Waphum’ Uhili Ezingcongolweni!

KWINKULUNGWANE yokuqala, amaYuda amaninzi ayekhangele phambili ekuboneni uMesiya othenjisiweyo. (Yohane 6:14) Xa uYesu wafika emhlabeni, weza nentuthuzelo nolwazi olungakumbi ngelizwi likaThixo. Waphilisa abagulayo, wondla abalambileyo, wathomalalisa iintlekele zemvelo wade wavusa nabafileyo. (Mateyu 8:26; 14:14-21; 15:30, 31; Marko 5:38-43) Kwakhona wayethetha okwakuvela kuYehova yaye wathembisa nangobomi obungunaphakade. (Yohane 3:34) Ngezinto wayezenza nawazithethayo, uYesu wabonisa ngokuphandle ukuba wayenguMesiya, nalowo wayeya kukhulula uluntu kwisono nakwimiphumo yaso engendawo.

Ibiya kuba yinto esengqiqweni ngeenkokeli zonqulo zamaYuda ukwamkela uYesu, ukumphulaphula nokuthobela ukhokelo lwakhe. Kodwa azizange zikwenze oku. Kunoko, zazimthiy’ egazini, zamtshutshisa zaza zayila iqhinga lokumbulala!—Marko 14:1; 15:1-3, 10-15.

Ngokufanelekileyo uYesu wawagweba la madoda. (Mateyu 23:33-35) Kodwa, wayesazi ukuba kwakukho omnye owayebekek’ ityala ngobungendawo obabusezintliziyweni zawo. Wathi kuwo: “Nina niphuma kuyihlo uMtyholi, yaye nithanda ukwenza ngokweminqweno kayihlo. Yena wayesisibulala-mntu kwasekuqaleni, yaye akemi enyanisweni, kuba inyaniso ayikho kuye. Xa ethetha ubuxoki, uthetha ngokotyekelo lwakhe, kuba ulixoki noyise wabo ubuxoki.” (Yohane 8:44) UYesu wayesazi ukuba abantu banako ukwenza ubungendawo, kodwa ngoku wathetha ngomthombo wobungendawo—uSathana uMtyholi.

Ngokuthi uSathana “akemi enyanisweni,” uYesu watyhila ukuba esi sidalwa somoya sasikhe sangumkhonzi kaThixo othembekileyo kodwa sakreqa kuloo ndlela ilungileyo. Kwakutheni ukuze uSathana avukele uYehova? Wakhulisa umnqweno wokuzingca kangangokuba wafuna ukunqulwa ngendlela uThixo afanele anqulwe ngayo.a—Mateyu 4:8, 9.

Imvukelo kaSathana yabonakala kumyezo wase-Eden xa walukuhla uEva ukuba atye kwisiqhamo esalelweyo. Ngokuba lixoki lokuqala nangokuhleba uYehova, uSathana wazenza “uyise wabo ubuxoki.” Ngaphezu koko, ngokulukuhla uAdam noEva kwimvukelo, uSathana wabangela ukuba isono silawule phezu kwabo kuze kukhokelele ekufeni kwabo nezizukulwana ezaziza kulandela. Ngaloo ndlela uSathana wazenza “isibulala-mntu”—isigwinta sokwenene embalini!—Genesis 3:1-6; Roma 5:12.

Impembelelo kaSathana yaphumela nakwezinye izidalwa zomoya, xa wagaya ezinye iingelosi ukuba zithelele imvukelo yakhe. (2 Petros 2:4) NjengoSathana, ezi zidalwa zingendawo zomoya zaba neminqweno emibi ngabantu. Ngenxa yokuba ziziingelosi, zaba neminqweno egqwethekileyo yesini yaye imiphumo yaba yintlekele.

Ubungendawo Buzalisa Umhlaba

IBhayibhile ithi: “Kuthe bakuqala ukwanda abantu phezu komhlaba bazala neentombi, baziphawula ke oonyana boThixo oyinyaniso iintombi zabantu, ukuba zintle ngenkangeleko; baza bazithabathela abafazi kuzo zonke abazikhethayo.” (Genesis 6:1, 2) Yayingoobani “oonyana boThixo oyinyaniso”? Yayizizidalwa zomoya kungekhona abantu. (Yobhi 1:6; 2:1) Sikwazi njani oko? Kaloku, kwakusele kuyiminyaka eli-1 500 abantu betshata yaye kungekho sizathu sikhethekileyo sokuthetha ngako. Ngoko ke, ngokukhankanya ukuba oku kwakuziintlobano zesini ‘noonyana boThixo oyinyaniso,’ abaziguqula bayinyama baza “bazithabathela iintombi zabantu,” ngokucacileyo le ngxelo ichaza into ebangel’ iintloni nengaqhelekanga.

Oko kugqwetheka kwezinto kwaboniswa ngabantwana abazalwa lolo manyano lugqwethekileyo. Babebizwa ngokuba ziiNefili, abantwana abangamabhastile abakhula baziingxilimbela. Ezi Nefili zabaxhaphaza abantu ngendlela ebangel’ usizi. Eneneni, igama elithi “Nefili” lithetha “abawisi.” Aba bantu babulwanyanarha bachazwa ngokuthi “yayingamadoda akudala anamandla nadumileyo.”—Genesis 6:4.

Ezi Nefili nooyise zenza ubungendawo obungaphaya kokuqonda. IGenesis 6:11 ithi: “Umhlaba wawonakele emehlweni oThixo oyinyaniso yaye . . . wawuzaliswe lugonyamelo.” Ewe, abantu babenobundlobongela yaye bahlahlel’ indlela izizukulwana ezilandelayo.

IiNefili nooyise, zaba nefuthe njani ebantwini ngobungendawo? Ngokwenza izinto ezinomtsalane kwiminqweno yabantu abanesono. Waba yintoni umphumo? “Kuba yonke inyama yayiyonakalisile indlela yayo emhlabeni.” Ekugqibeleni, uYehova watshabalalisa ihlabathi ngoNogumbe wehlabathi lonke, esindisa kuphela ilungisa elinguNowa nentsapho yakhe. (Genesis 6:5, 12-22) Iingelosi ezazingabantu zabuyela kubume bazo bomoya zihlazekile. Kubonakala ukuba ukususela ngoko, uThixo wazalela ezi zidalwa zomoya zingendawo ukuba zibe ngabantu. (Yude 6) Noko ke, zahlala zinempembelelo enamandla kwimicimbi yabantu.

Umqol’ Uphandle Kongendawo!

Umkhamo uSathana aphembelela ngawo ihlabathi uchazwe kwincwadi yoku-1 kaYohane 5:19, ethi: “Siyazi ukuba thina singabakaThixo, kodwa ihlabathi liphela lisemandleni ongendawo.” USathana ukhokelela abantu kwiintlekele ezingakumbi. Eneneni, uzimisele kunangaphambili ukwenzakalisa abantu. Ngoba? Kungenxa yokuba yena needemon zakhe banikwa uphuma-phele ezulwini emva kokumiselwa koBukumkani bukaThixo ngowe-1914. Ichaza ngesi siganeko, iBhayibhile yathi: “Yeha kuwo umhlaba . . . , ngenxa yokuba uhlile weza kuni uMtyholi, enomsindo omkhulu, esazi ukuba ixesha analo lifutshane.” (ISityhilelo 12:7-12) USathana uyisebenzisa njani impembelelo yakhe ebantwini namhlanje?

Ngokuyintloko uSathana usebenzisa amandla alawula indlela abantu abacinga nabenza ngayo izinto. Ngenxa yoko, kweyabase-Efese 2:2, uSathana uchazwa ngokuthi ‘ungumlawuli wegunya lomoya, moya lowo ngoku osebenza koonyana bokungathobeli.’ Endaweni yokukhuthaza uloyiko lobuthixo nokulunga, lo ‘moya’ uqhwabel’ izandla ukuvukela uThixo nemilinganiselo yakhe. USathana needemon zakhe batshotsh’ entla ekuphembeleleni ubungendawo obenziwa ngabantu.

“Londoloza Intliziyo Yakho”

Enye indlela awubonisa ngayo “lo moya” ngubhubhane wokubukela amanyala, owenza abantu bathi ti yiminqweno yesini esigqwethekileyo uze wenze ihambo enjalo ibonakale yamkelekile. (1 Tesalonika 4:3-5) Ukudlwengula, ukuxhatshazwa ngenkohlakalo ngokwesini, ukudlwengulwa lihlokondiba, ukuba neentlobano zesini nezilwanyana nokuxhaphaza abantwana ngokwesini, zezinye zeendlela abantu abazonwabisa ngayo ngemifanekiso engamanyala. Naxa ingenzulu kangako, imifanekiso engamanyala yenzakalisa abo bayibukelayo nabafunda ngayo ize ibenze amakhoboka esini. Bubungendawo obuphelisa ulwalamano lwabantu noThixo. Imifanekiso engamanyala ibonisa ukugqwetheka kweengqondo zeedemon eziyiqhwabel’ izandla le mifanekiso—abavukeli abaneminqweno yesini egqwethekileyo ukususela ngexesha langaphambi koMkhukula womhla kaNowa.

Ngesizathu esivakalayo, indoda esisilumko uSolomon yabongoza yathi: “Ngaphezu kwako konke okunye okumele kulondolozwe, londoloza intliziyo yakho, kuba iphuma kuyo imithombo yobomi.” (IMizekeliso 4:23) Ngeliphandle, ukulondoloza intliziyo yakho kumgibe wemifanekiso engamanyala kuthetha ukutshintsha umabonwakude okanye ucime ikhompyutha xa ivelisa amanyundululu anjalo yaye kubalulekile ukuyicima ngokukhawuleza nangengqiniseko! Khawucinge nje ngawe ulijoni eliphepha utolo olujoliswe entliziyweni yakho. USathana ujolise kwintliziyo yakho yokomfuziselo—apho kukho zonke iimvakalelo neminqweno yakho—yaye ufuna ukuyonakalisa.

Kufuneka ukhusele intliziyo yakho ekuthandeni ubundlobongela, kuba uMtyholi uyazi ukuba “[uYehova] umthiyile ngokuqinisekileyo nabani na othanda ugonyamelo.” (INdumiso 11:5) Akunyanzelekanga ukuba uSathana akwenze unxanelw’ igazi ukuze ube lutshaba lukaThixo; ukhulisa nje uthando onalo ngogonyamelo. Akothusi ke ngoko ukubona ukuba kumajelo osasazo, ngamaxesha amaninzi ugonyamelo luhambisana nobugqi. IiNefili zafa kudala, kodwa imikhwa nezimbo zazo isekho! Ngaba indlela ozonwabisa ngayo ibonisa ukuba ulwa namaqhinga kaSathana?—2 Korinte 2:11.

Indlela Yokulwa Nempembelelo KaSathana Engendawo

Kunokubonakala kunzima ukulwa nemimoya engendawo. IBhayibhile ithi abo bazama ukukholisa uThixo “bazamazamana . . . kwanemikhosi yoomoya abangendawo kwezasezulwini iindawo,” ukongezelela kumlo abanawo wenyama engafezekanga. Ukuze siphumelele kulo mlo size sikholise uThixo, kufuneka sixhakamfule onke amalungiselelo avela kuye.—Efese 6:12; Roma 7:21-25.

La malungiselelo aquka umoya kaThixo oyingcwele, awona mandla makhulu kwindalo iphela. Umpostile uPawulos wabhalela amaKristu enkulungwane yokuqala esithi: “Ke thina samkela, kungekhona umoya wehlabathi, kodwa umoya ovela kuThixo, ukuze sizazi izinto esizinikwe ngobubele nguThixo.” (1 Korinte 2:12) Abo bakhokelwa ngulo moya kaThixo, bayakuthanda okuthandwa nguye baze bakuthiye akuthiyileyo. (Amosi 5:15) Unokuwufumana njani umoya oyingcwele? Ngokuthandaza nangokufunda iBhayibhile—kaloku iBhayibhile yimveliso yomoya oyingcwele—nolwalamano oluhle nabantu abamthanda ngokwenene uThixo.—Luka 11:13; 2 Timoti 3:16; Hebhere 10:24, 25.

Ngokuxhakamfula la malungiselelo obuthixo, uya kube ubeka isiqalo esihle sokwambatha ‘sonke isikrweqe sikaThixo ukuze ukwazi ukuma uqinile nxamnye namaqhinga kaMtyholi.’ (Efese 6:11-18) Ukusebenzisa la malungiselelo ngokuzeleyo kungxamisekile kunangaphambili. Kutheni sisitsho?

Ubungendawo Buza Kupheliswa Kungekudala!

Umdumisi uthi: “Ekuhlumeni kwabo bangendawo njengotyani nabo bonke abo baqhelisela okwenzakalisayo betyatyamba, oko kukuze babhujiswe ngonaphakade.” (INdumiso 92:7) Ewe, njengemihla kaNowa, ukwanda kobungendawo kububungqina bokuba umgwebo kaThixo usemnyango, kungekuphela nje kubantu abangendawo kodwa nxamnye noSathana needemon zakhe. Baya kuphoswa enzonzobileni, ngokungathi babotshwe izandla neenyawo ngaphambi kokuba batshatyalaliswe ngokupheleleyo. (2 Timoti 3:1-5; ISityhilelo 20:1-3, 7-10) Ngubani oza kuphumeza lo mgwebo? Akakho omnye ngaphandle koYesu Kristu yaye sifunda oku ngaye: “Wabonakaliselwa le njongo uNyana kaThixo, yokuba ayichithe imisebenzi kaMtyholi.”—1 Yohane 3:8.

Ngaba ukufuna ngamehlw’ amnyama ukuba ubungendawo buphele? Ukuba kunjalo, unokufumana intuthuzelo ngethemba eliseBhayibhileni. Ayikho enye incwadi ebhenca unobangela wobungendawo, uSathana yaye ayikho enye ebonisa indlela yena nemisebenzi yakhe engendawo eya kubhangiswa ngayo. Siyakukhuthaza ukuba uzuze ulwazi oluchanileyo lweBhayibhile, ukuze uzikhusele ngoku nxamnye nempembelelo kaSathana uze uzibekele ithemba lokuphila kwihlabathi elingenabo ubungendawo.—INdumiso 37:9, 10.

[Umbhalo osemazantsi]

[Ibhokisi/Umfanekiso okwiphepha 6]

Iintsomi Ezisekelwe Kubomi Bokwenene

Amabali athetha ngoothixo abangabantu, iingxilimbela nezantyantyala zezikhukula afumaneka kwiincwadi zeentsomi ehlabathini lonke. Ngokomzekelo, iAkkadian Epic kaGilgamesh ithetha ngomkhukula, inqanawa nabantu abasindayo. UGilgamesh ngokwakhe uchazwa njengothixo onenkanuko nonogonyamelo, umntu kodwa okwanguthixo. Amabali ama-Aztec athetha ngehlabathi lakudala elalineengxilimbela aphinde athethe nangonogumbe omkhulu. Intsomi kaNorse ichaza isizwe seengxilimbela nendoda eyayisisilumko uBergelmir owenza umkhombe omkhulu ukuze asinde nomfazi wakhe. Xa zidibene zonke ezi ntsomi zingqinelana neBhayibhile ethi bonke abantu basuka kumlibo omnye wabantu abasinda kunogumbe owatshabalalisa ihlabathi langaphambili elingendawo.

[Umfanekiso]

Ilitye elibhalwe “iNtsomi kaGalgamesh”

[Inkcazelo]

The University Museum, University of Pennsylvania (neg. # 22065)

[Umfanekiso okwiphepha 5]

Imikhwa yeeNefili isabonakala nanamhlanje

[Umfanekiso okwiphepha 7]

Ulwazi oluchanileyo lusikhusela kwimpembelelo yobungendawo