“Musani Ukubuyisela Ububi Ngobubi Nakubani Na”
“Musani ukubuyisela ububi ngobubi nakubani na. Yenzani okuhle emehlweni abantu bonke.”—ROMA 12:17.
1. Nguwuphi umkhwa oxhaphakileyo ebantwini?
NGOKUQHELEKILEYO xa umntwana etyhalwa ngomnye, naye udla ngokufuna ukuphindisa. Okubuhlungu kukuba, baninzi nabantu abadala abathanda ukuziphindezela xa boniwe. Yinyaniso ukuba, bona abatyhalani ngokoqobo, kodwa baziphindezela ngeendlela ezichuliweyo. Badla ngokusasaza intlebendwano ngalo mntu ubonileyo okanye bazame ukumwisa kwimigudu yakhe. Enoba bakwenza ngayiphi na indlela oko, injongo inye—kukuziphindezela.
2. (a) Kutheni amaKristu okwenyaniso ekuphepha ukuziphindezela? (b) Yiyiphi imibuzo nesahluko seBhayibhile esiza kusixubusha?
2 Nakuba umnqweno wokufuna ukuziphindezela wendele, amaKristu okwenyaniso ayakuphepha ukuziphindezela. Endaweni yokuziphindezela, azama ukuthobela esi siluleko sompostile uPawulos: “Musani ukubuyisela ububi ngobubi nakubani na.” (Roma 12:17) Yintoni eya kusinceda sikwazi ukuphila ngalo mgaqo? Ngubani ngokukhethekileyo esimele singabuyiseli ububi ngobubi kuye? Uya kuba yintoni umvuzo wokungaziphindezeli? Ukuze siphendule le mibuzo, makhe siqwalasele umongo wamazwi kaPawulos size sibone indlela eyabaseRoma isahluko 12 ebonisa ngayo ukuba ukungaziphindezeli kuyinto efanelekileyo, eluthando nekhondo lokuthozama esimele silixelise. Siza kuxubusha ngenkalo nganye kwezi zintathu.
“Ngenxa Yoko Ndiyanibongoza”
3, 4. (a) Yintoni axubusha ngayo uPawulos ekuqaleni kweyabaseRoma isahluko 12, ibe yintoni ebethelelwa kukusebenzisa kwakhe ibinzana elithi “ngenxa yoko”? (b) Iimfesane zikaThixo zazimele zibe nawuphi umphumo kumaKristu aseRoma?
3 Sivula nje isahluko 12, uPawulos uthetha ngezinto ezine eziphathelele ubomi bomKristu. Uthetha ngolwalamano esinalo noYehova, namanye amaKristu, nabo bangengomaKristu nabasemagunyeni. UPawulos ubonisa isizathu esibalulekileyo sokuxhathisa iminqweno ephosakeleyo, kuquka ukuziphindezela, ngokuthi: “Ngenxa yoko ndiyanibongoza ngeemfesane zikaThixo, bazalwana.” (Roma 12:1) Phawula ibinzana elithi “ngenxa yoko,” elithetha ukuthi “ngokuphathelele lo mbandela.” Enyanisweni uPawulos uthi, ‘Ngokuphathelele oku ndigqiba kukuthetha, ndiyanibongoza ukuba nenze oko ndiza kunixelela kona.’ UPawulos wayewaxelele ntoni amaKristu aseRoma?
4 Kwizahluko ezili-11 zokuqala kule ncwadi yakhe, uPawulos waxubusha ngelungelo elimangalisayo elanikwa amaYuda nabeeNtlanga lokuba babe ngabalawuli noKristu kuBukumkani bukaThixo, ithemba elingazange lamkelwe ngamaSirayeli okwemvelo. (Roma 11:13-36) Elo lungelo likhethekileyo labakho kuphela ngenxa ‘yeemfesane zikaThixo.’ AmaKristu ayemele asabele njani kobo bubele bungako bungawafanelanga bukaThixo? Ayemele abe nombulelo ongazenzisiyo aze enze oko walandelisa ngako uPawulos esithi: “Niyinikele imizimba yenu ibe yimibingelelo ephilayo, engcwele, eyamkelekileyo kuThixo, inkonzo ke leyo engcwele ngokwamandla enu engqiqo.” (Roma 12:1) Ayemele enze ntoni kanye loo maKristu ukuze azinikele abe “yimibingelelo” kuThixo?
5. (a) Umntu unokuzinikela njani ‘abe ngumbingelelo’ kuThixo? (b) Nguwuphi umgaqo omele ulawule indlela aziphatha ngayo amaKristu?
5 UPawulos uhlabela mgama athi: “Musani ukumilisa okwale nkqubo yezinto, kodwa guqukani ngokutshintsha ingqondo yenu, ukuze nikungqine ngokwenu ukulunga nokwamkeleka nokugqibelela kokuthanda kukaThixo.” (Roma 12:2) Kunokuvumela umoya wehlabathi ulawule iingcinga zawo, ayemele atshintshe iingqondo zawo zivumelane noKristu. (1 Korinte 2:16; Filipi 2:5) Loo mgaqo wawumele ulawule indlela aziphatha ngayo amaKristu okwenyaniso mihla le, kuquka nathi namhlanje.
6. Ngokuvisisana namazwi kaPawulos kweyabaseRoma 12:1, 2, yintoni ebangela sikuphephe ukuziphindezela?
6 Thina singenelwa njani yindlela aqiqa ngayo uPawulos kweyabaseRoma 12:1, 2? Njengaloo maKristu aseRoma athanjiswe ngomoya, nathi sinombulelo ongazenzisiyo ngokuqhubeka kukaThixo ebonisa imfesane kuthi ngoxa esipha ubomi mihla le. Ngenxa yombulelo esinawo sikhonza uThixo ngamandla ethu onke, ngako konke esinako kungakhathaliseki iimeko esikuzo. Lo mnqweno wenza sikuphephe ngokupheleleyo ukucinga njengehlabathi, kodwa sicinge njengoKristu. Ukuba nengqondo kaKristu kuba negalelo kwindlela esiphatha ngayo abanye—amaKristu nabo bangengawo. (Galati 5:25) Ngokomzekelo: Ukuba sicinga njengoKristu, kunyanzelekile ukuba sikuphephe ukuziphindezela.—1 Petros 2:21-23.
“Uthando Lwenu Malungabi Naluhanahaniso”
7. Luluphi uthando ekuthethwa ngalo kweyabaseRoma isahluko 12?
7 Siyakuphepha ukubuyisela ububi ngobubi kungekuphela nje kuba kuyinto efanelekileyo ukwenjenjalo kodwa nangenxa yokuba kukubonisa uthando ukungaziphindezeli. Phawula indlela umpostile uPawulos akuchaza ngayo oko kwenziwa luthando. Kwincwadi yabaseRoma, uPawulos usebenzisa igama elithi “uthando” (a·gaʹpe ngesiGrike) izihlandlo eziliqela xa ethetha ngothando lukaThixo nolo lukaKristu. (Roma 5:5, 8; 8:35, 39) Noko ke, kwisahluko 12, uPawulos usebenzisa olu hlobo lothando ngendlela eyahlukileyo—xa ethetha ngothando oluboniswa ngumntu kwabanye. Emva kokuchaza ukuba izipho zokomoya azifani yaye ziphiwe amaKristu athile, uPawulos uchaza uphawu olumele luhlakulelwe ngawo onke amaKristu. Uthi: “Uthando lwenu malungabi naluhanahaniso.” (Roma 12:4-9) Ukuthanda abanye lolona phawu lwahlula amaKristu enyaniso. (Marko 12:28-31) UPawulos ubongoza thina maKristu ukuba siqinisekise ukuba uthando lwethu lunyanisekile.
8. Sinokulubonisa njani uthando olungenaluhanahaniso?
8 Ukongezelela, uPawulos uchaza indlela oluboniswa ngayo uthando olungenaluhanahaniso, esithi: “Kwenyanyeni oko kungendawo, namathelani koko kulungileyo.” (Roma 12:9) ‘Ukwenyanya’ ‘nokunamathela’ ngamagama aqatha. ‘Ukwenyanya’ kunokuguqulelwa ngokuthi “ukuyithiy’ egazini into.” Simele sithiye kungekuphela nje imiphumo yoko kubi kodwa sithiye ububi ngokwabo. (INdumiso 97:10) Igama elithi “namathelani” liguqulelwe kwisenzi segama lesiGrike ngokoqobo elithetha “ukuncamathelisa.” Xa umKristu enothando lokwenene uncamathela ngokupheleleyo, kubulungisa de bube bubuntu bakhe.
9. Sisiphi isibongozo esenziwa ngokuphindaphindiweyo nguPawulos?
9 Enye indlela yokubonisa uthando ichazwa ngokuphindaphindiweyo nguPawulos. Uthi: “Qhubekani nibasikelela abo batshutshisayo; sikelelani, ningaqalekisi.” “Musani ukubuyisela ububi ngobubi nakubani na.” “Musani ukuziphindezelela, zintanda.” “Musa ukuzivumela woyiswe bububi, kodwa hlala uboyisa ububi ngokulungileyo.” (Roma 12:14, 17-19, 21) La mazwi kaPawulos ayichaza ngokucacileyo indlela esimele sibaphathe ngayo abo bangengomaKristu, kwanabo basichasayo.
“Qhubekani Nibasikelela Abo Batshutshisayo”
10. Sinokubasikelela njani abo basitshutshisayo?
10 Singasithobela njani esi sibongozo sikaPawulos: “Qhubekani nibasikelela abo batshutshisayo; sikelelani”? (Roma 12:14) UYesu wathi kubalandeli bakhe: “Qhubekani nizithanda iintshaba zenu, nibathandazele abo banitshutshisayo.” (Mateyu 5:44; Luka 6:27, 28) Ngoko, enye indlela esisikelela ngayo abo basitshutshisayo kukubathandazela, sicele uThixo ancede avule amehlo akhe nabani na ositshutshisa ngenxa yokungazi ukuze abone inyaniso. (2 Korinte 4:4) Yinyaniso ukuba isenokuba ngumnqa into yokucela uThixo asikelele umntu ositshutshisayo. Noko ke, okukhona sicinga njengoKristu, kokukhona siya kukwazi ukuthanda neentshaba zethu. (Luka 23:34) Inokuba yintoni imiphumo yokuthanda neentshaba zethu?
11. (a) Yintoni esinokuyifunda kumzekelo kaStefano? (b) Njengokuba umzekelo kaPawulos ubonisa, yintoni enokwenza abanye abatshutshisi batshintshe?
11 UStefano ngomnye owathandazela abatshutshisi bakhe, ibe umthandazo wakhe waviwa. Kungekudala emva kwePentekoste yowama-33 C.E., uStefano wabanjwa wavalelwa ngabachasi bebandla lamaKristu, warhuqelwa ngaphandle kweYerusalem waza waxulutywa ngamatye. Ngaphambi kokuba afe, wamemeza wathi: “Yehova, musa ukusibalela kubo esi sono.” (IZenzo 7:58–8:1) Enye yamadoda awayewathandazela loo mini nguSawule, owayebukele yaye ekholiswa kukubulawa kukaStefano. Kamva, uYesu ovusiweyo wabonakala kuSawule. Lo wayesakuba ngumtshutshisi waba ngumlandeli kaKristu waza wangumpostile uPawulos, umbhali wencwadi yabaseRoma. (IZenzo 26:12-18) Ngokuvisisana nomthandazo kaStefano, kuyabonakala ukuba uYehova wamxolela uPawulos ngeso sono sokuba ngumtshutshisi. (1 Timoti 1:12-16) Siyaqondakala isizathu sokuba uPawulos abongoze amaKristu athi: “Qhubekani nibasikelela abo batshutshisayo.” Wayesazi ukuba ekugqibeleni abanye abatshutshisi basenokuba ngabakhonzi bakaThixo kanye njengaye. Namhlanje, bambi ababengabatshutshisi baye bangamaKristu ngenxa yokuba noxolo kwabakhonzi bakaYehova.
‘Yibani Noxolo Nabantu Bonke’
12. Isiluleko esikweyabaseRoma isahluko 12:17 sidibana njani namazwi akwindinyana yesi-9?
12 Ngoku uPawulos usiluleka ngendlela esimele siphathe ngayo amanye amaKristu nabo bangengawo, uthi: “Musani ukubuyisela ububi ngobubi nakubani na.” Loo mazwi uwathetha ngenxa yoko aye wakutsho ngaphambili, esithi: “Kwenyanyeni oko kungendawo.” Eneneni ke, umntu ebenokutsho njani ukuba uyakwenyanya oko kungendawo, okanye ububi, xa eza kwenza kwaokubi ukuze aziphindezele kwabanye? Oko bekuya kungqubana nokuba nothando “olungenaluhanahaniso.” Emva koko uPawulos uthi: “Yenzani okuhle emehlweni abantu bonke.” (Roma 12:9, 17) Siwathobela njani loo mazwi?
13. Ziziphi iindlela esiziphatha ngazo “emehlweni abantu bonke”?
13 Ngaphambilana, kwincwadi awayibhalela abaseKorinte, uPawulos wathetha ngentshutshiso ababejamelene nayo abapostile. Wathi: “Siye saba ngumboniso wokubonelwa lihlabathi, naziingelosi, nangabantu. . . . Xa sitshabhiswa, siyasikelela; xa sitshutshiswa, siyanyamezela; xa sinyeliswa, siyabongoza.” (1 Korinte 4:9-13) Ngokufanayo, namhlanje amaKristu okwenyaniso abekwe esweni ngabantu beli hlabathi. Xa bebona izinto ezilungileyo esizenzayo ngoxa siphathwa kakubi ngokungekho sesikweni, oko kunokubenza basabele kakuhle kwisigidimi sethu sobuKristu.—1 Petros 2:12.
14. Simele sikuzabalazele ukusa kuwuphi umkhamo ukwenza uxolo?
14 Noko ke, simele sikuzabalazele ukusa kuwuphi umkhamo ukwenza uxolo? Simele senze konke okusemandleni ethu. UPawulos uthi kubazalwana bakhe abangamaKristu: “Ukuba kunokwenzeka, zamani ngokusemandleni enu, ukuba noxolo nabantu bonke.” (Roma 12:18) Ibinzana elithi “ukuba kunokwenzeka” nelithi “zamani ngokusemandleni enu” ngamabinzana aphelelisanayo abonisa ukuba ukwenza uxolo nabanye akunakusoloko kulula. Ngokomzekelo, asiyi kutyeshela umthetho kaThixo kuba sifuna ukuba seluxolweni nabantu. (Mateyu 10:34-36; Hebhere 12:14) Nakuba kunjalo, senza konke okusemandleni ethu—ngaphandle kokulalanisa kwimigaqo yobulungisa—ukuze sakhe uxolo ‘nabantu bonke.’
“Musani Ukuziphindezelela”
15. Sisiphi isizathu sokungaziphindezeli esikweyabaseRoma 12:19?
15 UPawulos uchaza esinye isizathu esisinyanzelayo ukuba singaziphindezeli; esilikhondo lokuthozama esimele sililandele. Uthi: “Musani ukuziphindezelela, zintanda, kodwa yikhweleleni ingqumbo; kuba kubhaliwe kwathiwa: ‘Impindezelo yeyam; kuya kubuyekeza mna, utsho uYehova.’” (Roma 12:19) UmKristu ozama ukuziphindezela ukhukhumele. Uthabathela kuye indima kaThixo. (Mateyu 7:1) Enye into, xa eziphindezela ubonisa ukungabi nalukholo kwisiqinisekiso sikaYehova esithi: “Kuya kubuyekeza mna.” Noko ke, wona amaKristu okwenyaniso anentembelo yokuba uYehova uya ‘kubangela ukuba okusesikweni kwenziwe kwabo banyuliweyo bakhe.’ (Luka 18:7, 8; 2 Tesalonika 1:6-8) Ngokuthozama amaKristu okwenyaniso ayekela kuThixo ibe nguye ophindezela ububi.—Yeremiya 30:23, 24; Roma 1:18.
16, 17. (a) Kuthetha ukuthini ‘ukufumba amalahle omlilo phezu kwentloko’ yomntu? (b) Ngaba wena wakha wambona umntu ongengomKristu ethamba ngenxa yobubele? Ukuba kunjalo, chaza umzekelo.
16 Ukuziphindezela kutshaba kusenokuyenza lukhuni intliziyo yalo, kodwa ukuliphatha ngobubele kusenokuyithambisa. Sitsho njani? Phawula amazwi kaPawulos kumaKristu aseRoma. Uthi: “Ukuba utshaba lwakho lulambile, luphe ukutya; ukuba lunxaniwe, lunike into yokusela; kuba ngokwenza oku woba ufumba amalahle omlilo phezu kwentloko yalo.” (Roma 12:20; IMizekeliso 25:21, 22) Kuthetha ukuthini oku?
17 ‘Ukufumba amalahle omlilo phezu kwentloko yalo’ sisafobe esivela kwinkqubo yokunyibilikisa isinyithi eyayisetyenziswa ngamaxesha okubhalwa kweBhayibhile. Kwakufakwa isinyithi ezikweni, ngaphantsi nangaphezulu kwaso kufakwe amalahle. Loo malahle angaphezulu ayesiba shushu kangangokuba nentsimbi elukhuni yayinyibilika butsho buphume bonke ubumdaka. Ngokufanayo, ngokuba nobubele kulowo uchasayo, ‘sisenokumnyibilikisa’ athambe kutsho kuvele iimpawu zakhe ezintle. (2 Kumkani 6:14-23) Enyanisweni, baliqela kwibandla lamaKristu namhlanje abatsalwa bububele ababenzelwa ngabakhonzi bakaYehova.
Isizathu Sokuba Singaziphindezeli
18. Kutheni kuyinto efanelekileyo, eyothando nokuthozama ukungaziphindezeli?
18 Kule ngxubusho imfutshane yabaseRoma isahluko 12, siye sabona izizathu ezibalulekileyo eziliqela zokuba ‘singabuyiseli ububi ngobubi kuye nabani na.’ Esokuqala, ukungaziphindezeli likhondo elifanelekileyo esimele sihambe ngalo. Ngenxa yemfesane eboniswe kuthi nguThixo, kufanelekile yaye kusengqinqweni ukuba sizinikele kuYehova size ngokuzithandela sithobele imithetho yakhe—kuquka lowo wokuthanda iintshaba zethu. Esesibini, ukwala ukubuyisela ububi ngobubi likhondo lothando esimele sihambe ngalo. Xa siphepha ukuziphindezela size sakhe uxolo, siba nethemba lokuba siya kunceda nabona bachasi boyikekayo babe ngabakhonzi bakaYehova. Esesithathu, ukuphepha ukuphindezela ububi ngobubi likhondo lokuthozama esimele sihambe ngalo. Ukuziphindezela bekuya kuthetha ukuba sikhukhumele, kuba uYehova uthi: “Impindezelo yeyam.” ILizwi likaThixo liphinda lisilumkise lithi: “Kufikile na ukukhukhumala? Ngoko ihlazo liyeza; kodwa bunabathozamileyo ubulumko.” (IMizekeliso 11:2) Xa ngobulumko siyekela impindezelo kuThixo xa sisoniwa sibonisa ukuba sithozamile.
19. Yintoni esiza kuyixubusha kwinqaku elilandelayo?
19 UPawulos uqukumbela le ngxubusho yakhe yendlela esimele sibaphathe ngayo abanye. Ubongoza amaKristu athi: “Musa ukuzivumela woyiswe bububi, kodwa hlala uboyisa ububi ngokulungileyo.” (Roma 12:21) Yiyiphi imimoya yobungendawo esijamelene nayo namhlanje? Sinokuyoyisa njani? Iimpendulo zale mibuzo ziza kuxutyushwa kwinqaku elilandelayo.
Ungachaza Na?
• KweyabaseRoma isahluko 12, sisiphi isiluleko esiphindaphindwayo?
• Yintoni eya kusinceda singaziphindezeli?
• Ziziphi iingenelo esiya kuzifumana thina nabanye xa ‘singabuyiseli ububi ngobubi’?
[Ibhokisi ekwiphepha 22]
EyabaseRoma isahluko 12 ichaza ulwalamano lwamaKristu ngale ndlela:
• uYehova
• amanye amaKristu
• abo bangengomaKristu
[Umfanekiso okwiphepha 23]
Incwadi kaPawulos eyayisiya kwabaseRoma inceda amaKristu afumane isiluleko esifanelekileyo
[Umfanekiso okwiphepha 25]
Yintoni esinokuyifunda kumzekelo womfundi uStefano?