Oothunywashe Bobungendawo

INGCACISO yeBhayibhile ngendima yeedemon kwimicimbi yabantu iphendula imibuzo esisiseko ngobungendawo ebingayi kuphenduleka ukuba ibingekho. Ngokomzekelo, khawuqwalasele la mazwi eInternational Herald Tribune angemfazwe eqhubekayo kwiiBalkans: “Iqela labaphandi baMazwe aseYurophu ligqibe kwelokuba [amajoni] aye adlwengula abafazi namantombazana amaSilamsi angama-20 000 . . . njengendlela elungelelanisiweyo yokugrogrisa eyenzelwe ukuwoyikisa, ukuwaphelisa amandla nokuwadudula emke emakhayeni awo.”

Isincoko esasikwiphephancwadi iTime sazama ukuyichaza le meko: “Maxa wambi, abafana abasemfazweni basenokudlwengula ukuze bakholise izikhulu zabo, abaphathi babo, nokuze bafumane ukuthandwa njengoonyana bethandwa ngooyise. Ukudlwengula kunikela ubungqina bokuzinikela kuburhalarhume beqela elo. Umfana okulungeleyo ukwenza izinto ezimanyumnyezi akasisebenzisi isazela sakhe ukuze azivisisanise neenjongo ezingqongqo zeqela lakhe. Umntu ubonisa ukuthobela kwakhe ngokwenza izenzo ezimanyumnyezi.”

Kodwa kutheni ‘iinjongo ezingqongqo zeqela’ zonakele ngaphezu kwezazela zamalungu alo? Njengomntu ngamnye, phantse wonk’ ubani unqwenela ukuphila ngoxolo nommelwane wakhe. Ngoko kutheni, ngamaxesha emfazwe, abantu bedlwengula, bengcungcuthekisa baze babulalane? Isizathu esiyintloko kukuba kusebenza amandla eedemon.

Ukuqonda indima yeedemon kukwanikela isicombululo koko abathile bakubiza ngokuba “yingxaki yabafundi ngezakwalizwi.” Le ngxaki kukuvisisanisa ezi meko zintathu: (1) UThixo unamandla onke; (2) uThixo unothando yaye ulungile; yaye (3) kwenzeka izinto ezimbi. Bambi banembono yokuba unako ukuzivisisanisa ezimbini kwezi, kodwa akunakuze uzivisisanise zontathu. ILizwi likaThixo liyaphendula, yaye loo mpendulo ibandakanya imimoya engabonakaliyo, oothunywashe bobungendawo.

Umvukeli Wokuqala

IBhayibhile isixelela ukuba uThixo ungumoya. (Yohane 4:24) Ekuhambeni kwethuba waba nguMdali wezigidi zezinye izidalwa zomoya, oonyana abazizithunywa zezulu. Embonweni, umkhonzi kaThixo uDaniyeli wabona amakhulu ezigidi zezithunywa zezulu. Bonke abantu bomoya uYehova awabadalayo babengamalungisa yaye bevisisana nokuthanda kwakhe.—Daniyeli 7:10; Hebhere 1:7.

Kamva, xa uThixo ‘waseka ihlabathi,’ aba nyana bakaThixo bazizithunywa zezulu ‘bamemelela kunye’ baza ‘baduma bonke.’ (Yobhi 38:4-7) Kodwa omnye wabo wakhulisa umnqweno wokurhwaphiliza unqulo olwalufanele ngokufanelekileyo lusiwe kuMdali. Ngokuvukela uThixo, esi sithunywa sezulu sazenza usathana (okuthetha “umchasi”) nomtyholi (okuthetha “umhlebi”).—Thelekisa uHezekile 28:13-15.

Esebenzisa inyoka e-Eden ukuze athethe nomfazi wokuqala, uEva, uSathana wamlukuhlela ekubeni angawuthobeli umyalelo ongqalileyo kaThixo wokuba angadli kwisiqhamo somthi othile emyezweni. Emva koko, indoda yakhe yamthelela. Ngaloo ndlela, isibini sokuqala esingabantu sathelela isithunywa sezulu ekuvukeleni uYehova.—Genesis 2:17; 3:1-6.

Ngoxa izinto ezenzeka e-Eden zisenokubonakala zisisifundo esizicaceleyo sokuthobela, apho uSathana waphakamisa iimbambano ezimbini ezibalulekileyo. Okokuqala, uSathana waphikisa ukuba ulawulo lukaYehova phezu kwezidalwa zakhe lwalulolobulungisa yaye lulolokulungelwa kwazo. Mhlawumbi abantu babenokuzilawula kakuhle ngakumbi. Okwesibini, uSathana wathandabuza enoba nasiphi na isidalwa esinengqiqo sasinokuhlala sithembekile yaye sinyanisekile kuThixo xa ukuthobeka kwakubonakala kungenazingenelo zezinto eziphathekayo.a

Ukuziqonda ngokucacileyo iimbambano ezaphakanyiswa e-Eden, kunye nolwazi ngeempawu zikaYehova, kuyasinceda sisiqonde isicombululo ‘sengxaki yabafundi ngezakwalizwi,’ oko kukuthi ukuvisisanisa ubukho bobungendawo kunye nophawu lukaThixo lwamandla nothando. Ngoxa liyinyaniso elokuba uYehova unamandla angasikelwe mda yaye uluthando lumntwisiwe, ukwanobulumko nokusesikweni. Ezi mpawu zine uzisebenzisa ngokulungelelene ngokugqibeleleyo. Ngaloo ndlela, akazange awasebenzise ngoko nangoko amandla akhe amakhulu ukuze abatshabalalise abo bavukeli bathathu. Oko ngekwakube kokusesikweni kodwa mhlawumbi ngekwakungabanga bubulumko okanye uthando. Ngokubhekele phaya, akazange akubethe nje ngoyaba oko kwakwenzekile, khondo elo bambi basenokucinga ukuba yayiya kuba lelothando. Ukwenjenjalo ngekwakungabanga bubulumko yaye ngekwakungabanga kuko nokusesikweni.

Kwakufuneka ixesha ukuze kuzinziswe iimbambano ezaziphakanyiswe nguSathana. Kwakuza kuthabatha ixesha ukungqina ukuba abantu babenako ukuzilawula kakuhle bengaxhomekekanga kuThixo. Ngokuvumela aba bavukeli bathathu baqhubeke bephila, kwakhona uYehova wanika izidalwa ithuba lokuba nesabelo ekungqineni ibango likaSathana libubuxoki ngokukhonza uThixo ngokuthembeka ngaphantsi kweemeko ezinzima.b

UYehova wayemxelele ngokucacileyo uAdam noEva ukuba ukuba babedlile kwisiqhamo esalelweyo, babeya kufa. Ibe bafa, nangona uSathana wayemqinisekisile uEva ukuba wayengayi kufa. NoSathana ngokwakhe uphantsi kwesigwebo sokufa; okwangoku uyaqhubeka elahlekisa uluntu. Enyanisweni, iBhayibhile ithi: “Ihlabathi liphela lilele kongendawo.”—1 Yohane 5:19; Genesis 2:16, 17; 3:4; 5:5.

Ukuvukela Kwezinye Izithunywa Zezulu

Kungekudala emva koko kwenzeka e-Eden, ezinye izithunywa zezulu zathelela ekuvukelweni kolongamo lukaYehova. IBhayibhile ithi: “Kuthe bakuqala ukwanda abantu ehlabathini, bakuzalelwa iintombi, bazibona oonyana bakaThixo iintombi zabantu ukuba zintle, bazeka abafazi kuzo zonke abazinyulayo.” Ngamanye amazwi, ezi zithunywa zezulu “zalishiya ikhaya lazo [ezulwini]” zaza zeza emhlabeni, zambatha imizimba yabantu, zaza zaziyolisa ngesini nabafazi.—Genesis 6:1, 2; Yuda 6.

Le ngxelo iyaqhubeka kwiGenesis 6:4: “Kwakukho iingxilimbela ehlabathini ngaloo mihla; kananjalo emveni koko, xeshikweni oonyana bakaThixo bangenayo kuzo iintombi zabantu, zabazalela abantwana. Aba baba ngamagorha ababekho kwasephakadeni, amadoda adumileyo.” Aba nyana bangamabhastile abazalwa ngabafazi yaye ooyise izizithunywa zezulu babenamandla ngendlela engaqhelekanga, “amagorha.” Babengamadoda anogonyamelo, okanye iiNephi·limʹ, igama lesiHebhere elithetha “abo bawisa abanye.”

Okuphawulekayo kukuba ezi ziganeko kamva kuyabaliswa ngazo kumabali empucuko amandulo. Ngokomzekelo, ibali elidumileyo laseBhabhiloni elineminyaka engama-4 000 lichaza ngezenzo zobugorha obungaphezu kwamandla omntu zikaGilgamesh, umntu owayesondele ebuthixweni, enamandla yaye enogonyamelo “inkanuko yakhe eyayibutshayela buphele buthi tu ubuntombi kulowo wayethandana naye.” Omnye umzekelo, webali lamaGrike, nguHercules (okanye uHeracles) owayenamandla angaphezu kwawabantu. Ezalwa nguAlcmene, umntu, yaye uyise inguthixo uZeus, uHercules wathabatha iphulo logonyamelo emva kokubulala umfazi nabantwana bakhe eqhutywa yimpambano. Nangona amabali anjalo agqwetheka kakhulu njengokuba ayesuka kwesinye isizukulwana esiya kwesinye, ayangqinelana noko iBhayibhile ikutshoyo ngeeNgxilimbela nooyise ababezizithunywa zezulu ezinemvukelo.

Ngenxa yempembelelo yezithunywa zezulu ezingendawo noonyana bazo abanamandla angaphezu kwawabantu, umhlaba wazaliswa kakhulu lugonyamelo kangangokuba uYehova wagqiba kwelokuba alitshabalalise ihlabathi ngomkhukula omkhulu. IiNgxilimbela zatshabalala kunye nabo bonke abantu ababengahloneli Thixo; ekuphela kwabantu abasindayo nguNowa olilungisa nentsapho yakhe.—Genesis 6:11; 7:23.

Noko ke, ezo zithunywa zezulu zingendawo azizange zife. Kunoko, zalahla imizimba yazo yabantu zaza zabuyela kummandla womoya. Ngenxa yokungathobeli kwazo, azizange zivunyelwe ukubuyela kwintsapho kaThixo yezithunywa zezulu ezingamalungisa; zingazange zivunyelwe nokuba ziphinde zikwazi ukuzambathisa imizimba yabantu njengokuba zenzayo ngomhla kaNowa. Sekunjalo, zaqhubeka zinempembelelo eyonakalisayo kwimicimbi yoluntu, phantsi kwegunya ‘lomphathi weedemon,’ uSathana uMtyholi.—Mateyu 9:34; 2 Petros 2:4; Yuda 6.

Iintshaba Zoluntu

USathana needemon bebesoloko bengababulali yaye bekhohlakele. Ngeendlela ezahlukahlukeneyo, uSathana wabulala imfuyo kaYobhi nenkoliso yezicaka zakhe. Emva koko, wabulala abantwana bakaYobhi abalishumi ngokubangela ukuba “umoya omkhulu” utshabalalise indlu ababekuyo. Emva koko, uSathana wabetha uYobhi “ngamathumba amabi, wathabathela entendeni yonyawo lwakhe, wesa elukakayini lwakhe.”—Yobhi 1:7-19; 2:3, 7.

Iidemon zibonisa isimo sengqondo sobungendawo esifanayo. Ngomhla kaYesu, zabangela abantu bazizimumu yaye baziimfama. Zabangela ukuba indoda ethile izijece ngamatye. Zankala inkwenkwana ethile phantsi zaza ‘zayibetha yathi xhwenene kunene.’—Luka 9:42; Mateyu 9:32, 33; 12:22; Marko 5:5.

Iingxelo ezivela emhlabeni wonke zibonisa ukuba uSathana needemon zakhe basenolunya unanamhlanje. Bambi abantu bayabagulisa. Bambi babakhathaza ngokungabalalisi ebusuku okanye ngokubabangela babe namaphupha amabi okanye ngokubaxhaphaza ngokwesini. Sekunjalo baye bakhokelela abanye ekubeni baphambane, babulale okanye bazibulale bona.

Koda Kube Nini Na Benyanyezelwe?

USathana needemon zakhe abasayi kunyanyezelwa ngonaphakade. UYehova ubavumele ngezizathu ezivakalayo ukuba baqhubeke bekho de kube ngulo mhla wethu, kodwa ngoku ixesha labo lifinyele. Ebutsheni bale nkulungwane, kwathatyathwa inyathelo elibalaseleyo lokuwusikela umda ummandla abasebenza kuwo. Incwadi yeSityhilelo iyacacisa: “Kwaza kwabakho imfazwe emazulwini, uMikayeli [uYesu Kristu ovusiweyo] nezithunywa zakhe besilwa nenamba [uSathana], inamba nezithunywa zayo zisilwa; azaba nakweyisa, kanjalo ayaba safunyanwa indawo yazo emazulwini. Yaphoswa phantsi inamba enkulu, inyoka yakudala, leyo kuthiwa nguMtyholi, uSathana ke, lowo ulilahlekisayo elimiweyo liphela; yaphoswa emhlabeni, nezithunywa zayo zaphoswa kunye nayo.”—ISityhilelo 12:7-9.

Waba yintoni umphumo? Le ngxelo iyaqhubeka: “Ngenxa yoko yibani nemihlali, nina mazulu, nani ninomnquba kuwo.” Izithunywa zezulu ezingamalungisa zazinokuvuya kuba uSathana needemon zakhe babengasekho ezulwini. Kodwa kuthekani ngabantu abasemhlabeni? IBhayibhile ithi: “Yeha, abo bawumiyo umhlaba nolwandle! ngokuba uhlile weza kuni uMtyholi, enomsindo omkhulu, esazi nje ukuba ixesha analo lincinane.”—ISityhilelo 12:12.

Kumsindo wabo uSathana nabo bangaphantsi kwakhe bazimisele ukubangela uyeha omkhulu kangangoko banako ngaphambi kwesiphelo sabo esisondeleyo. Kule nkulungwane kuye kwakho iimfazwe zehlabathi ezimbini kunye neemfazwe ezingaphantsi ezingaphezu kwe-150 ukususela ekupheleni kwemfazwe yehlabathi yesibini. Ngoku sesiqhelene nokusetyenziswa kwamagama abonisa ugonyamelo olukhoyo kwesi sizukulwana: “imfazwe yeentsholongwane,” “Ukubulawa Kwabantu Ngenkohlakalo,” “amathafa okubulala,” “iinkampu zokudlwengula,” “abantu ababulala amaxhoba amaninzi,” nelithi “ibhombu yeathom.” Iindaba zizaliswe ngamabali eziyobisi, ukubulala, ukuqhushunjiswa, ukudliwa kwenyama yabantu ngamageza, ukubulawa kwabantu abaninzi, indlala, nokuthuthunjiswa.

Iindaba ezimnandi zezokuba ezi zinto zezokomzuzwana. Kungekudala, kwakhona uThixo uza kwenza okuthile nxamnye noSathana needemon zakhe. Echaza umbono ovela kuThixo, umpostile uYohane wathi: “Ndabona isithunywa sezulu, sisihla siphuma emazulwini, sinesitshixo senzonzobila, nomxokelelwane omkhulu esandleni saso. Sayibamba inamba, loo nyoka yakudala enguMtyholi, uSathana ke, sayikhonkxa iminyaka eliwaka. Sayiphosa enzonzobileni, sayivalela, satywina ngaphezu kwayo, ukuze ingabi sazilahlekisa iintlanga, ide izaliseke iminyaka eliwaka.”—ISityhilelo 20:1-3.

Emva koko, uMtyholi needemon zakhe baya “kukhululwa ixeshana elincinane,” baze ke batshatyalaliswe ngonaphakade. (ISityhilelo 20:3, 10) Hayi indlela ekuya kuba mnandi ngayo ngelo xesha! USathana needemon zakhe bengasekho ngonaphakade, uYehova uya kuba “zizinto zonke kubo bonke.” Yaye ngokwenene wonk’ ubani uya ‘kuziyolisa ngobuninzi boxolo.’—1 Korinte 15:28; INdumiso 37:11.

[Imibhalo esemazantsi]

[Umfanekiso okwiphepha 7]

Ngaba ngabantu kuphela ababekek’ ityala ngezinto ezinjengezi, okanye ngaba kukho namandla athile angendawo nangabonakaliyo abekek’ ityala?

[Inkcazelo]

Oil wells burning in Kuwait, 1991: Chamussy/Sipa Press

[Umfanekiso okwiphepha 7]

Hayi indlela eliya kuba mnandi ngayo ixesha laxa iidemon zingasabakhathazi abantu!