Ukufuna Iimpendulo Ezichanileyo

Ndingenza njani ukuze ndikhusele impilo yam?

Ndingenza njani ukuze intsapho yam yonwabe?

Ndingenza njani ukuze ndingaphelelwa ngumsebenzi?

NGABA wakha wazibuza omnye wale mibuzo? Wazifumana ke iimpendulo ezichanileyo? Nyaka ngamnye, kupapashwa malunga nama-2 000 eencwadi ezahlukahlukeneyo ezicebisa ngale mibuzo neminye ebalulekileyo. EBritani kuphela, abafundi bachitha imali efikelela kwii-R1,1 zamawaka ezigidi ngonyaka bethenga iincwadi zamacebiso kwiingxaki zobomi. EUnited States bachitha ii-R4,4 zamawaka ezigidi ngonyaka kwezi ncwadi. Ngoko asinguwe wedwa ofuna amacebiso eengxaki zobomi bemihla ngemihla.

Ethetha ngamacebiso ezi ncwadi zingapheliyo, omnye umbhali wathi: “Iincwadi ezininzi ezibhalwayo ziphindaphinda oko sekubhalwe kwezinye.” Enyanisweni, amacebiso amaninzi akwezi ncwadi aphinda ubulumko obabhalwa kwenye yezona ncwadi zindala ehlabathini. Le yeyona ncwadi isasazwe ngokubanzi ehlabathini. Iguqulelwe yonke okanye inxalenye yayo kwiilwimi ezimalunga nama-2 400. Xa iyonke, kuye kwashicilelwa imibhalo engaphezu kwamawaka ezigidi ama-4,6 ehlabathini lonke. Le ncwadi sithetha ngayo yiBhayibhile.

IBhayibhile ikutsho phandle oku: “Sonke iSibhalo siphefumlelwe nguThixo kwaye siyingenelo ekufundiseni, ekohlwayeni, ekulungelelaniseni izinto, ekuqeqesheleni ebulungiseni.” (2 Timoti 3:16) Ewe, iBhayibhile ayibhalelwanga ukuba yincwadi yamacebiso. Eyona njongo yayo kukutyhila ukuthanda kukaThixo eluntwini. Nakuba kunjalo, inamacebiso amaninzi okujamelana neengxaki zoluntu, ibe ithembisa ukuba abo balandela ulwalathiso lwayo baya kuzuza lukhulu. (Isaya 48:17, 18) Xa esetyenziswa amacebiso ayo, ahlala ephumelela kungakhathaliseki imvelaphi yomntu, uhlanga nemfundo anayo. Kutheni ungafundi inqaku elilandelayo nje ukuze uzibonele enoba kuluncedo kusini na oko kutshiwo yiBhayibhile ngempilo, intsapho nomsebenzi wengqesho?