Intlungu Engathethekiyo Nehlala Ihleli

KUTSHANJE, omnye umphengululi uye wenza uphando efuna ukuqonda ukuba iba njani intlungu yabantu abafelwe ngabo babathandayo ngokuhamba kwexesha. Wathumela amaphepha emibuzo kwiqaqobana labazali abafelwa ngabantwana kwiminyaka embalwa edluleyo. Asingabo bonke abayiphendulayo loo mibuzo. Utata ogama linguVladimir, owafelwa ngunyana kwiminyaka emihlanu edluleyo, wathi kusenzima kakhulu ukuthetha ngonyana wakhe.a

Abazali abafelweyo bayayazi loo ntlungu ingapheliyo. Kwiminyaka elishumi edluleyo unyana kaWilliam oneminyaka eli-18 ubudala warhaxwa ngamanzi wafa. Ebhala ngesi siganeko uWilliam uthi, “Intliziyo yam iselihlwili nangoku, yaye ndiya kude ndife isenjalo.” Kwiminyaka emihlanu uLucy efelwe ngunyana wakhe owaqutyulwa kukugula, wabhala wenjenje: “Kwiintsuku zokuqala ezimbalwa, ndandisoloko ndizixelela oku, ‘Akafanga.’ Yayiba ngathi ndisephupheni, ndiza kuvuka kungekudala. Ngokuya zihamba iintsuku ndayamkela into yokuba ngenene ufile, akazukubuya. Unyana wam wafa kwiminyaka emihlanu edluleyo, kodwa maxa wambi xa ndihleli ndedwa, zithi waxa iinyembezi.”

Kutheni abazali abafelweyo abafana noVladimir, uWilliam, noLucy, benale ntlungu ingathethekiyo nehlala ihleli? Makhe siqwalasele ezinye zezizathu.

Kutheni Kubangela Intlungu Engaka?

Xa kuzelwe umntwana, abazali bavuya ngendlela engenakuthelekiswa nanto. Bayavuya yaye bayaneliseka xa bebukele imveku yabo ilele naxa incuma. Abazali abanothando baneqhayiya ngabantwana babo. Babaqeqeshela ukuba babe nesimilo yaye bazole. (1 Tesalonika 2:7, 11) Njengoko abantwana bekhula bekwenza oku, abazali bazingomb’ isifuba baze balindele okungakumbi kubo.

Abazali abanenkathalo basebenza nzima ukuze bondle abantwana babo. Basenokubekela bucala imali okanye izinto eziphathekayo belungiselela ukuba abantwana babo bakwazi ukuziqalela iintsapho zabo kwixa elizayo. (2 Korinte 12:14) Oku kuzibhokoxa kungaka, ixesha, kunye nemali echithwayo zibonisa into enye—abazali bakhulisa abantwana babo ngenjongo yokuba baphile, bangafi. Ukufa komntwana wabo kuphazamisana neenjongo zabo, yaye amathemba abebenawo ngaloo mntwana emka namanzi. Uthando olufudumeleyo obeluphakathi komzali nomntwana luphelile, luthintelwe ngumqobo ekungekho mntu unamandla okuwususa, ukufa. Indawo ebenayo unyana okanye intombi yabo ezintliziyweni zabo ikhal’ ibhungane. Abazali basentlungwini engenakuphela ngokukhawuleza.

IBhayibhile iyangqina ukuba abazali abafelweyo banyamezele intlungu yokwenene nengapheliyo. Ichaza okwenzekayo xa usolusapho uYakobi waxelelwa ukuba unyana wakhe uYosefu ubulewe, iBhayibhile ithi: “UYakobi wazikrazula iingubo zakhe zokwaleka, wabhinqa irhonya esinqeni sakhe waza waqhubeka emzilele unyana wakhe iintsuku ezininzi. Babemthuthuzela bonke oonyana bakhe nazo zonke iintombi zakhe, kodwa wayengavumi ukuthuthuzeleka, esithi: ‘Ndakude ndihle ndiye kunyana wam eShiyol [okanye engcwabeni]!’” Kwathi sele kudlule iminyaka, wabe uYakobi esesentlungwini yokufelwa ngunyana, phofu awayecinga ukuba ufile. (Genesis 37:34, 35; 42:36-38) Omnye umzekelo oseBhayibhileni ngowebhinqa elithembekileyo eligama linguNahomi elafelwa ngoonyana ababini. Libuhlungu ngendlela engathethekiyo, lafuna ukulitshintsha igama lalo elithi Nahomi, elithetha “Ubumnandi,” libe nguMara, othetha “Ubukrakra.”—Rute 1:3-5, 20, 21.

Noko ke, iBhayibhile ithetha okungakumbi kunentlungu eviwa ngabazali xa befelwe. Ibonisa nendlela uYehova abomeleza ngayo abo bakule ntlungu. Kwinqaku elilandelayo, siza kuqwalasela iindlela uThixo abathuthuzela ngazo abo bafelweyo.

[Umbhalo osemazantsi]