuwo ubungqina obuhle, ibe kungekudala amanye awo andithanda aza andinika imicinga yomlilo, amakhandlela kwanokutya okongezelelekileyo. Okokuqala iBhayibhile yam yayithatyathiwe, kodwa ngenxa yelinye igosa, yabuyiselwa kum. Hayi indlela endandikuvuyela ngayo ukufunda amazwi ayo axabisekileyo ngokukhanya kwekhandlela!

Kamva ndathi ndatshintshelwa kwintolongo yasemkhosini engasekhoyo ngoku, i-rue du Cherche-Midi, eParis. Ndandivalelwe ndodwa, ngoko ndandinethuba elininzi lokucamngca ngemeko endandikuyo.

Ndandineminyaka engama-27 ubudala yaye ndandikhonze uYehova ixesha elizeleyo kangangeminyaka emibini. Ukunxibelelana kwentsapho yakowethu okokuqala namaNgqina kaYehova kwenzeka ngosasazo lweRadio Vitus, isikhululo esifihlakeleyo saseParis. Kwakungowe-1933. Ndayimela inyaniso ngowe-1935 emva kokugqiba inkonzo yesinyanzelo emkhosini. Ndabhaptizwa eLucerne, eSwitzerland, ngoAgasti 1936.

Mna, abazali bam, umntakwethu nodade wethu sasinxulumana nebandla ekwakukuphela kwalo elaliseParis. UMzalwana Knecht, ngoko owayesongamela umsebenzi waseFransi, wathi gqolo ekhuthaza amaNgqina aselula ukuba angenele ubulungiseleli bexesha elizeleyo. Umphumo waba kukuba, ngoAprili 1938, mna, umntakwethu nodade wethu sagqiba ekubeni sibe ngoovulindlela, okanye abalungiseleli bexesha elizeleyo. Isabelo sethu sasiseAuxerre, idolophu emalunga neekhilomitha ezili-154 kumzantsi-mpuma weParis. Udade wethu uJeannette wayenikela ubungqina edolophini phakathi, ibe mna nomntakwethu uMarcel sasinyawuza iibhayisikili zethu ukuya kwiidolophana ezingqonge ummandla omalunga neekhilomitha ezingama-30. Ngelo thuba umsebenzi wokushumayela ngokuyintloko wawubandakanya ukusasazwa koncwadi lweBhayibhile, ngaphandle kokwenziwa kwamabuyelo. Ndikhumbula indlela okwakundikhathaza ngayo oko.

NgoJuni 1938 ndamenyelwa ukuya kusebenza kwiofisi yaseParis yeWatch Tower Society. Ngelo xesha abasebenzi, okanye intsapho yaseBheteli, eFransi yayinamalungu amalunga neshumi, ibe ndanikwa isabelo sokusebenza kwiSebe Lokuthunyelwa Koncwadi. Kwakulapho ndandisebenza khona xa ndabizelwa kwinkonzo yasemkhosini ndaza ndafumana “isabelo esitsha.”

Isabelo Sam Esitsha—Entolongweni

Zisuka nje ndaqonda ukuba ukuba ndandingacingi ngeendlela zokwenza okuthile—nokuba ke kokuncinane—ndisenzela uYehova ngoxa ndandingaphaya kwezitshixo, ukholo lwam lwaluza kuthi ngokukhawuleza lufe. Kodwa kungekudala ndakwazi ukwenza amathuba okuthetha ngenyaniso yeLizwi likaThixo. Kwiiveki ezimbalwa emva kokuba ndifikile kwintolongo iCherche-Midi, ndatshintshelwa kwigumbi eliqhelekileyo elalinamanye amabanjwa. Apho ndadibana nomfundi owayefundele ezomthetho owayegwetyelwe entolongweni ngenxa yokubuya kwikhefu lakhe lasemkhosini iintsuku ezimbalwa emva kwethuba elifanelekileyo. Kwakhona kwakukho umfundi owayefunde kwisikolo sabefundisi bamaKatolika owayegwetywe ngenxa yokuba neminwe emide. Thina sobathathu sasikunandipha ukuncokola ithuba elide ngenyaniso yeBhayibhile.

Ngenye imini ndaphawula umbanjwa ehleli yedwa kwikona yebala. Njengoko ndandisondela, ndandinokubona ukuba wayefunda. Ndathetha naye. Waguquka waza wandibonisa iBhayibhile yakhe. Khawufan’ ucinge! Wayengomnye wamaNgqina kaYehova! Wayengowomnombo wabantu abathetha ulwimi lwasePoland, igama lakhe linguCeglarski, ibe ngokufanayo nam, wayesentolongweni ngenxa yobundilele bakhe. Ekugqibeleni ndabufumana ubuzalwana bobuKristu! Unokuyithelekelela indlela esasiphuphuma ngayo yimincili sobabini. Ngoku sasinokukwazi ukunandipha incoko eyakhayo kangangeeyure ezininzi.

Kule ntolongo sasivunyelwa ukuba siphume sijikeleze ibala kangangeeyure eziliqela ngosuku, ngoko ndakwazi ukuthetha namabanjwa ambalwa awayekunandipha ukuphulaphula isigidimi seBhayibhile. Maxa wambi kwanabalindi abathile babesithelela kwiingxubusho zethu. Ndandifumene okuthile endandinokukwenzela uYehova. Enyanisweni, intolongo yaye yaba sisabelo sam esitsha sokushumayela, yaye ngoku ndandisenza iiyure zikavulindlela, kwanakuba ndandingenakunikela ngxelo ngazo. Kodwa oko akuzange kundikhathaze.

Imfuduko

Kwaqengqeleka iinyanga kungekho nto iphawulekayo ngokwentelekiso—nto leyo efane ibizwe ngokuba yiMfazwe Engeyeyokwenene. Kodwa oku kwafikelela esiphelweni ngoMeyi 1940, xa amaJamani ahlasela iFransi. NgoJuni abasemagunyeni baseFransi bakhupha yonke into elibanjwa kuzo zonke iintolongo zaseParis ngenxa yokuza kwemikhosi yamaJamani. Sakhweliswa kwiilori zomkhosi saza sasiwa eOrleans, idolophu ekwiikhilomitha ezingaphezu kwe-100 ukuya kumazantsi eParis. Emva kokuba kumiswe ithuba elifutshane, amabanjwa asekuhlaleni nawezomkhosi ahlanganiswa ngokwamaqela aza ayalelwa ukuba aqhubeke ehamba esiya emzantsi-mpuma ebetha ngezikaTshiwo ukuya kumntla wodonga lomlambo iLoire. Abalindi ababexhobe bef’ amacala babebeke iliso labo kula maqela. Kwakunzima gqitha ukuhamba kwilanga likaJuni elaligqats’ ubhobhoyi apho.

Kwakukho izaphuli-mthetho phakathi kwethu, ibe abalindi babeyalelwe ukuba baqhumis’ imbumbulu beqengqu’ ugodo kuye nabani na owayesima, esiwa okanye owayengakwazi ukuqhubeka ehamba. Ngosuku lwesithathu, uMzalwan’ uCeglarski waqalisa ukutsala nzima ngenxa yesigulo esibangelwa lilanga. Ukumshiya kwakuya kuthetha ukufa okuqinisekileyo kuye. Abalindi bandivumela ukuba ndimsongele ngengubo ndincediswa ngamanye amabanjwa saza samthwala. Ngosuku olulandelayo waziva noko izinto zingemntaka’ Ngqika yaye wakwazi ukuqhubeka ebetha ngezikaTshiwo.

Ngaphambi kokuba sifike eBriare, idolophu encinane emi kumntla wodonga lomlambo iLoire, iqela lethu ladibana negquba labantu besindwa yimigodlo yabo yemithwalo eminye beyikhwelise ezinqweleni. Babesabela emazantsi bebaleka imikhosi eyayisiza yamaJamani. Sakwazi ukubuqonda ubukhulu bale mfuduko yabemi basekuhlaleni njengoko amawaka abo ayesaba ngenxa yobomi bawo.

Sandula ke safumanisa ukuba abalindi bethu babephel’ emehlweni, nokuba sasihamba sodwa. Sasiza kwenza ntoni ngoku? Sasingenakukwazi ukuwela umlambo omkhulu iLoire size siqhubeke nohambo lwethu olusinge kumzantsi ngenxa yokuba zonke iibhulorho zazidilikile. Iqela lethu elincinane (elalinoMzalwana uCeglarski, amabanjwa amabini kunye nam) lagqiba ekubeni libuyele eParis.

Safumana amahashe awayeshiyiwe, yaye sawaphalisa kangangoko sasinako. Ndandenzakele edolweni ibe ndingasenako ukuwugoba umlenze wam, ngoko amaqabane am kwaye kwafuneka andincedise ukuqabela ehasheni. Sandula ke safumanisa ukuba nehashe lam laliqhwalela! Ngoko sasihamba kancinane oku konwabu njengoko ihashe lam lalijingxela. Noko ke, kungekudala uhambo lwethu lwafikelela esiphelweni esasingalindelekanga. Sasigubungele iikhilomitha ezimbalwa kuphela xa sathana nqwakaqha nenxalenye yomkhosi wamaJamani, ibe ipolisa lomkhosi lasiyalela ukuba sehle emahasheni. Ekuphela kwento esasiphumelele kuyo yayikukutshintsha abalindi!

Ibanjwa LeMfazwe

Kungekudala emva kokuthinjwa kwethu, mna noMzalwana Ceglarski sahlulwa, ibe wasala engumbanjwa wamaJamani de kwaphela imfazwe. Emva kweenyanga ezimbalwa ndisentolongweni ekwikampu yamajoni iJoigny, kumbindi Fransi, ndathunyelwa eStettin, izibuko elalisaziwa ngokuba yiEast Prussia. Ngoku laziwa ngokuba lizibuko laseSzczecin ePoland.

Ekubeni ndandikwintolongo yasemkhosini yaseFransi ngokusemthethweni xa ndathinjwa ngamaJamani, ndasiwa kwiikampu yamabanjwa angethuba lemfazwe, apho imeko noko yayiginyis’ amathe kunento eyayisenzeka kwikampu zoxinaniso. Le kampu yayiyishedi enkulu ngokoyiyekayo eyayihlala amabanjwa angama-500, eyayilindwa ngabalindi abaxhobileyo. Amabanjwa ayesebenza kwimisebenzi eyahlukahlukeneyo esixekweni ebudeni bemini ibe ayebuyiselwa ekampini ngorhatya lwemivundla. Ngoko ndandiza kuyifumana njani indlela yokwenzela uYehova okuthile, ekubeni abantu bengekho imini yonke?

Kule shedi, kwakukho ibhodi enkulu ekwakunokubhalwa kuyo inkcazelo ethile ize ixhonywe, ibe ndafumana imvume yokusebenzisa indawo encinane kule bhodi. Ndafumana iphetshana elithile, ndaza ndathi emva kokulolula ngenyameko, ndabhala iindinyana ezimfutshane eziliqela ngemixholo yeBhayibhile. Ezantsi, ndachaza indawo endandinokufumaneka kuyo nexesha awayenokuthi nabani na onomdla kwisigidimi soBukumkani bukaThixo aze kundibona ngalo.

Ukushumayela Kuzo Zonke Iindidi Zabantu

Le nkqubo yaba nemiphumo emihle. Kungekudala ndakwazi ukuqhuba intlanganiso encinane rhatya ngalunye kunye nabaphulaphuli abathandathu, abasibhozo, ibe maxa wambi kwanabalishumi. Ngokufuthi iingxubusho zethu zazithabatha iyure okanye ngaphezulu, kuxhomekeka kwimibuzo eyayiphakanyiswa. Ngamathub’ athile, umlindi ongumJamani owayethetha isiFrentshi wayesithelela.

Njengoko ndandineBhayibhile enye kuphela, ndabhalela iqela leRed Cross yaseGeneva, ndilicela ukuba lindithumelele iiBhayibhile ezininzi kangangoko kunokwenzeka. Lahamba ixesha, kodwa ekugqibeleni ndafumana ipasile yam yokuqala yeeBhayibhile ezingentshanga. Ngenye imini ndaxelelwa ukuba ndiye kwiofisi yekampu ngenxa yokuba undwendwe lwam, ummeli weRed Cross, wayenqwenel’ ukundibona. Wayengumfundisi wamaProtestanti. Kuyabonakala ukuba wayecinga ukuba nam ndandikwangumProtestanti. Wadana kancinane xa wafumanisa ukuba ndandingomnye wamaNgqina kaYehova!

Sekunjalo, wayenobubele ekwavuyisana nam ngenxa yoko ndandikwenza. Wandiqinisekisa ukuba ndandinako ukuqhubeka ndiodola iiBhayibhile nokuba ndandiya kuzifumana. Ngokwenene izinto zahamba ngolo hlobo. Ngaloo ndlela, ndakwazi ukusasaza iiBhayibhile ezimalunga nama-300 ebudeni bexesha endandihlala ngalo kuloo kampu. Emva kwemfazwe, olunjani uvuyo endaba nalo ndakufumanisa ukuba umbanjwa waseBelgium ogama linguWattiaux, endanikela kuye ubungqina kwikampu yaseStettin, wayeyimele inyaniso!

Ebudeni bokuthinjwa kwam eJamani, ndandinelungelo lokufumana iipasile zokutya ezazivela kwintsapho yakowethu. Kungekudala ndafumanisa ukuba pasile nganye yayikwafihla intabalala yokutya kokomoya okuxabisekileyo. Udade wethu wayechwetheza amanqaku awayevela kwiMboniselo kwiphepha ngalinye elicekethekileyo aze awafihle kwiipakethi zemacaroni. Abalindi abazange bawafumane. Ndakwafumana nenkupho yencwadi ethi Children kwipasile yokutya. Oku kwangqineka kuyeyona nto iluncedo kubulungiseleli bam.

Ukwandisa Ubulungiseleli Bam

Njengoko ndandingumkhandi weenqwelo-mafutha, ekugqibeleni ndabelwa ukusebenza kwigaraji yokulungisa iitrektari. AmaJamani amalunga nama-20, inkoliso yawo eyayingabantu abakhulu gqitha ukuba bangabizelwa kwinkonzo yasemkhosini, ayesebenza apho. Ngoko ndenza umgudu wokufunda isiJamani kancinane. Umnqweno wam osuk’ entliziyweni wawukukwandisa ubulungiseleli bam nokungaphindi ndiphelelisele ukushumayela kwam kumabanjwa awayethetha isiFrentshi.

Noko ke, kwakufuneka ndenze ngobulumko, ngenxa yokuba abasebenzi abangamaJamani babesoyika ukubonakalisa iimbono zabo esidlangalaleni. Ngoko ndathetha nabo ngokwabantu ngabanye. Njengomgaqo, babeyazi kakuhle gqitha iBhayibhile yaye babevile ngamaNgqina kaYehova. Bambi babesazi nokuba amaNgqina amaninzi ayeye athunyelwa kwiikampu zoxinaniso.

Usuku ngalunye kuloo garaji, ndandiluqukumbela ndithethe nabo bonke abasebenzi abangoowethu ngenyaniso. Bambi babesithanda isigidimi, kodwa oko kwakungenjalo ngendoda eyayiphethe. Ngokungathandabuzekiyo ndawuphosa umhlola xa ndabhala oku kwitafile eyayisebenzela kuyo Jehovas Zeugen (amaNgqina kaYehova) ukuze ndiyincede iqonde uhlobo lomntu endandilulo. Le ndoda yabonakala isoyika xa yawubonayo lo mbhalo yaza yawucima ngokukhawuleza. Kodwa ayizange indohlwaye. Ekuhambeni kwexesha, abanye abasebenzi baba nobuhlobo. Enyanisweni, babendizisela ukutya okuninzi kangangokuba ndandinako ukwabelana ngako namanye amabanjwa aliqela ndakubuyela ekampini.

UYehova, Inqaba Eluqilima

Kuyo yonke le minyaka, ndiye ndafumanisa ukuba sinokusoloko simenzela okuthile uYehova noowethu, zingakhathaliseki iimeko ezinzima ezisenokubakho. IStettin yayiqhushunjiswa ngeebhombu ngeyona ndlela kangangezihlandlo eziliqela yimikhosi eManyeneyo. Sasizama ukuzimela kwimisele egqunywe ngamaplanga nomhlaba. Le misele yayingeyonkuselo kangako, kuba amabanjwa amaninzi ayephulukana nobomi bawo kulo misele. Ebudeni bohlaselo lwasemoyeni, maxa wambi ndandidla ngokuva isandla sindibamba ebumnyameni, size kuphela sindiyeke nje ukuba uhlaselo luphele. Ndandingazi nokuba ngubani na lowo. Kuyabonakala ukuba, amanye amabanjwa ayecinga ukuba ndandinokhuselo olukhethekileyo kuba ndandithetha ngoThixo.

Ebudeni bolunye uhlaselo lwasemoyeni, ikampu yethu yatshiswa yaphela vuthu ziibhombu ezitshisayo. Sisele sodwa ezitratweni zedolophu, sabona imibono emininzi eyoyikekayo. Abemi ababeqaqanjelwa zizilonda zokutsha baziphosa kwimijelo yoMlambo iOder eyayiqukuqelelela eStettin. Xa la maxhoba okutsha ayephuma emanzini, ayetshiswa yifosforasi. Kwabaninzi itshoba lalala umbethe.

Ngenxa yokuba imikhosi yamaRashiya yayisendleleni, sayalelwa ukuba siyishiye iStettin size siye ngasentshona eNeubrandenburg sandule ke siye eGüstrow. Sicwanye kwitrektari enkulu, sasihamba endleleni apho iimbumbulu zamaRashiya zazisiwa amaxesha ngamaxesha. Ekugqibeleni iingadluma zeenqwelo zemfazwe zamaRashiya zasifumana eGüstrow. Imikhosi yamaRashiya eyothusayo yayigqugqisa kuloo dolophu kangangeveki. Imikhosi yaseBritani yayisondela, ibe ngoxa babelindele ukungquzulana kwaloo mikhosi, abasemagunyeni baseRashiya bawahlula amabanjwa omkhosi kwawasekuhlaleni. Bazigcinela amanye amabanjwa baza bathumela aseleyo (kuquka nam) kumaBritani.

Oku kwaba kukuphela kwamava awoyikekayo. Kwiiveki ezimbalwa kamva, ndazifumanisa ndikwiplatfomu yesikhululo sikaloliwe iGare du Nord eParis. Kwakuxa kumpondo zankomo. Kwakuphakathi kwinyanga kaMeyi ngowe-1945, ibe ekugqibeleni ndabuyela ekhaya, emva kweenyanga ezingama-69 ekuthinjweni.

Ukufumana Izinto Ezingakumbi Endandinokumenzela Zona UYehova

Ngowe-1946 uMbutho wandimema kwakhona ukuba ndiye kukhonza eBheteli, ngoko eyayiseMontmorency, ummandla ongaphandle kwedolophu emantla eParis. Kwiinyanga ezimbalwa kamva, mna noMzalwan’ uPaul Dossman sabelwa ukuba sityelele amabandla aseFransi njengabaveleli besiphaluka. Ngelo thuba, kwakukho amaNgqina ambalwa angama-2 000 kulo lonke ilizwe. Namhlanje, kwiminyaka engaphezu kwama-40 kamva, kukho abavakalisi abangaphezu kwekhulu lamawaka.

Kamva ndaphinda ndabizelwa eBheteli, ngoko eyayimi kummandla owawuhlala abemi baseParis. Ngowe-1949, ndikhuthazwe ngabazalwana ababini ababengabavangeli basemazweni ababevela eNgilani, ndaqalisa ukufunda isiNgesi—ndimele ndivume ukuba, kwakukho ubunzinyana. Ngonyaka olandelayo, ndamenyelwa kwiSikolo seBhayibhile seWatchtower saseGiliyadi.

Xa ndabuyela eFransi, ndakhonza okwethutyana kumsebenzi wesiphaluka, wandula ke uMbutho wandicela ukuba ndikhonze njengomvangeli wasemazweni eAfrika. Ebudeni belo thuba, ndaye ndatshata noTitica, udade womnombo wamaGrike. Sahlala eSenegal kangangeminyaka emihlanu yaye saba nelungelo lokubona ibandla lokuqala lisakhiwa eDakar. Ngenxa yezizathu zempilo, kamva kwanyanzeleka ukuba sibuyele eFransi.

Ngoku ndikunyaka wam wama-50 ndikwinkonzo yexesha elizeleyo ibe ndiye ndanovuyo kuyo yonke le minyaka lokunceda abantu abangaphezu kwekhulu ukuba bamele inyaniso. Eneneni ngokuphindaphindiweyo uYehova uye waba ngolungileyo waza wasivula isandla sakhe kum. Ndiye ndafunda kumava obomi ukuba enoba isenokuba yintoni na imeko yethu, sinokusoloko sifumana indlela ethile yokumdumisa neyokumzukisa uThixo wethu, uYehova.

[Umfanekiso okwiphepha 23]

UJean Queyroi nomfazi wakhe, uTitica